Read Isu Tway dè fyi 1 Bible Online

Tway dè fyi 1 - Isu bible

Tway dè fyi 1

¹Ŋwàʼà kə kwu ayiə yə Yesù Kə̀litò kə dê nəniy awò Dzwan. Zə̀kìy kə zəŋi tsə nə̀ Yesù kòʼ àyiə aghè yə̀ ani zəŋi tsə tə̀ aghee kəfàʼ ə we yiy kəli tsə ayiə yə a kî fyiə nəniy anə fəkə̀mə̀. Yesù ə twum tsə tsə̀ndii ə̀ Kə̀zə̀ nə̀ ì zù dzày yə̀ ntwum yə awò Dzwan, wè kə̀fàʼ ə̀ we.

²Dzwan mə dzày mà àyiə yə àdzə̀m ù kə kôʼ nəniy. À yù də̀ ayiə ghè yə̀ ù twà dzày bə̂ nəniy kwùmə̀ yə̀ nə̀ ntwum yə ì ŋwò bə̂ nəniy â Zə̀kìy nə̀ àyiə àsoŋə̀ yə̀ Yesù Kə̀litò kə dê bə̂ â we.

³Zə̀kìy kî nyiə̀ kə̀lwì awò àghù yə̀ à dzə̀m ghu tyoŋə dzîy nəniy ntwùm ə̀ Kə̀zə̀ awò àghè àliy. Ù kì nyiə̀ sòʼò kə̀lwì awò àghù yə̀ ghu kî zəŋə nəniy ayiə yə ntwùm ə̀ ìghè yə̀ dzìy nəniy aŋwòə soŋə fə ghè fə̀ mə swəd awò Zə̀kìy ani zəŋi nə̀ ayiə yə̀ fyi.

⁴Ŋwàʼà kə̀ à twà bə̀ mìə̀, Dzwan. Mə twâ bə̀ awò àghě ndaw tə udzəŋə tə ìsèmbe tə də nəniy a mbwòʼ ə̀ Esìyà. Mə gwùŋə̀ nə̀ Zə̀kìy nyiə̀ ghà nə̀ ìliə yiy nə̀ ìbvay yiy. Ù də̌ wù wə̀ ù muə nəniy, də̀ sòʼo wù wə̀ ù kə muə nəniy, də̀ sòʼo wù wə̀ ù nə̀ muə nəniy anə nsòŋi ndzə̀m. Mə gwùŋə̀ sòʼò nə̀ ùzwày ù zwe wə u də nəniy akə̀lə̀ ndàŋə̀ kə̀dòŋ, u nyiə̀ ghà nə̀ ìliə yiy nə̀ ìbvay yiy.

⁵Yesù Kə̀litò toŋə wù wə̀ ù dè nəniy iyiə yə i də nəniy ìsoŋə̀ yìy kwùmə̀ yə̀ nə̀ Zə̀kìy nə̀ fòŋə̀ we idzə̀m, à kə də̌ we wù səsə ani zɛ̀mə̀ ŋwò dzwoŋi bə̀ anə ipfə. Ù də̀ sòʼo wù wə̀ ù saʼa nəniy ùdòŋ ù dzə̀m fə anə mbyi. Kə̀litò kə liə ŋwô ŋgaŋ. Ù kə sà nyiə̀ yə̀ kàŋ tə we ani bii fyi kə ŋgaŋ anə daʼa kə bɛb tə ŋgàŋ tìy kə kwu nəniy azoŋə̀ ŋgàŋ.

⁶Bòʼ àyiə ghè yə̀, ù mə zəŋi nə̀ ŋgà doʼò tsə inaʼ i ghè àlwaʼa yiy ani fàʼ fàʼ kə Zə̀kə̀ kə də nəniy Tè we. Ŋkwiʼi miy doʼò anə izəd i Yesù Kə̀litò nə̀ daʼa kə̀soŋə̀ kìy anə nsòŋə indzə̀m, I doʼò kə ghii.

⁷Ghà zuw nənìy! Ù kì bè anə təmbàʼ. Aghê àdzə̀m kî kòʼò ŋwòə we nə̀ àghù yə̀ ghu kə tsuk wiy nəniy we nə̀ ìwuŋ yiy anə kàʼ fə təzəd. Aghê dzə̀m an-a-mbvə̀dintsə ni ŋge mwe bòʼ we. Ìsoŋə̀ ìsoŋə̀ yìy, à də̌ ghii ayiə ghè yə̀ nì dyòʼò nəniy. À də̀ kə ghii.

⁸Mwe ə̀ mbyi Zə̀kə̀ kə kwu nəniy udaʼa udzə̀m fə anə mbyi dzîy nə̀, “À də̀ miə mə zəŋi nəniy nə̀ ufyiə udzə̀m wìy kaʼ tsə, à də̀ sòʼò miə, mə zəŋə nəniy nə̀ ufyiə udzə̀m wìy mây. Mə kə də̀ ŋwô ani kaʼ bə̀, mə də ŋwô nyiə, mə kî nam də̀ ŋwô anə nsòŋi ndzə̀m.”

⁹Mə də Dzwan, àzə̀ ghii. Mə kə fàʼà fwumə tsə̀ fàʼ kə Kə̀litò nə̀ ghà. Yəə mə bɛmə nəniy awò Kə̀litò, mə də fwumi sòʼo nə̀ ghà anə aghù yə̀ Zə̀kìy saʼa nəniy mùə̀ tə ghu tiy. Mə də sòʼo nə̀ ghà ani kwù tə̀fòŋ anə ifii yə ŋgà fyaʼa nəniy ate. Ŋgà ma ŋge kwù fôŋ tìy anə ifii yə ŋgà kə fyaʼa nəniy bòʼ Yesù, dòŋ kə ŋgàŋ. Ghu kə zù na yə̀ mìə̀ anə lòʼo kə dzwì dzɛmə̀ na tsîy nəniy ghu tyoŋə nə̀ à də Patmòs bòʼ àyiə yə mə kə naʼà nəniy ntwùm ə̀ Kə̀zə̀, nə̀ àyiə àsoŋə̀ yə̀ Yesù kə dê nəniy awò mìə̀.

¹⁰Anə ntsuk fə̀ fwulə fə Mwe ə̀ mbyi fiy, Zwày k-a-zə̀ kìy bù azoŋə̀ mìə̀, mə zuw dzə̀ ìlìy yìy i foŋə nəniy a dzəmə̀ mìə̀ yəə ghu nə̀ twuŋə isoŋ yiy.

¹¹Dzə̀ ìghè yə̀ ə dzày tsə awò mìə̀ nə̀, “Twà tsə ayiə yə wò kòʼò nəniy an-a-ŋwàʼà wò twum yə̂ awò dzəŋə kə aghě Kəzə̀ yə̀ ghu də nəniy a Efesùs, nə̀ a Smilnà, nə̀ Pelgamùm, nə̀ a Tìlàtilà, nə̀ a Sadìs, nə̀ a Fìlàdefìyà, nə̀ a Làwdesìyà.”

¹²Mə kyɛ̀mì tsìy yə̀ nə̀ mə kôʼ wù wə̀ ù dzə̀ŋə̀ bə̂ nə̀ mìə̀. Yəə mə kyemì tsîy yə̂ nəniy, mə fə̀d kòʼ yə̀ fyiə kə ghu tyimə nia nəniy kaʼì tìy ate ùsèmbe ghu zwubì nəniy anə ufyiə ùtsə ùsoŋə̀ wə̀ ghu tyoŋə nəniy nə̀ à də̀ gôl, nə̀ ghu mə təmi na kaʼì tìy ate.

¹³Wè lìy kə də̀ awote anə uzə fyiə kə ghu tyimə nia nəniy kaʼì tìy ate, u fwunə nəniy Wà Wù. U dzə̀ŋì kəli sàŋ i kwùmə̀ tswi yə̂ nəniy we anə təkyoŋi, u wab kəli kə sòʼò bə̀d k-a-fyiə kə̀ mwaa kiy anə ikiykiy i we, ghu kə zəŋi nəniy anə ufyiə ùtsə ùsoŋə̀ wə̀ ghu tyoŋə nəniy nə̀ à də̀ gôl.

¹⁴Ŋwû t-a-tuw tə we tiy kə fə̀mə̀ buŋə buŋə. Asə ə we yiy kə bàŋə̀ ŋkàŋ yəə à də̀ nɛm kə uvə̀lə̀.

¹⁵Awee we yiy kə mwà yəə à də̀ fyiə kə̀tsəə kə ghu ŋwôʼ nəniy anə intsə. Dzə̀ we anə idzwə kə foŋə yəə dzwì nì tyà tswi nəniy.

¹⁶Ù kə kwi kəli mənsǐbə̂d ìnsèmbe anə wokə we kə̀ nyiə̀ kiy. Kwàb ə̀ tsam yə ì twabə nəniy anə ubə̀d ùdzə̀m, kə fyiə bə̀ anə idzwə i we. Utwûmusə u we wiy mwà sòʼò yəə à də̌ tsə̀ yə̀ ì tuu nəniy nə̀ daʼa kiy nə̀ fòŋə̀ ntsə̀.

¹⁷Abù mə kôʼ yə̂ nəniy we, ifwe yam yiy səli nyi yə̀, mə bvə̀ tswi tsə a təŋə ifwe i we yəə Mə mə pfə, ù bù gaʼ tsə wo kə we kə̀ nyiə kiy azoŋə̀ mìə̀, dzày tsə â mìə̀ nə̀, “Kə̀ tsəŋ dzə̀, à də̀ miə mə zəŋi nəniy nə̀ ufyiə udzə̀m kaʼ tsə, à də̀ sòʼò miə, mə zəŋə nəniy nə̀ ufyiə udzə̀m u mây.”

¹⁸Mə də wù wə̀ mə muə nəniy. Mə maa pfə, a kwuni bû nyiə, mə də utaw, mə nî kàm pfə kòʼ sòʼò wày. Mə kwu kədaʼa azoŋə̀ ìpfə yiy, mə kwu sòʼò ŋwô daʼa kiy azoŋə̀ ìnaʼ i pfə.

¹⁹Wò kwu ani twà tsə ayiə yə wò kòʼ nəniy. Àyu a fyiə nəniy nyiə̀ nə̀ àyu a nî wòə̀ fyiə nəniy.

²⁰Mə kî tyi dè bə̀ ŋwò ìmyiŋì yə̀ nsǐbələ̀ mə̀ ìnsèmbe dê bə̂ nəniy nə̀ ùfyiə wə ghu tyimə nia nəniy kaʼì tìy ate ùsèmbe. Nsǐbə̂d mə̀ ìn sèmbe à də̌ tsə̀təndii t-a-zə̀ anə ndaw tə udzəŋə tə ìsèmbe. Ufyiə ù tyimə nia u tə kaʼì wə̀ ùsèmbe, à də̌ ndaw tə udzəŋə tə ghè tə̀ ìsèmbe.