Read Isu Tway dè fyi 10 Bible Online

Tway dè fyi 10 - Isu bible

Tway dè fyi 10

¹Udzɛmə ùliy wiy kə bù fwuli miə, mə kòʼ yə̀ tsə̀ndii ə̀ Kə̀zə̀ ìsòŋə̀ yìy, i fyi bə̂ an-a-byiwuŋ. A də̌ nə̀ mbàʼ tìy mə dzɛ̀mì na tsìy yə̌ we yəə à də̀ təndzwu. Kə̀imyimyiə kiy dzɛ̀mə̀ na tsìy kə sòʼò tuw kə we. Utwùmusə u we wiy mwà yəə à də̌ tsə̀, ifwe i we yiy də̀ yəə à də̀ nɛm kə uvə̀lə̀.

²U kwu nyòŋə f-a-ŋwàʼà anə awo we nə̀ ŋwàʼà kə ghè kə̀ mə fwiy dòʼò fyi yə̀. U gaʼ na nyi yə̀ ùfwe u we ùnyiə wiy anə dzwì ìnè yìy, gaʼ na tsə ufwe uwe ùkwə̂ wìy anə iŋgwùŋə.

³U bwoʼ fyi bə̀ kə̀bòŋ idoŋ, dzə̀ ì ghè yə̌ kwùə̀ yə̀ yəə dzə̀ kə̀nyàkhìy. Yəə ù bwoʼ tsə nəniy bôŋ kə̀ ghii, iwe yiy bə̀lì nsòŋə insèmbe an-a-byiwuŋ, dzìy fyiə bə̀ àyiə mə zuw kyilə yə̀.

⁴Abù yəə iwe yə̀ mày tsə nəniy, mə liə ani twà na tsə ayiə yə iwe yə̀ kə dzîy nəniy, mə kwuni zuw dzə̀ ìlìy yìy an-a-vələ ì dzìy nəniy awò mìə̀ nə̀, “Nǔ na ayiə yə iwe yə̀ dzày nəniy! Kə̀ twâ na dzə̀ ayiə ghè yə̀.”

⁵Tsə̀ndii yə mə kə kôʼ nəniy, ì gaʼ na nyi yə̂ wu kiy anə dzwî, kə̀li kiy də̀ anə iŋgwùŋə, u nìày fyi kwoʼ kə wo kə we kə̀nyiə kiy idoŋ.

⁶U kà yə̀ awò Zə̀kə̀ kə muə nəniy anə nsòŋi ndzə̀m, Zə̀kə̀ kə kə bwam nəniy byiwuŋ kiy nə̀ mbvə̀dintsə kiy nə̀ dzwì ìnè yìy nə̀ ufyiə wə u də nəniy ate ù dzə̀m. Tsə̀ndii ə Kə̀zə̀ yə̀ ə dzày tsə nə̀, “Zə̀kìy kî kàm dòʼò tsòŋì koŋə yə̀ dzə̀ wày nə̀ ù kə̀ zəŋi nəway ayiə yə ù kwu ani zəŋi.

⁷Ani bu tsə̀ndii ə̀ Kə̀zə̀ ani zəŋi yə̀ tsə̀təndii ìsèmbe twuŋ tsə nəniy isoŋ i we yiy, nùw tə ayiə tə Zə̀kìy byay na nəniy, tə ni bû fyi àsoŋə̀ yìy. I nî bvami bè fyiə kə anə ayiə Zə̀kìy kə dzǎy na nəniy awò àghě kəfàʼ a we yiy, tyoŋə àghě ntwùm ə̀ Kə̀zə̀.”

⁸Mə kàm zuw dzə̀ ì ghè yə̀ dzây tswi fəli bə̂ nəniy an-a-byiwuŋ awò mìə̀ nə̀, “Zǔ nǐy ŋwǒ kə ŋwàʼà kìy kə fwiy doʼò nəniy anə awo tsə̀ndii yə wuu kə we kə̀liy kiy təmi doʼò anə dzwî, kə̀ liy kiy tiy nəniy anə iŋgwùŋə.”

⁹Abù mə zû nəniy akə̀lə̀ tsə̀ndii yə ŋwàʼà kə̀ kə də nəniy anə awo we, mə dzày yə̀ nə̀ ù nyiə̀ bə̀ nyòŋə f-a-ŋwàʼà fə ghè fə̀ awò mìə̀. Tsə̀ndii yə dzày bə̀ awò mìə̀ nə̀, “Nǐy yə ŋwàʼà kə̀ wò fwu yə̂! Kə kî twabə yəə à də̀ təzuw anə idzwə yiə̀, kə ki kwuni ŋwiiy anə unìə̀ yiə̀.”

¹⁰Mə nìy yə̀ nyòŋə f-a-ŋwàʼà fə̀ anə awo tsə̀ndii yə fwu yə̀. Kə twabə anə idzwə yam yəə à də̀ təzuw. Yəə mə mîy yə̂ nəniy, kə kàm kaʼ ani ŋwìy anə uniə̀ wam.

¹¹Dzə̀ ìlìy yiy dyaŋi dzày bə̀ awò mìə̀ nə̀, “Wò kwu ani tsəŋə niʼa yə kə ayiə yə a kwu nəniy ani fyi kwùmə̀ yə̀ nə̀ ndə̀mə̀ àghù, kwùmə̀ yə̀ sòʼò nə̀ ndə̀mə̀ tə̀ nàʼà, kwùmə̀ yə sòʼò nə̀ àghě dzə̀ŋì tə tə nàʼà tìy, kwùmə̀ yə̀ sòʼò nə̀ ùdòŋ wìy.”