Read Isu Tway dè fyi 11 Bible Online

Tway dè fyi 11 - Isu bible

Tway dè fyi 11

¹Tsə̀ndii ə̀ Kə̀zə̀ ə nyə̀ bə̀ mìə̀ nə̀ mbàŋ ì də nəniy yəə à də̌ mbàŋ yə̀ ghu foʼò nəniy loʼo tiy ate. U dzày bə̀ awò mìə̀ nə̀, “Kə̀litò dzìy nə̀, ‘Zù a ndàw Kə̀zə̀, wò fôʼ tsə, wò fôʼ tsə soʼò tà kə̀ ghu sâ nyiə̀ nəniy ufyiə wiy ate awò Zə̀kìy, wò taŋ tsə soʼò àghù yə̀ ghu fwulə̀ nəniy Zə̀kìy awote.

²Kə̀ kwuni fòʼ dzə̀ bee kə ndàw Kə̀zə̀ kìy aŋwòə Zə̀kìy mə nyə̀ ŋwò awò àghù yə̀ ghu də wày aghee Dzû aŋwòə ghu kî kwu ani sàʼ inaʼ i zwe yə anə təndzoŋə mə̀vəm inkyàʼì nə̀ ndzoŋə tiy ibè.

³Mə kî twumə yə̀ àghè àbè ghu ki naʼà ntwum yam anə məntsukə kaam nə̀ mbwǎm mə̀ ntsukə miy imbè nə̀ ntsukə miy mə̀vəm in tyìfoŋ, nə̀ ghu mə dzə̀ŋì kəli usâʼ u təndzwu wə ghu zəŋi nəniy anə ŋwù təbyi ani dè tsə nə̀ ghu mwe ŋwò anə bɛb tə aghê zəŋə nəniy.’ ”

⁴Aghee ntwùm ə̀ Kə̀zə̀ yə̀ àbè ghu də ŋkàʼ mə̀ Olìf ìmbè nə̀ loʼo tə̀ tyimə nia u təkàʼì wìy ùbè u tiy nəniy anə sə kə Mwe ə̀ mbyi wə ù saʼa nəniy mbyi idzə̀m.

⁵Abu wè lìy dziy zəŋi iyiə ìbɛbə yiy azoŋə̀ àghě ntwùm ə̀ Kə̀zə̀ yə̀ àbè, uvələ wiy ki fyi bə̂ anə adzwə ghu u byɛbi màʼà we. I ghii dè tsə nə̀ abu à də kə ndiə, ù liə ani zəŋi ghu nə̀ ìyiə ìbɛbə ìliy yiy, ù kwu ani pfə.

⁶Zə̀kìy mə nyìə ghu nə̀ daʼa kiy ani bwi na iwe nə̀ i kə niə̀ dzə̀ anə sòŋə fə ghu nìʼà nəniy ntwùm ə̀ we ate. Zə̀kìy mə nyə̀ sòʼo ghu nə̀ daʼa kiy ani zəŋi tsə mwi mə̀ tə̀dzwì, nə̀ mwi mə̀ dzwì tə̀ nê tìy, ìm fə̀d kə təkâŋ. Ghu kwu sòʼò kə daʼa ani zəŋi tsə ndə̀mə̀ ntswə̀d mə̀ fyià mìy anə mbyi. Ghu də ŋwô ani zəŋi ayiə yə anə ndə̀mə̀ nsòŋə anə yiə yə ghu liə nəniy.

⁷Abu ghu naʼà mà tsə nəniy ntwùm ə̀ Kə̀zə̀, nyàm yə̀ ì muə nəniy anə ntswam k-a-bwòʼ, ì nî bù ŋwày nə̀ ghu, ì kì taw tsìy tsə ghu ì wiy màʼà tsə sòʼò ghu.

⁸Avəən ə ghu yiy ki nəŋì doʼò tsə anə dzəd anə inaʼ ìnê yə̀ ghu kə ba wiy nəniy Mwe ə̀ mbyi ə̀ ghu ate anə kàʼ fə təzəd. Aghê tyoŋə ìnaʼ i ghè yə̀ anə idzə̀ŋi amfən nə̀ à də̀ Sodòm moo ìnaʼi Idzìp ani dè tsə tsə̀e nə̀ aghee ghè yə̀ kə ŋge zəŋə àyiə àbɛbə yəə à də̀ aghû yə̀ ghu kə muə nəniy anə inaʼ i Sodòm nə̀ anə inaʼ i Idzìp.

⁹Aghê dzə̀m anə nàʼà tə̀ dzə̀m nə̀ anə sələ təndaw àdzə̀m, nə̀ anə dzə̀ŋì tə nàʼà tə̀ dzə̀m, aghû yə̀ ghu də nəniy aghê àbaŋə yiy nə̀ àləŋə yiy ni fwələ avəən ə ghè ntwùm ə̀ Kə̀zə̀ yə̀ anə məntsukə ìnti nə̀ boʼ kiy. Ghu twe soʼò nə̀ aghê kə nîy kələ dzə̀ ghu.

¹⁰Ani bu aghê bɛbə yə ghu muə nəniy anə mbyi kôʼ tsə nə̀ aghee ntwùm ə̀ Kə̀zə̀ yə̀ mə pfə, ghu ni dwiʼi, ghu zəŋi tsə soʼò ìnyi, ghu ni dzuu ufyiə wiy anə iwè ani dè yə̀ dwiʼi kə ghu kwu nəniy, ghu kî zəŋə ghii aŋwòə aghee ntwum yə àbè kə twum bə̀ ntswə̀d mə̀ fyià mìy, azoŋə̀ àghè àŋwunə yə ghu də nəniy fə anə mbyi.

¹¹Ani buu ntsukə miy kwuni tsîy tsə nəniy inti nə̀ boʼ kìy, Zə̀kìy ni zəŋi tsə nə̀ aghee ntwùm ə̀ Kə̀zə̀ yə̀ doʼò dzwoŋi bə̂ ùtaw. Aghû yə̀ ghu nî kòʼò nəniy ghu, itsəŋ yiy ni kwi ghu.

¹²Aghee ntwùm ə̀ Kə̀zə̀ yə̀ àbè, ghu zuw dzə̀ ìtâw ìlìy yìy ì dzə̀ŋə̀ tswi bə̂ nəniy an-a-byiwuŋ dzìy a ghu nə, “Ghà kwoʼ bə̂ fə̀.” Ghu dyaŋi ŋwò kwoʼ yə̀ anə təmbàʼ. Aghû yə̀ ghu kə bâ nəniy ghu, ghu ndòʼò kòʼò yə̀ ghu yəə ghu kwoʼo nəniy an-a-byiwuŋ.

¹³Anə sòŋə fə ghè fə̀, mbvə̀dintsə kiy səkì tsə nə̀ daʼa kiy bəlì dyaŋi. Kə byɛbi maʼà tsə bə̂d kə̀mòʼ anə ubə̀d ùvəm anə inaʼ i ghè yə̀. Aghee pfə təkaam isèmbe. Itsəŋi kwi aghê liy yə anə təfòŋ. Ghu nyə̀ sòʼò mə̀ŋkwiʼi â Zə̀kə̀ kə saʼa nəniy an-a-vələ, dzìy nə̀ ù mə dzwàb tsìy fyi.

¹⁴À kə yù də̌ fyàfyày kə iyiə ani zəŋi yə̀ àyiə àfyia yiy àbè. Ghà kwu ani kəli tsə nə̀ iyiə ìfyia yiy ani zəŋi yə̀ àyiə àfyia yiy àti, i nyiə̀ dzǐy fyi.

¹⁵Tsə̀ndii ani zəŋi yə̀ tsə̀təndii isèmbe kə twuŋ tsə isoŋ i we, mə zuw dzə̂ tìy bviʼi fyi kə nəniy mbòŋ mìy an-a-vələ nə̀, “Mwe ə̀ mbyi ə̀ ŋgàŋ, Kə̀zə̀, we nə̀ wù wə̀ Zə̀kìy sûw kyili na nə̀ ù dòʼò kə̀dòŋ, ghu də ŋwô nyiə̀ ani saʼ mbyi yə ìdzə̀m. Ghu kî saʼa mbyi yə anə nsòŋə indzə̀m.”

¹⁶Ŋgəd tə̀ soŋə̀ tə̀ iwu iwû nə̀ ŋgəd tiy ikyàʼì ghu kə doʼò tswi nəniy anə ndàŋ tə udòŋ tə ghu, ghu nyaʼa tswi tsə anə sə k-a-zə̀ fwoə tswi tsə ntwùmə̀sə mə̀ ghu, fwùlì tsə Kəzə̀.

¹⁷Ghu fwùlə̀ Kə̀zə̀ dzìy tsə nə̀, “A Mwe ə̀ mbyi, Kə̀zə̀, wò də̌ Zə̀kə̀ kə kwu nəniy daʼa kiy tsìy fyiə ufyiə udzə̀m. Wò də̌ wù wə̀ ù də nəniy nyiə, wò də̀ soʼò wù wə̀ ù kə də tsə nəniy, Ghè nyiə̀ zòŋə̀ kiə̀ aŋwòə wò mə təm nyi aghû yə̀ ghu ŋwunə nəniy wô anə daʼa kìə̀. Wò nyə̀ saʼa sòʼò àghě mbyi àdzə̀m.

¹⁸Yəə aghee mbyi yiy kə ŋə̂m kə nəniy nə̀ fòŋ tìy azoŋə̀ wò, à də̀ ighe wò ŋge ŋə̀mə̀ sòʼò nə̀ fòŋ azoŋə̀ ghu nyiə! Soŋə fyiə̀ fìy mə kpe ani saʼ aghê pfə yiy. Soŋə fyiə̀ fìy mə kpe sòʼò â wò ani namə fyi aghee kəfàʼ yiə̀, toŋə aghee ntwùm ə̀ Kə̀zə̀ nə̀ àghè liy yə̀ ghu kwu nəniy itsəŋi i Kə̀zə̀ yìy. Bəə ghu kə tsəbə koʼò kə ghu nə̀ ghu də aghè soŋə̀ yìy moo nə̀ ghu də ŋgwò mə̀ ghù, soŋə fiy mə kpe â wò ani namə ghu àdzə̀m. Soŋə fyiə̀ fìy mə kpe sòʼò â wò anə byɛbi màʼà àghù yə̀ ghu byɛbə myaʼà soʼò àghê liy yiy anə mbyi.”

¹⁹Mə dyaŋi kòʼ ndàw Kə̀zə̀ an-a-vələ ì fwiy tsə nəniy, mə kòʼ təta kə məŋkà awote a ndàw Kə̀zə̀. Iwe yiy mwà tsə, fə̀nə̀ yə̀, kwò ŋwò yə̀ sòʼò, mbvə̀dintsə kiy sə̀k tsə nə̀ daʼa kiy. Ntay mə̀ nè mǐy fyiə tswi bə̀ sòʼò idoŋ.