Read Isu Tway dè fyi 12 Bible Online

Tway dè fyi 12 - Isu bible

Tway dè fyi 12

¹Mə kə kòʼ kwab k-a-tsə̀e kə̀ soŋə̀ kə̀ liy kiy kə fyi nəniy an-a-byiwuŋ. Mə kòʼ yə̀ wìyəŋi ù lìy, ù dzə̀ŋì kəli nəniy ndzwu tiy tə mwâ yəə à də̀ inyi. Ndzoŋ ə də̀ a təŋə̀ àwee we. Ù kə dzə̀ŋì kəli ntyàŋì k-a-dòŋ anə kətuw, kə kwu mənsǐbələ̀ ìvəm nə̀ nsǐbələ̀ mìy ìmbè.

²Wìyəŋi ù ghè wə̀ kə boŋ dòʼò ŋwò nə̀ ù mə swəd dòʼò ani byi. Yəə à kə də nə̀ ù dzǐy byi, u bwoʼ fyi bə̀ kə̀bòŋ aŋwòə ù kə ŋge zuw ìfwabi.

³Tsə̀e ìlìy yǐy kàm fyi fwuli kə an-a-byiwuŋ. Mə kòʼ faŋkwoʼ kə zwə kə̀ baŋə kiy ì kwu nəniy utuw wiy ùsèmbe, kwu təndwuŋ ìvəm. Utuw ughè wə̀ ùsèmbe kwu ùntyàŋì u kədòŋ.

⁴Zwə yə nìy kə ukwe u we sè fyi tswi bə̀ kə̀m kə mənsǐbə̂d kə̀mòʼ anə kəbyiwuŋ anə ukə̀m u mənsǐbə̂d ùti màʼà yə̀ ambvə̀d. U zù təmi dòʼò yə̀ akə̀lə̀ wìyə̀ŋi wə ani kwumi fwu ŋwò wà we abu ù byi tsə nəniy.

⁵Wìyəŋi wə dyaŋi byi bə̀ wà ùŋəmə̀, wà ù ghè wə̀ kə kwu ani saʼ aghee mbyi àdzə̀m nə̀ daʼa kə kə kwoʼ kpe doʼò nəniy. Zə̀kìy bù fam ŋwò kə wà ùŋəmə̀ wə̀, zù nə̀ we akə̀lə̀ ndàŋə̀ kə̀dòŋ ə̀ we.

⁶Wìyəŋi ù ghè wə̀ ə tu zù a mbvə̀nə̀ kə̀sisi anə lòʼo kə Zə̀kìy kə byay na nəniy awò we ani zəŋi tsə nə̀ tsə̀təndii t-a-zə̀ tìy nə̀ də ani yɛ̀mì azoŋə̀ we awote anə məntsukə kaam nə̀ mbwàm mìy imbè nə̀ vəm mə̀ ntsukə miy ìntyìfoŋ.

⁷Tsam ə dyaŋi kaʼ tsə an-a-byiwuŋ. Tsə̀ndii ə̀ Kə̀zə̀, Maykèl nə̀ tsə̀təndii t-a-zə̀ tə̀liy tə kaʼ yə̀ ani ŋwày nə̀ zwə yə. Zwə yə nə̀ tsə̀təndii tə we tiy kaʼ yə̀ sòʼò ani ŋwày dzwoŋi Maykèl nə̀ tsə̀təndii t-a-zə̀ tə̀liy tə.

⁸Zwə yə̀ kə kə̀ kwuni təm nyi dzə̂ anə ŋgə̀d kə̀. Ghu kə̀ kâm bɛmə dzə̂ nə̀ zwə yə dòʼò an-a-byiwuŋ nə̀ tsə̀təndii tə we tiy.

⁹Maykèl nə̀ tsə̀təndii t-a-zə̀ tə̀liy tə, sè màʼà fyi yə̀ faŋkwoʼ kə zwə kə an-a-byiwuŋ. Zwə̀ ìghè yə̀ də̌ zwə̀ ìwîy yə̀ ghu twoŋə nəniy nə̀ à də̌ àmbvə̀ntsə, tyoŋə sòʼò nə̀ à də̀ Satàn. À də̌ we ù nɛbə kyabə tsə̂ nəniy aghû yìy anə mbyi idzə̀m. Ghu kə tyiŋə màʼà fyi tswi bə̀ we fə an-a-mbvə̀dintsə nə̀ tsə̀təndii tə we tiy.

¹⁰Mə dyaŋi zuw dzə̀ ìlìy yìy an-a-vələ ì dzìy nəniy anə dzə̂ ìtâw yìy nə̀, “Zə̀ kə ŋgàŋ kìy mə bii fyi aghee we yiy anə daʼa kə ù kwu nəniy. Ù saʼa àghè dzə̀m yəə à də̀ kədòŋ. Wù wə̀ Zə̀kìy sûw kyili na nəniy an-a-dòŋ, ù kwu kədaʼa ani saʼ aghê dzə̀m. Zə̀ kə ŋgàŋ kìy mə nìy màʼà fyi zwə yə ì də nəniy wù wə̀ ù bwìy kwi tsə̂ nəniy awizə̂ ə ŋgàŋ yə̀ ghu bɛmə nəniy awò Zə̀kìy nə̀ ntsukə tiy nə̀ ntsə̀ tiy anə sə k-a-zə̀, dzìy nə̀ ghu mə zəŋi bɛb anə sə k-a-zə̀, dzìy sòʼò nə̀ Zə̀kìy kwu ani nyiə̀ ghu nə̀ mfəm.

¹¹Awizə̂ ŋgàŋ yə̀ ghu kə bɛmə nəniy awò Yesù, ghu kə taw tsìy tsə Satàn aŋwòə ghu kə kə̀ bwi na kôʼ dzə̂ ani dzày àyiə awò àghù yìy kwùmə̀ yə̀ nə̀ Yesù. Ghu kə təm nyi sòʼò aŋwòə ghu kə gaʼ na fôŋ tə ghu azoŋə̀ ayiə yə wù wə̀ ù də nəniy yəə Wà ndzù kə zəŋi nəniy anə sòŋə fə ù kə pfə nəniy, sà nyìə̀ yə̀ kàŋ tə we. Aghee ghè kə bɛmə təŋ ŋwô ani pfə bòʼ àyiə àsoŋə̀ yə̀ ghu kə dzîy nəniy kwùmə̀ yə̀ nə̀ Yesù.

¹²I dê tsə nə̀, gha tsə̀təndii t-a-zə̀ tə̀ ghà də an-a-vələ, ghà kwu ani dyoʼo. Ayiə àfyia yiy kî kwuni fyiə ŋwò nə̀ ghà, gha yə ghà də kwu way Zə̀kìy, gha yə ghà muə nəniy a mbvə̀dintsə nə̀ anə dzwî aŋwòə àmbvə̂ntsə mə fyi tswi bə̀ akə̀lə̀ ghà. Fòŋə̀ we ŋge ŋə̀mə̀ ŋwò aŋwòə ù kwu ŋwô nə̀ ghe kwu kə kəmə̀ fə fəsoŋə anə zəŋi gha nə̀ ìyiə ìbɛbə yiy.”

¹³Yəə zwə yə̀ kə kôʼ tsə nəniy nə̀ ghu mə ighe sê màʼà fyi tswi a mbvə̀dintsə, u kaʼ yə̀ ani dzwùm wìyəŋi wə ù kə byi nəniy wà ùŋəmə̀ wə̀.

¹⁴Zə̀kìy kwuni nyə̀ tsə wìyəŋi wə nə̀ ghàw tə mbwòʼ ə̀ kə tə ntwum kə nê kìy nə̀ ù zəə zù ate anə mbvə̀nə̀ kə̀sisi anə lòʼo kə ghe kə byay na nəniy nə̀ ghu ki yɛmì ate azoŋə̀ we anə tə ŋə̀mə̀ ìti nə̀ boʼ kiy tə̀ kəə zwə nə̀ zè kwiy nəniy we.

¹⁵Zwə yə fə̀lì fyi bə̀ mwi anə idzwə in kuŋə bə̀ yəə à də̌ dzwì, kuŋə zè anə bə̀d kə̀ wìyəŋi wə kə də nəniy ate ani kwuŋi ŋwò nə̀ we.

¹⁶Mbvə̀dintsə kiy kwuni fày kə wìyəŋi wə anə ayiə yə kə wiy fyi yə̂ nəniy, swe ŋwò kə mwi mə zwə yə̀ kə fəlì fyi bə̂ nəniy anə idzwə i we.

¹⁷Iyiə yə zəŋi tsə fòŋ ə ŋə̀m kə zwə yə azoŋə̀ wìyəŋi wə. Àyu də̌ ighe ì kə kwi yə̂ nəniy ŋgə̀d kìy nə̀ àghù yə̀ ghu də nəniy yəə à də̀ awiwa wìyəŋi wə. Aghe ghè yə̀ də̀ aghû yə̀ ghu zuw nəniy lâŋ k-a-zə̀ kìy. Ghu dzîy soʼò nəniy ayiə yiy awò àghè liy yiy kwùmə̀ yə̀ nə̀ Yesù.

¹⁸Zwə yə təmi dòʼò yə̀ kə anə iŋgwùŋə i dzwî ìnè yə̀.