Read Isu Tway dè fyi 13 Bible Online

Tway dè fyi 13 - Isu bible

Tway dè fyi 13

¹Mə kə kòʼ nyàm ìlìy yìy ì fyi kwoʼ bə̂ nəniy anə dzwî ìnè yìy. I kwu tə nduŋ ìvəm nə̀ ùtuw wiy ùsèmbe. I dzə̀ŋì kəli ùntyàŋì u kədòŋ anə nduŋ tə ghè tə̀. Utuw u ghè wə̀ kə kwu azəd a nyaʼà nəniy Zə̀kìy.

²Nyàm yə̀ mə kə kôʼ nəniy ì kə fwunə̂ tsakabii, awee we nə̀ ùghə̀d uwù u we wiy də̀ yəə à də̌ nyàm yə̀ ghu twoŋə nə̀ à də̀ biyèl, idzwə i we yiy də̀ yəə à də̌ kənyàkhìy. Faŋkwoʼ kə zwə kə nyə̀ nyàm yə̀ nə̀ daʼa kiy kə ŋwô bə̂ nəniy anə ndàŋə̀ kə̀dòŋə̀ we. Ù nyə̀ sòʼò we nə̀ daʼa kə̀soŋə̀ kìy ani saʼ aghû.

³Tuw kə we kəmòʼ kìy kə kwu faŋkwoʼ kə ifoŋ Zə̀kìy kə kwe na nəniy, nyàm yə̌ dòʼò yə̀ anə ayiə pfə yiy. A kwuni də̌ nə̀ ifoŋ i ghè yə̀ mə zwum.Yəə i kə də nəniy ghii, adzwə zwum ndə̀mə̀ àghě mbyi anə nyàm yə̀. Ghu kaʼ yə̀ ani dzwùmì nyàm ìghè yə̀ dòʼò yə̀ sòʼò tsə̀təndii tə we.

⁴Aghee mbyi yə kaʼ yə̀ ani fwùlì zwə yə aŋwòə ì maa nyìə nyàm yə̀ nə̀ daʼa kiy ani saʼ aghû. Aghee mbyi yə fwùlə̀ sòʼò nyàm yə̀ dzìy tsə nə̀, “À kwu ndiə daʼa kiy yəə nyàm ə? À də̌ ndiə ani ŋwày nə̀ ìghe yiy ə?”

⁵Zə̀kìy na tsə nyàm yə̀ nə̀ ì dzày àyiə àkwoʼo uwè yìy, i nyàʼì sòʼò Kə̀zə̀. Zə̀kìy na tsə sòʼò nyàm ìghè yə̀ nə̀ ì dè daʼa kə ì kwu nəniy azoŋə̀ àghû yìy anə təndzoŋə mə̀vəm ìn kyàʼì nə̀ ndzoŋə tiy ibè.

⁶Nyàm yə̌ kaʼ yə ani nyàʼì Kə̀zə̀ nyàʼì sòʼò izəd i Kəzə̀, nyàʼà loʼo kə Zə̀kìy muə nəniy ate, nyàʼì sòʼò àghù yə̀ ghu muə nəniy awote an-a-byiwuŋ.

⁷Zə̀kìy na tsə nyàm yə̀ nə̀ ì ŋwày àghě Kəzə̀, ì taw tsìy tsə sòʼò ghu. Zə̀kìy na tə sòʼò ì ghe nə̀ ì kəli tsə kədaʼa ani saʼ aghee sələ təndaw àdzə̀m, nə̀ àghě nàʼà tə̀ dzə̀m, nə̀ àghě dzə̀ŋì tə nàʼà tə mbyi tə̀dzə̀m, aghê baŋə̀ yiy nə̀ àləŋə yiy.

⁸Ndə̀mə̀ àghù anə mbyi azəd ə ghu yiy kə də kə̀ twâ doʼò nəway anə ŋwàʼà kə itsà kə wù wə̀ ù kə də yəə Wà ndzù yə̀ ghu kə wiy nəniy, ghu kə fwùlə̀ nyàm yə̀. Ani nìy ŋwò bə̀ yəə mbyi kə kaʼ nəniy, wù wə̀ ù kə də yəə Wà ndzù kə twà na azəd ə ghù yə̀ ghu kî kyilə nəniy imùə̀ itsà yìy anə kəŋwàʼà.

⁹Wù wə̀ ù kwu nəniy utswuŋi wiy, u zuw.

¹⁰“Bəə à də nə̀ Zə̀kìy byay na nə̀ aghû yə̀ ghu dzwə nəniy nə̀ àghè àliy kwu ani kwi ŋwò ghu, ghu kî kwi ŋwò ŋwǒ ghu. Bəə à də nə̀ Zə̀kìy kə byay na nə̀ ghu kî wiy àghè àliy anə kwab, ghu kî wiy ŋwò àghee ghè yə̀ anə kwab.” Ì yû dè tsə nə̀ aghee Kəzə̀ yìy kwu ani kəli tsə ani kwi təfòŋ. Ghu kəli tsə soʼò ìbɛmə ìsoŋə̀ yìy anə ayiə Kəzə̀.

¹¹Mə kòʼ sòʼò nyàm ìlìy yìy ani zəŋi yə̀ tə̀ nyàm ìbè, ì ghè yə̀ kə kwuni fyi kwoʼ bə̀ ambvə̀dintsə. Ì kə kwu təndwuŋ ibè yəə à də̌ wà ndzù, i kwunə dzə̀ŋə̀ yəə à də̌ zwə.

¹²Nyàm ì ghè yə̌ kwu sòʼo ndzòʼò daʼa kə nyàm isəsə yə̀ kə kwu nəniy ani saʼ aghû yə̀ nyàm isəsə yə̀ kə kwu nəniy. I tyiŋi tsə aghû yə̀ ghu kə muə nəniy an-a-mbvə̀dintsə nə̀ ghu fwulì nyàm ìsəsə yə ì kə kwu nəniy wam kə ifoŋ kə kə kə zwum doʼò. Ifoŋ yə i kə zəŋi nəniy nə̀ nyàm yə̀ dòʼò bə̀ anə ayiə pfə yiy.

¹³Nyàmə̀ ìbàm yə̌ zəŋə tsə̂ mali tə yiə tə̀soŋə̀ tìy. I zəŋə tsə nə̀ uvələ wiy ŋwò tsə anə kəbyiwuŋ u bû an-a-mbvə̀dintsə nə̀ aghee koʼò yə̀ ŋwò.

¹⁴Zə̀kìy zəŋi tsə nə̀ nyàm ìghè yə̀ nɛb dzwàb tsə aghee mbyi yə ghu kə də kə̀ bɛmə nəway awò Zə̀kìy anə mali tə yiə tə ì kə zəŋə nəniy anə sə kə nyàm ìsəsə yə. Nyàmə̀ ìbàm yə̌ dzày yə̀ nə̀ aghee mbyi yə̀ bwam kə fəmwòʼo fə fwuni tsə nyàm isəsə yə ì kə kwu nəniy faŋkwoʼ kə ifoŋ kə kə kə zəŋi nəniy nə̀ ì dòʼò bə̀ anə ayiə pfə yiy tə̀ ghu ki fwulə.

¹⁵Zə̀kìy na tsə nə̀ nyàm ìbàm yə̀ ì zwày nyi yə̀ zuub tə imùə̀ anə mwòʼo fə ghu kə bwam nəniy anə zə̀ŋi kə nyàm isəsə yə ani zəŋi tsə nə̀ fə dzəŋì fyi bə̂, anə ayiə yə aghê kî də ani wiy màʼà àghù yə̀ ghu twe ani fwùlì mwòʼo fə ghè fə̀.

¹⁶Nyàm ìbàm yə̌ tyiŋi tsə sòʼò àghè àsoŋə̀ yìy nə̀ liy mə̀ ghù mìy, nə̀ àghè àkwumə yiy nə̀ àlay yiy, nə̀ aghû yə̀ ghu də nəniy ukwə̂d wìy nə̀ àyu ghu də wày ukwə̂d wìy, nə̀ ghu dê bə̂ ìkwe i ghu ìnyiə yiy, moo ntwùmə̀sə mə̀ ghu, tə̀ ghe kwe tsə izəd i nyàm ìsəsə yə ate yəə à də̌ tsə̀e azoŋə̀ àghè dzə̀m.

¹⁷Ghu kə fàʼ aghii ani zəŋi tsə nə̀ wè lìy kə də wày ani zwe fyiə kə̀li kiy moo ani fè fyiə kəli kiy abu ghu də kwu way tsəe kə nyàm ìsəsə yə, kə dê nəniy izəd i nyàm ìsəsə yə moo ntàŋə̀ nyàmə̀ ìsəsə yə anə ntwùmə̀sə mə̀ ghu.

¹⁸Ghà kwu ani kəli tsə utwab ani zuw kəli tsə imyiŋì yə̀ tsə̀e yə̀ kwu nəniy. Wù wə̀ ù kwu nəniy utwab wiy, ù də ŋwô ani kaw kəli fyi kə izəd i nyàm yə̀ anə ntàŋə̀ ì ghè. Ntàŋə̀ ìghè yə̀ də̀ izəd i wù ùghè wə̀. Ntàŋə̀ ìghè yə̀ də̌ 666.