Read Isu Tway dè fyi 15 Bible Online

Tway dè fyi 15 - Isu bible

Tway dè fyi 15

¹Mə kə lia kwoʼ yə̀ an-a-byiwuŋ, mə kòʼ fwuli ayiə àzwumə idzwə yiy àsèmbe. Mə kə kòʼ tsə̀təndii t-a-zə̀ ìsèmbe tə kə kwu nəniy ani nyə̀ fəm awò àghè ŋwunə yiy anə le tə tə dzə̀lə ìsèmbe. Zə̀kìy kwu fòŋ ì ŋəmə̀ yìy azoŋə̀ àghè ŋwunə yiy. À yù də̌ mfəm yə ù dziy nyiə̀ gwuŋì tsə awò ghu ani zəŋi tsə nə̀ ghu kyemì ŋwô bə̂ anə ayiə àbɛbə yə ghu zəŋə nəniy.

²Mə kòʼ sòʼò fyiə kə̀liy kiy kə də nəniy yəə à də̌ dzwì ìnè yìy i də̀ yəə à də̌ fə̀intəntay nə̀ ì mwòʼ dòʼò nə̀ ùvələ wiy. Mə kòʼ sòʼò àghù yə̀ ghu kə təm nyi nəniy nyàm yə̀ anə ayiə yə ghu də fwùlə̀ wǎy nyàm ì ghè yə̀, fwùlə̀ sòʼò wày zəəŋi kə we kiy, twe màʼà sòʼò nə̀ ghu kə kwe dzə̌ taŋ yə à də nəniy tsəe kə izəd i nyàm yə̀ azoŋə ghu. Ghu təmi dòʼò akə̀lə̀ fyiə kə kə də nəniy yəə à də̌ dzwì ìnè yə̀. Ghu kwu ubɛ̂m ani bwoʼ nyə̀ ùkali ate awò Zə̀kìy.

³Ghu zɛmə ndzàŋ yə̀ Musîs wè kə̀fàʼ ə Kə̀zə̀, kə zɛm nəniy. Ghu kə ghii zɛmə ani nyiə̀ ùkali awò Yesù wə̀ ù də nəniy yəə à də̌ Wà ndzù. Ghu kə zɛmə tsə nə̀. “A Mwe ə̀ mbyi, Zə̀kìy, wô wə̀ wò kwu nəniy daʼa kə kə tsîy fyi nəniy udaʼa wə udzə̀m, wò zəŋə̂ kwab tə yiə, Wò taw zəŋə tsə̀ àyiə yə a də nəniy tsitsi nə̀ àyiə yə à də nəniy àsoŋə̀ yìy, Wò də̀ kədòŋ anə nsòŋə indzə̀m[1].

⁴A Mwe ə̀ mbyi, à bvami mày kə wô wò də nəniy wù ùzwê wìy, Aghê kwu ani fwùlə̀ wò anə nàʼà tə̀dzə̀m, aŋwòə wò mə dè awò àghè dzə̀m nə̀ wò mə saʼ aghê dzə̀m tsitsi. Yəə i də nəniy ghii à də ndiə ù də wày ani tsəŋ wô, ù nyiə̀ sòʼò wò nə̀ kwiʼi miy?”

⁵Abù aghû yə̀ zɛm mâ tsə nəniy ayiə yə, mə fwə̀d yə̀ kòʼ ndàw Kə̀zə̀ an-a-byiwuŋ, toŋə mfwùə kə aghee Islàel yìy kə biə na nəniy a mbvə̀nə̀ kə̀sisi.

⁶Tsə̀təndii t-a-zə̀ tə̀ ìsèmbe ghu kə kwu nəniy mfəm tə ìsèmbe, ghu tsìy fyi bə̀ à ndàw Kə̀zə̀ ìghè yə̀. Tsə̀təndii tə ghè tə̀ kə dzə̀ŋì kəli ndzwu tə̀ fəmə mwaa tiy. Ghu wab kəli sòʼò ufyiə ùliy wiy anə kiy kiy tə ghu, ghu kə zəŋi nəniy anə ufyiə ùtsə ùsoŋə̀ wìy ghu tyoŋə nəniy nə̀ à də̀ gôl.

⁷Fyiə kəmòʼ anə ufyiə wə u kə muə nəniy ùkyàʼì, kə nyə̀ yə̀ ùbìy ukaŋ ghu kə zəŋi nəniy anə gôl awò tsə̀təndii t-a-zə̀ tə̀ ìsèmbe. Nlwù mìy kə də̀ anə ubìy ukaŋ ughè wə. Nlwùmə̀ ghè mə̀ kə də̀ kətsəe ani dè tsə nə̀ Zə̀ kə̀ kə muə nəniy anə nsòŋə indzə̀m, kə kî nyìə̀ ŋwǒ mfəm awò àghè ŋwunə yiy.

⁸Nək kiy lwe tsə a ndàw Kə̀zə̀ ìghè yə̀ ani dè tsə kətsəe nə̀ Zə̀kə̀ kə də nəniy wù ùsòŋə̀ wìy kə kwu sòʼò udaʼa udzə̀m, ù də̀ ŋwô. Wè lìy kə wày dzə ani tsìy nyi yə̀ dzə̀ awote a ndàw Kə̀zə̀ anə sòŋə fə ghè fə̀, wù kə də̀ kə ani tsìy nyi awo anə sòŋə fə tsə̀təndii t-a-zə̀ tə̀ ìsèmbe kə fəlì mà fyi bə̂ ntswə̀d mə̀ ìnsèmbe ghu kə bû nəniy nə̀ ìn ghe mìy.