Read Isu Tway dè fyi 16 Bible Online

Tway dè fyi 16 - Isu bible

Tway dè fyi 16

¹Mə kə zuw anə udzɛ̀mə̀ wè lìy dzày tsə nəniy a ndàw Kə̀zə̀ anə dzə̀ ì taw yiy awò tsə̀təndii tə tə kə kwu nəniy ubî ukaŋ wiy ùsèmbe a ghu nə, “Ghà zû fəlì yə̂ nlwùmə̀ in kə də nəniy anə ubìì ukaŋ wə ùsèmbe an-a-mbvə̀dintsə. Ì yû dè tsə nə̀ Zə̀kìy ŋəmə̀ nə̀ fòŋ azoŋə̀ àghè ŋwunə, dè sòʼò nə̀ ù kì nyìə̀ ŋwǒ ghu nə̀ mfəm.”

²Tsə̀ndii ìsəsə yə ŋwò zù nə̀ bìy k-a-kaŋ kə we kiy, fəlì màʼà nlwùmə̀ in kə də nəniy ate an-a-mbvə̀dintsə. Yəə ù fə̀lì tsə nəniy ghii, aghû yə̀ ghu kə kwu nəniy tsəe kə nyàm yə̀ anə iwè, ghu kə fwulə̀ soʼò nəniy zəəŋi kə nyàm yə̀, nsə̀ə̀ mə̀ fyây mǐy fyi kə azoŋə̀ ghu, in ŋge fwabə ghu.

³Tsə̀ndii ìlìy yə̀ ani zəŋi yə̀ tsə̀təndii i bè ə zù nə̀ bìì k-a-kaŋ kə we kiy, fə̀lì màʼà yə̀ nlwùmə̀ in kə lwe doʼò nəniy ate anə bìì k-a-kaŋ kə we anə dzwî ìnè yə̀. Yəə ù fəlì tsə nəniy ghii, mwi mə anə dzwî ìnè yə̀ ə kwi dòʼò yə̀ yəə à də̀ kâŋ tə wù wə̀ ù pfə doʼò nəniy. Ufyiə wə u kə muə nəniy anə dzwî ìnè yə̀, u pfə ŋwò ùdzə̀m.

⁴Tsə̀ndii ìlìy yə̀ ani zəŋi yə̀ tsə̀təndii ìti ə zù nə̀ bìì k-a-kaŋ kə we kiy, fə̀lì màʼà yə̀ nlwùmə̀ in kə lwe doʼò nəniy ate anə tə dzwì nə̀ anə asə ə tədzwì. Yəə ù fə̀lì tsə nəniy ghii, mwi mə in kə də nəniy anə tədzwì nə̀ anə lòʼo tə asə ə tədzwì yìy kə fyiə bə̀ ate, in fə̀d yə̀ tə̀kàŋ.

⁵Mə zuw tsə̀ndii Kə̀zə̀ yə̀ ì lia nəniy dzwî tìy dzìy nəniy â Zə̀kìy a we nə, “A Zə̀kìy, wò də̌ wù wə̀ ù də nəniy nyiə̀, də̀ sòʼo wù wə̀ ù kə də tsə nəniy. Wò də̌ wù ùzwê wìy. Wò saʼa àghù tsitsi.

⁶Aghê àbɛbə yiy maa wiy màʼà àghû yiə̀ àzwe yiy, wiy màʼà sòʼò àghê ntwùm ə̀ Kə̀zə̀. Ì yû də̀ tsə nə̀ wò də ŋwô tsitsi ani nyə̀ ghu nə̀ mfəm, tə̀ ghu mu təkâŋ. À yù bvami də̌ ndzòʼò namə kə ghu kwu ani kəli.”

⁷Mə dyaŋi zuw tsə̀ndii ə̀ Kə̀zə̀ ìlìy yìy, ì bə̀lì kə nəniy akə̀lə̀ tà kə̀ piaʼa nyiə kə ufyiə kiy awò Zə̀kìy, i dzìy nə̀, “Ìny! Mwe ə̀ mbyi, Kə̀zə̀, wô wə̀ wò kwu nəniy daʼa kə kə tsîy fyi, isaʼ yiə̀ yìy də tsitsi, də̀ sòʼò ìsoŋə̀ yìy yəə wò nyìə̀ nəniy mfəm awò àghù yə̀.”

⁸Tsə̀ndii ìlìy yìy ani zəŋi yə̀ tsə̀təndii i kyàʼì, i ŋwò zù nə̀ bìì k-a-kaŋ kə we kiy, fə̀lì màʼà yə̀ nlwù mə̀ we ìn kə də nəniy ate anə inyi. Zə̀kìy zəŋi tsə nə̀ tsə̀ ŋwòʼ àghù yəə à də̀ uvələ.

⁹Yəə tsə̀ yə̀ kə ŋge ŋwôʼ tsə nəniy aghû yə̀ aghii, Ghu kaʼ yə̀ ani dzày àyiə àbɛbə yiy kwùmə̀ yə̀ nə̀ Zə̀kìy aŋwòə Zə̀kìy kə kwu kədaʼa ani zəŋi tsə nə̀ ndzòʼò ntswə̀d mə̀ bù azoŋə̀ ghu. Ghu kwuni twe təŋ nə̀ ghu way ani kyɛ̀mì ŋwò bə̀ anə ayiə àbɛbə yə ghu zəŋə nəniy, twe sòʼò anə nyə̀ mə̀ŋkwiʼi awò Zə̀kìy.

¹⁰Tsə̀ndii ìlìy yə̀ ani zəŋi yə̀ tsə̀təndii ìtà ə zù nə̀ bìì k-a-kaŋ kə we kiy, fə̀lì màʼà yə̀ nlwùmə̀ ìn kə də nəniy anə bìy k-a-kaŋ anə ndàŋə̀ kə̀dòŋ yə̀ nyàm yə̀ ì kə ŋwô bə̂ anə dzwì ìnè yə̀ kə dyoʼò tsə̂ nəniy ate. Ləm kə̀ soŋə̀ kǐy bvə̀ bə̀ anə lòʼo kə nyàm yə̀ kə saʼa nəniy ate. Yəə ləm kiy bvə̂ bə̂ nəniy, nyàm yə̀ nə̀ àghù yə̀ ì kə saʼa nəniy, ghu fələ unɛm u ghu nə̀ àsoŋə aŋwòə ghu kə ŋge zuw bɛbə ŋwò.

¹¹Ghu nyàʼì Zə̀kə̀ kə saʼa nəniy an-a-byiwuŋ, aŋwòə nsə̀mə̀ ìn kə də nəniy azoŋə̀ ghu, ìn kə ŋge fwabə ŋwò. Ghu kwuni twe təŋ anə kyɛ̀mì ŋwò bə̀ anə ayiə yə ghu kə zəŋə nəniy nə̀ a dzwâbə̀ wày.

¹²Tsə̀ndii ə̀ Kə̀zə̀ ìlìy yə̀ ani zəŋi yə̀ tsə̀təndii ìn tyìfoŋ ə zù nə̀ bìy k-a-kaŋ kə we kiy, fə̀lì màʼà nlwùmə̀ in kə də nəniy ate anə dzwì Yuflèt ìnè yə̀, mwi mə̀ dzwì ìghè yə̌ zwumi ŋwò tsə ani zəŋi tsə nə̀ ùdòŋ wə̀ u ŋwô bə̂ nəniy anə nàʼà tə̀ tə də nəniy anə bə̀d kə̀ inyi yiy fyiə kwoʼo bə̂ ate, tə̀ ghu nə̀ də ani zù dàŋ awote nə̀ sǔgôʼ tə ghu tiy.

¹³Mə kòʼ nsìy mə̀bɛbə̀ mìy, in də nəniy yəə à də̌ uŋkàm. Kàm kəmòʼ ə fyi bə̀ anə idzwə i zwə. Ŋkàm kə̀li kiy fyi bə̀ anə idzwə i nyàm yə̀ ì kə fyi kwoʼ bə̂ anə dzwî ìnè yə̀. Ŋkàm kə̀liy kiy fyi bə̀ anə idzwə i wè ntwùm ə̀ Kə̀zə̀ ù gûw wìy.

¹⁴Nsìy mə̀ ghè mə̀ kə də̌ nsìy mə̀bɛbə̀ mə̀ ìn kə də nəniy ani zəŋi mali tə ayiə. Ghu ŋwò làʼ zù akə̀lə̀ àghù yə̀ ghu saʼa nəniy mbyi idzə̀m ani zù nìy zoŋə̀ na dzəŋi bə̀ sǔgôʼ tə ghu ani zù ŋwày ŋgə̀d kə̀ ghu kwu nəniy anə ŋwày anə ntsuk fə̀ soŋə̀ fə Zə̀kə̀ kə kwu nəniy daʼa kə kə tsîy fyi nəniy, ù nì nyiə̀ nəniy mfəm awò àghù yə̀ ghu dzwəə nəniy nə̀ we.

¹⁵Mwe ə̀ mbyi dziy nə̀, “Ghà toʼò kwumi tsə utuw anə ayiə yə mə dziy dzây! Mə kî bè yəə wù ùtsoŋə̀ wìy nì bê nə̀ aghee kə̀ kəli na nəway. Yəə i də nəniy ghii, mə kî dyoʼo nə̀ àghù yə̀ ghu kî nìy tsə nəniy iyɛmì yìy, ghu kî tsə̀ŋ muə kə nəniy imuə̀ yə̀ i də nəniy tsitsi anə ayiə yə ghu kî də wày anə kəli utuw ùdələ wiy ighəd yəə à də̌ wù wə̀ ù dzə̀ŋì kəli nəniy ndzwu tiy. Ani zəŋi tsə nə̀ ghà kə kəli dzə̀ tuw kə̀ dələ kiy yəə à də̌ wù wə̀ ù də nəniy nə̀ ùwuŋ ù zwumə wiy.”

¹⁶Nsìy mə̀bɛbə̀ mə̀ ə nìy na fwumi bə̀ ùdòŋ wə̀ anə lòʼo kə ghu tyoŋə anə idzə̀ŋì Hiblù nə̀ à də̌ Àmagedòn.[2]

¹⁷Tsə̀ndii ə̀ Kə̀zə̀ ìlìy yə̀ ani zəŋi yə̀ tsə̀təndii t-a-zə̀ ìsèmbe ə zù nə̀ bìy k-a-kaŋ kə we kiy, fə̀lì màʼà fyi kə nlwù mə̀ we idoŋ an-a-ŋkwùŋì. Yəə ù fə̀lì màʼà fyi kə nəniy, dzə̀ ìlìy yìy dzə̀ŋì fyi bə̀ a ndàw Kə̀zə̀ anə lòʼo kə ndàŋə̀ kə̀dòŋ kə də nəniy ate dzìy tsə nə̀, “Zə̀kìy nyiə dzǐy bwi na ani nyiə̀ mfəm awò àghè àŋwunə.”

¹⁸Yəə tsə̀ndii ə̀ Kə̀zə̀ yə̀ kə fəlì màʼà fyi kə nəniy nlwù mə̀, iwe mwà, fə̀n tsə sòʼò, loʼo tiy ŋwò kwùə̀ yə̀, mbvə̀dintsə kiy sə̀kì tsə sòʼò nə̀ daʼa kiy. Nìy ŋwò tsə anə ayiə yə mbyi kə kaʼ bə̂ nəniy, mbvə̀dintsə kiy kamə kə̀ sə̂k kôʼ dzə̂ ghii. Kə kə ŋge sə̀k tsìy fyi ŋwô anə sòŋə fə.

¹⁹Inaʼ ì Babilòn ìsoŋə̀ yə̀, i ŋwò dzàw nyi yə̀ anə ubə̀d ùti. Zə̀kìy kə ndəŋ byɛbi màʼà sòʼò ŋwò loʼo tə̀liy tiy anə nàʼà tə̀liy tiy. Ì yû kə dè tsə nə̀ Zə̀kìy kə kamə kə̀ nîyzə̀ dzə̂ àyiə àbɛbə yə inaʼ i Babilòn yìy kə zəŋi nəniy. À yù də̀ ighe ù kə zəŋi tsə nəniy nə̀ ghu mu yə̂ bwàmə̀ ùlwù yə̀ nɛb də nəniy ate à də nəniy mfəm ù nyə̀ nəniy awò ghu anə fòŋə̀ ìŋəmə̀ yə̀ ù kə kwu azoŋə̀ ghu.

²⁰Yəə mbvə̀dintsə kiy kə sə̀kì tsə nəniy nə̀ daʼakiy, naʼà tə̀ dzwì kə dzɛmì na tsîy yə̂, tə ŋwò sàŋ tsə. Kaʼà tǐy fə̀d dòʼò yə̀ nə̀ŋì tə təlòʼo.

²¹Yəə tsə̀ndii ə̀ Kə̀zə̀ yə̀ fə̀lì fyi kə nəniy nlwù mə̀ we miy idoŋ, ntay fə̀lì fyi tswi bə̀ an-a-byiwuŋ, ntay fə mòʼ ə də̀lə̀ yəə à də̌ mbè kə kwe, ntay mə ŋwò tsə an-a-byiwuŋ bvə̀ tswi bə̀ anə utuw u ghù. Aghee ghè yə̀ ə nyàʼì Kə̀zə̀ anə ayiə yə ù kə zəŋi tsə ə̀ ntay mə̀ fyâ mə̀ bvə̀ tswi bə̀ azoŋə̀ ghu.