Read Isu Tway dè fyi 17 Bible Online

Tway dè fyi 17 - Isu bible

Tway dè fyi 17

¹Tsə̀ndii ə̀ Kə̀zə̀ ìmòʼ anə tsə̀təndii tə isèmbe tə kwu kə nəniy ubî ukaŋ wə ùsèmbe u bù dzày tsə â miə̀ nə̀, “Bù, mə dê bə̂ wò nə̀ àyiə yə Zə̀kìy nî nyìə̀ nəniy mfəm ate awò ìnaʼ ìnê yə̀ i də nəniy akə̀lə̀ ndə̀mə̀ dzwì tə̀ nê tìy. Inaʼ ighè yə̀ də̀ yəə à də̀ kəkpàlə̀.

²À də̀ yəə a nə dzây tsə nə̀ ùdòŋ wə̀ ù saʼa nəniy mbyi, u mə zəŋi ayiə kəlyaŋi yiy nə̀ inaʼ i ghè yə̀ i də nəniy yəə à də̀ kəkpàlə̀. Ghu mə zəŋi sòʼò nə̀ aghû yə̀ ghu də nəniy fə anə mbyi ghu zəŋi soʼò àyiə kəlyaŋi yiy nə̀ ghu. Ighəd anə ayiə yiə kpàlə̀ kìy niɛbə tsə nəniy wìŋəmə̀ nə̀ ù mu nlwù mə̀ taw mìy ù nyìə̀ nəniy awò ghu. Abù ù mu kee tsə nəniy, u kaʼ yə̀ ani zəŋi ayiə kəlyaŋi.”

³Zwàykə̀zwekiy dyaŋi bù azoŋə̀ mìə̀ nə̀ daʼà kiy, tsə̀ndii ə̀ Kə̀zə̀ yə̌ nìy nyi yə̀ nə̀ mìə̀ a mbvə̀nə̀ kə̀sisi, mə kòʼ yə̀ wìyəŋi ùlìy wìy awote a mbvən, ù nyi doʼò nəniy anə nyàm ìbaŋə̀ yìy. A də̌ nə̀ nyàm ìghè yə̀ mə twà na azəd yiy anə uwè uwe ù dzə̀m. Azəd ə ghè yə̀ kə nyàʼà Kə̀zə̀. Nyàm ìghè yə̀ kə kwu utuw ùsèmbe nə̀ ndwuŋ tiy ìvəm.

⁴Wìyəŋi wə̀ kə dzə̀ŋì kəli ndzwu tə̀ baŋə tiy. À kə də̌ nə̀ ù mə nab na uwee uwe wiy anə ufyiə ùdzəŋə wiy ghu zəŋi nəniy anə ufyiə ùtsə ùsoŋə̀ wə̀ ghu tyoŋə nəniy nə̀ à də̀ gôl. U kwu sòʼò ufyiə ùdzəŋə wiy u taw nəniy nə̀ ìvən yiy. U kwu bwàm ìlìy yiy anə wo kə̀ nyiə kiy ghu zəŋi nəniy anə ufyiə ùtsə ùsoŋə̀ wìy a də̌ nə̀ nlwù mìy mə lwe dòʼò anə bwàm ìghè yə̀. Nlwù mə̀ ghè mə̀ kə də̀ kətsəe ani dè bə̀ ùmwamə ùbɛbə wə nə̀ àyiə lyaŋə à dzəə yə wìyəŋi wə zəŋə nəniy.

⁵Izəd yə i kə twâ doʼò nəniy anə utwùmusə u wìyəŋi wə i kə kwu nùw kə imyìŋì. Izəd i ghè yə kə də̌ nə̀, Wìyəŋi wə̀ də̀ inaʼ i Babilòn, inaʼ ibɛbə yiy. Ù də̀ yəə à də̀ zə̂ ùkpàʼlə̀ wə̀ fə anə mbyi. Ù tswə̀ ghu nə̀ ghu ki zəŋə yə ayiə kəlyaŋi yiy, anə yiə yə ghu kə fwulə̀ nəniy mwòʼo miy.

⁶Mə kòʼ nə̀ wìyəŋi wə̀ mə mu kee kâŋ tə ghě Kəzə̀ yə̀ ghu kə niʼà tsə̂ nəniy ayiə yiy kwùmə̀ yə̀ nə̀ Yesù. Abù mə kôʼ yə̂ nəniy we, idzwə yiy zwum này yə̀ mìə̀ ghii.

⁷Tsə̀ndii ə̀ Kə̀zə̀ yə̌ bəbə â mìə̀ nə̀, “Idzwə yiy wô zwumə anə iyiə ì kìə̀?” Na mə tyi dzây bə̂ nùw kə imyìŋì kə̀ wìyəŋi wə̀ kwu nə̀ nùw kə imyìŋì kə̀ nyàm yə̀ wìyəŋi wə̀ nyi doʼò nəniy ate kwu. Toŋə nyàm yə̀ ì kwu nəniy utuw wiy ùsèmbe nə̀ nduŋ tiy ivəm.

⁸Nyàm yə̀ wò kòʼ nəniy, ì kə bòʼ mùə̀ tsə̀ ŋwô, ì kwuni kàm wày dzə nyiə. Fəkəmə̀ ì kî kàm ŋwò fyi kwoʼ bə̀ anə ntswam k-a-bwòʼ kə̀. Ani bu nyàm yə̀ nì kàm bù dzwoŋi nəniy, adzwə ni zwum aghû yə̀ ghu muə nəniy fə an-a-mbvə̀dintsə. Aghee ghè yə̀ də̀ aghû yə̀ azəd ə ghu yiy kə də kə̀ twâ doʼò anə ŋwàʼà kə̀ ghu twâ na nəniy azəd ə ghù yə̀ ate ghu kwu ani nyi itsâ. Ghu kə kaʼ ani twà àzəd ə ghè yə̀ anə sòŋə fə mbyi kə kaʼ nəniy ate.

⁹À may kə wù wə̀ ù kwu nəniy utwab wiy ani zuw kəli tsə ayiə yə. Utuw u nyàm yə̀ wìyəŋi wə̀ də nəniy ate ùsèmbe u dê bə̀ tə̀doŋə isèmbe, u dê bə̀ soʼò udòŋ u sèmbe.

¹⁰Ùdòŋ ùtà ate maa pfə tsìy, à nam də̀ kə kə̀mòʼ kə nam saʼa ŋwò. Dòŋ kə̀liy kə ani zəŋi yə̀ ùdòŋ ùsèmbe, kə kamə kə̀ bû dzə̂. Ani bu ù bù nəniy, ù kì bè dyòʼò tsə kə anə kə̀mə̀ fə fəsòŋə.

¹¹Nyàm yə̀ ì kə boʼò mùə̀ nəniy, bù pfə, ù nì bè zəŋə yə̀ ùdòŋ ùfamə, ù ni zəŋə ayiə àbɛbə yiy anə ayiə yə ùdòŋ ùliy wə ùsèmbe kə zəŋə nəniy. Zə̀kìy ni kwuni byɛbi maʼà we.

¹²Nduŋ tə ivəm wò kòʼ nəniy, tə dê bə̀ sòʼò ùdòŋ ùvəm u də kamə kwoʼ kə dzə̂ way anə ndàŋ. Ghu nî kyilə tsə kə̀daʼa ani dzəŋi saʼ aghû nə̀ nyàm ìghè yə̀ anə kə̀mə̀ fə fəsòŋə kə ghii, yəə à də̀ ufwa iwùŋ ìmòʼ.

¹³Ghu ni dzəŋi bɛmə kə anə nìy nyìə̀ yə̀ ùdaʼa wə ghu kwu nəniy ani saʼ aghû a təŋə̀ nyàm yə̀.

¹⁴Ùdòŋ u ghè wə̀ nə̀ nyàm yə̀ nî kaʼ yə̀ ani ŋwày nə̀ Wù wə̀ ù də nəniy yəə à də̌ Wà ndzù. Wù wə̀ ù də yəə à də̌ wà ndzù nî kwuni təm nyi kə ghu aŋwòə ù də̀ Mwe ə̀ Mbyi, ù saʼa nəniy nə̀ mwe à dzə̀m, də̀ soʼò dòŋ kə̀ kə saʼa nəniy ùdòŋ ùdzə̀m. Aghû yə̀ ghu də dzəŋi nəniy nə̀ we, fìy we, à də̀ aghû yə̀ Zə̀kìy sây na nəniy. Aghee ghè yə̀ tsə̀ŋ kwu kə sòʼo ani fàʼ awò we nə̀ fòŋ ìmòʼ.

¹⁵Tsə̀ndii ə̀ Kə̀zə̀ yə̀ dzày fəli bə̀ awò mìə̀ nə̀ “Dzwî tə̀ wò mə̀ kòʼ nəniy anə inaʼ yə kpàlə̀ kə̀ mə̀ də nəniy ate, tə dê bə̀ nàʼà tə mbyi tə dzə̀m, dè bə̀ sòʼò àghě nàʼà tə mbyi tə̀dzə̀m, dè bə̀ sòʼò àghè baŋə nə̀ aghè àləŋə, dè bə̀ sòʼò aghě dzə̀ŋì tə nàʼà tə̀dzə̀m.

¹⁶Nduŋ tə ìvəm wò mə̀ kòʼ nəniy, tə dê bə̀ ùdòŋ. Ghu nə̀ nyàm yə̀ ghu nî kaʼa yə̀ ani dzwəə nə̀ wìyəŋi wə ù mə də nəniy yəə à də̀ aghee inaʼ yə. Ghu ni nîy ŋwô ufyiə wə ù dzə̀m u də nəniy awote anə inaʼ i ghè yə̀, yəə wù nə dzây nə̀ ghu na tsə inaʼ i ghè yə̀ nə̀ ùwuŋ ùzwum wiy. Ghu ni byɛbi maʼà ìnaʼ i ghè yə̀ yəə ghu nə̀ wiy nəniy nyàm, ghu piə̀ maʼà soʼò anə uvə̀lə̀.

¹⁷Ghu kî àyiə yə̀ zəŋə aŋwòə Zə̀kìy mə zəŋi nə̀ ghu tsə̂m tsə ani zəŋi ayiə yə ghe liə nə̀ ghu zəŋi. Ghu ki nyiə̀ soʼò daʼa kə ghu ani saʼ aghû awò nyàm ìghè yə̀ ani zù kwùm soŋə fə ghu kî zəŋə tsə nəniy iyiə yə Zə̀kìy dzây na nəniy nə̀ ghu zəŋi.

¹⁸Kpàlə̀ kə̀ wò mə̀ kòʼ nəniy, kə dê bə̀ inaʼ ì nê yə̀ ŋgəd tə we tiy saʼa nəniy ùdòŋ ùdzə̀m anə mbyi.”