Read Isu Tway dè fyi 18 Bible Online

Tway dè fyi 18 - Isu bible

Tway dè fyi 18

¹Mə kàm kòʼ tsə̀ndii ə Kə̀zə̀ ìlìy yìy ì fyi tswi bə̂ nəniy an-a-byiwuŋ, u kwu daʼa kə̀ soŋə̀ kìy, imwây iwe yiy màŋ zəŋi tsə asə zwu yə̀ a mbvə̀dintsə.

²U dzày fyi kə anə dzə̀ ìtaw yìy nə̀, “Ghu mə byɛbi màʼà inaʼ i Babilòn, inaʼ ìsoŋə̀ yìy, i nyiə̀ də̀ loʼo kə nsìy mə̀bɛbə̀ mìy muə nəniy ate. Inaʼ i ghè yə̀ nyə̀ də̀ loʼo kə nyâm tə̀ dzəə[3] tìy nê dyoʼò nəniy ate nə̀ ŋwùni mə̀ dzə̂ mə̀ ìndzə̀m.

³Zə̀kìy mə byɛbi màʼà inaʼ i Babilòn yə̀ aŋwòə ùdòŋ u ghu wiy mə niɛbi aghû yìy nə̀ ghu zəŋi lyibi tə ayiə ighəd yəə kpàlə̀ kǐy nə̀ niɛbə tsə wìŋəmə̀ nə̀ ù mu kee mənlwù, ù zəŋi sòʼò àyiə àlyaŋə yiy nə̀ we. Ùdòŋ u mbyi wə̀ mə zəŋi sòʼò lyibi tə ayiə tiy nə̀ àghě Babilòn yə̀. Ndə̀mə̀ àghě bekəivən àliy yiy mə kwum aŋwòə inaʼ yə̀ kə ŋge liə ŋwô ani zwe ufyiə ivən ìtaw yiy awò ghu.”

⁴Mə zuw fəli dzə̀ ìlìy yìy an-a-byiwuŋ ì dzìy nəniy nə̀, “Aghû yamə, ghà tu ŋwô fyi bə̂ anə ayiə yə aghee Babilòn yìy zəŋi nəniy. Ghà kə zəŋi dzə̀ ìbɛb yə ghu zəŋə, tə̀ ghà ki də kə̀ fii dzə̂ anə mfəm yə aghee inaʼ i ghè yə̀ kì fyaʼa nəniy ate.

⁵À də̀ yəə wù nə dzây nə̀ ayiə ghu àbɛbə yə ghu zəŋə nəniy, a mə ndwuŋi kwoʼ kwùm an-a-byiwuŋ, Zə̀kìy mə myìŋì sòʼò ayiə àbɛbə ghè yə̀ ghu zəŋi nəniy.

⁶Dzə̀ ìghè yə̌ dzày yə̀ awò tsə̀təndii t-a-zə̀ tə̀ Zə̀kìy nyiə̀ na nəniy ghu nə̀ daʼa kiy nə̀ ghu nyiə̀ mfəm awò aghě inaʼ yə, aghu nə, ‘Ghà nyiə̀ tsə inaʼ yə nə̀ mfəm ighəd anə ayiə yə ghu kə zəŋi nəniy nə̀ àghè àliy yiy. Ghà zəŋi tsə nə̀ ghu fii dzwâb tsə tsìy fyi anə ayiə yə ghu kə zəŋi nə̀ naʼà tə liy tə̀ fii ate.

⁷Nyìə yə̀ ìnaʼ yə nə̀ mfə̀mə̀ ìsòŋə̀ yə̀ ì kwoʼ kpe nəniy anə ŋkwiʼi mə i kə nyiə̀ anə uwè u we, nə̀ anə ayiə àbɛbə yə ghu kə liə ani zəŋə.’ Ghà kwu ani zəŋi tsə ghii aŋwòə inaʼ yə̀ mòʼò anə fôŋə we nə̀, ‘Mə saʼa yəə à də̌ nàʼtwum, mə way dzə yəŋə̀ mpfəsə. Mə kî mwe kòʼ sòʼò wày.’

⁸Yəə i də nəniy ghii, Zə̀kìy kî zəŋə tsə nə̀ utswə̂d wìy bû azoŋə̀ ìnaʼ yə anə ntsukə fə̀liy fiy. Aghee inaʼ yə̀ nî pfə, aghê àliy ni dîy pfə tə ghu Dzoŋ ni nyi anə inaʼ i ghè yə̀, aghê ni dîy dzoŋ. Uvələ wiy ni fwu maʼà we, Zə̀kìy nî nyìə̀ mfəm anə inaʼ yə ghii aŋwòə ù kwu daʼa kə kə tsîy fyi nəniy udaʼa udzə̀m.”

⁹Ùdòŋ u nàʼà tə̀ u kə təm dzəŋi yə̂ nə̀ aghě inaʼ yə ani zəŋi lyibi tə ayiə tə, ghu ni dîy, ghu mwe ani buu ghu kôʼ nəniy nək kə kə kə fyiə bə̂ nəniy anə uvə̀lə̀ wə̀ u nî fwuə nəniy inaʼ yə,

¹⁰ghu ni təmi tsə nàdiikiy, ghu tsəŋə yəə Zə̀kìy nyiə̀ nəniy aghee inaʼ ighè yə̀ ate nə̀ mfəm. Ghu ni dziy tsə soʼo nə̀, “Mwuli kə̀ kwoʼo kiy azoŋə̀ kwab kə inaʼ kə kə kwu soʼo nəniy daʼa kə̀soŋə̀ kìy Mwuli kə̀kwoʼo kiy azoŋə̀ Babilòn! Zə̀kìy mə saʼ wô anə kə̀mə̀ fə fəsòŋə, nyə̀ dyaŋi wô nə̀ mfəm.”

¹¹Aghê zwe fyie ufyiə wiy anə mbyi à dzə̀m ni dîy ìnaʼ yə, ghu mwe soʼò aŋwòə wè lìy ni də kàm wày dzə ani zwe ufyiə wə ghu nî kwu nəniy ani fè awò àghě inaʼ yə.

¹²Aghee inaʼ yə̀ kə zwe tsə̀ ndə̀mə̀ ufyiə ùtsə ùsoŋə̀ wìy nə̀ ufyiə ùtsə ùmwaa wiy, nə̀ ufyiə udzəŋə ùmwa wiy, nə̀ ùfyiə ùdzəŋə ùmwa wə u taw nəniy nə̀ ìvən yiy, nə̀ lelê tə təndzwu tə ivən ìtaw yiy, tə̀ baŋə tiy nə̀ tə̀ ləŋə tiy, nə̀ ùfyiə wə ghu fyiə̀ fyi kə anə ŋkàʼ mə̀ lyimə̀ mìy, nə̀ ùfyiə wə ghu fyiə̀ fyi kə anə ŋkàʼ mə̀ ìvən ìtaw yiy, nə̀ ùfyiə wə ghu zwubì nəniy anə tənsòŋə, nə̀ ùfyiə ùtsə wiy, nə̀ àtay àmwaa àtaw yiy.

¹³Ghu kə zwe tsə̀ sòʼò ùfyiə ùkwe ufànyiə ùlyimə wiy, nə̀ nlwù mìy, mfòŋ mə̀ àsaŋ u ba, nə̀ àsaŋə, nə̀ mbvu mə̀ Olìf mìy nə̀ mbòŋ tìy, nə̀ ndzù tìy, nə̀ ùŋkhinyàm wìy, nə̀ ùnyəŋ wə uŋkhinyàm u tsam wiy kə sê tsə̂ nəniy, nə̀ ùkwə̀d wìy.

¹⁴Aghê àzwe fyie ufyiə wiy ni dziy tsə nə̀, “A Babilòn! Ufyiə ùdzoŋə̀ wə̀ wò kə liə nəniy ani kəli, u mə saŋ. Ikwum yiə̀ nə̀ ùfyiə ùmwa wə, wò kə kwu nəniy, u mə này, wò nì kàm kəli kòʼ dzə̀ wày ùfyiə u ghè wə.”

¹⁵Aghê zwe fyiè fyiə ufyiə wə, ghu kə bû dòʼò tsə nəniy aghê àkumə yiy nə̀ ghu fyiè ùfyiə wə, ghu ni bû təmi doʼò tsə n-à-dii kiy, nə̀ itsəŋ yiy mə kwi ghu anə ayiə yə Zə̀kìy nyiə̀ nəniy mfəm awò ìnaʼ yə. Ghu ni dîy, ghu mwe soʼò.

¹⁶Ghu ni dziy nə̀, “Fyàyfyày tə ayiə tiy mə fyi nə̀ inaʼ ìsoŋə̀ yə̀, inaʼ yə̀ kə də̀ yəə à də̌ nàʼtwum wə ù dzə̀ŋì kəli ndzwu tə̀ dzoŋə̀ tìy nə̀ ndzwu tə ivən ìtaw yiy, nə̀ ndzwu tə̀dzoŋə̀ tə̀ tə lyiŋə mwâ yə̂. Ù nabə tsə soʼò ùwee wiy anə ufyiə ùtsə ùsoŋə̀ wə̀ ghu zəŋi anə gôl, nə̀ ufyiə ùmwaa wiy, nə̀ anə ufyiə ùtsə wə ivən yiy taw nəniy ghu tyoŋə nə̀ à də pîls.

¹⁷Zə̀kìy mə màŋ kwuni byɛbi màʼà tsə ikwum yə ghii anə kə̀ mə̀ fəsòŋə.” Aghû yə̀ ghu kə bâŋə̀ tsə̂ nəniy umfə̀n wìy, nə̀ àghè àliy yə ghu kə kyilə tsə̂ nəniy ukhiy wiy nə̀ ghu bê nìy kə kə̀mfə̀n ghu dàŋ fyi yə̀ mfyìə dzwì, ghu ni təmi doʼò nây fyi yə̂ nàdikiy anə inaʼ yə.

¹⁸Ani bu ghu kôʼ yə̂ nəniy nək kə uvə̀lə̀ kə̀ kə fwoə nəniy inaʼ yə, ghu ni bvəʼi fyi kə məmbòŋ nə̀, “A kamə kôʼ kôʼ ìnaʼ ìsoŋə̀ ìliy yiy yəə à də̌ ì yuu.”

¹⁹Ghu ni diy fyiə kə idoŋ, dzə̀ ə̀ kə ùtsətsaʼa, kwe anə utuw ani dè tsə nə̀ ghu mwe ŋwò. Ghu ni dziy tsə nə̀, “Fyàfyà tə ayiə tiy mə fyi nə̀ inaʼ ìsoŋə̀ yə̀. Inaʼ yə̀ maa zəŋi nə̀ aghû yə̀ àdzə̀m ghu baŋə̀ nəniy umfə̀n wìy anə mfyìə dzwì nə̀ ghu kwum. Zə̀kìy mâŋ zə̀àŋì byɛbi maʼà tsə nəniy inaʼ i ghè yə̀ anə kə̀ mə̀ fəsòŋə.”

²⁰Dzə̀ ìlìy yǐy dzày fyi bə an-a-byiwuŋ nə̀ “Gha yə ghà də an-a-byiwuŋ, ghà dwiʼi nə̀ àyiə yə a fyiə nə̀ inaʼ i Babilòn yìy. Gha yə ghà də nəniy aghee Kəzə̀ yìy nə̀ àghě ntwùm ə̀ Yesù yìy, nə̀ àghě ntwùm ə̀ Kə̀zə̀ yìy, ghà dwiʼi aŋwòə Zə̀kìy bvami nyìə̀ àghě inaʼ yə nə̀ mfəm anə ayiə àbɛbə yə ghu kə zəŋi nəniy azoŋə̀ ghà.”

²¹Tsə̀ndii ə Kə̀zə̀ ìsòŋə̀ yǐy bòʼò kə itay ìnê yìy, màʼà nyi tswi yə̀ anə mfyìə dzwì, dyaŋi dzày tsə nə̀, “Aghee inaʼ i Babilòn, Zə̀kìy kî byɛbə myàʼà tsə ìnaʼ ghii, i ni saŋ ŋwô tsə ighəd anə ayiə yə itay yə̀ saŋ nyi tə ate anə dzwî. Inaʼ yə̀ ni də kàm wày.

²²A Babilòn, wè lìy nì kàm wày dzə anə inaʼ yiə̀ ù bwoʼo nəniy bɛ̂m kìy, zɛmə àyiə, twuŋə tə̀mbwələ, twuŋə sòʼò asooŋ. Wè lìy nì kàm wày dzə̀ anə inaʼ yiə̀ ù kwu nəniy awo kəfàʼ yìy anə zwùbì ùfyiə, aghê nî kàm zuw kòʼ dzə̀ wǎy gwò kìy kə foŋə.

²³Ghu nî kàm kòʼ kòʼ dzə̀ wày kaʼì tìy tə tuu nəniy anə inaʼ yiə̀. Ghu nî kàm zuw kòʼ dzə̀ wǎy dzə̀ ə̀ wìŋəmə̀ ù dziy nîy wiy moo dzə̀ wìyəŋi wə ù dziy nîy ŋəm. Zə̀kìy kî byɛbə myàʼà ŋwò ìnaʼ yə aŋwòə aghû yə̀ ghu kə zwe fyiè nəniy ufyiə wiy anə inaʼ yə, ghu kə ŋge nɛbə àghù anə mbyi. Wǒ niɛbi tsə ghu nə̀ ghu bû nə̀ aghě nàʼà tə mbyi tə dzə̀m.”

²⁴Zə̀kìy kə nyə̀ Babilòn nə̀ mfəm aŋwòə à kə zəŋi ghu nə̀ ghu wiy maʼà àghě ntwùm ə̀ Kə̀zə̀ nə̀ àghě Kəzə̀ àliy yə.