Read Isu Tway dè fyi 19 Bible Online

Tway dè fyi 19 - Isu bible

Tway dè fyi 19

¹Abù ayiə yə tsìy ŋwò tsə nəniy, mə zuw fyiə kə̀liy kiy foŋə yəə à də̌ ndə̀mə̀ tə aghù an-a-vələ. Dzə̂ tə ghè tə̌ dzìy tsə nə̀, “Ukali awò Zə̀kìy, ù mə ŋgaŋ bii fyi. Ù də̌ wù ùsòŋə̀ wìy, kwu sòʼò kədaʼa.

²Ukali awò Zə̀kìy aŋwòə ù də̌ wù wə̀ ù saʼa nəniy anə ayiə àsoŋə̀ yìy, saʼa sòʼò tsitsi. Ù mə nyìə mfəm awò ìnaʼ ìbɛbə yə i də nəniy yəə à də̀ kəkpàlə̀ aŋwòə aghee inaʼ i ghè yə̀ byɛbə àghě nàʼà tə̀ liy tə nə̀ ghu ki lyaŋə soʼo yəə à də̌ ghu, fwùlə̀ sòʼò ùzə̀ ùliy wiy. Ukali awò Zə̀kìy aŋwòə ù mə nyìə mfəm awò ìnaʼ yə aghee we yiy kə wiy maʼà nəniy aghee kəfàʼ ə we yiy.”

³Ŋwàâ kə ghù kə̀ ə dzày fyi fəli kə idoŋ nə̀, “Ukali wiy də awò Zə̀kìy! Nək kiy kî kàm bwi dòʼò dzə̀ wày nə̀ kə fyiə way anə uwè u Babilòn wə̀ u fwoə nəniy.”

⁴Ŋgəd tə̀ soŋə̀ tə̀ mə̀vəm imbè nə̀ ŋgəd tiy ìkyàʼì nə̀ ùfyiə wə u kə muə nəniy ùkyàʼì, ghu nyaʼa tswi tsə fwùlì tsə Zə̀kə̀ kə kə də nəniy anə ndàŋə̀ kə̀dòŋ. Ghu dzày tsə nə̀, “Ìsoŋə̀ yìy, ukali wiy ndzə̂m də̀ awò Zə̀kìy.”

⁵Mə zuw dzə̀ ì fyiə bə̂ nəniy anə lòʼo kə ndàŋə̀ kə̀dòŋ kə də nəniy ate, dzìy tsə nə̀, “Gha yə ghà də nəniy aghee kəfàʼ a Kəzə̀ yìy nə̀ ghà yə̀ ghà kwu nəniy itsəŋ i Kəzə̀ yìy, liy mə̀ ghù nə̀ àghè àsoŋə̀ yìy, ghà nyiə̀ ùkali awò Zə̀kìy.”

⁶Mə dyaŋi zuw a də̀ yə ndə̀mə̀ àghù dzəŋə̀ ŋwò, i kàmə̀ foŋə yəə dzwì nì tyâ, kə foŋə sòʼò yəə à də̀ iwe i fə̀nə̀ nəniy, dzìy tsə nə̀, “Ukali wiy də awò Zə̀kìy aŋwòə Mwe ə̀ mbyi Kə̀zə̀ toŋə wù wə̀ ù kwu nəniy daʼa kə kə tsîy fyi nəniy, ù də̀ kədòŋ.

⁷Bù nənìy ŋgà səaŋi ŋgà ki dyoʼo soʼo, ŋgà nyiə̀ we nə̀ ŋkwiʼi miy aŋwòə soŋə fiy mə kpe awò Yesù wə̀ ù də nəniy yəə à də̌ Wà ndzù ani dòʼò anə fyiə kəmòʼ nə̀ aghě we yiy, yəə wìŋəmə̀ nə̀ nìy nəniy wìyəŋi. Aghee we yiy mə byay na təŋ iwe i ghu yiy ani bù təm dòʼò dzəŋi nə̀ we.

⁸Zə̀kìy mə zəŋi ghu nə̀ ghu doʼò mâ tsə aghê zwe yiy, yəə à də̌ wìyəŋi wə ù dziy nîy ŋəm. Ù dzə̀ŋì kəli nəniy ndzwu tə̀soŋə̀ tə̀ tə mwâ nəniy, zwe sòʼò. Ndzwu tə̀soŋə̀ tə̀ tə mwâ nəniy zwe sòʼò, tə dê bə̀ nə̀ aghee Kəzə̀ yə̀ zəŋə àyiə yə a də nəniy tsitsi anə sə k-a-zə̀.”

⁹Tsə̀ndii ì ghè yə̀ dyaŋi dzày tsə awò mìə̀ nə̀, “Twǎ na tsə ayiə yə. Zə̀kìy kî lwì àghù yə̀ ghu nâm bə̂ nəniy ghu anə inyi ìniiy iwè i wù wə̀ ù də yəə Wà ndzù.” U dzày sòʼò awò mìə̀ nə̀, “Ayiə yə Zə̀kìy dzîy nəniy, a də àsoŋə̀ yìy.”

¹⁰Mə dyaŋi nyaʼa tswi tsə akə̀lə̀ ìfwe i tsə̀ndii ə̀ Kə̀zə̀ yə̀ ani fwùlì we tsə̀ndii yə kwuni dzày tsə awò mìə̀ nə̀, “Kə̀ fwulì dzə̀ miə, mə mâŋ də̌ wè kə̀fàʼ ə̀ Kə̀zə̀ yəə à də̀ wô sòʼo, də̀ sòʼo wè kə̀fàʼ yəə à də̀ aghê liy yə ghu bɛmə nəniy awò Zə̀kìy, dzìy yə̀ sòʼò àyiə awò àghù yìy kwùmə̀ yə̀ nə̀ Yesù. Zə̀kìy də wù wə̀ wò kwu nəniy ani fwùlì aŋwòə à də̌ Zwày k-a-zə̀ kə nyiə̀ nəniy aghû yìy nə̀ daʼa kiy ani nàʼà ntwum yə ì də nəniy ìsòŋə̀ yìy awò àghè liy yiy kwùmə̀ yə̀ nə̀ Yesù.”

¹¹Mə dyaŋi kòʼ byiwuŋ kiy fwiy tsə nəniy, mə fə̀mì tsə ŋkhinyàm kə̀ fəmə kiy. Wù wə̀, ù kə nyi doʼò anə ŋkhinyàm kə̀, ghu kə twoŋə we nə̀ à də̀ Ayiə soŋə̀ yìy, ù dè soʼò nəniy ayiə yə a də nəniy àsoŋə̀ yìy kùmə̀ yə̀ nə̀ Zə̀kìy. Ù saʼa àghè dzə̀m anə ayiə tsitsi yiy, ŋwà sòʼò ŋgə̀d nə̀ àghù yə̀ ghu dzwəə nəniy we anə ayiə tsitsi yiy.

¹²Asə ə we yiy bàŋə̀ yəə à də̀ nɛm kə uvə̀lə̀, u dzə̀ŋì kəli ndə̀mə̀ ùntyàŋì u kədòŋ anə tuw kə we. Ù kə kwu izəd ìliy yiy i kə twâ doʼò nəniy azoŋə̀ we, wè lìy kə kwu dzə̀ wày à kə kwu kə we imyìŋì i ghè yə̀.

¹³Ù kə dzə̀ŋì kəli tə ndzwu nə̀ ghu mə fwò nyi tswi tsə anə təkàŋ, izəd i we yiy kə də̌ nə̀ à də̌ “Dzə̀ Kə̀zə̀.”

¹⁴Sǔgôʼ t-a-byiwuŋ tiy kə dzwùmə̀ yə̀ we nə̀ ghu mə nyi dòʼò kə anə uŋkhinyàm ù fəmə wiy, dzə̀ŋì kəli kə ndzwu tə̀ soŋə̀ tə̀ fəmə tiy anə iwè nə̀ tə zwe dzwàbə̀ ŋwò.

¹⁵Dzə̀ ə̀ we də̀ yəə à də̌ Kwàb ìtwabə̀ yə̀ ù kì kyàʼà nəniy aghû yə̀ ghu ŋwunə nəniy ate. Ù kì saʼa ghu nə̀ àwo àtaw yiy. Ù kì dyemi sòʼò àghù yə̀ ghu dzəə nəniy nə̀ we yəə wù nə̀ tsukə nəniy ubaŋ wiy an-a-ŋwuk. Ayiə yə à dzə̀m, ù kì zəŋə nyìə̀ awò Zə̀kə̀ kə kwu nəniy daʼa kə kə tsîy fyi nəniy aŋwòə Zə̀kìy ŋge ŋə̀mə̀ nə̀ fòŋ nə̀ ghu anə ayiə ghu àbɛbə yə ghu zəŋə.

¹⁶Ghu kə twà na izəd anə sàŋə̀ we an-a-bìy, izəd i ghè yə̀ kə də̌, “Dòŋ kə udòŋ ùdzə̀m nə̀ Mwe azoŋə̀ nə̀ mwe à dzə̀m.”

¹⁷Mə kòʼ sòʼò tsə̀ndii ə̀ Kə̀zə̀ ì təmi doʼò nəniy anə tsə̂, u toŋə tsə ŋwùni mə ìndzə̀m, ìn zee idoŋ anə dzə̀ ìtaw, dzày yə̀ a ghu nə, “Ghà bû dzəŋə bə̂ anə inyi ìsoŋə̀ yə̀ Zə̀kìy kaw na nəniy awò ghà!

¹⁸Bù nənìy ghà bû fwu nyâm tə iwè tə udòŋ, nə̀ tə ghě ulàŋ à nê yìy, nə̀ nyàm tə iwè tə tə sǔgôʼ tìy, nə̀ nyàm tə uŋkhinyàm tìy nə̀ tə aghù yə̀ ghu kə nyəŋə bə̂ nəniy anə uŋkhinyàm. Bǔ fwu nənìy nyâm tə iwè tə ghè àdzə̀m tìy, nə̀ nyàm tə iwè tə ghu yə̀ ghu kə də tsə nəniy ukwə̂d wìy, nə̀ tə ghù yə̀ ghu kə də wày ukwə̂d wìy, Ghà bû fwu soʼò nyàm tə iwè tə ghè soŋə̀ tìy nə̀ liy mə̀ ghù mìy.”

¹⁹Mə dyaŋi kòʼ nyàm yə̀ nə̀ ùdòŋ u nàʼà tə mbyi tiy nə̀ sǔgôʼ tə ghu tiy ghu dzəŋə bə̂ nəniy ani ŋwày tsam nə̀ wù wə̀ ù kə nyi doʼò anə kəŋkhinyàm, dzə̀ŋì kəli sòʼò ndzwu tə fəmə tiy, nə̀ sǔgôʼ tə we tiy soʼo.

²⁰Kə̀litò ə kwuni kwi ŋwò yə̀ nyàm yə̀ nə̀ wè ntwùm ə̀ Kə̀zə̀ ù gûw wə̀. Wè ntwùm ə̀ Kə̀zə̀ ù guw wə̀ kə zəŋi mali tə ayiə anə sə kə nyàm yə̀. À yù də̀ utsəe wə ù kə nɛb nəniy aghû yə̀ ghu kə bɛmə yə̂ nəniy nə̀ ghu kwe tsə tsəe kə izəd i nyàm yə̀ anə ntwùmə̀sə mə̀ ghu, fwùlì sòʼò mwòʼo fə fə kə də nəniy zəəŋi kə nyàm yə̀. Zə̀kìy nìy màʼà nyi yə̀ nyàm yə̀ anə uvə̀lə̀ wə̀ u də nimə kòʼò wày, nə̀ wè ntwùm ə̀ Kə̀zə̀ ù gûw wə̀ nə̀ ghu də àtaw yiy. Ghu fwu awote anə uvə̀lə̀ wə̀ u də nimə kòʼò wày.

²¹Wù wə̀ ù kə nyi doʼò a nə̀ kə̀ŋkhinyàm, u wiy màʼà tsə sǔgôʼ tə̀ liy tə anə kwab yə ì kə fyiə bə̂ anə idzwə iwe. Ŋwùni mə ìndzə̀m ə nyi iwe anə avə̀n ə ghù yə̀ ù kə wiy nəniy.