Read Isu Tway dè fyi 2 Bible Online

Tway dè fyi 2 - Isu bible

Tway dè fyi 2

¹Wù wə̀ ù kə də yəə à də̌ Wà Wù, u dzày bə̀ â mìə̀ nə̀, Wò kwu ani twà dzày yə̀ awò wù wə̀ ù niʼà nəniy ntwùm ə̀ Kə̀zə̀ a Efesùs, a we nə̀, “Ntwum yə̀ ŋwò bə̀ awò wù wə̀ ù kwi kəli nəniy nsǐbələ̀ mə̀ ìnsèmbe anə wo kə̀ nyiə kiy, bwìy tsìy yə̀ sòʼò anə uzə ufyiə wə ghu tyimə nia nəniy kaʼì tìy ate.

²Mə kwu ŋwô àyiə dzə̀m wò zəŋi nəniy. Mə kwu sòʼò ŋwò yəə wò fàʼ nəniy ate nə̀ daʼa kiy nə̀ yəə wò kwè nəniy fòŋ ate. Mə kwu ŋwǒ nə̀ wò wày dzə ani bɛmə dzə̀ àyiə yə aghê àbɛbə yiy zəŋə nəniy. Wò mə mwàmkòʼ aghû yə̀ ghu dzîy nəniy nə̀ ghu də aghee ntwùm ə̀ Yesù, wò kəli fyi kə soʼò nəniy nə̀ ghu də aghê àguw yiy.

³Wò mə fii, kwù sòʼò fòŋ bòʼ mìə̀, wò kwuni nam kwu kə fòŋ ìtaw yìy ani fàʼ anə izəd yam.

⁴Fòŋ kwuni zabə miə azoŋə̀ wò anə iyiə ìliy yiy. Wò kàm liə dzə̀ way awizə̂ yiə̀ yə̀ nyiə ghu bɛmə nəniy awò Zə̀kìy anə ayiə wò kə liə nəniy ghu ate isə anə sòŋə fə wò kə bɛmə nəniy awò mìə̀,

⁵kòʼo kə yəə wò bvə̌! Wò kwu ani bwi na tsə ani zəŋi ayiə àbɛbə yiy, wò muə̀ tsə anə ayiə yə wò kə bôʼ muə nəniy ate anə sòŋə fə səsə fə wò kə bɛmə nəniy ate awò Yesù. Bəə wò zù kə nə̀ sə kiy ani zəŋi ayiə àbɛbə yiy, mə ki bû nyiə̀ wò nə̀ mfəm, mə nîy ŋwô kə ufyiə yiə̀ wə̀ wò gaʼa nia nəniy kaʼì tìy ate anə lòʼo tə u kə̀ tiy tsə nəniy ate.

⁶Iyiə ìdzoŋə̀ yə̀ wò kwuni zəŋə nəniy, i də nə̀ wò bà ŋwò ayiə yə aghee dzəŋə kə Nìkolòs yìy zəŋə nəniy. Ighəd soʼo anə ayiə yə mə bâ nəniy ayiə aghè yə̀.

⁷Bəə ghà kwu nəniy utswuŋi wiy, ghà kwu ani zuw ayiə yə Zwàykə̀zwekiy dzîy nəniy awò ùdzəŋə u ndàw Kə̀zə̀ wìy. Mə kî nyə̀ tsə kə̀daʼa awò aghù yə̀ ghu təm nyi dzə̂ nəniy ambvə̂ntsə ani niə utam u ŋkàʼ wə̀ u nyiə̀ nəniy imuə itsà yìy, u də nəniy anə Palàdâys.”

⁸Wò kwu ani twà dzày yə̀ â wù wə̀ ù nìʼà nəniy ntwùm ə̀ Kə̀zə̀ a Sìminà, a we nə, “À də̀ miə mə zəŋi nəniy nə̀ ufyiə udzə̀m kaʼ tsə, à də̀ sòʼò miə, mə zəŋə nəniy nə̀ ufyiə udzə̀m u mây. Miə wə mə kə pfə dzə̂, kàm zɛ̀mə̀ dzwoŋi kə anə ipfə, mə muə nəniy nyiə, à də̀ miə mə twum bə̂ nəniy ntwum yə â ghà.

⁹Mə kwu ŋwô utswə̂d yiə̀ wìy. Mə kwu ŋwô nə̀ wò la ŋwò, ghà kwuni də̀ aghê kumə yiy. Ani ndzə̀m dzày tsə ayiə àsoŋə̀ yìy, wò kwumə ŋwò. Mə kwu ŋwô àyiə ghù yə̀ ghu kwoʼo nəniy iwe yiy nə̀ ghu də aghee Dzû nə̀ ghu kwuni wày dzə. Ghu dzîy àyiə àbɛbə yiy kwùmə̀ yə̀ nə̀ wò, ghu də aghee dzəŋə kə Satàn

¹⁰Ghà kə tsəŋ dzə̀ ifii yə ghà kî kwu ani fii. Ghà kəli tsə nə̀ àmbvə̂ntsə nyiə̀ dzǐy zəŋi tsə nə̀ aghù yə̀ ghu bâ gha, ghu kwi fê na gha àliy a ndàw ntsaʼ ani mwàmkòʼ ibɛmə ghəli. Ghà kî tsìy anə ntswə̀d mə̀ sòŋə̀ mìy anə məntsukə in vəm. Bəə ghu dziy bôʼ wiy kə gha, Kəə ghǎ nə̀ kwuni bvə̀ fyiə dzə̂ anə ibɛmə yə ghà kwu nəniy azoŋə̀ mìə̀. Bəə ghà zəŋi nəniy ghii, mə ki nyiə̀ ghà nə̀ namə kiy à də nəniy imuə itsà.

¹¹Aghû yə̀ ghu kwu nəniy utswuŋi wiy ghu kwu ani zuw ayiə yə Zwàykə̀zwekiy dzîy nəniy awò àghě udzəŋə u Kəzə̀ wìy. Aghû yə̀ ghu kî təmə nyiə̀ nəniy, ghu kî kəli dzə̀ wày utswə̂d wìy nə̀ ipfə yiy anə uvə̀lə̀.”

¹²Wò kwu ani twà dzày yə̀ awò wù wə̀ ù niʼà nəniy ntwùm ə̀ Kə̀zə̀ a Pelgamùm, a we nə, “Ntwum yə̀ ŋwò bə̀ awò wù wə̀ ù kwu nəniy kwab ə̀ tsam yə ì twabə nəniy ubə̂d ù dzə̀m.

¹³Mə kwu ŋwô loʼo kə ghà muə nəniy ate, ghà muə anə lòʼo kə Satàn saʼa nəniy ate. Ghà kwuni namə faʼà nəniy ayiə yə a dê nəniy nə̀ ghà bɛmə ŋwô awò mìə̀. Ghà kamə bvə̂ te sə dzə̂ anə ibɛmə yə ghà kwu nəniy awò mìə̀. Ghà kə bòʼ kwu ibɛmə anə sòŋə fə ghu kə wiy maʼà tsə nəniy Antipàs wè kə̀fàʼ wam ùdzòŋə̀ wìy anə lòʼo kə Satàn saʼa nəniy ate.

¹⁴Mə kwuni kwu àyiə bɛbə àliy yiy gha zəŋə nəniy. Aghê àliy anə uzə ghii, ghu zəŋə àyiə yə Balàm tyi dê nəniy. Balàm kə tswù Balàk nə̀ ù fàʼ ìyiə ìbɛbə yiy. Balàk ə zəŋə tsə aghee Islàel, aghee Islàel yǐy zəŋi tsə ibɛb anə ayiə yə ù kə zəŋi tsə nəniy nə̀ ghu nyi ufânyiə wə ghu sâ nyə̀ dzə̂ nəniy â mwòʼo miy. U zəŋə sòʼò nə̀ ghu si lyaŋə.

¹⁵Aghee liy yiy soʼo anə uzə ghii ghu zəŋə àyiə àbɛbə yə aghee dzəŋə kə Nìkolòs kə tyi dê nəniy.

¹⁶Yəə i də nəniy ghii, ghà kwu ani kyèmì ŋwò bə̀ anə ayiə àbɛbə aghè yə̀ ghà zəŋə nəniy. Abu à də wày aghii, mə kî kwùlə̀ bè ŋwò akə̀lə̀ ghà, mə ki ŋwây àghè àbɛbə yə anə kwab yə ì fyiə bə̂ nəniy anə idzwə yam.

¹⁷Bəə ghà kwu nəniy utswuŋi wiy ghǎ zuw ayiə yə Zwày k-a-zə̀ kìy dzîy nəniy awò àghě udzəŋə u Kəzə̀ wìy. Wù wə̀ ù kì təmə nyiə̀ nəniy Satàn, mə ki dê we nə̀ twìʼì kə ufànyiə kə mə kə na nəniy. Mə ki nyiə̀ soʼò we nə̀ ìtay ìfəmə yiy, mə ki twâ tsə soʼò ìzəd ìfyiə yiy ate. Wè lìy kì kəli dzə̀ wày izəd i ghè yə̀. À kì kyilə tsə kə wù wə̀ mə kî nyiə̀ yə̂ ìtay ighè awò we.”

¹⁸Wò kwu ani twà dzày yə̀ awò wù wə̀ ù niʼà nəniy ntwùm ə̀ Kə̀zə̀ a Tàytilà, a we nə, “Ntwum yə̀ ŋwò bə̀ awò Wà Kə̀zə̀ ù kwu asə a byaʼa nəniy yəə à də̀ uvələ, awee we yiy mwâ soʼò nəniy yəə à də̀ fyiə kə̀tsəə kə ghu ŋwôʼ nəniy anə intsə.

¹⁹Mə kwu ŋwò yəə ghà kə muə nəniy muə̀ təli tiy ate. Mə kwu ŋwô nə̀ ghà kə kwu iliə azoŋə̀ wù ùmoʼ umòʼ. Mə kwu sòʼò ŋwoə ndzòʼò ìbɛmə yə ghà kwu nəniy â mìə̀, kwu sòʼò àyiə yə ghà kə faʼà nəniy awò mìə̀. Mə kwu ŋwô yəə ghà kwê fôŋ tìy ate. Mə kwu ŋwô nə̀ ayiə yə ghà faʼà nəniy nyiə̀ a mə tsìy fyi ayiə yə ghà kə faʼà nəniy anə sòŋə̀ fə ghà kə bɛmə nəniy awò mìə̀.

²⁰Utswə̂d wə̀ mə kwuni kwu nə̀ ghà à də̌ nə̀, Ghà kə bɛmə na yə nə̀ wìyəŋi wə izəd ghu tyoŋə nə̀ à də̀ Dzezebèl anə fwumi kəli ù kə tyoŋə nəniy uwu we wiy nə̀ ghe də wè ntwùm ə̀ Kə̀zə̀. Ù maa zəŋi anə ayiə yə ù kə tyi də̂ nəniy nə̀ aghee kəfàʼ yamə kaʼ yə ani zəŋə ayiə kəlyaŋi yiy. Zəŋi sòʼò nə̀ ghu ki nyiə mfànyiə mə ghu sâ nyiə̀ dzə̂ awò mwòʼo miy.

²¹Mə mə nyìə we nə̀ soŋə fiy nə̀ ù kyɛ̀mì ŋwò anə ayiə we àbɛbə yiy. Ù kwuni də liə way ani kyemì ŋwò anə ayə we àlyaŋə yə.

²²Yəə i də nəniy ghii, mə kî byòʼò myàʼà we anə ukày nə̀ ìdzàŋ yìy. Mə ki zəŋi tsə soʼò àghù yə̀ ghu zəŋə nəniy lyaŋi kiy nə̀ we tə̀ ghu fii tsə ifii ìsoŋə̀ yìy, à mày kə bəə ghu kyemì ŋwò bə̂ anə ayiə àbɛbə yə ghu zəŋə nəniy nə̀ wìyəŋi wiy.

²³Mə ki wiy maʼà soʼò àghù yə̀ ghu dzwumə̀ nəniy ayiə yə ù tyi dê nəniy. Aghee udzəŋə u Kəzə̀ wìy ki kəli tsə nə̀ mə də wù wə mə koʼò nəniy fôŋ tə ghù tìy, kwu sòʼò àyiə yə ghu moʼò nəniy. Mə kî tsə dzwəŋə wù ùmòʼ umòʼ anə ayiə àbɛbə yə ù zəŋə nəniy.

²⁴Gha àliy yə a Tàytilà, ghǎ kə̀ kwuni dzwumì dzə̂ nəway ayiə Dzezebèl àtyi de àbɛbə yiy. Ghà kə dzwumì dzəŋə dzə̀ ayiə yə. Aghû yə̀ ghu dzwumə̀ nəniy we ghu tyoŋə nə̀ à də̌, ‘Nùw tə yiə tə soŋə̀ tə̀ Satàn tyi dê nəniy awò àghè àguw yə.’ Mə dzîy bə̀ â ghà nə̀, mə kî tyiŋi dzə̀ wày gha nə̀ ghà na lâŋ kə̀ taw kə̀ liy kiy.

²⁵Ghà kwuni kwu kə anə təmi taw tsə anə ibɛmə yə ghà kwu nəniy azoŋə̀ mìə̀ ani zù kwùm soŋə fə mə kî bè dzwəŋə nəniy ate.”

²⁶Wù wə̀ ù kì təmə nyiə nəniy Satàn, zù kə sòʼò nə̀ səkiy ani zəŋi ayiə yə mə liə, ani zù kwùm anə sòŋə fə ghu nî pfəə nəniy ate, mə ki nyiə̀ we nə̀ ndzòʼò daʼa kə Təli wam kə nyiə̀ nəniy awò mìə̀ ani saʼ mbyi.

²⁷Ù ki saʼa naʼà tə ghè tə̀ nə̀ ù kwu way mwuli kə̀ kwoʼo kiy azoŋə̀ nàʼà tə ghè tə̀. Ghu ki dyemi aghee ghè yə̀ yəə wù nì dyemə itsaʼ yiy nə̀ wee ani bwam fə ntwà ate.

²⁸Mə ki nyiə̀ soʼò we nə̀ sǐbələ̀ fə utsuk ù zwe fiy ani dè tsə nə̀ ù mə təm nyi anə yiə yə təli wam kə nyiə̀ nəniy miə nə̀ daʼa kiy.

²⁹Aghû yə̀ ghu kwu nəniy utswuŋi wiy, ghu zuw ayiə yə Zwàykə̀zwekiy dzîy nəniy awò àghě udzəŋə u Kəzə̀ wìy.