Read Isu Tway dè fyi 20 Bible Online

Tway dè fyi 20 - Isu bible

Tway dè fyi 20

¹Mə kòʼ tsə̀ndii ə Kə̀zə̀ ì tswi bə̂ nəniy an-a-byiwuŋ, i kwu dzwə̀ kə ntswam k-a-bwòʼ kə̀ nə̀ tə̀tàw kə ntsaʼ kiy anə awo.

²U bù kwi tsə zwə yə, toŋə zwə̀ ìwîy yə̀ à də nəniy àmbvə̂ntsə də̀ sòʼò Satàn, u kwù na yə̀ we anə ntàŋə̀ tə̀ ŋə̀mə̀ kaam.

³Tsə̀ndii yə nìy màʼà nyi tswi yə̀ we anə ntswam k-a-bwòʼ kə̀ fè na yə̀ we awote. U fè na tsə bwôʼ kə ghè kə̀ anə ayiə yə wè lìy də wày ani fwiy. Ani zəŋi tsə nə̀ Satàn kə kâm nɛb sòʼò aghee nàʼà tə mbyi tiy, à mày kə nə̀ ntàŋə̀ tə̀ŋə̀mə̀ kaam mə tsìy ŋwò. Abu soŋə fə ghè fə̀ tsìy tsə dzə̂, tsə̀ndii yə̀ kwu ani bù dzwə̀ màʼà fyi bə̀ we anə kə̀mə̀ fə fəsòŋə.

⁴Mə kòʼ ndàŋ tə udòŋ, aghû yə̀ ghu kə də nəniy ate a də̌ nə̀ Zə̀kìy mə nyìə ghu nə̀ daʼa kiy nə̀ ghu saʼ aghê mbyi. Mə kòʼ sòʼò àghù yə̀ aghê àbɛbə yiy kə wiy maʼà nəniy ghu bòʼ ntwùm ə̀ Kə̀zə̀ yə̀ ghu kə niʼà nəniy kwùmə̀ yə̀ nə̀ Yesù. Aghû yə̀ kə twe təŋ ŋwô ani fwùlì nyàm yə̀ nə̀ zəəŋi kə we kiy, ghu twe sòʼò ani kwe tsəe kə izəd i nyàm yə̀ ghu kə kwe nia nəniy anə ntwùmə̀sə mə̀ moo anə awo aghù yə̀ ghu kə fwulə we. Ghu mə zɛ̀mə̀ dzwoŋi bə̀ bù dòʼò tsə anə ndàŋ tə udòŋ. Zə̀kìy mə nyìə ghu nə̀ daʼa kiy nə̀ ghu saʼ aghû. Ghu kî dyòʼò fwumə sòʼò nə̀ Kə̀litò anə ntàŋə̀ ŋə̀mə̀ tə̀ kaam.

⁵À yù də̀ Izɛmə̀ dzwoŋi isəsə yə i nî fyiə nəniy nə̀ àghè pfə yiy. Aghê liy yə̀ nì zɛ̀mə̀ dzwoŋi dzə̀ wày anə ipfə à nì mày kə nə̀ ŋəmə̀ tə̀ kaam mə tsìy ŋwò.

⁶Aghû yə̀ ghu ni də fwumi nəniy nə̀ àghù yə̀ ghu nî zɛmə̀ bə̂ anə ipfə anə ndzòʼò soŋə fə, ghu nî ŋge dyoʼo ŋwò. Ghu də aghee Kəzə̀. Ghu nî kàm pfə dzə̀ wày anə zəŋi yə̀ nsòŋə imbè. Ghu nî kwuni dyòʼò tsə àghè lwaʼa yiy anə fàʼ k-a-zə̀ nə̀ fàʼ kə Kə̀litò kìy ghu ni saʼ fwumi nə̀ we anə ntàŋə̀ tə̀ŋə̀mə̀ kaam.

⁷Ani buu ŋə̀mə̀ tə̀ kaam tsîy ŋwò tsə nəniy, ghu ni dzwə̂ màʼà fyi bə̂ Satàn anə tswam k-a-bwòʼ kə̀.

⁸Ani bu ghu fwiy maʼà tsə Satàn, ù nî zù nɛb kyabi tsə̀ àghù anə nàʼà tə mbyi tə̀dzə̀m. Ghu tyoŋə nàʼà tə ghè tə̀ nə̀ à də̌ Gôg nə̀ Magòg. Satàn nì nìy bə̀ àghù yə̀ awote àdzə̀m ù dzəŋə na bə̀ ghu anə lòʼo kə ghu nî ŋwà nəniy ate. Aghê ghè yə̀ nì ŋge dùw yəə à də̀ kəsisi anə iŋgwùŋə i dzwî.

⁹Sǔgôʼ tìy ni bwîy tsî yə̂ loʼo tədzə̀m anə mbyi, ghu dzɛ̀mə̀ na tsìy kə aghee Kəzə̀ à zwe yiy anə fôŋ, anə inaʼ yə Zə̀kìy kə liə nəniy. Zə̀kìy ni kwuni twum tswi bə̂ ùvələ an-a-byiwuŋ u bû fwu màʼà kə sǔgôʼ tə̀ ghu kə dzɛmə̀ na tsîy nəniy aghee Kəzə̀ yìy.

¹⁰Àmbvə̂ntsə wə ù kə nɛb nyiə̀ nəniy ghu, ghu ni twùŋə̀ màʼà nyi yə̀ we anə uvə̀lə̀ wə̀ u də nimə kòʼò wày anə lòʼo kə nyàm yə̀ kə də nəniy ate nə̀ wè ntwùm ə̀ Kə̀zə̀ ù gûw wə̀. Ghu ni fyaʼa awote nə̀ ntsukə nə̀ ntsə̀ tìy anə nsòŋə indzə̀m.

¹¹Mə kə kòʼ Kə̀zə̀ kə doʼò tswi nəniy anə faŋkwoʼ kə ndàŋə̀ kə̀dòŋ ìfəmə̀ yìy. Kəbyiwuŋ nə̀ mbvə̀dintsə kiy saŋ ŋwò tsə, wè lìy kwuni kàmə̀ kòʼò wày byiwuŋ kiy moo kə̀mbvə̀dintsə nə̀ Zə̀kìy mə byɛbi màʼà.

¹²Mə kòʼ àghè soŋə̀ nə̀ liy mə̀ ghù yə̀ ghu kə pfə tsîy dzə̂ ghu təmi doʼò nəniy anə sə kə ndàŋə̀ kə̀dòŋ. Ghu fwiy na uŋwàʼà wə̀ u kə dê nəniy fàʼ kə̀ aghê dzə̀mə̀ fâʼ nəniy fə anə mbyi. Ghu fwiy fwuli kə ŋwàʼà kə̀li kiy ghu tyoŋə nəniy nə̀ à də̌ ŋwàʼà kə imùə̀, ŋwàʼà kə̀ Zə̀kìy twâ nəniy azəd ə ghù yə̀ ghu kwu ani kəli imuə̀ itsà. Zə̀kìy saʼ aghû yə̀ ghu kə pfə dzə̂ anə ayiə yə ŋwàʼà kə̀ kə dzîy nəniy nə̀ ghu kə fàʼ ŋwò.

¹³Aghû yə̀ ghu kə pfə doʼò nəniy anə dzwì ìnè yìy ghu zè kə akə̀lə̀ Kə̀zə̀ nə̀ ù saʼ ghu. Aghû yə̀ ghu kə də nəniy anə inaʼ i pfə, ghu bù, bù təmi bə̀ anə sə kə ndàŋə̀ kə̀dòŋ, Zə̀kìy saʼa wù ùmoʼ umòʼ anə ayiə yə wù ghè wə̀ kə fâʼ nəniy fə anə mbyi.

¹⁴Aghû yə̀ ghu kə də tsə nəniy anə lòʼo kə aghee pfə zê dyòʼò tsə̀ nəniy ate, ghu lyimə, toŋə aghû yə̀ ghu kə də kə̀ bɛmə nəway Zə̀kìy. Zə̀kìy nìy màʼà yə̀ ghu anə uvə̀lə̀ wə̀ u də nimə kòʼò wày, lòʼo kə aghee pfə nəniy ate ani zəŋi yə̀ nsòŋə mə̀ pfə mìy ìmbè.

¹⁵Ghu kə nìy kə àghù yə̀ à dzə̀m azəd ə ghu yiy kə də wày anə ŋwàʼà kə imùə̀ itsà, màʼà nyi yə̀ anə uvə̀lə̀ wə̀ u də nimə kòʼò wày.