Read Isu Tway dè fyi 21 Bible Online

Tway dè fyi 21 - Isu bible

Tway dè fyi 21

¹Mə dyaŋi kòʼ yə̀ byiwuŋ kə̀fyiə kiy nə̀ mbvə̀dintsə kə̀fyiə kiy. À kə də̌ nə̀ byiwuŋ kə səsə kə nə̀ mbvə̀dintsə kə səsə kə̀ mə saŋ ŋwò. Dzwìy ìnè yǐy kàm wày soʼo.

²Mə dyaŋi kòʼ yə̀ ìnaʼ i Yèlusalèm ì fyiə yiy à də nəniy inaʼ i Kəzə̀ ìzwe yiy. I tswi bə̀ an-a-byiwuŋ nə̀ i ŋwô bə̀ awò Zə̀kìy. Zə̀kìy mə byay na yəə à də̌ wìyəŋi wə ghu dzəŋì na nəniy ndzwu tə inìy iwè tə̀ zwe tiy anə uwè u we, ù limə nəniy ŋə̀mə̀ we.

³Mə zuw sòʼò dzə̀ ìlìy yiy ì dzìy fyiə bə̂ nə̀ ùtaw wiy anə lòʼo kə ndàŋə̀ kə̀dòŋ ə̀ Kə̀zə̀ kə də ate nə̀, “Kòʼò nənìy, Zə̀kìy kî mùə̀ fwumə nyiə nə̀ àghù yìy, ù ki də anə fwumi kə ghu, aghee ghè yə̀ ki də aghee we, ù ki də fwumi soʼo nə̀ ghu nə̀ uwe uwe wiy. Ù ki də soʼo Zə̀ kə ghu kiy.

⁴Yəə i də nəniy ghii, ù kì zəŋə tsə nə̀ ghu kə kâm mwe dzə̀. À ki də yəə wù nə dzây nə̀ ù zə̀d màʼà tsə mənsə anə utuw u ghu. Ghu ki də kàm wày dzə ani pfə moo ani mwe moo ani kàm dìy. Ghu ki də kàmə̀ zuw sòʼò wày ìfwabi yiy aŋwòə ayiə wiy yə̀ mə tsìy ŋwò.”

⁵Zə̀kə̀ kə kə doʼò tswi nəniy anə ndàŋə̀ kə̀dòŋ, u dzày tsə nə̀, “Zuw nənìy! Mə mə zəŋi ayiə dzə̀m nyiə a mə dòʼo àfyiə yiy.” U dyaŋi dzày bə̀ awò mìə̀ nə̀, “Twǎ na tsə ayiə yə mə dzây bə̂ nəniy â wò aŋwòə ayiə ghè də̀ ayiə yə a kwu ani bù fyi àsoŋə̀ yìy, à də̀ sòʼò àyiə yə wù də ani gaʼ na yə̀ sòʼò fòŋ ate.”

⁶U kàm dzày fəli tsə nə̀, “Mə mə zəŋi mà àyiə yə à dzə̀m. Mə də wù wə̀ mə kə zəŋi nə̀ ufyiə udzə̀m u kaʼ tsə, də̀ sòʼo wù wə̀ ù kì zəŋə nə̀ ufyiə udzə̀m u mây. Mə kî nyiə̀ ŋwò mwi mə̀ muə mìy awò àghù yə̀ àdzə̀m fòŋə̀ mwi kî swəə nəniy ghu. Mwi mə̀ ghè mə̀ kì ŋwò bə̀ anə dzwì fə̀ fə nyiə̀ nəniy ìmùə̀ itsà yìy. Ghu ki mu nə̀ ghu kə̀ tsə nəway fyiə kəli kiy ate.

⁷Aghû yə̀ à dzə̀m ghu kî təmə nyiə nəniy Satàn, mə kî nyiə̀ ŋwò ùfyiə wə awò ghu, mə ki də Zə̀ kə ghu kiy ghu ki də soʼo awa yamə.

⁸A kwuni bû aghû yə̀ ghu kə də kwu way fôŋ tə̀ taw tiy, nə̀ àghù yə̀ ghu kə nyəli maʼà dzə̂ ìbɛmə i ghu yiy, nə̀ àghù yə̀ ghu kə zəŋə nəniy ayiə dzəə yiy, nə̀ àghù yə̀ ghu wiy myaʼà nəniy àghê liy yiy, nə̀ àghù yə̀ ghu kə lyaŋə nəniy, nə̀ àghù yə̀ ghu zəŋə ayiə məŋkàŋ yìy, nə̀ àghù yə̀ ghu fwulə̀ nəniy mwòʼo miy, nə̀ àghè àguw yiy àdzə̀m, ghu kî fyaʼa anə uvə̀lə̀ wə̀ u də nimə kòʼò way. Aghû yə̀ ghu nî pfə nəniy anə uvə̀lə̀, ani zəŋi yə̀ nsòŋə mə̀ ghu mə̀ pfə̂ mìy ìmbè.”

⁹Tsə̀ndii imòʼ anə tsə̀təndii tə ìsèmbe ghu kə boʼò kəli nəniy ubîy ukaŋ wə ntswə̀d mə̀ ìnsèmbe kə də nəniy ate, i zù bù dzày tsə awò mìə̀ nə̀, “Bù, mə zû dê bə̂ wò nə̀ àghù yə̀ ghu təm doʼò dzəŋi nəniy nə̀ Wù wə̀ ù də nəniy yəə à də̌ Wà ndzù. Aghee ghè yə̀ kì dyòʼò awò Kə̀litò yəə də̌ wìyəŋi ù dziy nîy anə ŋəm.”

¹⁰Zwàykə̀zwekiy bù azoŋə̀ mìə̀ nə̀ daʼa kiy, tsə̀ndii yə nìy ŋwò kwoʼ yə̀ nə̀ mìə̀ idoŋ idòŋ anə tuw kə ukàʼ. U dè bə̀ mìə̀ nə̀ ìnaʼ i Yèlusalèm ìfyiə yə à də nəniy inaʼ i Kəzə̀ ìzwe yiy i ŋwò tswii bə̂ awò Zə̀kìy an-a-byiwuŋ.

¹¹Inaʼ i ghè yə̀ ə mwà təŋə ghii awò ìmwày i Kəzə̀ yìy. Imwày i ghè yə̀ də̀ yəə à də̌ atay àsòŋə̀ yə̀ ghu tyoŋə nə̀ à də̀ Dzaspà. Inaʼ i ghè yə̌ zwe yəə à də̌ fə̀intəntay.

¹²Inaʼ i ghè yə̀ kwu mbà ìdabə̀ yìy ghu twiy na tsîy nəniy nə̀ mfə̀b mə̀ tə̀ mbà mìy ate ìnvə̀m nə̀ fə̀b mìy ìmbè. Tsə̀təndii t-a-zə̀ tìy dòʼò tsìy yə̀ ìmoʼ imòʼ anə mfə̀b mə̀ ghè mə̀. Ghu twà na azəd ə sələ ndaw tə Islàel ate ìvəm nə̀ ghe tìy ìbè anə fə̀b mə̀ tə̀ mbà mə̀ ghè mə̀.

¹³Nə̀ ùkwe ùkwə̂ wìy anə bə̀d kə̀ tsə̀ kə fyiə kwoʼo bə̂ nəniy ate, mfə̀b mə̀ tə̀ mbà mìy də̌ awote inti. Anə ukwe ùnyiə wiy anə bə̀d kə̀ tsə kə fyiə kwoʼo bə̂ nəniy ate mfə̀b mə̀ mbà mìy də̀ awote inti. Anə bə̀ kə tsə̀ inyi yiy nimə nəniy ate, mfə̀b mə̀ mbà mǐy də̀ awote inti.

¹⁴Bâʼ kə mbà kə̀ kə kə tsîy nəniy anə inaʼ i ghè yə̀, kə kə kwu atay tsə kə ndaw àvəm nə̀ àtay yiy àbè. Atay ghè yə̀ àvəm nə̀ àghe yiy abè, a kwu azəd aghě ntwùm ə̀ Wà ndzù à vəm nə̀ àghè bè. Izəd i mòʼ anə itay imòʼ.

¹⁵Tsə̀ndii yə ì kə dzəŋə̀ nəniy nə̀ mìə̀, ì kə kwu mbàŋ ghu kə zəŋi nəniy anə ufyiə ùtsə ùsoŋə̀ wə̀ ghu tyoŋə nə̀ à də̀ gôl, ì kə də̀ yəə mbàŋ yə̀ ghu foʼò nəniy ufyiə wiy ate ani fòʼ ìnaʼ i ghè yə̀ ate nə̀ mfə̀b mə̀ tə̀ mbà mìy nə̀ ùbàʼ u təmbà wìy.

¹⁶Yəə tsə̀ndii yə̀ fòʼ tsə nəniy inaʼ i ghè, idûw i ghè yə̌ bvami də̀ fwumi nə̀ ìdàb i ghè yə̀. Idâb yə̀ bâʼ kəmbà kə̀ dàb fyi kə ate idoŋ kə də sòʼò ighəd. Idûw i ghè yə̀ kə də̌ təntàm, bwaam fə ndaŋgàŋ nə̀ ntàm tìy mbwǎm mə̀ tə̀ kàm mìy ìmbè. Idâb i ghè yə̀ kə də̀ sòʼò təntàm, bwaam fə ndaŋgàŋ nə̀ ntàm tìy mbwǎm mə̀ tə̀ kàm imbè. Idâb yə̀ bâʼ kəmbà kə̀ dàb fyi kə ate idoŋ kə də̀ sòʼò təntàm, bwaam fə ndaŋgàŋ nə̀ ntàm tìy mbwǎm mə̀ tə̀ kàm mìy ìmbè.

¹⁷Tsə̀ndii ì ghè yə̌ fòʼ tsə fə̂b kə bàʼ kə mbà kə̀. Fə̂b kə ghè kə̀ kə də̀ yəə à də̀ təntàm mə̀vəm inti nə̀ ntàm tìy ìtà. Tsə̀ndii ìghè yə̀ kə fòʼ tsə anə ayiə aghee mbyi yiy foʼò nəniy ufyiə wiy ate.

¹⁸Ghu kə zəŋi ubâʼ u mbà u ghè wə̀ anə atay ivən ìtaw yə ghu tyoŋə nə̀ à də̀ Dzaspà nə̀ anə ufyiə ùtsə ùsòŋə̀ wə̀ ghu tyoŋə nə̀ à də̀ gôl. Ghu zəŋi na inaʼ i ghè anə ufyiə ùliy wiy u kə fəmə̀ nəniy yəə à də̌ fə̀intəntay.

¹⁹Tsə kə ghu kə byiə na nəniy ubâʼ u mbà ìnaʼ yə ate, ghu kə zəŋi na anə ayiə àdzoŋə̀ yìy, anə atay àsoŋə̀ yə̀ ghu tyoŋə nə̀ à də̀ Dzaspà. Atay a kə tsə a səsə yə̀ kə də̀ Dzaspà. Itay kətsə, ani zəŋi yə̀ àtay kətsə àbè kə də̀ safile. Itay i kətsə ani zəŋi yə̀ àtay kətsə àti, kə də̀ agèt. Itay i kətsə ani zəŋi yə̀ àtay kətsə à kyàʼì kə̀ də̀ emelà.

²⁰Itay i kətsə ani zəŋi yə̀ àtay kətsə à tà, kə də̀ onìks. Itay i kətsə ani zəŋi yə̀ àtay kətsə à ntyìfoŋ kə də̀ kànelìyàn. Itay i kətsə ani zəŋi yə̀ àtay kətsə à sèmbe kə də̀ kwâz. Itay i kətsə ani zəŋi yə̀ àtay kətsə à famə kə də̀ belìl. Itay i kətsə ani zəŋi yə̀ àtay kətsə à bwùkə kə də̀ topàz. Itay i kətsə ani zəŋi yə̀ àtay kətsə àvəm kə də̀ kalsedonì. Itay i kətsə ani zəŋi yə̀ àtay kətsə àvəm nə̀ ighe yiy imòʼ kə də̀ tukuwìs. Itay i kətsə ani zəŋi yə̀ àtay avəm nə̀ àghe yiy abè, kə də̀ ametìs.

²¹Mfə̀b mə̀ tə̀ mbà mə̀ ivəm nə̀ ìn ghe miy imbè, in kə də nəniy anə inaʼ yə, ghu kə zəŋi na anə ufyiə ùdzəŋə wə ivən yiy kə taw nəniy ghu kə tyoŋə nəniy nə̀ à də̀ pîls. Ghu kə zəŋi ufə̂b u mbà ùmòʼ anə pîl. Dzələ tə tə kə də nəniy anə inaʼ i ghè, ghu kə zəŋi anə̀ gôl ì zwe nəniy yəə à də̌ fə̀intəntay.

²²Mə kə kə̀ kôʼ dzə̂ nəway ndàw Kə̀zə̀ awote anə inaʼ aŋwòə Mwe ə̀ mbyi, Zə̀kə̀ kə kwu nəniy udaʼa wiy ùdzə̀m nə̀ wù wə̀ ù kə də yəə à də̌ Wà ndzù, ghu kə də̀ awote yəə à də̌ ndaw Kə̀zə̀. À yù də̀ ighe ndàw Kə̀zə̀ kə də kàm kwu way ani dòʼò awote.

²³Tsə̀ nə̀ ndzoŋ kə kàm kwu dzə̀ way ani tu anə inaʼ i ghè yə̀ aŋwòə imwày i Kəzə̀ yìy kə də̀ təkaʼì anə inaʼ i ghè yə̀. Wù wə̀ ù də nəniy yəə à də̌ Wà ndzù, ù kə də̀ sòʼò təkaʼì anə inaʼ i ghè yə̀.

²⁴Aghê nàʼà tə mbyi tiy ni bwiy anə kàʼì tə ghè tə̀ tə kə də nəniy anə inaʼ yə, zəŋə̂ ayiə yə ghu liə nəniy ani zəŋi anə kàʼì tə ghè tə̀. Ùdòŋ u nàʼà tə mbyi tiy ni bû nə̀ ìkwum i ghu anə inaʼ i ghè yə̀ ani bù nyìə̀ mə̀ŋkwiʼi awò Zə̀kìy nə̀ awò wù wə̀ ù də nəniy yəə à də̌ Wà ndzù.

²⁵Mfə̀b mə̀ mbà mə̀ inaʼ i ghè yə̀ ni də kə ntsukə in dzə̀m nə̀ ghu mə fwiy na. Ghu nî fè na kòʼ dzə̀ wày aŋwòə ləm kiy ni dòʼò kòʼ dzə̀ wày awote anə inaʼ.

²⁶Aghee mbyi à dzə̀m, ghu ni bû soʼò nə̀ ìkwum i ghu yiy awote anə inaʼ ani bù nyiə̀ mə̀ŋkwiʼi awò Zə̀kìy nə̀ awò wù wə̀ ù də nəniy yəə à də̌ Wà ndzù.

²⁷Fyiə kə̀ dzəə kə̀liy kiy nî nyi kwoʼ dzə̀ wày awote anə inaʼ. Wù wə̀ ù zəŋə nəniy ayiə dələ kətuw yiy moo ù dzìy nəniy ayiə guw yiy, ù nì nyi dzə̀ wày awote anə inaʼ. Aghû yə̀ ghu nî nyiə nəniy awote anə inaʼ, à mày kə àghù yə̀ azəd ə ghu nî twà dyoʼò nəniy anə ŋwàʼà kə imùə̀ itsà kə wù wə̀ ù də nəniy yəə à də̌ Wà ndzù.