Read Isu Tway dè fyi 22 Bible Online

Tway dè fyi 22 - Isu bible

Tway dè fyi 22

¹Yəə tsə̀ndii ə̀ Kə̀zə̀ yə̀ dè tsə nəniy inaʼ yə awò mìə̀, ù dè tsə soʼo dzwì mwi mə ìnyiə nəniy imùə̀ itsà yìy. Mwi mə̀ ghè mə̌ mwà, zwe sòʼò yəə à də̌ fə̀intəntay. Dzwì ìghè yə̀ ə kwuŋə fyiə bə̀ a təŋə̀ ndàŋ ə̀ kə̀dòŋ yə̀ Zə̀kìy kə də nəniy ate, we nə̀ nə̀ wù wə̀ ù də nəniy yəə Wà ndzù,

²kuŋə tswi yə̀ anə foŋə̀ dzəd ì ghaʼa yə̀ anə inaʼ i ghè yə̀. Ŋkàʼ ə təmi dòʼò tswi anə ŋgwùŋə tə dzwì ìghè yə̀, in kwu sòʼò utam wə u nyiə̀ nəniy itsâ yìy. Ŋkàʼ mə̀ ghè mə̀ muə ə̀ le tə utam ìvəm nə̀ ghe tiy ibè an-a-ŋə̀m. Muə tsə ùle umòʼ anə ndzoŋ imòʼ. Fəbə̀ tə kàʼ fə̀ ə də̀ utyiə awò ghè dzə̀m anə mbyi.

³Fyiə kə̀liy kiy moo wù lìy mùə̀ dzə̀ way awo anə inaʼ i ghè yə̀ nə̀ Zə̀kìy kamə bɛmə na. Kwe k-a-dòŋ k-a-zə̀, we nə̀ wù wə̀ ù də nəniy yəə à də̌ Wà Ndzù, kə kə də̀ anə inaʼ i ghè yə̀, aghee kəfàʼ ə Kəzə̀ ki fwulə Zə̀kìy.

⁴Ghu nî kòʼò yə̀ Kə̀zə̀ nsə-mə̀-nsə, izəd i Kəzə̀ yìy ki twâ doʼò koŋə yə̂ anə ntùmə̀nsə mə̀ ghu.

⁵U tsuk wiy ki də kàmə̀ dzəə way, aghee kəfàʼ ə Kəzə̀ yìy ki də kàmə̀ nia sòʼò wày isə yiy anə ayiə kàʼì tə mwi moo kaʼì tə inyi aŋwòə Mwe ə̀ mbyi, Kə̀zə̀ kì dyòʼò kàʼì tə ghu. Ghu ki saʼa inaʼ yiy yəə à də̀ udòŋ anə nsòŋə indzə̀m.

⁶Tsə̀ndii yə dzìy â mìə̀ nə̀ “Ayiə yə àdzə̀m wò zuw nəniy, kòʼ sòʼò, à də̀ ayiə àsoŋə̀ yə̀ Zə̀kìy kî kwu ani zəŋi nə̀ a bû fyi. Wò kwu ani bɛmə ayiə ghè yə̀. Mwe ə̀ mbyi, Zə̀kə̀ kə kə nyiə̀ nəniy aghee ntwùm ə̀ Kə̀zə̀ nə̀ daʼa kiy nə̀ ghu bû nàʼà ntwum ə̀ Kə̀zə̀, ù mə twum tsə̀ndii ə̀ we nə̀ ù bù dè bə̀ àyiə yə a kwu nəniy ani kwùlì fyi awò àghù yə̀ ghu faʼà nəniy awò we.”

⁷Zuw nənìy! Yesù dzìy nə̀, “Anə fəkə̀mə̀ mə bû! Zə̀kìy kî ŋge lwì ŋwò aghû yə̀ àdzə̀m ghu zuw nəniy ntwum yə ì twà doʼò nəniy anə ŋwàʼà kə̀, a kwu soʼo ani bù fyi anə fəkə̀mə̀.”

⁸À də̀ miə Dzwan, wù wə̀ ù kə zuw, kòʼ sòʼò àyiə yə à dzə̀m anə udzɛ̀mə̀. Yəə mə zuw mâ tsə, kòʼ mà tsə sòʼò àyiə ghà yə̀, mə bvə̀ tswi tsə anə ifwe i tsə̀ndii ì Kə̀zə̀ yə̀ ì kə dê ayiə yə â mìə̀ ani fwùlì we.

⁹Tsə̀ndii yə kwuni dzìy nə̀, “Kə̀ fwulì dzə̀ miə, mə də sòʼo wè kə̀fàʼ yəə à də̀ wô, nə̀ aghee ntwùm ə̀ Kə̀zə̀. Mə də sòʼo yəə à də̌ àghù yə̀ ghu zəŋə nəniy ayiə yə ntwumə̀ Kə̀zə̀ yə̀ dzìy nəniy. Wò kwuni kwu ani fwulə yəə Zə̀kìy.”

¹⁰U dzày fwuli tsə awò mìə̀ nə̀, “Kə̀ nû na dzə̌ ntwum yə ì də nəniy anə ŋwàʼà kə̀ aŋwòə fəkəmə̀ Zə̀kìy zəŋi nə̀ ayiə ghè yə̀ fyi.

¹¹Yəə soŋə fiy swəd bə̂ dzə̂ awò Zə̀kìy ani zəŋi ayiə yə, Bəə wù də nəniy nə̀ ù zəŋə àyiə àbɛbə, ù liə nəniy ani zù kə nə̀ sə kiy ani zəŋi ayiə àbɛbə, Zə̀kìy kî nyiə̀ ŋwò we nə̀ mfəm. Wù wə̀ ù dzəə nəniy, bəə ù liə nəniy ani zù kə nə̀ səkiy anə dòʼò wù ù dzəə wìy, i ghè yə̀ lia we. Zə̀kìy kî nyiə̀ ŋwò we nə̀ mfəm. Wù wə̀ ù zəŋə nəniy ayiə yə a də nəniy tsitsi, ù kwu ani zù kə nə̀ səkiy ani zəŋi ayiə yə a də nəniy tsitsi, Wù wə̀ ù də nəniy wù ù zwê wìy, ù kwu kə ani zù kə nə̀ səkiy ani dòʼò tsə kə wù ù zwê wìy.”

¹²Zuw nənà! Yesù dzìy nə̀, “Anə fəkə̀mə̀ mə bû! Mə bê ani bù tsə fyi aghû, mə kî tsəə fyiə wù ùmoʼ umòʼ anə fyiə kə ù fàʼ nəniy.

¹³Mə də wù wə̀ ù zəŋə nəniy nə̀ ufyiə udzə̀m wìy kaʼ tsə, də̀ sòʼo wù wə̀ ù zəŋə nəniy nə̀ ufyiə udzə̀m wìy mây. Mə də kəsə anə ufyiə udzə̀m, mə̀ də sòʼò kəbaam anə ufyiə udzə̀m.”

¹⁴Zə̀kìy kî ŋge lwì ŋwò aghû yə̀ ghu muə nəniy mùə̀ tə̀ zwe tiy yəə wù nə̀ sùw nia nəniy ndzwu tə we tiy aŋwòə ghu ki nyìə̀ ghu nə̀ daʼa kiy ani niə utam u kàʼ fə̀ fə nyiə nəniy itsâ yìy. Ghu ki də soʼo ani tsìy nyi anə ufə̀b u mbà ìnaʼ ìzwe yə.

¹⁵Aghû yə̀ ghu kî də abee, à də̀ aghû yə̀ ghu də zwe way, yəə à də aghû yə̀ ghu zəŋə ayiə àfyinə yiy, nə̀ àghè àlyaŋə, nə̀ àghù yə̀ ghu wiiy aghê yìy, nə̀ àghù yə̀ ghu fwulə̀ nəniy mwòʼo miy, nə̀ àghù yə̀ ghu liə nəniy ani dzii ayiə yə a də wày àsoŋə̀ yìy, guw sòʼò. Ghu way dzə ani tsìy nyi anə inaʼ ighè yə̀.

¹⁶Miə, Yesù! Mə twum fyi bə̀ tsə̀ndii yam nə̀ ì bù dzày bə̀ àyiə yə awò ghà, gha yə ghà də nəniy anə udzəŋə ù fwulə u Kəzə̀ wìy, nə̀ ayiə yə à dzə̀m a də àsoŋə̀ yìy. Mə də Wà tu kə Devìd wə ù kə də nəniy dòŋ kìy. Mə də yəə à də̌ sǐbələ̀ fə utsuk ù zwe fə fə tu nəniy.

¹⁷Zwàykə̀zwekiy nə̀ aghě we yə ghu də nəniy yəə à də̌ wìy Kə̀litò, ghu dzîy awò wù wə̀ ù bɛmə nəniy awò Kə̀litò a we nə, “Bù!” Wù wə̀ ù zuw nəniy ayiə yə, ù dzày tsə sòʼò nə̀ “Bù!” Wù wə̀ fòŋ swəə nəniy we anə iyiə i Kəzə̀, u bù awò Yesù. Wù wə̀ ù liə nəniy ani mu mwi mə̀ ìn nyiə̀ nəniy itsâ yìy, u nìy yə̀, ù kə tsə dzə̀ fyiə kə̀liy kiy.

¹⁸Miə Dzwan, me dzîy awò wù wə̀ ù zuw nəniy ayiə yə a twâ dòʼò nəniy fə anə kəŋwàʼà. Abu wù kwee fəli iyiə yiy anə ayiə yə a de nəniy anə ŋwàʼà kə̀, Zə̀kìy ki kwe fwuli mfə̀m we nə̀ ntswə̀d mə̀ ŋwàʼà kə̀ dzìy nəniy.

¹⁹Abu wù nìy ŋwò fyi iyiə ì liy yiy anə ayiə yə a də nəniy anə ŋwàʼà kə̀, Zə̀kìy ki də kə̀ bɛmə dzə̂ nə̀ ù niə kətam anə kàʼ fə itsà fə̀. Zə̀kìy ki də kə̀ bɛmə soʼò nə̀ ù tsìy nyi kwoʼ anə inaʼ ì zwe yə. Ayiə ghè yə̀ twà dòʼò fə̀ anə Ŋwàʼà kə̀.

²⁰Wù wə̀ ù dzày nəniy ayiə yə à də̀ Yesù. Ù dzìy nə̀, Ndzə̀m ndzə̀m, anə fəkə̀mə̀ me bû. Miə, Dzwan, mə bəlì kə nə̀, “I doʼò kə ghii, a Mwe ə̀ Mbyi, Yesù, bù!”

²¹Mə gwuŋə̀ nə̀ mwe ə̀ mbyi Yesù, zù kə nə̀ sə kiy ani dè fòŋə̀ we ìdzòŋə̀ yìy awò ghà, ghà aghee Kəzə̀[4]. I doʼò kə ghii.