Read Isu Tway dè fyi 3 Bible Online

Tway dè fyi 3 - Isu bible

Tway dè fyi 3

¹Wò kwu ani twà dzày yə̀ awò wù wə̀ ù nìʼà nəniy ntwùm ə̀ Kə̀zə̀ a Sadìs, a we nə, “Ntwum yə̀ ŋwò bə̀ awò wù wə̀ ù kwu nəniy uzwày u Kəzə̀ wìy ùsèmbe, ù kwi kəli soʼò nəniy nsǐbələ̀ mìy ìnsèmbe. Ù dzìy nə̀ mə kwu ŋwô àyiə yə àdzə̀m ghà zəŋi nəniy, mə kwu ŋwô nə̀ ghà də yəə à də̀ aghû yə̀ ghu bɛmə nəniy awò mìə̀, zəŋə yə̀ sòʼò àyiə yə mə dzîy nəniy. Ghà mə kwuni bvə̀ te səə, ghà kamə̀ zuw way awò mìə̀.

²Mə kaw kòʼ kəli fyi kə nə̀ muə̀ təli yəə à də̀ aghû yə̀ ghu bɛmə nəniy Yesù tə kə̀ kwoʼ kpe dzə̂ anə sə kə Zə̀ kam. Yəə i də nəniy ghii, ghà zɛmə̀ ŋwô dzwoŋi bə̂ anə mbwuni tə ghà bvunə nəniy anə ayiə Kəzə̀. Ghà kaʼ dzwoŋi tsə ani fàʼ àyiə àdzoŋə̀ yìy anə yiə yə Zə̀kìy liə, yəə à də̀ aghû yə̀ ghà nam kwu nəniy ibɛmə yiy awò Kə̀litò.

³Mòʼo tsə nənìy ayiə àsoŋə̀ yə̀ ghu kə tyi dê nəniy, ghǎ zuw sòʼò. Ghǎ kyèmì ŋwò bə̀ ani zəŋə ayiə àbɛbə yiy. Ghà ki zəŋə yəə ayiə àsoŋə̀ yə̀ mə kə tyi dê nəniy awò ghà. Bəə ghà də kə̀ zɛmə̀ ŋwô kə nəway, ghà ki də kə̀ kəli nəway soŋə fə mə kî bè nəniy ate ani bù nyə̀ ghà nə̀ mfəm aŋwòə mə kî bè yəə à də̂ wù ùtsoŋə̀ wìy, nə̀ wè lìy kə̀ kəli na nəway.

⁴Gha àliy yiy də ŋwô à sə̀ki kə ghii, ghà muə nəniy imuə̀ ìzwe yiy a Sadìs. Ghà kî dzə̀ŋə̀ kə ndzwu tə̀ fəmə tiy, ghà ki bwiy fwumə yə nə̀ mìə̀ aŋwòə ghà mə kwoʼ kpe ani bwìy nə̀ mìə̀.

⁵Aghû yə̀ ghu kî təmə nyiə nəniy udaʼa ùbɛbə wiy, ghu kî dzə̀ŋə̀ sòʼò ndzwu tə̀ fəmə tiy yəə à də̀ aghû yə̀ ghu muə nəniy muə̀ tə̀ zwe tiy. Mə kî wày ani zə̀d màʼà àzəd ə ghu anə ŋwàʼà kə imùə̀ itsà. Mə ki dzây yə̂ â Təli wam, mə dzây yə̀ soʼò â tsə̀təndii tə we tiy nə̀ ghu də aghû yam.

⁶Aghû yə̀ ghu kwu nəniy utswuŋi wiy, ghu zuw ayiə yə Zwàykə̀zwekiy dzîy nəniy awò udzəŋə u aghě Kəzə̀ wìy.”

⁷Wò kwu ani twà dzày yə̀ awò wù wə̀ ù niʼà nəniy ntwùm ə̀ Kə̀zə̀ a Fìlàdefìyà, a we nə̀, “Ntwum yə̀ ŋwò bə̀ awò wù wə̀ ù də nəniy wù ù zwê wìy, də̀ sòʼo wù wə̀ ù də nəniy iyiə ìsoŋə̀ yìy. Ù kwu nəniy dzwə̀ kə̀ kə dê nəniy daʼa kə ù kwu nəniy yəə à də̀ kədòŋ anə ayiə yə Devìd kə də nəniy. Abu ù fwiy kə nəniy ufə̂b u ndaw wiy, wè lìy wày dzə ani kàm fè na. Abu ù fè na tsə soʼò ufə̂b u ndaw wiy, wè lìy wǎy ani fwiy dzə̀.

⁸Ù dzìy nə̀, mə kwu ŋwô nə̀ ghà banə kwu way daʼa kiy. Ghà mə dzwùmì àyiə yam à dzìy yiy. Ghà kamə dzây kôʼ dzə̂ nə̀ ‘Mə kwu dzə̀ way Yesu.’ Mə mə fwiy na ufə̂b u ndaw wiy anə sə kiə̀ nə̀ wè liy wày dzə ani fè na.

⁹Zuw tsə nənìy àyiə yə mə dzîy, mə kî zəŋə tsə àghù yə̀ ghu də nəniy anə dzəŋə kə Satàn, ghu dzîy nəniy nə̀ ‘Ghè də aghee Kəzə̀ yə̀ ù sày na nəniy,’ Də̀ ghii nə̀ ghu kwuni guw ŋwò. Mə ki zəŋi tsə nə̀ ghu bû nəŋì fwo na bə̂ ntwùmə̀ sə mə̀ ghu a təŋə ifwe ghəli, ghu kəli tsə nə̀ mə liə ŋwô gha.

¹⁰Bòʼ àyiə yə mə tyi dê nəniy â ghà nə̀ ghà təmi taw tsə, ghà kwû tsə sòʼò tə̀fòŋ, mə kî zəŋə tsə ŋwò nə̀ iyiə ìbɛbə ìliy yiy kə fyi dzə̀ nə̀ ghà anə sòŋə fə utswə̂d wìy kî bê nəniy ani mwàmkòʼ àghě mbyi àdzə̀m.

¹¹Mə kî kwùlə̀ bè ŋwò. I dzwâbə̀ nə̀ ghà təmi taw tsə kə anə ayiə yə ghà zuw nəniy ani zəŋi tsə nə̀ wè lìy kə nîy ŋwò dzə̀ namə kəli kiy.

¹²Wù wə̀ ù kì təmə nyiə nəniy daʼa kə Satàn kìy, mə kî zəŋə tsə we ù ki də nyə̀lə kə̀ taw kiy a ndàw Kə̀zə̀ ìnè yìy. Wù ùghè wə̀ nì wày dzə ani ŋwò kòʼ awote. Mə ki twâ na tsə izəd i Zə̀ kam azoŋə̀ we, mə twâ na tsə soʼò ìzəd i Yèlusalèm ìfyiə yiy azoŋə̀ we. À də̀ izəd inaʼ i Zə̀ kam ìfyiə yiy. Izəd i ghè yə̀ kì ŋwò tswi bə̀ awò Zə̀ kìy an-a-byiwuŋ. Mə ki twâ na tsə soʼò ìzəd yam ìfyiə yiy azoŋə̀ we.”

¹³Aghû yə̀ ghu kwu nəniy utswuŋi wiy, ghu zuw ayiə yə Zwàykə̀zwekiy dzîy nəniy awò ndaw tə udzəŋə tiy.

¹⁴Wò kwu ani twà dzày yə̀ awò wù wə̀ ù nìʼà nəniy ntwùm ə̀ Kə̀zə̀ a Làwdesìyà, a we nə, “Ntwum yə̀ ŋwò bə̀ awò wù wə̀ ghu tyoŋə nəniy nə̀ à də̀, ‘I də kə ghii.’ Ù də̌ wù wə̀ ù fàʼà nəniy ayiə yə Zə̀kìy liə, dè sòʼò ìyiə yə i də nəniy ìsoŋə̀ yìy kwùmə̀ yə̀ nə̀ Zə̀kìy. Ù də̀ sòʼo wù wə̀ Zə̀kìy kə bwam nəniy ufyiə wiy ùdzə̀m abidzəmə̀ we awò mbyi ani kaʼ.

¹⁵Ù dzìy nə̀, mə kwu ŋwô àyiə yə ghà zəŋə nəniy à dzə̀m. Ghǎ kə̀ pfə doʼò dzə̂ anə ibɛmə ghii awò mìə̀, ghà kwu sòʼò way ighaa yiy anə ibɛmə yə ghà kwu nəniy azoŋə̀ miə̀, a mə ba də nə̀ ghà mə pfə doʼò anə ibɛmə ghii azoŋə̀ mìə̀ moo a mə si ba də nə̀ ghà kwu ighaa anə ibɛmə yə ghà kwu azoŋə̀ mìə̀

¹⁶Anə ayiə yə ghà kwu nəniy nyoŋə fə ibɛmə fiy azoŋə̀ mìə̀, mə kî kwuni twe myàʼà ŋwò gha.

¹⁷Ghà dzîy nə ‘Mə kumə ŋwò, mə kwu ufyiə udzə̀m, mə laʼà dzə̀ wày fyiə kə̀liy kiy.’ Ghà kwuni kwu dzə̀ way nə̀ ghà də aghû yə̀ ghu ŋgee fyaʼa nəniy, də̀ sòʼò aghee kəmwùli ghà la ŋwò, də̀ sòʼò aghê àfɛbə yiy, də̀ sòʼo nə̀ ìwuŋ ìzum yiy.

¹⁸À yù də̀ ighe mə nyiə̀ ghà nə̀ ìtswù yìy nə̀ ghà bû zwe ufyiə ùtsə ùsoŋə̀ wə̀ ghu tyoŋə nə̀ à də̀ gôl, ghu ŋwôʼ dzə̂ anə intsə, ì də nə̀ ì kàm kwu dzə̀ way udzə wiy ani zəŋi tsə nə̀ ghǎ nə̀ də ani dòʼò àghè kwumə yiy. Ghà kwu ani zwe, dzə̀ŋì sòʼò ndzwu tə̀ fəmə tiy anə iwè nəli ani zəŋi tsə nə̀ aghê kə kâm tsoʼ sòʼò ghà nə̀ ghà də nə̀ ìwuŋ ìzwum yiy. Ghà kwu sòʼo ani zwe kə utyiə usə ani kwe anə asə ghii, ani zəŋi tsə nə̀ ghǎ nə̀ də ani kòʼ tə̀ loʼo.

¹⁹Mə kwâ tsə àghù yə̀ mə liə nəniy, mə nyə̀ tsə sòʼò ghu nə̀ mfəm. Yəə i də nəniy ghii, ghà kwu ani kəli tsə ighaa ani kyèmì ŋwò bə̀ anə ayiə ghii àbɛbə yiy.

²⁰Ghà zuw! Mə təmi dòʼò anə ufə̀b u ndaw, bwoʼo nyiə bə̀ kə̀bàʼ. Wù wə ù zuw kəli nəniy dzə̀ yam, ŋwò fwiy tsə kəbâʼ, mə kì tsìy nyi bə̂, mə nyi fwumi nə̀ we.

²¹Aghû yə̀ à dzə̀m ghu kî təmə nyiə nəniy ayiə àbɛbə yə, mə ki nyiə̀ tsə ghu nə̀ daʼa kiy nə̀ ghu doʼò tsə anə ndàŋə̀ kə̀dòŋ akə̀lə̀ ndàŋə̀ kə̀dòŋ yam, ighəd anə yiə yə mə kə təm nyi nəniy Satàn, mə də nəniy nyiə akə̀lə̀ Təli wam anə ndàŋə̀ kə̀dòŋə̀ we.

²²Aghû yə̀ ghu kwu nəniy utswuŋi wiy, ghu zuw ayiə yə Zwàykə̀zwekiy dzîy nəniy awò ùdzəŋə u aghě Kəzə̀ wìy.”