Read Isu Tway dè fyi 4 Bible Online

Tway dè fyi 4 - Isu bible

Tway dè fyi 4

¹Abù mə kôʼ mà tsə nəniy ayiə yə, udzɛmə ùliy wiy bù fəli miə, mə kòʼ kə̀byiwuŋ kə fwiy doʼò nəniy, wù wə̀ dzə̀ we kə də yəə à də̌ isoŋ, u dzày fəli bə̀ â mìə̀ nə̀, “Kwoʼ bə̀ fə mə ki zəŋi tsə soʼò nə̀ wò kôʼ àyiə yə a kî fyiə abu àyu tsìy ŋwò tsə nəniy.”

²Zwàykə̀zwekiy dyaŋi bù azoŋə̀ mìə̀, mə kòʼ yə̀ ndàŋə̀ kə̀dòŋ an-a-byiwuŋ nə̀ wù lìy dòʼò tswi ate anə ndàŋ.

³Wù wə̀ ù kə doʼò tswi nəniy ate anə ndàŋə̀ kə̀dòŋ, ù kə mwà yəə à də̌ atay yə ghu tyoŋə nə̀ à də̀ Dzaspà, bàŋə̀ yə̀ sòʼò yəə à də̀ atay yə ghu tyoŋə nə̀ à də̌ kànelìyàn. Kə̀imyimyiə kə̀ mwaa kiy dzɛ̀mə̀ na tsìy kə sòʼò we, mwà yəə à də̀ atay yə ghu tyoŋə nə̀ à də̀ emelà.

⁴Ndàŋ tə udòŋ tə̀ liy tiy kə də̌ awo mə̀vəm ìmbè nə̀ ndàŋ tìy ìkyàʼì, tə dzɛ̀mə̀ na tsìy kə ndàŋə̀ kə̀dòŋ ìnè yə̀. Ŋgəd tə̀ soŋə̀ tìy ghu kə də nəniy aghê mə̀mvəm imbè nə̀ aghè kyàʼì kə dòʼò tswi ate anə ndàŋ tə ghè tə̀. Ghu kə dzə̀ŋì kəli ndzwu tə̀ fəmə tiy anə iwè nə̀ ùntyàŋì u kədòŋ wìy anə utuw u ghu, ghu kə zəŋi nəniy anə ufyiə ùtsə ùsoŋə̀ wə̀ ghu tyoŋə nə̀ à də̀ gôl.

⁵Iwe yiy mwà fyi bə̀ awote anə ndàŋə̀ kə̀dòŋ, byiwuŋ kiy kwò awo akə̀lə̀ ndàŋə̀ kə̀dòŋ ìghè yə̀. Anə sə kə ndàŋə̀ kə̀dòŋ ì ghè yə̀, kaʼì tǐy mwà awote ìsèmbe. Kaʼì tə ghè tə̀ à də̌ uzwày u Kəzə̀ ùsèmbe u faʼà nəniy awò Zə̀kìy.

⁶Fyiə kə̀li kiy kə də̀ anə sə kə ndàŋə̀ kə̀dòŋ yəə à də̀ iŋwû i zwe twalə fyiə yə̀ yəə à də̌ fə̀intəntay. Ufyiə ù liy wiy u kə muə nəniy ùkyàʼì, u təmi dòʼò dzɛ̀mì na tsìy yə̀ ndàŋə̀ kə̀dòŋ anə ubə̂d ù dzə̀m. Ùfyiə u ghè wə̀ kə kwu asə anə iwè i ghu ìdzə̀m. U kə kwu asə isəə, kwu sòʼo asə ibàm.

⁷Fyiə kə səsə kə kə kə də nəniy, kə fwunə kə̀nyàkhìy, kə̀liy kə də̀ yəə à də̌ ŋə̀mə̀ mbòŋ, kə̀liy kə ani zəŋi yə̀ ùti, kə kwu utwûmusə u wû, ani zəŋi yə̀ ùkyàʼì, kə də̀ yəə à də̀ kəŋwuun, kə zəə yə̂ nəniy.

⁸Ufyiə ughè wə̀ ù dzə̀m kə kwu təghâw. Asə ə də̀ anə iwè ighu idzə̀m, zù dyaŋi kə a təŋə təghàw. Ghu kwu tə ghâw ìntyìfoŋ i ntyìfoŋ. Nə̀ ntsukə nə̀ ntsə̀ tìy, ghu tsə̀ŋ kwu kə ani zɛm dzìy tsə nə̀ “Mwe ə̀ mbyi, Zə̀kə̀ kə kwu nəniy daʼa kiy anə ufyiə udzə̀m, ù də̌ wù ùzwê wìy. Ù kwu dzə̀ way udzə wiy anə uwè. Ù də̌ wù wə̀ ù kə də tsə nəniy, də̀ sòʼo wù wə̀ ù də nəniy nyiə̀, də̀ sòʼo wù wə̀ ù kì də nəniy anə nsòŋi ndzə̀m.”

⁹Ufyiə wə u kə muə nəniy ù kyàʼì, u zɛmə tə̀ndzàŋə awò wù wə̀ ù də nəniy anə ndàŋə̀ kə̀dòŋ, ù mùə̀ dòʼò təŋ nəniy. Ghu kə zɛmə dzìy tsə nə̀ ù kwu kədaʼa nə̀ ŋkwiʼi mə̀sòŋə̀ mìy. Ghu nyìə̀ sòʼò we nə̀ zòŋə̀ kìy anə ayiə yə ù zəŋə nəniy nə̀ ghu.

¹⁰Ŋgəd tə̀ soŋə̀ tə̀ iwu iwû nə̀ ŋgəd tiy ikyàʼì nyaʼa tswi tsə a təŋə̀ wù wə̀ ù kə doʼò tswi tsə nəniy anə ndàŋə̀ kə̀dòŋ, fwùlì tsə we wə ù mùə̀ dòʼò təŋ nəniy. Ghu tsoʼ kə ùntyàŋì u ghu gaʼ na yə̀ a təŋə̀ we, dzày tsə nə̀,

¹¹“A Mwe ə̀ mbyi, Zə̀ kələ, wò kpe ŋwô awò ghə̀d ani nyə̀ wò nə̀ ŋkwiʼi miy, nə̀ ùkali wiy, wò kwu sòʼò ŋwò daʼa kiy, aŋwòə wò fàʼ ùfyiə udzə̀m. Ufyiə ughè wə̀ mùə nə̀ à tsə̀m wò, wò mə zəŋi sòʼò anə itsə̀m yiə̀ nə̀ ghu ki də utaw.”