Read Isu Tway dè fyi 5 Bible Online

Tway dè fyi 5 - Isu bible

Tway dè fyi 5

¹Udzɛmə wiy kàm bù fəli miə, mə kòʼ wù wə̀ ù kə də nəniy anə ndàŋə̀ kə̀dòŋ nə̀ ù mə kwi kəli ŋwàʼà kìy anə ukwe u we ùnyiə wiy. Ghu fwukə ŋwàʼà kə ghè kə̀ yəə à də fəghâm ghu zě fyiə yə nəniy. A də̌ nə̀ ghu mə twà na ayiə yiy ate anə ubə̀d ùdzə̀m, nə̀ ghu mə fad na nyi taw yə nə̀ ùbə̀d u fyiə wiy anə tə lòʼo isèmbe.

²Mə kòʼ tsə̀ndii ə Kə̀zə̀ ìsòŋə̀ yìy, ù bəbə nəniy anə dzə̀ ìtaw yiy nə̀, “À kwoʼ kpe ndiə ani kyemi màʼà fyi yə̀ ùfyiə wə ghu fê na nəniy ŋwàʼà kə̀ ate tə̀ ù zè fyi yə̀ ə?”

³Wè lìy kə kwuni wày dzə an-a-byiwuŋ moo an-a-mbvə̀dintsə moo a təŋə kə mbvə̀dintsə ù kə kwoʼ kpe nəniy anə zè fyi yə̀ ŋwàʼà kə̀ moo ani toŋə fyiə kə iyiə ìliy yiy ate an-a-ŋwàʼà.

⁴Mə tòʼò ŋge dìy ùwe aŋwòə ghu kə kə̀ kôʼ nəway wè lìy ù kə kwoʼ kpe nəniy ani zè fyi yə̀ ŋwàʼà kə̀ moo ani toŋə fyi kə iyiə ìliy yiy ate anə ŋwàʼà kə ghè kə̀.

⁵Ŋgəd imòʼ anə ŋgəd tə iwu iwû nə̀ ŋgəd tiy ìkyàʼì dyaŋi dzày tsə â mìə̀ nə̀ “Kə̀ kâm dìy sòʼò! Kòʼo, Wù wə̀ ghu tyoŋə nə̀ à də̌ ‘Nyàkhìy kə inaʼi Dzudà,’ ù də nəniy wà wà Devìd ùsòŋə̀ wìy, ù mə təm nyi, ù də̀ ŋwô ani kyemi màʼà tsə ufyiə wə ùsèmbe ghu fê na nəniy ŋwàʼà kə̀ ate ù zè fyi yə̀ ŋwàʼà kə ghè kə̀.”

⁶Mə dyaŋi kòʼ wù ù də nəniy yəə à də̌ Wà ndzù ù təmi doʼò nəniy akə̀lə̀ ndàŋə̀ kə̀dòŋ, ufyiə wə u kə muə nəniy ùkyàʼì, nə̀ ŋgəd tə̀ soŋə̀ tə̀ iwu iwû nə̀ ŋgəd tiy i kyàʼì, ghu dzɛ̀mə̀ na tsìy kə we. Ù də̀ kə yəə ghu mə we wiy màʼà na. Ì kə kwu tə nduŋ isèmbe, nə̀ àsə yiy àsèmbe à kə də nəniy ùzwày u Kəzə̀ wə̀ ùsèmbe ghu kə twum fyi yə̂ nəniy ghu anə mbyi dzə̀m.

⁷U zù nìy kə ŋwàʼà kə̀ anə wo kə̀ nyiə kə wù wə̀ ù kə də nəniy anə ndàŋə̀ kə̀dòŋ.

⁸Abù wù wə̀ ù də yəə à də̌ Wà ndzù zù nìy ŋwò kə dzə̂ nəniy ŋwàʼà kə̀, ufyiə wə u kə muə nəniy ùkyàʼì, nə̀ ŋgəd tə iwu iwû nə̀ ŋgəd tiy ìkyàʼì, ghu nyaʼa tswi tsə akə̀lə̀ wù wə̀ ù də yəə à də̌ Wà ndzù, fwuə bə̀ ntwùmə̀sə mə̀ ghu a mbvə̀d. Ŋgə̀d ìmoʼ imòʼ ə bòʼò kəli kə kəbɛ̂m anə awo nə̀ ùbì ukaŋ wiy ghu zəŋi nəniy anə ufyiə ùtsə ùsoŋə̀ wə̀ ghu tyoŋə nə̀ à də̀ gôl. Ghu kwe lwe na tsə uzuu ùlyimə wiy anə ubîy ukaŋ wə, dè tsə tsə̀e ìgwùŋì i ghù yə̀ ghu də nəniy aghee Kəzə̀ yìy.

⁹Ufyiə wə u muə nəniy ùkyàʼì, nə̀ ŋgəd tə̀ soŋə̀ tə iwu iwû nə̀ ŋgəd tiy ikyàʼì, ghu zɛm tsə ndzàŋ nə̀ ghu kamə zɛm kôʼ kôʼ, nyìə̀ yə̀ ùkali ate awò wù wə̀ ù də yəə à də̌ Wà ndzù dzìy tsə nə̀, “Wò mə kwoʼ kpe ani nìy kə ŋwàʼà kə̀, wò fwiy fyi yə̂ ùfyiə wə ghu kwû nəniy ŋwàʼà kə̀ ate, Wò kpe ŋwô aŋwòə ghu kə wiy maʼà tsə wô, wǒ zwe dzwəŋə bə̀ àghě Kəzə̀ anə kàŋ tiə̀ anə nàʼà tə mbyi tə dzə̀m anə dzə̀ŋì tə nàʼà tə̀ dzə̀m, abidzəmə kàŋ tiə̀ tə̀ wò kə sâ nəniy, ghu nyiə̀ də̀ aghê Kəzə̀.

¹⁰Wò mə zəŋi ghu dzə̀m nə̀ ghu doʼò tsə aghê lwaʼa yiy, ghu faʼà nəniy awò Zə̀kə ŋgàŋ kìy, Ghu ki saʼa soʼo yəə à də̀ aghê àlwaʼa yiy fə an-a-mbvə̀dintsə.”

¹¹Abù mə lia yə̂ nəniy, mə zuw dzə̂ tə tsə̀təndii t-a-zə̀ anə ndə̀m ghu təmi dzɛmì na tsîy yə̂ nəniy dàŋə̀ kə̀dòŋ nə̀ ùfyiə wə̀ u kə muə nəniy ùkyàʼì nə̀ ŋgəd tə̀ soŋə̀ tə̀ iwu iwû nə̀ ŋgəd tiy ìkyàʼì.

¹²Ghu zɛmə àyiə anə dzə̀ tə̀ taw tiy dzìy tsə nə̀, “Wù wə̀ ù də yəə à də̌ Wà ndzù wə̀ ghu kə wiy maʼà nəniy, ù mə kwoʼ kpe, ŋgà kwu ani nyə̀ we nə̀ ùkali wiy aŋwòə ù kwu daʼa kə̀soŋə̀ kìy nə̀ ìkwum yiy, nə̀ ùtwab wiy. Ŋgà kwu ani nyə̀ we nə̀ ŋkwiʼi mə̀sòŋə̀ mìy!”

¹³Mə kàm zuw sòʼò ùfyiə wə ùdzə̀m Zə̀kìy zəŋi na nəniy an-a-byiwuŋ nə̀ ambvə̀dintsə, nə̀ a təŋə kəmbvə̀dintsə nə̀ anə dzwî ìnè yìy. Ufyiə wə ùdzəm udzə̀m u də nəniy anə mbyi, u nyiə̀ nəniy ukali wiy awò Zə̀kìy, dzìy tsə nə̀, “Ukali nə̀ ŋkwiʼi miy, nə̀ ìmwày ìsoŋə̀ yìy, nə̀ daʼa kiy də awò wù wə̀ ù də nəniy anə ndàŋə̀ kə̀dòŋ, nə̀ awò wù wə̀ ù də yəə à də̌ wà ndzù anə nsòŋə indzə̀m.”

¹⁴Ufyiə wə u kə muə ùkyàʼì, u dzìy nə̀ “I doʼò kə ghii,” ŋgəd tə̀ soŋə̀ tə̀ ə nyaʼa tswi tsə, bvə̀ fwuə yə̀ ntwùmə̀sə ambvə̀d.