Read Isu Tway dè fyi 6 Bible Online

Tway dè fyi 6 - Isu bible

Tway dè fyi 6

¹Yəə wù wə̀ ù də yəə à də̌ Wà ndzù wə̀ kyemi maʼà tsə nəniy fyiə kə səsə kə anə ufyiə wə ùsèmbe ghu kə kwû na nəniy ŋwàʼà kə̀ ate, mə fwə̀lə̀ yə̀, zuw fyiə kəmòʼ anə ufyiə wə ùkyàʼì u dzîy nəniy anə dzə̂ i foŋə yəə iwe yiy nə̀ mwâ nəniy nə̀, “Bǔ!”

²Mə liay kwoʼ kə idoŋ, kòʼ yə̀ ŋkhinyàm kə̀ fəmə kiy. Wù wə̀ ù kə kwoʼ doʼò nəniy ate an-à-nkhinyàm, ù kə kwu mwè, dzə̀ŋì kəli sòʼò ntyàŋì kə̀ təmə nyiə kiy an-a-tuw. Ù kə də̌ wù wə̀ ù təmə nyiə nəniy. Ù kə fyiə yə̀ ani zù təm nyi ndə̀mə̀ ùŋgə̀d, ù kəli sòʼò ùnamə.

³Abù wù wə̀ ù də yəə à də̌ Wà ndzù wə̀ tyili maʼà tsə nəniy fyiə kə̀liy kə ani zəŋi yə̀ ùbè, mə zuw fyiə kə̀li kiy, zəŋə yə̀ ufyiə ubè anə ufyiə ùkyàʼì u kə muə, kə dzîy nəniy nə̀, “Bǔ!”

⁴Ŋkhinyàm kə̀li kiy kə kə baŋə̀, kə fyi bə̀ anə lòʼo kə ndàŋə̀ kə̀dòŋ kə də nəniy ate. Zə̀kìy nyiə̀ tsə wù wə̀ ù kə də nəniy anə ŋkhinyàm kə ghè kə̀ nə̀ daʼa kiy ani zəŋi tsə nə̀ aghê kə muə̀ dzə̀ anə ibvay, tə̀ aghê ŋwày kwunì anə iwè anə mbyi, ghu wiy maʼà kwunì ìwee anə tsam. À yù də̀ ighe Zə̀kìy kə nyiə̀ tsə soʼò nəniy kwàb ə̀ tsam awò wù wə̀ ù kə də nəniy anə ŋkhinyàm kə̀.

⁵Abù wù wə̀ ù də yəə à də̌ Wà ndzù fwiy maʼà kə nəniy bə̂d k-a-fyiə kə̀liy kiy anə ŋwàʼà kə̀ ani zəŋi yə̀ ùti, mə dyaŋi zuw fyiə kə̀li kiy ani zəŋi yə̀ sòʼò ùfyiə uti anə ufyiə wə ùkyàʼì u kə muə nəniy kə dzîy nəniy nə̀, “Bǔ!” Abù mə liay yə̂, mə kòʼ yə̀ ŋkhinyàm kə̀ ləŋə kiy. Wù wə̀ ù kə kwoʼ doʼò nəniy ate, ù kwu ufyiə wə ghu foʼò nəniy idə̂d i kə fyiə ate anə awo we.

⁶Mə dyaŋi zuw dzə̀ ìlìy anə uzə ufyiə wə u kə muə nəniy ùkyàʼì ì dzìy nəniy nə̀, “A də ani nìy kə ukhiy wə wù də nəniy ani fàʼ anə fə tsuk, a zwe kə kə kaŋ k-a-ba kə mfòŋ mə̀ àsaŋ ate. A də sòʼò ani nìy kə ukhiy wə wù də nəniy ani fàʼ anə fə tsuk, a zwe kə soʼò ùkaŋ u mfòŋ mə̀ àsaŋə uba ivən ìtaw yiy ùti. Kə̀ kwuni byɛbi màʼà dzə̀ uswum u ŋkàʼ mə̀ Olìf mìy nə̀ ìswum i utam wə ghu zəŋə nəniy nlwùmìy ate.”

⁷Abù wù wə̀ ù də yəə à də̌ Wà ndzù fwiy maʼà kə nəniy bə̂d k-a-fyiə kə̀liy kiy anə ufyiə wə ghu kə kwû na nəniy ŋwàʼà kə̀ ate, ani zəŋi yə̀ ùkyàʼì, mə zuw dzə̀ ə̀ wù anə uzə u fyiə wə u kə muə nəniy ùkyàʼì ani zəŋi yə̀ sòʼò tə̀ dzə̀ ìkyàʼì, ì dzìy nəniy nə̀, “Bǔ!”

⁸Mə liay yə̀, kòʼ kwaʼa k-a-ŋkhinyàm. Izəd i wù wə̀ ù kə də nəniy ate anə ŋkhinyàm kə ghè kə̀ kə də̌ nə̀ à də̀ ipfə. Wù wə̀ ù kə dzwumə̀ bə̂ nəniy we nə̀ à də inaʼ i pfə. Zə̀kìy kə nyə̀ tsə ghu nə̀ daʼa kiy ani wiy màʼà aghě bə̀d kə mbyi kəmòʼ anə ubə̀d u mbyi ùkyàʼì anə tsam nə̀ anə dzoŋ, nə̀ anə lelê tə tə dzàŋ nə̀ anə nyàm tə mbvən tiy.

⁹Abù Wà ndzù wə̀ fwiy maʼà fəli kə nəniy bə̂d k-a-fyiə kəmòʼ anə ŋwàʼà kə̀ ani zəŋi yə̀ ùbə̀d ùtà anə ubə̀d ufyiə wə ùsèmbe, Zə̀kìy zəŋi tsə miə mə kòʼ yə̀ àvəən ə ghù yə̀ ghu kə wiy maʼà nəniy ghu bòʼ ntwùm ə̀ Kə̀zə̀ yə̀ ghu kə naʼà nəniy anə ayiə àdzoŋə̀ yìy, ghu də nəniy a təŋə tà kə̀ ghu sâ nyiə̀ nəniy ufyiə wiy ate awò Zə̀kìy.

¹⁰Ghu dzə̀ŋì fyi bə̀ anə dzə̀ tə̀ taw tiy nə̀, “A Zə̀kìy, wô wə̀ wò kwu nəniy daʼa kə kə tsîy fyi nəniy, wò də̌ wù ù zwê wìy, də̀ sòʼo wù wə̀ ù dzìy ayiə àsoŋə̀ yìy. Kə̀lə â wò, kə̀ kâm ləmə zəli sòʼò ani saʼ wiy aghû yə̀ ghu kə wiy nəniy ghəd anə mbyi, wò nyiə̀ soʼò ghu nə̀ mfəm.”

¹¹Zə̀kìy nyiə̀ tsə ghu nə̀ sàŋ tə̀ fəmə tiy, dzày tsə a ghu nə̀ ghu kwi tsə təfôŋ ani zù kwùm soŋə fə ghu kî wiy myaʼà kpe tsə nəniy awizə ghu yə àdzə̀m ghu faʼà nəniy awò Zə̀kìy anə ayiə yə ghu kə wiy maʼà soʼò nəniy ghu ate.

¹²Abù mə kôʼ yə̂ nəniy wù wə̀ ù də yəə à də̌ Wà ndzù fwiy fəli kə nəniy bə̂d k-a-fyiə kə̀li kiy ani zəŋi yə̀ ùbə̀d ù ntyìfoŋ, anə ubə̀d wə̀ ùsèmbe, mə kòʼ mbvə̀dintsə kiy ŋwô sə̀kì tsə nəniy nə̀ daʼa kiy, inyi yiy ŋwò ləŋ tsə ghii yəə à də̌ ndzwu tə ghu zəŋi nəniy anə gùw tə byi tə̀ ləŋə tiy. Ndzoŋ ə ŋwò bàŋ tsə sòʼò yəə à də̀ təkâŋ.

¹³Nsǐbə̂d mǐy bvə̀ fyi tswi bə̀ ambvə̀dintsə yəə ŋkwùŋì kǐy nə̀ sə̀kə̀ tsə nəniy kâʼ fə isəŋ fiy utam u isəŋ wiy tswaʼi fyi tswi bə̀ a mbvə̀d nə̀ u kamə kə̀ taw.

¹⁴Byiwuŋ kiy saŋ tsə yəə ghu nə̀ gyɛlə ŋwô kə nəniy ghâm fìy. Təkaʼà nə̀ nàʼà tə̀ dzwî tìy kə dzɛmə̀ na tsîy nəniy, tə saŋ ŋwò tsə anə lòʼo tə tə kə də nəniy ate.

¹⁵Ùdòŋ u nàʼà tə̀ dzə̀m, nə̀ ùdòŋ u kwab tə nàʼà tə̀ dzə̀m, nə̀ ùdòŋ u tə sǔgôʼ ù dzə̀m, nə̀ àghè kwumə, nə̀ àghè soŋə̀ yìy, aghû yə̀ ghu kə də nəniy ukwə̂d wìy, nə̀ àghù yə̀ ghu kə də wày ukwə̂d wìy, ghu də̀mə̀ nə̀ ghu mə tu nûw doʼò anə utìy, nə̀ a təŋə una wə u də nəniy anə təkàʼà.

¹⁶Ghu dzìy awò ùna wiy nə̀ awò kàʼà tìy nə̀, “Ghè bwoʼ kəwo, bə̀li bvə̌ fyi tswi bə̀ nənìy ghà nûw na tsə ghəd tə̀ wù wə̀ ù də nəniy anə ndàŋə̀ kə̀dòŋ kə kôʼ dzə̀ ghəd, tə̀ wù wə̀ ù də yəə à də̌ Wà ndzù kə nyiə̀ sòʼò ghəd nə̀ mfəm.

¹⁷I ndzə̂m də̌ nə̀, ntsuk fə Zə̀kìy dziy nyiə̀ mfəm ate awò àghè dzə̀m, we nə̀ wù wə̀ ù də yəə à də̌ Wà ndzù, fə mə bù. Wè lìy wày dzə ani taw tsìy mfə̀mə̀ ì ghè yə̀.”