Read Isu Tway dè fyi 7 Bible Online

Tway dè fyi 7 - Isu bible

Tway dè fyi 7

¹Yəə ayiə yə̀ kə tsîy ŋwò tsə nəniy, Zə̀kìy zəŋi tsə mə kòʼ tsə̀təndii t-a-zə̀ ìkyàʼì tə təmi doʼò nəniy anə ubə̀d u kəmbvə̀dintsə ùkyàʼì, ghu kwi kəli nəniy ùŋkwùŋì u mbyi wiy ùkyàʼì nə̀ u kə kâm fyɛbi nyi dzə̀ a mbvədintsə, moo anə dzwì ìnè yìy, moo anə ŋkàʼ.

²Mə dyaŋi kòʼ tsə̀ndii ə̀ Kə̀zə̀ ìlìy yìy ì fyiə kwoʼo bə̂ nəniy anə bə̀d kə̀ inyi yiy fyiə kwoʼo bə̂ nəniy ate nə̀ ì mə̀ kwi kəli kə tsəe kə Zə̀kə̀ kə muə̀ doʼò təŋ nəniy. Tsə̀ndii ì ghè yə̀ ə twoŋə tsə tsə̀təndii t-a-zə̀ tə̀ liy tə ìkyàʼì anə dzə̀ ìtaw yìy, Zə̀kìy kə nyiə̀ na nəniy ghu nə̀ daʼa kiy nə̀ ghu byɛbi maʼà kə̀mbvə̀dintsə nə̀ dzwì tə̀ nê tìy.

³Tsə̀ndii yə dzày yə̀ aghu nə, “Ghà kə byɛbi màʼà dzə̌ mbvə̀dintsə kiy, moo dzwì ìnè yìy moo ŋkàʼ. À mày kə nə̀ ghè mə kwe mà tsəe k-a-zə̀ kìy anə ntwùmə̀sə mə̀ ghě kəfàʼ ə Zə̀ kə ŋgàŋ.”

⁴Wè lìy dzày bə̀ â mìə̀ nə̀ ntàŋə̀ àghù yə̀ Zə̀kìy kə kwe na nəniy tsəe kə we kiy anə ntwùmə̀sə mə ghu anə sələ tə ndaw tə Islàel tə̀ ìvəm nə̀ ghe tiy ibè, ghu kə də̀ təkaam fəbwaam nə̀ vəm mə̀ tə̀ kàm mìy ìn kyàʼì nə̀ kaam tə ghù tìy ìkyàʼì.

⁵Anə isəd i ndaw i Dzudà, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Lubèn, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Gâd, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Ashà, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Naptàlî, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Mànasè, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Simìyòn, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Levì, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Ìsakà, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Zebulùn, Zə̀kìy kə tsə̀lì na tsə aghee we awote təkaam ivəm nə̀ kaam tiy ìbè. Anə isəd i ndaw i Yùsə̂f, Zə̀kìy kə tsə̀lì na tsə aghee we awote təkaam ivəm nə̀ (...)

⁹Yəə ayiə yə̀ tsìy ŋwò tsə nəniy, Zə̀kìy zəŋi tsə miə, mə kòʼ yə̀ ŋwàâ kə ghù nə̀ wè lìy bòʼò wày dzə ani taŋ mà àghě ghè yə̀. Ghu kə ŋwò bə̀ anə nàʼà tə mbyi tə dzə̀m, nə̀ anə sələ tə ndaw tədzə̀m, ghu dzə̀ŋə̀ sòʼò dzə̀ŋì tə nàʼà tə̀ ghu kə ŋwô bə̂ nəniy ate. Ghu təmi dòʼò akə̀lə̀ ndàŋə̀ kə̀dòŋ nə̀ akə̀lə̀ wù wə̀ ù kə də yəə à də̌ Wà ndzù. Ghu dzə̀ŋì kəli sàŋ tə̀ fəmə tiy, wù umoʼ umòʼ ə kwi kəli bî kə iswam anə awo.

¹⁰Ghu bwoʼ fyi bə̀ mə̀mbòŋ anə dzə̀ tə̀ taw tiy nə̀, “À də̌ Zə̀kə ŋgàŋ kə̀ kə də nəniy anə ndàŋə̀ kə̀dòŋ, we nə̀ wù wə̀ ù də nəniy yəə à də̌ Wà ndzù ghu bii fyi nəniy ghəd.”

¹¹Tsə̀təndii tə ghè tə̀ nə̀ ŋgəd tə̀ soŋə̀ tə̀ mə̀vəm imbè nə̀ ŋgəd tiy ikyàʼì nə̀ ufyiə wə u kə muə nəniy ùkyàʼì, ghu kə təmi dzɛ̀mə̀ na tsìy kə ndàŋə̀ kə̀dòŋ yə̀ anə fôŋ. Ghu nə̀ŋì fwoə tswi tsə ntwùmə̀sə mə̀ ghu ambvə̀dintsə, fwùlì tsə Kəzə̀.

¹²Ghu dzìy tsə nə̀, “I doʼò kə ghii! Ukali, nə̀ lwì kìy, nə̀ ùtwab wiy, nə̀ zòŋə̀ kìy, nə̀ ŋkwiʼi miy, nə̀ daʼa kiy də awò Zə̀kìy anə nsòŋə in dzə̀m. I doʼò kə ghii!”

¹³Ŋgəd imòʼ ə bəb tsə awò mìə̀ nə̀, “À də̌ nə̀ ndìə̀ ghu dzəŋì kəli nəniy sàŋ tə̀ fəmə tiy fə ə? Ghu ŋwô bə̀ yə̀?”

¹⁴Mə bə̀lì kə a we nə, “A mwe, wò kwu ŋwô loʼo kə aghû yə̀ ŋwò bə̂ nəniy ate.” U dyaŋi dzày bə̀ â mìə̀ nə̀, “Aghû yə̀ à də aghû yə̀ ifii ìsoŋə̀ yìy mwâmkôʼ dzə̂ nəniy ghu kwùmə̀ yə̀ nə̀ Mwe ə̀ mbyi. Ghu mə sùw màʼà sàŋ tə ghu tiy anə kàŋ tə wù wə̀ u də yəə à də̌ Wà ndzù, zəŋi tsə sàŋ tə ghu tiy fə̂m doʼò tsə soʼò nəniy.

¹⁵À yù də̀ ighe ghu təmi doʼò nəniy fə anə sə kə ndàŋə̀ kə̀dòŋ, fwùlə̀ Kə̀zə̀ nə̀ ntsukə nə̀ ntsə̀ a ndàw Kə̀zə̀. Zə̀kə̀ kə də nəniy anə ndàŋə̀ kə̀dòŋ, ù kì nìy ŋwò iyemì yìy azoŋə̀ ghu anə ayiə yə fyiə kə̀li kiy də wày ani mwàm ghu.

¹⁶Dzoŋ nî kàm zab kòʼ kòʼ dzə̀ wày ghu, fòŋə̀ fyiə kə̀muə kiy nî kàm zwə kòʼ kòʼ dzə̀ wày ghu, tsə̀ nì kàm zuk kòʼ kòʼ sòʼò wày ghu.

¹⁷Aŋwòə wù wə̀ ù də nəniy yəə à də̌ Wà ndzù ù də nəniy anə ndàŋə̀ kə̀dòŋ nì dyòʼò tsə àbàʼàtə̀ndzù awò ghu. U ni yemə azoŋə̀ ghu, nìy zè nə̀ ghu anə lòʼo kə mwi mə ìn nyìə̀ nəniy imuə̀ yìy. Zə̀kìy ni zə̂d maʼà soʼò nsə mə̀ ghu.”