Read Isu Tway dè fyi 8 Bible Online

Tway dè fyi 8 - Isu bible

Tway dè fyi 8

¹Abù wù wə̀ ù də nəniy yəə à də̌ Wà ndzù kɛmə màʼà ŋgwùŋì tsə fyiə kə ghu kə kwû na nəniy ŋwàʼà k-a-zə̀ kìy ate anə zəŋi yə̀ ùfyiə usèmbe, loʼo tiy ŋwò dòʼò tsə moŋ an-a-byiwuŋ anə kə̀mə̀ fə fəsòŋə.

²Mə dyaŋi kòʼ ŋgəd tə tsə̀təndii t-a-zə̀ ìsèmbe ghu təmi doʼò nəniy anə sə k-a-zə̀, Zə̀kìy nyiə̀ tsə sòʼò ghu nə̀ àsooŋ yiy à sèmbe.

³Tsə̀ndii ìlìy yìy ì kə kwu nəniy kaŋə fə gôl fə̀ ghu piaʼà nəniy inoŋ yiy ate â Zə̀kìy, i zù bù təmi dòʼò kə akə̀lə̀ tà kə̀ saa nyiə kə ufyiə kiy awò Zə̀kìy ghu kə zəŋi nəniy anə ufyiə ùtsə wə ghu tyoŋə nə̀ à də̀ gôl. Wù lǐy nyə̀ yə̀ we nə̀ ndə̀mə̀ ìnoŋ yiy â we nə̀ ù pìə̀ ani kwe fəli yə̀ anə igwùŋì yə̀ aghee Kəzə̀ yìy kə gwùŋə̀ nəniy anə tà kə̀ sâ nyiə kə ufyiə kiy awò Zə̀kìy anə sə kə ndàŋə̀ kə̀dòŋ.

⁴Nək kə kə kə fyiə bə̂ nəniy ane ufyiə ùlyimə wə ù kə piaʼà nəniy anə awo tsə̀ndii ə Kə̀zə̀ yə̀, nə̀ ìgwùŋì yə̀ aghee Kəzə̀ yə̀ kə gwuŋə̀ nəniy, ə kwoʼ yə̀ anə lòʼo kə Zə̀kìy kə də nəniy ate.

⁵Tsə̀ndii ə̀ Kə̀zə̀ yə̀ dyaŋi kaʼì fyi bə̀ ùvələ anə tà kə̀ saa nyiə kə ufyiə kiy ate awò Zə̀kìy, gaʼ yə̀ anə kaŋ kə ghu piaʼà nəniy ufyiə ùlyimə wiy ate, nìy màʼà fyi tswi bə̀ an-a-mbvə̀dintsə. Iwe yiy fə̀n kə, mwà tsə, mbvə̀dintsə kiy sə̀kì tsə anə ayiə àsoŋə̀ yìy.

⁶Tsə̀təndii tə ìsèmbe byay tsə iwe ani twuŋ asooŋ ə ghu.

⁷Tsə̀ndii ìsəsə yə twuŋ tsə isoŋ i we, ntay nə̀ ùvələ wiy fə̀lì fyi bə̀ ambvə̀dintsə nə̀ kâŋ tìy mə mwòʼ dòʼò ate. Uvələ wiy fwu ŋwò kə bə̂d k-a-mbvə̀dintsə kəmòʼ anə ubə̀d u kəmbvə̀dintsə ùti, fwu màʼà kə sòʼò bə̀d kə ŋkàʼ kə̀ mòʼ anə ubə̀d uŋkàʼ ùti, fwu màʼà kə sòʼò bə̀d kə uzù kə̀mòʼ anə ubə̀d uzù ùti.

⁸Yəə tsə̀ndii ìlìy yə̀ twuŋ tsə nəniy isoŋ i we yiy ani zəŋi yə̀ tsə̀təndii i bè, fyiə kə̀ liy kiy kə kə də yəə à də ukâʼ ùnê wìy, u byaʼa nəniy, kə bvə̀ nyi tswi yə̀ anə dzwî ìnè yìy. Bə̂d kə dzwî kə̀mòʼ anə ubə̀d u dzwî uti fə̀d dòʼò yə̀ tə̀kàŋ.

⁹Byɛbi màʼà kə bə̂d kə ufyiə kəmòʼ anə bə̀d ufyiə wə ùti u kə muə nəniy, byɛbi màʼà sòʼò bə̀d kə umfə̀n kə̀mòʼ anə ubə̀d u umfə̀n ùti.

¹⁰Abù tsə̀ndii ìlìy yə̀ ani zəŋi yə̀ tsə̀təndii iti twuŋ tsə nəniy isoŋ iwe yiy, sǐbələ̀ fə̀ soŋə̀ fǐy bvə̀ fyi tswi bə̀ idoŋ, tu yəə à də̀ kaʼì tə atay. Fə bvə̀ fè tsə bə̂d kə̀mòʼ anə ubə̀d u tə dzwì ùti. Fè tsə sòʼò àsə dzwì tə̀ tə nyiə̀ nəniy imuə̀ yìy.

¹¹Izəd i sǐbə̂d fə ghè fə̀ kə də̌ nə̀ à də̌ “Iŋwîy.” Kə̂m kə dzwî kə̀mòʼ anə ukə̀m ùti kaʼ yə̀ ani ŋwìy. Ndə̀mə̀ àghù ə pfə yəə ghu mu kə nəniy mwi mə̀ ghè mə̀ aŋwòə mwi mə̀ ghè mə̀ kə ŋwìy ŋwò.

¹²Tsə̀ndii ani zəŋi yə̀ tsə̀təndii ikyàʼì twuŋ tsə isoŋ i we, fyiə kə̀li kiy tswàb bə̀d kə inyi kəmòʼ anə ubə̀d ùti, tswàb bə̀d kə ndzoŋ kəmòʼ anə ubə̀d ùti nə̀ bə̀d kə mənsǐbə̂d kə̀mòʼ anə ubə̀d u mənsǐbəd ùti. I zəŋi tsə nə̀ bə̂d kə̀mòʼ anə ubə̀d u təkàʼì ùti doʼò yə̂ nə̀ u kamə̀ tuu way, zəŋi tsə sòʼò nə̀ bə̂d kə̀mòʼ anə ubə̀d u fəntsuk nə̀ kə doʼò an-a-ləm, zəŋi tsə sòʼò bə̂d kə̀mòʼ anə ubə̀d ùti nə̀ ntsukə tiy dòʼò yə̀ an-a-ləm.

¹³Mə dyaŋi liay kwoʼ yə̀ kòʼ mbwòʼ ə̀ kə tə ntwum kə zəə tsîy nəniy idoŋ idòŋ, dzìy tsə anə dzîy ìtaw yìy nə̀, “Fyày fyày tə yiə! Fyày fyày tə yiə! Fyày fyày tə yiə, awò àghù yə̀ ghu muə nəniy an-a-mbvə̀dintsə a ki bu tsə̀təndii tə ìti twuŋ tsə nəniy asooŋ yə ghu dziy twuŋ anə fəkə̀mə̀.”