Read Isu Tway dè fyi 9 Bible Online

Tway dè fyi 9 - Isu bible

Tway dè fyi 9

¹Tsə̀ndii ani zəŋi yə̀ tsə̀təndii ìtà ə twuŋ tsə isoŋ i we, mə kòʼ fyiə kə̀liy kiy kə kə də nəniy yəə à də̀ fəsǐbələ̀ nə̀ kə mə bvə̀ dòʼò fyi tswi bə̀ a mbvə̀dintsə. A də̌ nə̀ ghu mə nyə̀ fyiə kə ghè kə̀ nə̀ dzwə̀ kìy nə̀ kə fwiy kə ufə̂b u ntswam k-a-bwòʼ kə̀ kə dâb này nyi tswi yə̂ nəniy.

²Abù kə fwiy kə nəniy ufə̂b u ntswam k-a-bwòʼ kə ghè kə̀, nək kiy fyi kwoʼ bə̀ ate, lə̀k kə ləŋə nəniy yəə à də̀ nək kə kə fyiə nəniy anə uvə̀lə̀ ù nê wìy. Nək kə ghè kə̀ kə kə fyi bə̂ nəniy anə bwòʼ kə ghè kə̀ ə zəŋi tsə nə̀ loʼo tiy ləŋ doʼò yə̂, zəŋi tsə sòʼò tsə̌ wày ani tuu twali fyi yə̀.

³Be tiy fyi bə̀ anə nək kə ghè kə̀, tswi bvə̀ tsə ambvə̀dintsə, kəli tsə sòʼò kə̀daʼa ani tyiə aghû yəə à də̀ tənàŋ.

⁴Wù lìy wǐy dzày yə̀ a ghu nə̀ ghu kə zəŋi dzə̀ ìyiə ìliy yiy nə̀ ùzuu wiy moo nə̀ ŋkàʼ moo nə̀ fyiə kə̀liy kiy ghu zuu na nəniy. Ghu kwuni kwu kə ani zəŋi ayiə àbɛbə yiy awò àghù yə̀ ghu də kwu way tsəe k-a-zə̀ kìy anə ntwùmə̀sə mə̀ ghu.

⁵Zə̀kìy kə kə̀ bɛmə dzə̂ nə̀ be tə ghè tə̀ wiy aghû, ù kə kwuni màŋ dzày tsə kə nə̀ tə tyiə tsə aghû anə tə ndzoŋə ità. Ifwabi yə be tə̀ kə nyiə̀ nəniy awò àghù yìy, i bvami də̀ yəə à də̌ ndzòʼò ìfwabi yə nàŋ tìy nyiə̀ nəniy abu tə tyiə tsə nəniy wù.

⁶Anə ndzoŋə tə ghè tə̀ ìtà, aghê ni liə ani pfə dzəd ni də kwuni wày awò ghu ani pfə. Ghu ni mbvuŋə nə̀ ipfə yiy bû nîy ghu, ipfə yiy ni də bè wày ani bù nìy ŋwò nə̀ ghu.

⁷Be tə ghè tə̀ kə də̀ yəə à də̌ ùŋkhinyàm wə̀ ghu byay na ani sək tsam nə̀ ùghè wiy. Be tə ghè tə̀ kə dzə̀ŋì kəli ufyiə ùliy wiy u də nəniy yəə à də̌ ùntyàŋì u udòŋ nə̀ ghu zəŋi anə ufyiə ùtsə ùsoŋə̀ wə̀ ghu tyoŋə nə̀ à də̀ gôl. Ntwùmə̀sə mə̀ ghu miy kwuni fwunə ntwùmə̀sə mə̀ àghù.

⁸Ŋwû tə utuw tə ghu tiy kə də̀ yəə à də̀ ŋwù tə utuw tə iyəŋi. Asooŋ ə ghu yiy də̀ yəə à də̌ asooŋ ə kənyàkhìy.

⁹Ghu kə kwu mbàʼa mə̀ tsam ìn də yəə à də̌ mbàʼa mə̀ tsam mə ghu zəŋi nəniy anə ufyiə ùtsə wiy. Ghâw tə ghu tiy kə foŋə bə̀ yəə à də̌ zəŋ kə ndə̀mə̀ ùnyəŋ u tənyàm wə̀ ù ŋkhinyàm wìy sê nəniy, u swəə yə̂ nəniy iwe yiy ani zù ŋwày.

¹⁰Ghu kwu ikwee tyiə àghù ate yəə à də̌ ikwee i tə nàŋ. Ghu kwu kədaʼa anə ikwè i ghu ani zəŋi nə̀ aghê fii anə tə ndzoŋə ità.

¹¹Ghu kə kwu kədòŋ kə saʼa nəniy ghu. Dòŋ kə ghè kə̀ kə də̌ tsə̀ndii yə ì də nəniy sə kiy anə ntswam k-a-bwòʼ kə̀ kə dâb này nyi tswi yə̂. Izəd i tsə̀ndii ì ghè yə̀ anə idzə̀ŋì i Hiblù kə də̌ nə̀ à də̀ “Abadòn” anə idzə̀ŋì i Glîk, i kə də̌ nə̀ à də̌ “Apolìyòn.” I myìŋə̀ nəniy nə̀ à də̌ “Àbyɛbi màʼà.”

¹²Mfə̀mə̀ ìfyià ìsəsə yə tsìy ŋwò tsə. Yəə ì tsìy ŋwò tsə nəniy, mfəm tə̀ fyia tiy kwuni nam dòʼò səə ŋwô ìbè tə kî bè nəniy.

¹³Tsə̀ndii ìlìy yìy ani zəŋi yə̀ tsə̀təndii in tyìfoŋ ə twuŋ tsə isoŋ i we, mə dyaŋi zuw dzə̀ ìlìy yìy yəə à də̌ dzə̀ wù ì foŋə nəniy anə bwè tə tà k-a-zə̀ ìkyàʼì ghu kə zəŋi nəniy anə ufyiə ùtsə ùsòŋə̀ wìy ghu tyoŋə nəniy nə̀ à də̀ gôl, kə təmi doʼò nəniy anə sə k-a-zə̀.

¹⁴Dzə̀ ì ghè yə̀ ə dzày yə̀ awò tsə̀ndii yə ani zəŋi yə̀ tsə̀təndii intyìfoŋ nə̀, “Zě màʼa tsə̀təndii tə ìkyàʼì Zə̀kìy kwû na nəniy anə dzwì Yuflèt ìsoŋə̀ yə̀.”

¹⁵Tsə̀ndii yə ani zəŋi yə̀ tsə̀təndii i ntyìfoŋ ə zè màʼà tsə tsə̀təndii tə ìkyàʼì nə̀ ghu wiy maʼà aghě bə̀d kə mbyi kəmòʼ anə ubə̀d u mbyi ùti. Zə̀kìy mə zəŋi na nə̀ ghu kwu ani pfə anə tsuk fə ghè fə̀, anə ndzòŋ ìghè yə̀ nə̀ anə ŋə̀m kə ghè kə̀.

¹⁶Anə ayiə yə mə kə zwulə nəniy, mə kə də̀ ŋwô ani dzày nə̀ ntàŋə̀ tə̀ sǔgôʼ tə̀ tə kə də anə uŋkhinyàm u tsam wə̀ kə tsìy fyiə kwoʼo yə̀ ŋwǒ mbwǎm mə̀ ndaŋgàŋ mìy ìmbè.

¹⁷Udzɛmə wə u kə bû nəniy miə, mə kòʼ yə̀ uŋkhinyàm u ghè wə̀ nə̀ àghù yə̀ ghu kə nyəŋə bə̂ nəniy uŋkhinyàm u ghè wə̀, ghu kə dzə̀ŋì kəli ufyiə ùtsə wiy anə kiykiy tə ghu nə̀ kəə awuŋə tsam yiy nì kwi ghu. Ufyiə u ghè wə̀ ə bàŋə̀ yə̀ yəə à də̀ nɛm kə uvə̀lə̀, u lyiŋə yə̀ sòʼò yəə à də̀ kənək, ba wày ma dzə yəə à də̀ uzuu. Ùliy wiy dyòʼò yə̀ sòʼò yəə à də̌ ŋkwù kə məmbvu. Utuw uŋkhinyàm u ghè wə̀ kə də̀ yəə à də̀ utuw unyàkhìy. Unɛm u məvə̀lə̀ wǐy fyiə bə̀ anə adzwə ghu nə̀ nək kiy nə̀ tsày tə̀ byaʼa tiy soʼo.

¹⁸Ufyiə wə ùti, nɛm kə uvə̀lə̀ nə̀ nək kiy nə̀ tsày tə̀ byaʼa tə tə kə fyiə bə̂ anə adzwə ùŋkhinyàm wə̀, kə wiy màʼà tsə aghû anə bə̀d k-a-mbvə̀dintsə kəmòʼ anə ubə̀d u kəmbvə̀dintsə ùti anə aghù yə̀ ghu ŋwunə â Zə̀kìy.

¹⁹Daʼa kə uŋkhinyàm wə̀ kə də̌ anə adzwə ghu, də̀ sòʼò anə ikwè i ghu. Ikwee i ghu yiy kə də̀ yəə à də̀ təzwə tə kwu nəniy utuw wiy. Ghu tsuw wiy àghù ate.

²⁰Aghee mbyi àŋwunə àliy yə, nɛm kə uvə̀lə̀ kə̀ nə̀ nək kə nə̀ tsày tə̀ byaʼa tə̀ kə də kə̀ wiy maʼà nəway ghu, ghu kə̀ nam kyemì ŋwô anə mwàmə mə̀bɛbə̀ mə̀ ghu kə kwu nəniy. Ghu kə kə̀ bwi na dzə̂ ani fwùlì mwòʼo mə ghu kə zəŋi tsə nə̀ awò ghu yiy. Ghu kə kə̀ bwi na soʼò ani fwùlì nsìy mə̀bɛbə̀ mìy nə̀ mwòʼo mə ghu kə bwam anə ufyiə ùtsə ùsoŋə̀ wə̀ ghu tyoŋə nə̀ à də̀ gôl, nə̀ anə ufyiə ùtsə ùmwaa wə ghu tyoŋə nə̀ à də̀ sivà, nə̀ anə ufyiə ùtsə ùliy wə ghu tyoŋə nə̀ à də̌ blǔns, nə̀ anə atay nə̀ anə ŋkàʼ. Də̌ ghii nə̀ mwòʼo mə̀ wày dzə ani kòʼ àsə, moo zuw ùtswuŋi, moo ani bwìy anə ifwe yə ghu kwu.

²¹Ghu kə kə̀ bwi na dzə̂ ani wiy aghû yìy, moo ani bwi na ayiə àfyinə yiy, moo ani zəŋi ayiə kəlyaŋi, moo ani zəŋi ayiə ə tsoŋə yiy.