Read Iu Mien Tin Deic Douh 11 Bible Online

Tin Deic Douh 11 - Iu Mien bible

Tin Deic Douh 11

¹Zinh ndaangc lungh ndiev mienh yietc zungv gorngv nduqc nyungc waac hnangv. Waac-eix fih hnangv nzengc.

²Ninh mbuo suiv jienv mingh dong bung maengx,[32] taux Sinaa Deic-Bung,[33] maaih ndau-baengh nyei dorngx, ziouc dingh njiec yiem wuov aqv.

³Laanh gorngv mbuox laanh, “Daaih maah! Mbuo nanv nie-zun buov ngaengc daaih.” Ninh mbuo longc nie-zun div la'bieiv. Ndau-ndiev nyouh haic nyei zung ninh mbuo longc div ba'naih nie.

⁴Ninh mbuo aengx gorngv, “Daaih maah! Mbuo ceix norm zingh yaac ceix norm fanh taapv hlang taux gu'nguaaic lungh, bun mbuo maaih mengh dauh yaac maiv zuqc bun nzaanx buangv lungh ndiev.”

⁵ZIOUV ziouc njiec daaih mangc baamh mienh ceix nyei zingh caux fanh taapv.

⁶ZIOUV gorngv, “Mangc gaax! Naaiv deix mienh se nduqc fingx mienh yaac gorngv nduqc nyungc waac hnangv. Koqv hoqc jiez gorn zoux, ninh mbuo haih zoux duqv ndongc naaiv, ninh mbuo jiez hnyouv zoux haaix nyungc ninh mbuo ziouc haih zoux duqv cuotv nyei.

⁷Daaih maah! Mbuo njiec mingh zoux lunc ninh mbuo nyei waac weic bun laanh maiv mengh baeqc laanh.”

⁸ZIOUV ziouc bun ninh mbuo nzaanx nzengc buangv lungh ndiev. Ninh mbuo ziouc guangc, maiv ceix wuov norm zingh aqv.

⁹Weic naaiv, wuov norm zingh maaih mbuox heuc Mbaa^mben,[34] weic zuqc yiem wuov ZIOUV bun mienh nyei waac lunc nzengc. Yiem wuov ZIOUV yaac bun zuangx mienh nzaanx mingh yiem buangv lungh ndiev.

¹⁰Yiem naaiv mingh gorngv Sem nyei zeiv-fun. Mbiungc-suiv-imx yiemx liuz lungh ndiev, nqa'haav i hnyangx, Sem duqv yietc baeqv hnyangx wuov hnyangx, ninh duqv dauh dorn, mbuox heuc Aan^faa^satv.[35]

¹¹Duqv liuz Aan^faa^satv, ninh ziangh jienv hmz baeqv hnyangx, corc maaih dorn maaih sieqv nyei.

¹²Aan^faa^satv duqv faah ziepc hmz hnyangx, ninh duqv dauh dorn, mbuox heuc Qelaa.

¹³Duqv liuz Qelaa, Aan^faa^satv ziangh jienv feix baeqv lengh buo hnyangx, corc maaih dorn maaih sieqv nyei.

¹⁴Qelaa duqv faah ziepc hnyangx, ninh duqv dauh dorn, mbuox heuc E^mbe.

¹⁵Duqv liuz E^mbe, Qelaa ziangh duqv feix baeqv lengh buo hnyangx, corc maaih dorn maaih sieqv nyei.

¹⁶E^mbe duqv faah ziepc feix hnyangx, ninh duqv dauh dorn, mbuox heuc Belekv.

¹⁷Duqv liuz Belekv, ninh ziangh duqv feix baeqv faah ziepc hnyangx, corc maaih dorn maaih sieqv nyei.

¹⁸Belekv duqv faah ziepc hnyangx, ninh duqv dauh dorn, mbuox heuc Le^u.

¹⁹Duqv liuz Le^u, ninh ziangh duqv nyic baeqv lengh nduoh hnyangx, corc maaih dorn maaih sieqv nyei.

²⁰Le^u duqv faah ziepc nyeic hnyangx, ninh duqv dauh dorn, mbuox heuc Selukv.

²¹Duqv liuz Selukv, ninh ziangh duqv nyic baeqv lengh siec hnyangx, corc maaih dorn maaih sieqv nyei.

²²Selukv duqv faah ziepc hnyangx, ninh duqv dauh dorn, mbuox heuc Naa^ho.

²³Duqv liuz Naa^ho, ninh ziangh duqv nyic baeqv hnyangx, corc maaih dorn maaih sieqv nyei.

²⁴Naa^ho duqv nyic ziepc juov hnyangx, ninh duqv dauh dorn, mbuox heuc Telaa.

²⁵Duqv liuz Telaa, ninh ziangh duqv yietc baeqv ziepc juov hnyangx, corc maaih dorn maaih sieqv nyei.

²⁶Telaa duqv cietv ziepc hnyangx, ninh duqv buo dauh dorn, mbuox heuc Apc^laam, Naa^ho caux Haalaan.

²⁷Yiem naaiv mingh gorngv Telaa nyei zeiv-fun. Telaa zoux Apc^laam, Naa^ho caux Haalaan nyei die. Haalaan zoux Lotv nyei die.

²⁸Haalaan guei seix ndaangc ninh nyei die, Telaa. Haalaan m'daaih yiem ninh cuotv seix nyei deic-bung guei seix, se Ken^ndie Mienh nyei U^aa Zingh.

²⁹Apc^laam caux Naa^ho i dauh dorng jaa. Apc^laam nyei auv heuc Saalaai. Naa^ho nyei auv heuc Minkaa, se Haalaan nyei sieqv. Haalaan zoux Minkaa caux Itc^kaa nyei die.

³⁰Saalaai maiv haih maaih saeng-yungz. Ninh maiv maaih fu'jueiv.

³¹Telaa dorh ninh nyei dorn, Apc^laam, caux ninh nyei fun, Haalaan nyei dorn, Lotv, caux ninh nyei mbuangz, Apc^laam nyei auv, Saalaai, cuotv Ken^ndie Deic-Bung nyei U^aa Zingh oix mingh Kaa^naa^an Deic-Bung. Mv baac ninh mbuo mingh taux Haalaan Zingh ziouc dingh njiec yiem wuov aqv.

³²Telaa ziangh duqv nyic baeqv lengh biaa hnyangx ziouc yiem Haalaan Zingh guei seix mi'aqv.