Read Iu Mien Tin Deic Douh 14 Bible Online

Tin Deic Douh 14 - Iu Mien bible

Tin Deic Douh 14

¹Doix wuov zanc nyei lungh ndiev maaih Sinaa Deic-Bung nyei hungh, Am^laa^fen, maaih En^laa^saax Zingh nyei hungh, Aa^li^okc, maaih Elaam Zingh nyei hungh, Ke^ndo^laa^o^me, aengx maaih Goyim Zingh nyei hungh, Ti^ndaan.

²Naaiv deix hungh diex mingh caux So^ndom Zingh nyei hungh, Mbei^laa, Go^mo^laa Zingh nyei hungh, Mbinsaa, Atc^maa Zingh nyei hungh, Sinaapv, Se^mbo^yim Zingh nyei hungh, Se^me^mbe, caux Mbelaa Zingh (naaiv se So^aa Zingh) nyei hungh mborqv jaax.

³Naaiv deix biaa dauh hungh gapv jienv qaqv yiem Sitc^ndim Horngc (se Koiv-Nzauv[39] nyei dorngx) mborqv jaax.

⁴Ninh mbuo zuqc Ke^ndo^laa^o^me Hungh gunv ninh mbuo ziepc nyeic hnyangx mv baac taux ziepc faam hnyangx wuov hnyangx ninh mbuo ngaengc jienv.

⁵Ziepc feix hnyangx wuov hnyangx, Ke^ndo^laa^o^me Hungh aengx caux ninh gapv qaqv mborqv jaax wuov deix hungh mingh mborqv hingh yiem Atc^taa^lotv Kaan^naa^im nyei Le^faa^im Mienh, yiem Haam Zingh nyei Sux^sim Mienh, yiem Saawe Ki^li^yaa^taa^im nyei ndau-baengh nyei Emim Mienh,

⁶aengx caux Se^i Deic-Bung mbong zaangc dorngx nyei Holi Mienh, aengx mborqv hingh taux En^baa^laan Zingh nitv deic-bung-huaang wuov.

⁷Ninh mbuo aengx nzuonx taux En Mitv^fatv, (naaiv se Kaa^ndetc) mborqv hingh nzengc yiem Haa^saa^son Taamaa nyei Aa^maa^lekv Mienh, liemh Aa^mo^lai Mienh.

⁸Nqa'haav So^ndom Zingh nyei hungh, Go^mo^laa Zingh nyei hungh, Atc^maa Zingh nyei hungh, Se^mbo^yim Zingh nyei hungh, caux Mbelaa Zingh (naaiv se So^aa) nyei hungh cuotv mingh Sitc^ndim Horngc ndau-baengh nyei dorngx

⁹caux wuov deix biei dauh hungh mborqv jaax. Maaih Elaam Zingh nyei hungh, Ke^ndo^laa^o^me, maaih Goyim Zingh nyei hungh, Ti^ndaan, maaih Sinaa Deic-Bung nyei hungh, Am^laa^fen, yaac maaih En^laa^saax Zingh nyei hungh, Aa^le^okc. Biei dauh hungh caux biaa dauh hungh mborqv jaax.

¹⁰Sitc^ndim Horngc maaih nyouh haic nyei zung nyei kuotv buangv nzengc. So^ndom caux Go^mo^laa Zingh nyei hungh tiux biaux, ninh mbuo maaih deix mienh ndortv naaiv deix zung nyei kuotv mi'aqv. Zengc njiec nyei mienh biaux faaux mbong.

¹¹Wuov deix biei dauh hungh caangv nzengc So^ndom caux Go^mo^laa Zingh nyei nyungc-nyungc ga'naaiv caux yietc zungv nyanc hopv ziouc mingh mi'aqv.

¹²Ninh mbuo yaac caangv Apc^laam nyei fun, Lotv, caux ninh nyei yietc zungv ga'naaiv dorh mingh nzengc, weic zuqc ninh yiem So^ndom Zingh.

¹³Maaih dauh mienh biaux ndutv ziouc dorh naaiv deix sic mingh mbuox Hipv^lu Mienh, Apc^laam. Apc^laam yiem Aa^mo^lai Mienh, Mamle, nyei domh mba'ong zuei ndiangx-lomc. Mamle caux ninh nyei i dauh youz, Etc^ko caux Aa^ne, zoux Apc^laam nyei loz-gaeng doic.

¹⁴Apc^laam haiz gorngv ninh nyei cien fun zuqc caangv mingh, ninh ziouc diuc nzoih yiem ninh nyei biauv zong cuotv seix, haih mborqv jaax nyei m'jangc dorn, faam-baeqv ziepc betv dauh, zunc jienv mingh taux Ndaan Zingh.

¹⁵Taux wuov Apc^laam zorqv ninh ganh nyei mienh bun nqoi zoux yietc guanh yietc guanh nyei, lungh muonz zanc mborqv wuov deix mienh aengx zunc jienv mingh taux Ho^mbaa Zingh yiem Ndaa^matv^gatc Zingh nyei baqv bung maengx.

¹⁶Ninh mbuo zorqv yietc zungv caangv mingh nyei ga'naaiv nzuonx. Liemh ninh nyei fun, Lotv, caux Lotv nyei nyungc-nyungc ga'naaiv, aengx caux m'sieqv dorn caux baeqc fingx yietc zungv dorh nzuonx nzengc daaih aqv.

¹⁷Apc^laam mborqv hingh Ke^ndo^laa^o^me Hungh aengx caux ninh dongh hnyouv mborqv jaax wuov deix hungh, ninh ziouc nzuonx. Taux Saawe Horngc, (aengx maaih mbuox heuc “Hungh Horngc”), So^ndom Zingh nyei hungh cuotv daaih zipv.

¹⁸Aengx maaih Saalem Zingh[40] nyei hungh, Men^ki^se^ndekc, dorh deix njuov caux a'ngunc diuv bun Apc^laam. Men^ki^se^ndekc zoux Yiem Hlang Jiex nyei Tin-Hungh nyei sai mienh.

¹⁹Ninh yaac buang waac bun Apc^laam, “Tov Yiem Hlang Jiex nyei Tin-Hungh, Zeix Lungh Zeix Ndau Wuov Dauh, ceix fuqv bun Apc^laam.

²⁰Ceng Yiem Hlang Jiex nyei Tin-Hungh, weic zuqc ninh bun meih nyei win-wangv zuqc yiem meih nyei buoz-ndiev.” Apc^laam ziouc zorqv ninh duqv nzuonx daaih nyei yietc zungv ga'naaiv, ziepc gouv nyei yietc gouv bun Men^ki^se^ndekc.

²¹So^ndom Zingh nyei hungh gorngv mbuox Apc^laam, “Tuix mienh nzuonx bun yie. Ga'naaiv meih ganh longc aqv.”

²²Apc^laam dau So^ndom Zingh nyei hungh, “Yie sung jienv buoz dorng jienv ZIOUV, dongh Yiem Hlang Jiex, Zeix Lungh Zeix Ndau nyei Tin-Hungh, laengz jiex ngaengc waac.

²³Yie laengz da'faanh meih nyei haaix nyungc ga'naaiv yie maiv longc yietc deix. Liemh yietc diuh suix fai yietc diuh heh hlaang yie zungv maiv longc weic bun meih nqa'haav hingv maiv duqv gorngv, ‘Yie ceix Apc^laam butv zoih.’

²⁴Yie ganh maiv longc yietc nyungc cuotv liuz yie nyei mienh nyanc liuz hopv liuz nyei. Maaih gan yie mingh nyei mienh, Aa^ne, Etc^ko caux Mamle, oix zuqc bun ninh mbuo duqv ninh mbuo nyei buonc hnangv.”