Read Iu Mien Tin Deic Douh 16 Bible Online

Tin Deic Douh 16 - Iu Mien bible

Tin Deic Douh 16

¹Apc^laam nyei auv, Saalaai, maiv haih yungz fu'jueiv bun Apc^laam. Saalaai maaih dauh nouh beiz, mbuox heuc Haagaa, se I^yipv Mienh.

²Saalaai ziouc gorngv mbuox Apc^laam, “ZIOUV bun yie maiv haih duqv fu'jueiv. Meih bieqc mingh caux yie nyei nouh beiz bueix maah! Nziex yie haih laaix ninh duqv fu'jueiv mv bei.” Apc^laam muangx Saalaai nyei waac.

³Apc^laam nyei auv, Saalaai, ziouc zorqv ninh nyei nouh beiz wuov dauh I^yipv Mienh, Haagaa, bun ninh nyei nqox longc zoux auv. (Wuov zanc Apc^laam yiem Kaa^naa^an Deic-Bung duqv ziepc hnyangx.)

⁴Apc^laam caux Haagaa bueix, Haagaa ziouc maaih jienv sin aqv. Haagaa hiuv duqv ganh maaih jienv sin, ninh ziouc mangc maiv faaux mueic ninh nyei ziouv, Saalaai.

⁵Saalaai gorngv mbuox Apc^laam, “Se laaix meih yie cingx zuqc Haagaa mangc yie maiv jiez. Yie zorqv yie nyei nouh beiz bun meih qam jienv. Ih zanc ninh hiuv duqv ninh maaih jienv sin ninh ziouc mangc piex yie. Tov ZIOUV siemv mangc gaax, yie zoux duqv horpc fai meih zoux duqv horpc.”

⁶Apc^laam dau, “Ninh m'daaih zoux meih nyei nouh beiz, yiem meih nyei buoz-ndiev. Meih oix hnangv haaix nor zoux bun ninh, sueih meih zoux aqv maah!” Saalaai zoux doqc Haagaa, Haagaa ziouc biaux mi'aqv.

⁷ZIOUV nyei fin-mienh buangh Haagaa yiem deic-bung-huaang mingh Suwaa Zingh wuov diuh jauv nyei wuom-zingv hlen,

⁸ziouc naaic ninh, “Saalaai nyei nouh beiz, Haagaa aah! Meih yiem haaix daaih? Oix mingh haaix?” Haagaa dau, “Yie biaux yie nyei ziouv, Saalaai aqv.”

⁹ZIOUV nyei fin-mienh aengx gorngv, “Meih oix zuqc nzuonx meih nyei ziouv wuov yaac mbuoqc ninh gunv.”

¹⁰ZIOUV nyei fin-mienh aengx gorngv mbuox ninh, “Yie oix bun meih nyei zeiv-fun hiaangx daaih zungv saauv maiv hingh.”

¹¹ZIOUV nyei fin-mienh aengx gorngv mbuox Haagaa, “Meih ih zanc maaih jienv sin, oix yungz duqv dauh dorn. Meih oix zuqc tengx ninh cuotv mbuox heuc I^saa^maa^en,[42] weic zuqc ZIOUV haiz liuz meih nyei kouv naanc aqv.

¹²Meih nyei dorn oix hnangv dauh hieh lorh nor. Ninh nyei buoz oix mborqv zuangx mienh, zuangx mienh yaac oix mborqv ninh. Caux ninh nyei yietc zungv muoz-doic[43] yaac maiv haih horpc.”

¹³Haagaa ziouc cuotv mbuox bun ZIOUV, dongh caux ninh gorngv waac wuov dauh. Ninh gorngv, “Meih se mangc duqv buatc yie wuov dauh Tin-Hungh.” Aengx gorngv, “Yie yiem naaiv buatc liuz Mangc Duqv Buatc Yie Wuov Dauh mv baac corc maaih maengc ziangh nyei?”

¹⁴Hnangv naaiv nor yiem Kaa^ndetc caux Mbeletv mbu'ndongx wuov norm wuom-kuotv, mienh cuotv mbuox heuc Mbe^e Laa^hai Loi.[44]

¹⁵Nqa'haav Haagaa yungz duqv dauh dorn bun Apc^laam. Apc^laam ziouc tengx ninh nyei dorn cuotv mbuox heuc I^saa^maa^en.

¹⁶Haagaa yungz I^saa^maa^en bun Apc^laam wuov zanc Apc^laam nyei hnyangx-jeiv duqv betv ziepc luoqc hnyangx.