Read Iu Mien Tin Deic Douh 20 Bible Online

Tin Deic Douh 20 - Iu Mien bible

Tin Deic Douh 20

¹Apc^laa^ham yiem Mamle nyei domh mba'ong zuei ndiangx-lomc suiv mingh taux Negepc, Kaa^ndetc Zingh caux Suwaa Deic mbu'ndongx, yiem douc Ge^laa^aa Mungv.

²Yiem naaic Apc^laa^ham gorngv ninh nyei auv, Saalaa, zoux ninh nyei muoc.[58] Ge^laa^aa nyei hungh, Aa^mbi^me^lekv, ziouc paaiv mienh dorh Saalaa mingh ninh wuov.

³Maaih muonz Aa^mbi^me^lekv Hungh mbeix buatc Tin-Hungh daaih mbuox ninh, “Meih za'gengh oix zuqc daic aqv, weic zuqc meih dorh daaih naaiv dauh m'sieqv dorn zungv maaih nqox nyei.”

⁴Mv baac Aa^mbi^me^lekv liemh maiv gaengh duqv nitv fatv Saalaa. Ninh ziouc gorngv mbuox Tin-Hungh, “Ziouv aah! Liemh maiv zoux dorngc nyei baeqc fingx meih oix mietc nzengc?

⁵Apc^laa^ham ganh gorngv, ‘Saalaa zoux yie nyei muoc.’ Wuov dauh m'sieqv dorn yaac gorngv, ‘Ninh zoux yie nyei gorx.’ Yie zoux nyei se hnyouv zingx nyei, maiv dorngc haaix nyungc.”

⁶Mbeix buatc nyei ziangh hoc Tin-Hungh aengx gorngv mbuox ninh, “Yie hiuv nyei. Meih hnangv naaiv nor zoux meih nyei hnyouv zingx nyei. Yie ganh dangv jienv, maiv bun meih baamz zuiz dorngc yie. Se weic naaiv yie maiv bun meih hluo zuqc ninh.

⁷Meih oix zuqc fungx naaiv dauh m'sieqv dorn nzuonx bun ninh nyei nqox weic zuqc ninh nyei nqox se douc waac mienh. Ninh haih tengx meih daux gaux, meih ziouc duqv ziangh jienv. Se gorngv meih maiv fungx naaiv dauh m'sieqv dorn nzuonx nor, liemh meih caux meih nyei yietc zungv mienh, ndongc haaix zungv zuqc daic nzengc.”

⁸Da'nyeic ndorm nziouv nyei, Aa^mbi^me^lekv heuc ninh nyei zuangx jien daaih zunv gorngv naaiv deix sic bun ninh mbuo muangx. Ninh mbuo gengh! gamh nziex haic aqv.

⁹Aa^mbi^me^lekv heuc Apc^laa^ham daaih ziouc gorngv, “Meih fungc hnangv naaiv nor zoux bun yie? Yie dorngc haaix nyungc meih, meih cingx daaih dorh zuiz daaih hoic yie caux yie nyei guoqv ndongc naaiv camv? Meih hnangv naaiv nor zoux bun yie se maiv horpc yietc deix.”

¹⁰Aa^mbi^me^lekv aengx naaic Apc^laa^ham, “Meih weic haaix diuc hnangv naaiv nor zoux?”

¹¹Apc^laa^ham dau, “Yie laaic yiem naaiv maiv maaih haaix dauh gamh nziex Tin-Hungh. Nziex ninh mbuo oix daix yie weic duqv yie nyei auv.

¹²Cuotv liuz naaiv, ninh za'gengh zoux yie nyei muoc, caux yie juangc die maiv juangc maa. Yie yaac longc ninh zoux auv.

¹³Tin-Hungh paaiv yie leih yie nyei die nyei biauv wuov zanc yie mbuox ziangx yie nyei auv, ‘Meih oix zuqc hnangv naaiv bun cing meih hnamv yie. Maiv gunv mingh taux haaix ndau, meih oix zuqc gorngv, “Ninh zoux yie nyei gorx.”+’+”

¹⁴Aa^mbi^me^lekv ziouc fungx ngongh, ba'gi yungh, nouh gauv nouh beiz mingh bun Apc^laa^ham, yaac fungx Apc^laa^ham nyei auv, Saalaa, nzuonx bun ninh.

¹⁵Aa^mbi^me^lekv mbuox Apc^laa^ham, “Mangc gaax! Yie nyei deic-bung yiem meih nyei nza'hmien. Meih oix yiem haaix, gunv yiem aqv.”

¹⁶Ninh aengx gorngv mbuox Saalaa, “Yie zorqv siec joih nyaanh[59] daaih bun meih nyei gorx zoux nzaaux hmien nyaanh, bun caux meih yiem nyei mienh hiuv duqv meih za'gengh maiv dorngc. Haaix dauh ziouc hiuv duqv meih maiv zoux dorngc haaix nyungc.”

¹⁷Apc^laa^ham ziouc tengx Aa^mbi^me^lekv daux gaux, Tin-Hungh ziouc zorc longx Aa^mbi^me^lekv caux ninh nyei auv, liemh ninh nyei yietc zungv nouh beiz, bun ninh mbuo aengx haih maaih gu'nguaaz.

¹⁸Weic zuqc laaix Apc^laa^ham nyei auv, Saalaa, nyei sic, Tin-Hungh zoux bun Aa^mbi^me^lekv Hungh nyei biauv zong m'sieqv dorn yietc zungv maiv haih maaih gu'nguaaz.