Read Iu Mien Tin Deic Douh 23 Bible Online

Tin Deic Douh 23 - Iu Mien bible

Tin Deic Douh 23

¹Saalaa ziangh seix zaangc nyei hnyangx-jeiv duqv yietc baeqv nyic ziepc cietv hnyangx.

²Ninh guei seix wuov zanc yiem Kaa^naa^an Deic, Ki^li^yaatv Aan^mbaa, se He^mbo^lon Zingh wuov. Saalaa daic mingh, Apc^laa^ham nzauh haic, yiem wuov nyiemv.

³Apc^laa^ham yiem geqc ninh nyei auv nyei ga'hlen mingh mbuox Hitv^tai Mienh,

⁴“Yie se ganh fingx mienh daaih caux meih mbuo yiem naaiv. Tov meih mbuo maaic deix yiem naaiv nyei ndau bun yie zoux zouv-gemh zangx yie nyei auv.”

⁵Wuov deix Hitv^tai Mienh dau, “Domh Gorx aac,

⁶meih muangx yie mbuo gorngv oc. Meih yiem yie mbuo mbu'ndongx se yietc dauh zoux hlo nyei mienh. Meih mangc gaax, haaix norm dorngx gauh longx jiex, meih gunv dorh meih nyei auv mingh zangx wuov. Yiem yie mbuo naaiv maiv maaih haaix dauh nzaeng jienv ninh nyei zouv fai laanh jienv maiv bun zangx meih nyei auv.”

⁷Apc^laa^ham ziouc jiez sin baaix wuov norm deic-bung nyei Hitv^tai Mienh.

⁸Ninh gorngv, “Se gorngv meih mbuo maaih hnyouv bun yie zangx yie nyei auv yiem naaiv norm dorngx, tov meih mbuo muangx yie nyei waac aengx tengx yie tov So^haax nyei dorn, E^fo^lon.

⁹Tov ninh maaic Makv^be^laa mbaengx-kuotv bun yie. Naaiv norm mbaengx-kuotv yiem ninh nyei ndeic-daauh. Tov ninh yiem meih mbuo nyei nza'hmien maaic buangv jaax-zinh weic benx yie nyei buonc zoux zouv-gemh.”

¹⁰Wuov dauh Hitv^tai Mienh, E^fo^lon, yiem ninh ganh nyei mienh mbu'ndongx dorng jienv zueiz zingh gaengh ndaangc nyei Hitv^tai Mienh dau Apc^laa^ham, “Domh Gorx aac,

¹¹maiv zuqc aqv. Muangx yie gorngv oc. Yie zorqv wuov nzong ndeic, liemh mbaengx-kuotv, fungx bun meih nzengc. Yiem naaiv dorng jienv yie ganh nyei mienh yie jiu bun meih. Gunv dorh meih nyei auv mingh zangx wuov aqv.”

¹²Mv baac Apc^laa^ham aengx baaix wuov norm deic-bung nyei mienh,

¹³dorng jienv zuangx mienh mbuox E^fo^lon. “Se gorngv meih a'hneiv nor, tov meih muangx yie oc. Yie buangv hnyouv bun wuov nzong ndeic nyei jaax-zinh. Tov meih zipv weic bun yie haih yiem wuov norm dorngx zangx yie nyei auv.”

¹⁴E^fo^lon dau Apc^laa^ham,

¹⁵“Domh Gorx aac, muangx yie oc. Naaiv nzong ndeic nyei jaax-zinh zic duqv i joih caux faah ziepc feix lungz[66] nyaanh hnangv. Mv baac meih caux yie maiv zuqc funx haaix nyungc aqv. Gunv zangx meih nyei auv aqv.”

¹⁶Apc^laa^ham ziouc dingc maaiz aqv. Ei E^fo^lon dorng jienv Hitv^tai Mienh gorngv nyei waac, ninh nziang i joih faah ziepc feix lungz nyaanh, ziux wuov norm deic-bung nyei saeng-eix mienh nziang nyei hniev-daauh, bun E^fo^lon.

¹⁷E^fo^lon nyei ndeic yiem Makv^be^laa, se yiem Mamle nyei dong bung maengx. Naaiv nzong ndeic caux ndeic gu'nyuoz nyei mbaengx-kuotv, liemh huing nzuonx nyei ndiangx benx nzengc Apc^laa^ham nyei.

¹⁸Yiem zingh gaengh caangh laangh wuov zanc, wuov deix Hitv^tai Mienh dauh dauh ziouc hiuv duqv wuov nzong ndeic maaic dangx bun Apc^laa^ham mi'aqv.

¹⁹Apc^laa^ham ziouc dorh ninh nyei auv, Saalaa, mingh zangx yiem Makv^be^laa nyei mbaengx-kuotv, Kaa^naa^an Deic-Bung, nitv Mamle wuov. (Se nitv He^mbo^lon.)

²⁰Wuov nzong ndeic caux ndeic gu'nyuoz nyei mbaengx-kuotv, Hitv^tai Mienh maaic dangx bun Apc^laa^ham longc zoux zouv-gemh.