Read Iu Mien Tin Deic Douh 24 Bible Online

Tin Deic Douh 24 - Iu Mien bible

Tin Deic Douh 24

¹Apc^laa^ham nyei hnyangx-jeiv hlang, gox haic aqv. Yiem ninh zoux nyei nyungc-nyungc ZIOUV yaac ceix fuqv bun ninh.

²Apc^laa^ham mbuox ninh hnyangx-jeiv gauh gox jiex[67] wuov dauh bou, dongh tengx ninh goux nzengc jaa-dingh wuov dauh, “Dorh meih nyei buoz daaih an jienv yie nyei camh zuih ga'ndiev maengx.[68]

³Yie oix meih ziangv jienv ZIOUV, dongh lungh caux ndau nyei Tin-Hungh, laengz waac meih maiv lorz ih zanc yie yiem jienv nyei Kaa^naa^an Mienh mbu'ndongx nyei sieqv zoux yie nyei dorn nyei auv.

⁴Oix zuqc nzuonx yie nyei loz-deic-bung, yie nyei cien-ceqv wuov, tengx yie nyei dorn, I^sakc, gorngv auv.”

⁵Bou naaic gaax, “Se gorngv sieqv maiv kangv gan yie daaih naaiv norm deic-bung ni? Yie oix zuqc fungx meih nyei dorn nzuonx meih cuotv daaih wuov norm deic-bung saah?”

⁶Apc^laa^ham gorngv, “Cin-maanc maiv dungx fungx yie nyei dorn nzuonx wuov norm deic-bung.

⁷Lungh zaangc nyei Tin-Hungh wuov dauh ZIOUV, dorh yie leih nqoi yie nyei die nyei biauv, guangc jienv yie cuotv seix nyei deic-bung. Ninh yaac caux yie laengz ngaengc waac. Ninh gorngv, ‘Yie oix zorqv naaiv norm deic-bung bun meih nyei zeiv-fun.’ ZIOUV oix paaiv ninh nyei fin-mienh mingh ndaangc, meih ziouc haih duqv dauh wuov norm deic-bung nyei sieqv zoux yie nyei mbuangz.

⁸Se gorngv wuov dauh sieqv maiv laengz caux meih daaih naaiv, yie bun meih laengz liuz nyei ngaengc waac jiex mi'aqv. Mv baac meih cin-maanc maiv dungx dorh yie nyei dorn nzuonx wuov norm deic-bung oc.”

⁹Wuov dauh bou ziouc dorh ninh nyei buoz an jienv ninh nyei ziouv, Apc^laa^ham, nyei camh zuih ga'ndiev maengx houv jienv laengz ei naaiv deix waac zoux.

¹⁰Wuov dauh bou ziouc dorh jienv ziepc dauh ninh nyei ziouv nyei lorh torh caux ziex nyungc maaih jaax-zinh nyei ga'naaiv cuotv jauv mingh Me^so^bo^de^mie Deic, Naa^ho nyei zingh.

¹¹Taux zingh ga'nyiec maengx, ninh bun lorh torh gueic njiec wuom-kuotv hlen. Wuov zanc lungh maanz-hmuangx aqv, doix zuqc m'sieqv dorn cuotv daaih zaangh wuom nyei ziangh hoc.

¹²Wuov dauh bou daux gaux gorngv, “O ZIOUV, yie nyei ziouv, Apc^laa^ham, nyei Tin-Hungh aah! Tov tengx yie ih hnoi zoux duqv ziangx yie laengz nyei waac. Tov meih yaac zoux longx bun yie nyei ziouv, Apc^laa^ham.

¹³Yie souv jienv naaiv wuom-zingv hlen. Yiem naaiv norm zingh nyei sieqv ih zanc cuotv daaih zaangh wuom.

¹⁴Yie oix caux dauh sieqv gorngv, ‘Tov meih bungx meih naaic nie-ha'louh njiec bun deix wuom yie hopv oc.’ Se gorngv wuov dauh sieqv gorngv, ‘Domh Gorx aac, gunv hopv maah! Yie corc aengx oix bun wuom meih nyei lorh torh hopv’ nor, yie ziouc hiuv duqv meih ginv wuov dauh daaih zoux meih nyei bou, I^sakc, nyei auv aqv. Se gorngv hnangv naaiv nor, yie hiuv duqv meih za'gengh zoux longx bun yie nyei ziouv.”

¹⁵Daux gaux zungv maiv gaengh setv, maaih dauh sieqv, mbuox heuc Le^mbe^kaa, ndaam jienv nie-ha'louh cuotv daaih. Le^mbe^kaa se Mbe^tu^en nyei sieqv. Le^mbe^kaa nyei gux heuc Minkaa. Minkaa zoux Naa^ho nyei auv. Naa^ho zoux Apc^laa^ham nyei youz.

¹⁶Naaiv dauh sieqv ziangh duqv nzueic haic yaac maiv gaengh nziaauc jiex dorn. Ninh njiec taux wuom-zingv zaangh wuom buangv ha'louh aengx faaux daaih.

¹⁷Apc^laa^ham nyei bou ziouc tiux jienv mingh taux sieqv nyei ga'hlen gorngv, “Tov bun deix meih naaic nie-ha'louh nyei wuom yie hopv oc.”

¹⁸Wuov dauh sieqv gorngv, “Domh Gorx aac, gunv hopv maah!” Sieqv ziouc bungx nie-ha'louh njiec mba'dauh, bouh jienv bun ninh hopv.

¹⁹Ninh hopv liuz wuom, sieqv aengx gorngv, “Yie corc oix mingh zaangh wuom bun meih nyei lorh torh hopv beuv.”

²⁰Ninh ziouc gaanv jienv dox nie-ha'louh nyei wuom an wuov zoh bun lorh torh hopv. Aengx tiux mingh wuom-kuotv wuov zaangh wuom bun ninh nyei dauh dauh lorh torh hopv.

²¹Wuov dauh bou souv jienv wuov maiv ko lo, samx mangc gaax, ZIOUV tengx ninh zoux ziangx ziux ninh cuotv daaih zoux nyei gong fai ni?

²²Lorh torh hopv liuz wuom, wuov dauh bou zorqv norm jiem-mba'zorng-hiun, hniev-daauh yietc zinh faam-buon,[69] aengx zorqv doix jiem nyei jiemh, hniev-daauh faam-lungz,[70] bun wuov dauh sieqv.

²³Wuov dauh bou naaic, “Tov mbuox yie, meih haaix dauh nyei sieqv? Meih nyei die nyei biauv maaih dorngx bun yie mbuo bueix muonz fai?”

²⁴Sieqv dau, “Yie Mbe^tu^en nyei sieqv. Yie nyei ong heuc Naa^ho. Gux heuc Minkaa.”

²⁵Ninh aengx gorngv, “Yie mbuo nyei biauv maaih miev maaih mbiauh nqaauv camv nyei uix saeng-kuv. Yaac maaih dorngx bun meih bueix.”

²⁶Wuov dauh bou ziouc gueic njiec ndau baaix ZIOUV.

²⁷Ninh gorngv, “Ceng ZIOUV, yie nyei ziouv, Apc^laa^ham, nyei Tin-Hungh. ZIOUV maiv guangc laengz jiex nyei ngaengc waac, zungv ziepc zuoqv nyei zoux longx bun yie nyei ziouv. Yie ganh aeqv, ZIOUV dorh jauv taux yie nyei ziouv, Apc^laa^ham, nyei cien-ceqv nyei biauv.”

²⁸Sieqv tiux jienv nzuonx mingh, zorqv naaiv deix jauv-louc mbuox ninh nyei maa caux biauv zong mienh.

²⁹Le^mbe^kaa maaih dauh gorx, mbuox heuc Laa^mbaan. Laa^mbaan gaanv jienv mingh wuov wuom-zingv lorz wuov dauh mienh.

³⁰Laa^mbaan buatc liuz ninh nyei muoc dangh jienv nyei mba'zorng-hiun caux buoz-jiemh, yaac haiz ninh gorngv nzengc wuov dauh mienh gorngv nyei waac, ninh ziouc cuotv mingh lorz wuov dauh mienh. Buatc ninh souv jienv lorh torh ga'hlen nitv wuom-zingv.

³¹Laa^mbaan gorngv, “Daaih oc. Meih se ZIOUV ceix fuqv nyei mienh. Meih fungc souv jienv ga'nyiec hnangv? Yie zungv liuc leiz biauv yaac liuc leiz ziangx lorh torh yiem nyei dorngx.”

³²Wuov dauh bou ziouc bieqc biauv mi'aqv. Laa^mbaan bouh lorh torh nyei dorx njiec, aengx zorqv mbiauh nqaauv zorqv miev bun lorh torh nyanc. Ninh lorz wuom bun Apc^laa^ham nyei bou caux gan Apc^laa^ham nyei bou daaih nyei mienh nzaaux zaux.

³³Mbenc ziangx hnaangx, heuc Apc^laa^ham nyei bou nyanc mv baac ninh gorngv, “Yie maiv gaengh nyanc oc. Zuov yie gorngv nzengc yie daaih nyei jauv-louc cingx nyanc.” Laa^mbaan gorngv, “Maaih haaix nyungc, gunv gorngv maah!”

³⁴Wuov dauh bou gorngv, “Yie se Apc^laa^ham nyei bou.

³⁵ZIOUV za'gengh ceix fuqv yie nyei ziouv, Apc^laa^ham, camv haic, bun ninh butv zoih haic, maaih ngongh, maaih ba'gi yungh, maaih yungh camv, yaac maaih jiem maaih nyaanh, maaih nouh gauv nouh beiz, maaih lorh torh caux lorh.

³⁶Yie nyei ziouv nyei auv, Saalaa, hnyangx-jeiv gox nyei ziangh hoc, yungz duqv dauh dorn bun yie nyei ziouv. Yie nyei ziouv maaih nyei nyungc-nyungc ninh jiu bun wuov dauh dorn mi'aqv.

³⁷Yie nyei ziouv heuc yie caux ninh laengz jiex ngaengc waac gorngv, ‘Maiv dungx lorz dongh ih zanc yiem jienv naaiv norm Kaa^naa^an Deic-Bung nyei sieqv bun yie nyei dorn longc zoux auv.

³⁸Oix zuqc nzuonx yie nyei die nyei zouv zaangc mienh caux yie nyei cien-ceqv tengx yie nyei dorn lorz dauh sieqv zoux auv.’+”

³⁹“Yie aengx naaic gaax yie nyei ziouv, ‘Se gorngv wuov dauh sieqv maiv kangv gan yie daaih ni?’+”

⁴⁰“Yie nyei ziouv dau, ‘Dongh yie buoqc zaangc nyei ZIOUV oix paaiv ninh nyei fin-mienh caux meih mingh tengx meih zoux duqv ziangx ziux meih cuotv jauv zoux nyei gong. Meih oix zuqc lorz dauh yie nyei cien-ceqv nyei sieqv, yie nyei die nyei zouv zaangc mienh, bun yie nyei dorn longc zoux auv.

⁴¹Meih mingh taux yie nyei cien-ceqv wuov, meih caux yie laengz nyei ngaengc waac ziouc jiex mi'aqv. Maiv gunv ninh mbuo maiv bun sieqv meih, meih caux yie laengz nyei ngaengc waac jiex mi'aqv.’+”

⁴²“Ih hnoi yie taux wuov wuom-kuotv hlen, yie daux gaux gorngv, ‘ZIOUV, yie nyei ziouv, Apc^laa^ham, nyei Tin-Hungh aah! Tov tengx yie zoux ziangx yie cuotv jauv daaih zoux nyei gong.

⁴³Ih zanc yie souv jienv naaiv wuom-zingv hlen. Maaih dauh sieqv cuotv daaih zaangh wuom yie oix gorngv, “Tov deix meih nyei nie-ha'louh nyei wuom hopv oc.”

⁴⁴Se gorngv ninh gorngv, “Gunv hopv maah! Yie yaac oix zaangh wuom bun meih nyei lorh torh hopv” nor, yie ziouc hiuv duqv dongh wuov dauh sieqv ZIOUV dingc daaih zoux yie nyei ziouv nyei dorn nyei auv.’

⁴⁵“Yie yiem hnyouv daux gaux zungv maiv gaengh setv, Le^mbe^kaa ziouc ndaam jienv nie-ha'louh cuotv daaih. Ninh njiec taux wuom-zingv zaangh wuom, yie ziouc mbuox ninh, ‘Tov deix wuom hopv oc.’

⁴⁶“Ninh ziouc siepv-siepv nyei bungx nie-ha'louh njiec mba'dauh yaac gorngv, ‘Gunv hopv maah! Yie aengx zaangh wuom bun meih nyei lorh torh hopv.’ Yie ziouc hopv. Ninh aengx zaangh wuom bun lorh torh hopv.

⁴⁷“Yie aengx naaic ninh, ‘Meih haaix dauh nyei sieqv?’ “Ninh dau, ‘Yie Mbe^tu^en nyei sieqv. Yie nyei ong heuc Naa^ho. Gux heuc Minkaa.’ “Yie ziouc zorqv mba'zorng-hiun dangh jienv ninh nyei mba'zorng, aengx zorqv jiemh dangh jienv ninh nyei buoz.

⁴⁸Yie yaac gueic njiec baaix ZIOUV. Yie ceng ZIOUV, yie nyei ziouv, Apc^laa^ham, nyei Tin-Hungh. Ninh dorh yie mingh duqv zuqc jauv, bun yie lorz duqv yie nyei ziouv nyei youz nyei sieqv-fun zoux yie nyei ziouv nyei mbuangz.

⁴⁹Ih zanc se gorngv meih a'hneiv ziepc zuoqv nyei zoux doix yie nyei ziouv nyei waac, tov mbuox yie. Meih maiv oix zoux nor, tov mbuox yie, yie cingx hiuv duqv oix zuqc hnangv haaix nor zoux.”[71]

⁵⁰Laa^mbaan caux Mbe^tu^en dau, “Naaiv deix jauv se yiem ZIOUV daaih. Yie mbuo maiv haih caux meih gorngv longx fai ciouv.

⁵¹Le^mbe^kaa m'daaih yiem naaiv nyei. Gunv dorh ninh mingh zoux meih nyei ziouv nyei mbuangz aqv, hnangv ZIOUV Tin-Hungh gorngv nor.”

⁵²Apc^laa^ham nyei bou haiz ninh mbuo nyei waac ziouc puoqv njiec ndau baaix ZIOUV.

⁵³Ninh yaac zorqv longc jiem longc nyaanh daav daaih nyei siou-setv caux lui-houx bun Le^mbe^kaa. Ninh aengx zorqv jaaix nyei zingh nyeic bun sieqv nyei gorx caux maa.

⁵⁴Apc^laa^ham nyei bou bun liuz, ninh caux gan ninh daaih nyei mienh ziouc nyanc hnaangx aqv. Nyanc liuz hopv liuz, ninh mbuo bueix muonz wuov. Da'nyeic ndorm jiez sin daaih, wuov dauh bou gorngv, “Tov bun yie nzuonx yie nyei ziouv wuov oc.”

⁵⁵Sieqv nyei gorx caux ninh nyei maa gorngv, “Tov bun sieqv caux yie mbuo yiem ziepc baav hnoi liuz, nqa'haav mingh duqv nyei.”

⁵⁶Wuov dauh bou gorngv, “Tov meih mbuo maiv dungx zorv yie weic zuqc ZIOUV tengx yie zoux sung yie nyei jauv mi'aqv. Tov bun yie nzuonx yie nyei ziouv wuov aqv.”

⁵⁷Ninh mbuo dau, “Wuov nyungc, heuc sieqv daaih naaic gaax ninh hnangv haaix nor gorngv.”

⁵⁸Ninh mbuo ziouc heuc Le^mbe^kaa daaih naaic, “Meih za'gengh oix gan naaiv dauh m'jangc dorn mingh nyei fai?” Sieqv dau, “Mingh nyei.”

⁵⁹Ninh mbuo ziouc bun Le^mbe^kaa caux dorh Le^mbe^kaa hlo daaih wuov dauh bou gan Apc^laa^ham nyei bou mbuo mingh.

⁶⁰Ninh mbuo buang waac Le^mbe^kaa, gorngv mbuox ninh, “Yie mbuo nyei muoc aac, tov bun meih zoux ziex cin ziex waanc mienh nyei maa. Tov bun meih nyei zeiv-fun haih duqv nzipc ninh mbuo nyei win-wangv nyei zingh.”[72]

⁶¹Le^mbe^kaa caux ninh nyei m'sieqv bou mbuo mbenc nzoih ga'naaiv, geh jienv lorh torh gan jienv Apc^laa^ham nyei bou nzuonx. Wuov dauh bou ziouc cuotv jauv dorh jienv Le^mbe^kaa mingh aqv.

⁶²I^sakc yiem Mbe^e Laa^hai Loi[73] Deic-Bung-Huaang nzuonx weic zuqc wuov zanc ninh yiem Negepc.

⁶³Maaih hnoi lungh maanz-hmuangx, I^sakc cuotv mingh saau wuov ndeic. Ninh cau hmien buatc guanh lorh torh hungx jienv daaih.

⁶⁴Le^mbe^kaa yaac cau hmien buatc I^sakc ziouc njiec lorh torh daaih

⁶⁵naaic gaax Apc^laa^ham nyei bou, “Yiem wuov ndeic hungx jienv mbuo daaih wuov dauh mienh se haaix dauh?” Wuov dauh bou gorngv, “Ninh zoux yie nyei ziouv.” Le^mbe^kaa ziouc zorqv kuaaiv ndie buang jienv ganh nyei hmien.

⁶⁶Wuov dauh bou ziouc gorngv nzengc ninh nyei jauv-louc bun I^sakc muangx.

⁶⁷I^sakc ziouc dorh jienv Le^mbe^kaa bieqc I^sakc nyei maa, Saalaa, nyei ndopv-liuh. Le^mbe^kaa ziouc benx I^sakc nyei auv mi'aqv. I^sakc yaac hnamv haic ninh. I^sakc ziouc duqv auv daaih tengx jaiv ninh nyei maa daic mingh nyei you-nzauh.