Read Iu Mien Tin Deic Douh 3 Bible Online

Tin Deic Douh 3 - Iu Mien bible

Tin Deic Douh 3

¹ZIOUV Tin-Hungh zeix daaih nyei yietc zungv lomc zaangc ga'naaiv se naang gauh guaix jiex. Naang naaic gaax wuov dauh m'sieqv dorn, “Tin-Hungh za'gengh gorngv maiv bun meih mbuo nyanc yiem naaiv huingx gu'nyuoz nyei haaix nyungc biouv fai?”

²Wuov dauh m'sieqv dorn dau naang, “Yiem huingx gu'nyuoz nyei zungh zungh biouv yie mbuo nyanc duqv nyei.

³Mv baac Tin-Hungh gorngv, ‘Yiem huingx mbu'ndongx wuov zungh ndiangx nyei biouv cin-maanc maiv dungx nyanc, liemh maiv dungx muoqv. Maiv zei aeqv, meih mbuo zungv zuqc daic aqv.’+”

⁴Naang gorngv mbuox m'sieqv dorn, “Meih mbuo maiv daic lorqc.

⁵Tin-Hungh hnangv naaiv gorngv weic zuqc ninh hiuv duqv meih mbuo nyanc liuz, meih mbuo haih hnamv duqv tong,[3] meih mbuo ziouc hnangv Tin-Hungh nor, haih hiuv duqv longx hiuv duqv ciouv.”

⁶Wuov dauh m'sieqv dorn mangc buatc wuov zungh biouv nzueic nyei, daaix nyanc kuv nyei. Ninh yaac hnamv daaih se gorngv haih bun mienh guai nor, za'gengh longx haic. Ninh ziouc gaeqv daaih nyanc aqv. Aengx bun deix ninh nyei nqox nyanc.

⁷Ninh mbuo nyanc liuz, ninh mbuo haih hnamv duqv tong.[4] Ninh mbuo hiuv duqv ganh laengh gaengv nyei yiem, ziouc zorqv ngongh nyorx ndiangx-normh lunh daaih pongx jienv aqv.

⁸Wuov hnoi, lungh maanz-hmuangx nyei ziangh hoc, ninh mbuo haiz ZIOUV Tin-Hungh yiem huingx gu'nyuoz yangh jauv. Wuov dauh m'jangc dorn caux ninh nyei auv ziouc bieqc huingx nyei ndiangx-lomc mingh bingx jienv ZIOUV.

⁹Mv baac ZIOUV Tin-Hungh heuc wuov dauh m'jangc dorn, “Meih yiem haaix laeh?”

¹⁰Wuov dauh m'jangc dorn dau, “Yie haiz meih yiem naaiv huingx. Yie gamh nziex haic weic zuqc yie laengh gaengv nyei yiem ziouc bingx meih.”

¹¹Tin-Hungh naaic gaax, “Haaix dauh mbuox meih, meih nyei sin laengh gaengv nyei? Meih nyanc dongh yie hatc meih maiv dungx nyanc wuov zungh biouv mi'aqv saah?”

¹²Wuov dauh m'jangc dorn dau, “Dongh meih bun daaih caux yie yiem naaiv wuov dauh m'sieqv dorn, ninh bun naaiv zungh ndiangx nyei biouv yie, yie ziouc nyanc mi'aqv.”

¹³ZIOUV Tin-Hungh naaic gaax wuov dauh m'sieqv dorn, “Meih zoux cuotv haaix nyungc sic mi'aqv?” Wuov dauh m'sieqv dorn dau, “Naang ganh nduov yie, yie ziouc nyanc.”

¹⁴ZIOUV Tin-Hungh mbuox wuov diuh naang, “Laaix meih hnangv naaiv nor zoux, “Meih ziouc zuqc houv gauh hniev yietc zungv saeng-kuv, gauh camv yietc zungv hieh zoih. Meih oix zuqc longc ga'sie luih jienv gan ndau mingh, yietc seix oix zuqc nyanc nie-mbung.

¹⁵Yie oix bun meih caux naaiv dauh m'sieqv dorn daav win, yaac bun meih nyei zeiv-fun caux ninh nyei zeiv-fun zoux win-wangv. Ninh nyei zeiv-fun oix mborqv meih nyei m'nqorngv huv, meih yaac oix nyorqv ninh nyei zaux-nqo.”

¹⁶Tin-Hungh yaac gorngv mbuox wuov dauh m'sieqv dorn, “Maaih sin nyei ziangh hoc yie oix jaa tipv bun meih kouv. Ndutv sin nyei ziangh hoc meih oix zuqc mun. Mv baac meih corc oix longc meih nyei nqox. Meih nyei nqox yaac oix gunv jienv meih.”

¹⁷Tin-Hungh yaac gorngv mbuox Aa^ndam, “Laaix meih muangx meih nyei auv nyei waac, nyanc dongh yie hatc meih, ‘Maiv dungx nyanc wuov zungh biouv.’ Ndau ziouc laaix meih zoux nyei sic zuqc houv. Meih yietc seix oix zuqc bangc ndau zoux gong kouv cingx duqv nyanc.

¹⁸Ndau oix weic meih cuotv miev cuotv njimv. Meih yaac oix zuqc nyanc yiem ndau cuotv nyei lai-miev.

¹⁹Meih oix zuqc zoux gong kouv cuotv ziex sin hanc wuov deix ndau cingx daaih haih cuotv deix ga'naaiv. Zoux taux meih aengx nzuonx benx nie, weic zuqc meih se nie benx daaih. Meih se nie, meih oix zuqc aengx benx nzunc nie aqv.”

²⁰Aa^ndam[5] tengx ninh nyei auv cuotv mbuox heuc Haawaa,[6] weic zuqc ninh zoux lungh ndiev mienh nyei maa.

²¹ZIOUV Tin-Hungh longc saeng-kuv nyei ndopv zoux lui-houx bun Aa^ndam caux ninh nyei auv, Haawaa, zuqv.

²²ZIOUV Tin-Hungh aengx gorngv, “Ih zanc wuov laanh mienh se hnangv mbuo nor, hiuv duqv longx, hiuv duqv ciouv. Oix zuqc maiv dungx bun ninh sung buoz mingh gaeqv ziangh maengc nyei biouv nyanc ziouc yietc liuz duqv ziangh jienv.”

²³ZIOUV Tin-Hungh ziouc zunc ninh cuotv E^nden Huingx yaac bun ninh zoux liangx-ndeic yiem Tin-Hungh longc nanv ninh daaih wuov deix nie.

²⁴ZIOUV zunc ninh cuotv liuz, yiem E^nden Huingx nyei dong bung maengx, ZIOUV bun ke^lu^mbim zuov jienv. Aengx maaih zung maaih douz nyei nzuqc ndaauv guinh guinh biei bung nyei, dangv jienv mingh ziangh maengc biouv nyei ndiangx wuov diuh jauv.