Read Iu Mien Tin Deic Douh 31 Bible Online

Tin Deic Douh 31 - Iu Mien bible

Tin Deic Douh 31

¹Yaakopv haiz gorngv Laa^mbaan nyei dorn ngopv. Ninh mbuo gorngv, “Yaakopv nzaeng nzengc aa die nyei jaa-dingh ga'naaiv. Ninh butv zoih daaih maaih nyei nyungc-nyungc se yiem mbuo nyei die daaih.”

²Yaakopv yaac zieqv duqv Laa^mbaan nyei eix leiz maiv hnangv zinh ndaangc wuov nor, pioux camv haic aqv.

³ZIOUV gorngv mbuox Yaakopv, “Nzuonx meih nyei cien-ceqv nyei deic-bung wuov oc. Yie oix caux meih yiem.”

⁴Yaakopv ziouc bun waac mingh mbuox Laasen caux Le^aa daaih ninh nyei ba'gi yungh yiem nyei ciangv.

⁵Yaakopv gorngv mbuox ninh nyei auv mbuo, “Yie buatc meih nyei die nyei eix leiz caux yie maiv hnangv zinh ndaangc. Mv baac yie nyei die nyei Tin-Hungh caux yie yiem.

⁶Meih mbuo yaac hiuv duqv yie longc nzengc qaqv tengx meih mbuo nyei die zoux gong.

⁷Mv baac meih mbuo nyei die corc pienx yie. Ninh tiuv yie nyei gong-zinh duqv ziepc nzunc aqv. Mv baac Tin-Hungh maiv bun ninh zoux haaix nyungc hoic yie.

⁸Se gorngv ninh gorngv, ‘Yungh maaih diemv nyei oix zuqc funx meih nyei gong-zinh,’ yietc zungv yungh njiec dorn maaih diemv nyei hnangv. Se gorngv ninh gorngv, ‘Yungh ben oix zuqc funx meih nyei gong-zinh,’ ziangh guanh yungh ziouc kungx njiec dorn ben nyei hnangv.

⁹Hnangv naaic, Tin-Hungh zorqv meih nyei die nyei buonc saeng-kuv bun yie nzengc mi'aqv.

¹⁰“Yungh saeng nyei ziangh hoc, yie mbeix buatc tiux yungh nyeiz nyei yungh gouv, maaih deix ben nyei, maaih deix maaih diemv cou nyei, maaih deix maaih diemv muonc nyei.

¹¹Mbeix buatc jienv nyei ziangh hoc, Tin-Hungh nyei fin-mienh heuc yie, ‘Yaakopv aac.’ Yie dau, ‘Oeix! Yie yiem naaiv oc.’

¹²Ninh gorngv, ‘Mangc gaax maah! Tiux yungh nyeiz nyei yietc zungv yungh gouv maaih deix ben nyei, maaih deix diemv muonc nyei, maaih deix diemv cou nyei, weic zuqc Laa^mbaan zoux bun meih nyei yietc zungv yie buatc nzengc.

¹³Yie se Tin-Hungh, dongh yiem Mbetc^en hinc cuotv bun meih buatc wuov dauh. Yiem Mbetc^en meih liepc norm la'bieiv don jienv dox youh fungx bun yie, yaac yiem wuov laengz jiez ngaengc waac. Mingh aqv. Ih zanc cuotv naaiv norm deic-bung nzuonx meih cuotv seix nyei deic-bung.’+”

¹⁴Laasen caux Le^aa dau Yaakopv, “Yie mbuo nyei die nyei jaa-dingh ih zanc zungv maiv maaih yie mbuo nzipc nyei buonc.

¹⁵Ninh zoux bun yie mbuo hnangv benx ganh fingx mienh nor. Ninh yaac maaic yie mbuo nyei m'nqorngv daaih yaac naqv nzengc mi'aqv.

¹⁶Tin-Hungh bun meih duqv yie mbuo nyei die nyei ga'naaiv se benx yie mbuo nyei yaac benx yie mbuo nyei fu'jueiv nyei. Ih zanc Tin-Hungh hnangv haaix nor mbuox meih, gunv hnangv wuov nor zoux.”

¹⁷Yaakopv ziouc mbenc ziangx ga'naaiv. Ninh bun ninh nyei auv-jueiv geh jienv lorh torh,

¹⁸yaac zunc jienv saeng-kuv mingh ndaangc. Aengx dorh jienv ninh yiem Batc^ndaan Aalam zornc duqv daaih nyei yietc zungv ga'naaiv cuotv jauv nzuonx Kaa^naa^an Deic-Bung, ninh nyei die, I^sakc, wuov.

¹⁹Wuov zanc Laa^mbaan cuotv mingh japv ninh nyei ba'gi yungh biei. Laasen bangc wuov norm ziangh hoc nimc ninh nyei die yiem biauv zaangc nyei miuc-fangx.

²⁰Yaakopv yaac nduov ninh nyei ong-daa, Aalam Mienh, Laa^mbaan, weic zuqc ninh bingx jienv biaux, maiv mbuox.

²¹Ninh dorh jienv ninh maaih nyei yietc zungv ga'naaiv biaux jiex ziqc Yu^fe^ditc Ndaaih, hungx jienv Gi^le^aatc nyei mbong-aiv dorngx mingh.

²²Yaakopv biaux mingh duqv buo hnoi, Laa^mbaan cingx hiuv duqv.

²³Ninh ziouc dorh jienv ninh nyei gorx-youz mingh zunc. Zunc siec hnoi ziouc zunc zaaic yiem Gi^le^aatc nyei mbong-aiv dorngx.

²⁴Wuov muonz Laa^mbaan[114] mbeix buatc Tin-Hungh daaih gorngv mbuox ninh, “Faix fim oc. Maiv gunv longx fai ciouv, maiv dungx gorngv haaix nyungc bun Yaakopv.”

²⁵Laa^mbaan zunc zaaic Yaakopv wuov zanc, Yaakopv corng jienv ndopv-liuh yiem Gi^le^aatc nyei mbong-aiv dorngx. Laa^mbaan caux gan ninh mingh nyei gorx-youz yaac corng jienv ninh mbuo nyei ndopv-liuh wuov.

²⁶Laa^mbaan gorngv mbuox Yaakopv, “Meih fungc hnangv naaiv zoux? Meih nduov yie aengx guaaiv jienv yie nyei sieqv biaux hnangv mborqv jaax caangv duqv daaih nyei m'sieqv dorn nor.

²⁷Meih fungc hnangv naaiv nor nduov yie, bingx jienv biaux yaac maiv mbuox yietc joux yie? Se gorngv yie hiuv nor, yie zoux nauc nyitc bun mienh baaux nzung, mborqv lorh mborqv nzoz, patv daanh baah, fungx meih mbuo njien-youh nyei cuotv jauv.

²⁸Meih liemh maiv bun yie duqv zom yie nyei fun caux yie nyei sieqv. Naaiv meih zoux nyei jauv za'gengh hngongx haic.

²⁹Ih zanc meih yiem yie nyei buoz-ndiev. Yie oix zoux haaix nyungc hoic meih se zoux duqv nyei. Mv baac a'hmuangx meih nyei die nyei Tin-Hungh box mbeix mbuox yie, ‘Maiv gunv longx fai ciouv, maiv dungx gorngv haaix nyungc bun Yaakopv.’

³⁰Yie hiuv duqv meih nyei hnyouv oix nzuonx meih nyei die nyei biauv cingx daaih biaux. Mv baac meih weic haaix diuc nimc yie yiem biauv zaangc nyei miuc-fangx?”

³¹Yaakopv dau Laa^mbaan, “Yie gamh nziex meih oix zorqv meih nyei sieqv nzuonx.

³²Mv baac meih nyei miuc-fangx aeqv, se gorngv lorz buatc yiem haaix dauh, maiv dungx liouh ninh nyei maengc aqv. Dorng jienv yie mbuo nyei zuangx gorx-youz sou cuotv meih nyei haaix nyungc ga'naaiv, gunv zorqv nzuonx aqv.” Yaakopv maiv hiuv duqv Laasen nimc ninh nyei die nyei miuc-fangx.

³³Laa^mbaan ziouc bieqc Yaakopv nyei ndopv-liuh caux Le^aa nyei ndopv-liuh caux wuov deix i dauh nouh beiz nyei ndopv-liuh sou mv baac sou maiv cuotv ninh nyei miuc-fangx. Ninh yiem Le^aa nyei ndopv-liuh cuotv daaih aengx bieqc Laasen nyei ndopv-liuh.

³⁴Laasen zorqv wuov deix yiem biauv zaangc nyei miuc-fangx dapv jienv lorh torh nyei dorx. Ninh ganh aeqv, zueiz jienv gu'nguaaic. Laa^mbaan sou nzengc Laasen nyei ndopv-liuh mv baac lorz maiv buatc.

³⁵Laasen gorngv mbuox ninh nyei die, “Aa die aac, meih maiv dungx nouz yie oc. Yie horpc zuqc jiez sin zipv die, mv baac yie nyei sin-yienc taux, yie jiez maiv duqv sin.” Laa^mbaan sou nzengc ga'naaiv yaac lorz maiv buatc ninh yiem biauv zaangc nyei miuc-fangx.

³⁶Yaakopv qiex jiez haic ziouc gorngv Laa^mbaan, “Yie zoux haaix nyungc dorngc meih, ziqc zuiz meih, meih cingx qaqv zunc jienv yie daaih?

³⁷Meih sou nzengc yie nyei ga'naaiv meih buatc haaix nyungc zeiz meih nyei ga'naaiv? Zorqv cuotv daaih an jienv naaiv maah! Bun meih nyei mienh caux yie nyei mienh lomh nzoih mangc. Ninh mbuo ziouc hiuv duqv yie caux meih, haaix dauh zoux horpc.

³⁸“Yie caux meih yiem duqv nyic ziepc hnyangx aqv. Meih nyei ba'gi yungh caux yungh maiv mbaang jiex dorn. Yietc dauh meih nyei ba'gi yungh gouv fai yungh gouv yie maiv nyanc jiex.

³⁹Se gorngv hieh ga'naaiv ngaatc, yie maiv dorh mingh bun meih mangc. Yie ganh laengz ndortv hnangv. Janx-zaqc nimc haaix nyungc, maiv gunv lungh hnoi zanc fai lungh muonz zanc, meih zungv heuc yie ganh tipv.

⁴⁰Lungh hnoi zanc yie diev nyutc pui, diev yuoqv. Lungh muonz zanc yaac diev juangv, guangc m'njormh jaax.

⁴¹Yie hnangv naaiv nor caux meih yiem buangv nyic ziepc hnyangx. Yie zoux gong ziepc feix hnyangx bietv meih nyei i dauh sieqv longc. Aengx zoux juqv hnyangx bietv meih nyei saeng-kuv. Meih corc tiuv yie nyei gong-zinh duqv ziepc nzunc mi'aqv.

⁴²Se gorngv maiv zeiz yie nyei die nyei Tin-Hungh, Apc^laa^ham nyei Tin-Hungh, dongh I^sakc zaangc nyei Tin-Hungh,[115] caux yie yiem nor, meih zungv bun yie kungx-buoz baeqc zaux nyei cuotv hnangv. Mv baac Tin-Hungh buatc yie nyei kouv-zingh caux yie nyei buoz zoux nyei gong. A'hmuangx ninh ziouc baav jienv meih.”

⁴³Laa^mbaan dau Yaakopv, “Naaiv deix sieqv se yie nyei sieqv. Naaiv deix fu'jueiv yaac yie nyei. Naaiv deix yungh guanh caux ba'gi yungh guanh yaac yie nyei. Meih buatc jienv nyei yietc zungv se yie nyei. Ih hnoi yie haih zoux haaix nyungc tengx yie nyei sieqv caux ninh mbuo nyei fu'jueiv?

⁴⁴Daaih maah! Meih caux yie oix zuqc liepc jiez ngaengc waac weic tengx mbuo i dauh zoux zorng-zengx.”

⁴⁵Yaakopv ziouc zorqv norm la'bieiv liepc jiez daaih don jienv zoux jangx-hoc,

⁴⁶aengx mbuox ninh nyei mienh, “Nzauz la'bieiv daaih maah!” Ninh mbuo ziouc nzauz la'bieiv daaih ndui jienv aqv. Ndui liuz, ninh mbuo ziouc lomh nzoih yiem wuov la'bieiv-ndui nyei ga'hlen nyanc hnaangx.

⁴⁷Laa^mbaan cuotv wuov norm dorngx nyei mbuox heuc Yegaa Saax^haax^ndu^taa,[116] mv baac Yaakopv cuotv mbuox heuc Gaa^le^etc.[117]

⁴⁸Laa^mbaan gorngv, “Ih hnoi naaiv ndui la'bieiv zoux mbuo i dauh nyei zorng-zengx.” Weic naaiv wuov norm dorngx heuc Gaa^le^etc.

⁴⁹Aengx duqv mbuox heuc Mitv^baa,[118] weic zuqc Laa^mbaan gorngv, “Mbuo leih nqoi doic mv baac tov ZIOUV yiem meih caux yie mbuo mbu'ndongx zuov jienv.

⁵⁰Se gorngv meih zoux doqc yie nyei sieqv, fai cuotv liuz yie nyei sieqv meih aengx ganh longc dauh auv, maiv gunv yie maiv hiuv, jangx jienv oc, maaih Tin-Hungh tengx meih caux yie zoux zorng-zengx.”

⁵¹Laa^mbaan aengx gorngv mbuox Yaakopv, “Mangc gaax, naaiv se yie ndui nyei la'bieiv caux don jienv nyei la'bieiv-dongc yiem meih caux yie mbu'ndongx.

⁵²Naaiv ndui la'bieiv caux naaiv norm la'bieiv-dongc zoux zorng-zengx tengx mbuo jangx zuqc, yie maiv jiex meih wuov bung zoux haaix nyungc hoic meih. Meih yaac maiv jiex naaiv bung zoux haaix nyungc hoic yie.

⁵³Tov Apc^laa^ham nyei Tin-Hungh caux Naa^ho nyei Tin-Hungh, dongh ninh mbuo nyei die nyei Tin-Hungh, tengx mbuo dunx sic.” Yaakopv ziouc ziangv jienv dongh ninh nyei die, I^sakc, zaangc nyei Tin-Hungh[119] nyei mbuox laengz jiez ngaengc waac.

⁵⁴Ninh yaac yiem wuov norm mbong-aiv longc saeng-kuv ziec bun Tin-Hungh yaac heuc ninh nyei gorx-youz daaih lomh nzoih nyanc hnaangx. Nyanc liuz, ninh mbuo ziangh muonz yiem wuov norm mbong.

⁵⁵Da'nyeic ndorm nziouv nyei, Laa^mbaan zom ninh nyei sieqv caux ninh nyei fun yaac buang waac ninh mbuo, ziouc cuotv jauv nzuonx biauv aqv.