Read Iu Mien Tin Deic Douh 33 Bible Online

Tin Deic Douh 33 - Iu Mien bible

Tin Deic Douh 33

¹Yaakopv mingh gau, buatc Esaau caux ninh nyei feix baeqv dauh mienh daaih. Ninh ziouc bun nqoi ninh nyei fu'jueiv bun Le^aa, Laasen caux i dauh nouh beiz, yietc dauh dorh deix mingh.

²Ninh bun ninh nyei i dauh nouh beiz caux ninh mbuo nyei fu'jueiv mingh ndaangc. Jiex daaih maaih Le^aa caux ninh nyei fu'jueiv. Laasen caux Yosepv nqa'haav laai jiex.

³Yaakopv ganh mingh ndaangc puoqv njiec taux ndau siec nzunc cingx taux fatv deix ninh nyei gorx wuov.

⁴Mv baac Esaau tiux mingh zipv, qam jienv zom.[126] I muoz zungv nyiemv.

⁵Esaau cau hmien buatc wuov deix m'sieqv dorn caux fu'jueiv, ninh naaic gaax, “Gan meih daaih naaiv deix mienh se haaix dauh?” Yaakopv dau, “Naaiv deix fu'jueiv se Tin-Hungh korv-lienh yie, ceix bun yie, meih nyei bou.”

⁶Wuov deix i dauh nouh beiz caux ninh mbuo nyei fu'jueiv ziouc daaih gueic njiec baaix.

⁷Jiex daaih Le^aa caux ninh nyei fu'jueiv yaac daaih gueic njiec baaix. Yosepv caux Laasen nqa'haav taux yaac fih hnangv nyei gueic njiec baaix.

⁸Esaau naaic gaax, “Yie buangh wuov deix saeng-kuv guanh maaih haaix nyungc eix leiz?” Yaakopv dau, “Ov, naaiv se weic oix bun gorx nqoi fim nqoi eix hnamv yie.”

⁹Mv baac Esaau dau, “Youz aac, yie mv baac maaih gaux longc nyei. Meih nyei, liouh meih ganh longc aqv.”

¹⁰Yaakopv gorngv, “Tov maiv dungx hnangv naaiv nor gorngv oc. Se gorngv meih nqoi eix yie nor, tov longc yie nyei zingh nyeic. Ih zanc yie buatc meih nyei hmien se hnangv buatc Tin-Hungh nyei hmien nor, weic zuqc meih maaih hnyouv zipv yie longx haic.

¹¹Tov gorx zipv yie dorh daaih nyei zingh nyeic. Tin-Hungh korv-lienh yie, bun yie maaih gaux longc.” Yaakopv gorngv gau, Esaau laengz longc mi'aqv.

¹²Esaau gorngv, “Mbuo lomh nzoih mingh aqv. Yie mingh ndaangc dorh meih.”

¹³Yaakopv dau, “Yie nyei ziouv yaac hiuv nyei, fu'jueiv muonc haic. Yie yaac oix zuqc hnamv taux ba'gi yungh caux yungh caux ngongh dorh jienv dorn nyei. Se gorngv horngh jienv mingh beqv nor, yietc hnoi hnangv saeng-kuv zungv daic nzengc aqv.

¹⁴Meih gunv mingh ndaangc aqv. Yie nqa'haav manc-manc mingh. Se gorngv fu'jueiv caux saeng-kuv mingh duqv nor, yie mv baac gaanv jienv mingh taux yie aengx buangh meih, yie nyei ziouv, yiem Se^i Deic.”

¹⁵Esaau gorngv, “Wuov nyungc, yie bun i ziex dauh yie ganh nyei mienh caux meih yiem naaiv.” Yaakopv dau, “Maiv zuqc hnangv naaic lorqc. Da'faanh duqv yie nyei ziouv nqoi eix hnangv duqv aqv.”

¹⁶Wuov hnoi Esaau ziouc nzuonx Se^i Deic mi'aqv.

¹⁷Mv baac Yaakopv mingh Sukc^kotv[127] gomv biauv, zoux saeng-kuv liuh. Wuov norm dorngx ziouc cuotv mbuox heuc Sukc^kotv.

¹⁸Yaakopv yiem Batc^ndaan Aalam mingh taux Kaa^naa^an Deic-Bung, Sekem Zingh mi'aqv. Longx nyei, maiv maaih haaix nyungc. Ninh corng jienv ndopv-liuh yiem wuov zingh ga'hlen.

¹⁹Corng ndopv-liuh nyei ndau ninh longc yietc baeqv kuaaiv nyaanh[128] tengx Haamo nyei dorn mbuo, Sekem nyei die, maaiz daaih.

²⁰Yiem wuov norm dorngx ninh ceix norm ziec-dorngh aengx cuotv mbuox heuc En E^lo^he I^saa^laa^en.[129]