Read Iu Mien Tin Deic Douh 35 Bible Online

Tin Deic Douh 35 - Iu Mien bible

Tin Deic Douh 35

¹Tin-Hungh gorngv mbuox Yaakopv, “Ih zanc meih oix zuqc suiv mingh yiem Mbetc^en. Yiem wuov oix zuqc ceix norm ziec-dorngh weic yie, dongh zinh ndaangc meih biaux meih nyei gorx, Esaau, wuov zanc hinc cuotv daaih bun meih buatc nyei Tin-Hungh.”

²Yaakopv ziouc mbuox ninh nyei hmuangv doic aengx caux ninh yiem wuov deix mienh, “Meih mbuo maaih ganh fingx nyei haaix nyungc miuc-fangx oix zuqc guangc taux nzengc. Oix zuqc saax nzengc uix, yienc lui-houx.

³Mbuo oix zuqc leih nqoi naaiv norm dorngx mingh yiem Mbetc^en. Taux wuov yie oix ceix norm ziec-dorngh weic Tin-Hungh, dongh zinh ndaangc yie buangh zuqc kouv naanc ninh tengx yie, yie mingh taux haaix ninh yaac caux yie mingh, wuov dauh Tin-Hungh.”

⁴Ninh mbuo yietc zungv ziouc zorqv ninh mbuo maaih nyei ganh fingx mienh nyei miuc-fangx caux dangh jienv nyei m'normh hiun, jiu bun Yaakopv. Yaakopv ziouc biopv jienv domh mba'ong zuei ndiangx-gorn ndiev, leih Sekem Zingh maiv nangc go.

⁵Yaakopv caux gan ninh nyei zuangx mienh cuotv jauv mingh wuov zanc, Tin-Hungh bun huing nzuonx wuov deix zingh nyei mienh gamh nziex haic, ziouc maiv zunc Yaakopv nyei dorn mbuo.

⁶Yaakopv caux yietc zungv gan ninh nyei mienh mingh taux Kaa^naa^an Deic-Bung, Lutv Zingh, (se Mbetc^en Zingh).

⁷Taux wuov ninh ceix norm ziec-dorngh daaih aengx cuotv wuov norm dorngx nyei mbuox heuc En Mbetc^en,[131] weic zuqc biaux ninh nyei gorx, Esaau, wuov zanc, Tin-Hungh yiem wuov hinc cuotv bun ninh buatc.

⁸Dongh zinh ndaangc dorh Le^mbe^kaa hlo daaih wuov dauh bou, Nde^mbo^laa, guei seix mi'aqv. Ninh mbuo ziouc zangx jienv yiem Mbetc^en nyei naamh bung, yietc diuh domh mba'ong zuei ndiangx-gorn hlen. Wuov diuh ndiangx ninh mbuo cuotv norm mbuox heuc Anlon Mbaakutv.[132]

⁹Yaakopv yiem Batc^ndaan Aalam Deic nzuonx daaih, Tin-Hungh aengx hinc cuotv nzunc, buang waac bun ninh.

¹⁰Tin-Hungh mbuox ninh, “Meih nyei mbuox heuc Yaakopv mv baac yangh naaiv jiex meih nyei mbuox oix zuqc goiv heuc I^saa^laa^en.”[133] Hnangv naaiv ninh ziouc duqv mbuox heuc I^saa^laa^en.

¹¹Tin-Hungh aengx gorngv, “Yie se Nernh Jiex nyei Tin-Hungh.[134] Meih oix zuqc maaih fu'jueiv camv. Meih nyei zeiv-fun oix hiaangx daaih benx yietc fingx caux camv-guoqv nyei fingx. Maaih deix meih nyei zeiv-fun yaac oix duqv zoux hungh.

¹²Yie jiu bun Apc^laa^ham caux I^sakc nyei deic-bung, yie yaac jiu bun meih caux meih nyei hoz doic zeiv-fun.”

¹³Gorngv liuz, Tin-Hungh ziouc yiem wuov norm dorngx faaux mingh mi'aqv.

¹⁴Yaakopv zorqv norm la'bieiv don jienv Tin-Hungh caux ninh gorngv waac nyei dorngx, yaac zorqv a'ngunc diuv ciev dongc gu'nguaaic, yaac zorqv ga'lanv youh dox jienv.

¹⁵Ninh aengx cuotv wuov norm dorngx nyei mbuox heuc Mbetc^en.[135]

¹⁶Yaakopv mbuo yiem Mbetc^en cuotv jauv mingh. Corc leih E^faa^laa^taa Mungv go deix nyei, Laasen taux ziangh hoc ndutv sin. Ninh mun kouv, aqc duqv yungz haic.

¹⁷Mun kouv jiex nyei ziangh hoc, goux ninh wuov dauh m'sieqv dorn gorngv, “Meih maiv dungx gamh nziex oc. Naaiv dauh gu'nguaaz se dorn.”

¹⁸Laasen aav lamh daic wuov zanc, ninh aengx tauv cuotv nzunc qiex, tengx ninh nyei dorn cuotv mbuox heuc Mben^o^ni.[136] Mv baac Yaakopv cuotv mbuox heuc Mben^yaa^min.[137]

¹⁹Laasen daic mi'aqv, zangx jienv mingh E^faa^laa^taa nyei jauv-hlen. (E^faa^laa^taa aengx maaih norm mbuox heuc Mbetc^le^hem.)

²⁰Yaakopv zorqv norm la'bieiv don jienv Laasen nyei zouv zoux jangx-hoc. Wuov norm la'bieiv yiem taux ih jaax hnoi.

²¹I^saa^laa^en[138] mbuo aengx suiv mingh corng ndopv-liuh yiem E^nde Fanh Taapv nyei wuov ndaangc maengx.

²²Yiem gau wuov norm deic-bung, gb I^saa^laa^en[139] nyei dorn, Lu^mben, caux ninh nyei maa-faix, Mbin^haa, maaih jauv. Ninh nyei die hiuv mi'aqv. Yaakopv maaih ziepc nyeic dauh dorn.

²³Le^aa nyei dorn maaih Lu^mben. Lu^mben se Yaakopv nyei dorn-hlo. Aengx maaih Si^me^on, Lewi, Yu^ndaa, Itc^saax^kaa, caux Se^mbu^lun.

²⁴Laasen nyei dorn maaih Yosepv caux Mben^yaa^min.

²⁵Laasen nyei nouh beiz, Mbin^haa, nyei dorn maaih Ndaan caux Napv^taa^li.

²⁶Le^aa nyei nouh beiz, Sinx^baa, nyei dorn maaih Gaatc caux Aa^se. Naaiv deix yietc zungv dorn, Yaakopv yiem Batc^ndaan Aalam duqv daaih.

²⁷Yaakopv nzuonx taux ninh nyei die, I^sakc, yiem Mamle, nitv Ki^li^yaatv Aan^mbaa, (se He^mbo^lon, dongh zinh ndaangc Apc^laa^ham caux I^sakc yiem nyei dorngx).

²⁸I^sakc ziangh duqv yietc baeqv betv ziepc hnyangx.

²⁹Ninh ziangh duqv siouc nyuonh ndaauv, hnyangx-jeiv gox haic, ziouc dangx qiex, guei seix mi'aqv.[140] Ninh nyei i dauh dorn, Esaau caux Yaakopv, dorh ninh nyei sei mingh zangx.