Read Iu Mien Tin Deic Douh 40 Bible Online

Tin Deic Douh 40 - Iu Mien bible

Tin Deic Douh 40

¹Jiex liuz yietc caamx, tengx I^yipv Deic-Bung nyei Faalo Hungh bouh a'ngunc diuv wuov dauh domh jien caux zoux njuov bun Faalo Hungh nyanc wuov dauh domh jien dorngc hungh diex.

²Hungh diex qiex jiez haic naaiv deix i dauh jien,

³ziouc zorqv ninh mbuo wuonx jienv goux hungh dinc wuov dauh domh baeng-bieiv nyei biauv nyei loh, dongh Yosepv zuqc wuonx wuov norm loh.

⁴Goux hungh dinc wuov dauh domh baeng-bieiv paaiv Yosepv goux ninh mbuo. Ninh mbuo i dauh yaac zuqc wuonx jienv loh lauh nyei.

⁵Maaih muonz nor, bouh diuv caux zoux njuov wuov deix i dauh domh jien yiem wuov loh mbeix mbeix. Yietc dauh mbeix buatc yietc nyungc. Yietc dauh nyei mbeix yaac maaih yietc nyungc eix leiz.

⁶Da'nyeic ndorm Yosepv bieqc mingh mangc, buatc ninh mbuo i dauh zungv nzauh nzauh wuov.

⁷Ninh naaic gaax Faalo nyei domh jien, dongh caux ninh zuqc wuonx jienv ninh nyei ziouv nyei biauv nyei loh wuov deix i dauh, “Meih mbuo ih hnoi zoux haaix nyungc? Buatc nzauh nzauh wuov!”

⁸Ninh mbuo dau, “A'hmuangx yie mbuo i dauh zungv mbeix mbeix. Yiem naaiv yaac maiv maaih haaix dauh haih tengx yie mbuo porv mbeix.” Yosepv dau, “Kungx Tin-Hungh hnangv haih porv mbeix maiv zeiz? Meih mbuo gorngv meih mbuo nyei mbeix bun yie muangx maah!”

⁹Bouh a'ngunc diuv wuov dauh domh jien ziouc gorngv ninh nyei mbeix bun Yosepv muangx. Ninh gorngv, “Yie buatc diuh a'ngunc hmei yiem yie nyei nza'hmien.

¹⁰Wuov diuh hmei yaac maaih buo caax nquaah. Yietv cuotv cunx daaih yaac nqoi biangh, biouv-joih yaac zuoqc.

¹¹Wuov zanc Faalo Hungh nyei zaanv yiem yie nyei buoz. Yie ziouc gaeqv wuov deix a'ngunc biouv nanv biouv-wuom dapv jienv zaanv bouh bun Faalo.”

¹²Yosepv gorngv, “Meih nyei mbeix nyei eix leiz se hnangv naaiv. Wuov deix buo nquaav nquaah beiv buo hnoi.

¹³Aengx buo hnoi Faalo Hungh oix bungx meih cuotv, oix guangc meih nyei zuiz, yaac bun meih duqv zoux gong hnangv loz wuov nor. Meih aengx duqv bouh a'ngunc diuv bun Faalo Hungh hnangv zinh ndaangc meih zoux wuov nor.

¹⁴Meih duqv longx nyei ziangh hoc tov jangx deix yie, zoux longx bun yie. Gorngv deix yie nyei jauv bun Faalo Hungh muangx, njoux yie cuotv naaiv norm loh.

¹⁵Yie yiem Hipv^lu Mienh nyei deic-bung zuqc dorh taux naaiv daaih. Yiem naaiv I^yipv Deic-Bung yie yaac maiv dorngc haaix nyungc zic duqv bun yie zuqc wuonx jienv naaiv loh hmuangx.”

¹⁶Zoux njuov nyei domh jien buatc Yosepv porv mbeix nyei eix leiz longx, ninh ziouc gorngv mbuox Yosepv, “Yie yaac mbeix norm mbeix. Yie buatc yie ganh nyei m'nqorngv ndongx jienv buo norm jei, dapv jienv njuov nyei.

¹⁷Gu'nguaaic wuov norm jei maaih nyungc-nyungc ziqv daaih nyei njuov bun Faalo Hungh nyanc. Mv baac norqc daaih nyanc wuov deix njuov.”

¹⁸Yosepv gorngv, “Meih nyei mbeix nyei eix leiz se hnangv naaiv. Wuov deix buo norm jei beiv buo hnoi.

¹⁹Aengx buo hnoi Faalo Hungh oix bun mienh hngaqv ndutv meih nyei m'nqorngv aengx zorqv meih nyei sei ndiux jienv ndiangx. Norqc yaac oix daaih nyanc meih nyei orv.”

²⁰Aengx jiex buo hnoi taux Faalo Hungh nyei sih nyietv-hnoi, ninh ziouc mbenc nyanc hopv zoux jorm cingv ninh nyei yietc zungv zoux jien nyei mienh daaih. Ninh yaac bungx bouh a'ngunc diuv caux zoux njuov wuov deix i dauh domh jien cuotv daaih yiem zuangx jien nyei nza'hmien.

²¹Bouh a'ngunc diuv wuov dauh aengx duqv zoux gong hnangv loz wuov nor, ziouc zorqv diuv-zaanv bouh mingh bun hungh diex.

²²Mv baac zoux njuov wuov dauh aeqv, Faalo Hungh heuc zorqv daaih ndiux jienv wuov ndiangx daix guangc mi'aqv. Naaiv deix sic za'gengh doix nzengc Yosepv porv nyei mbeix.

²³Mv baac bouh a'ngunc diuv wuov dauh jien la'kuqv Yosepv mi'aqv. Maiv jangx zuqc ninh aqv.