Read Iu Mien Tin Deic Douh 46 Bible Online

Tin Deic Douh 46 - Iu Mien bible

Tin Deic Douh 46

¹I^saa^laa^en dorh jienv ninh maaih nyei yietc zungv ga'naaiv cuotv jauv mingh taux Mbe^e^qe^mbaa Deic yiem wuov ziec ninh nyei die, I^sakc, nyei Tin-Hungh.

²Lungh muonz zanc Tin-Hungh hinc cuotv daaih heuc ninh, “Yaakopv aac, Yaakopv!” Yaakopv dau, “Oeix! Yie yiem naaiv oc.”

³Tin-Hungh gorngv, “Yie se Tin-Hungh, meih nyei die nyei Tin-Hungh. Maiv dungx gamh nziex. Gunv mingh I^yipv Deic-Bung aqv, weic zuqc yiem wuov yie zungv bun meih benx yietc fingx hlo nyei.

⁴Yie caux meih mingh I^yipv Deic-Bung, ndongc haaix zungv oix dorh meih nzuonx daaih. Meih guei seix nyei ziangh hoc, Yosepv ganh oix tengx meih nyei m'zing njipv.

⁵Yaakopv yiem Mbe^e^qe^mbaa Deic cuotv jauv. Ninh nyei dorn mbuo bun ninh mbuo nyei die caux ninh mbuo nyei fu'jueiv-faix caux ninh mbuo yietc zungv nyei auv faaux Faalo Hungh bun daaih zipv Yaakopv mbuo wuov deix ngongh cie mingh.

⁶Ninh mbuo yaac dorh jienv yiem Kaa^naa^an duqv daaih nyei saeng-kuv caux nyungc-nyungc ga'naaiv mingh I^yipv Deic-Bung. Yaakopv caux ninh nyei fun-faqv yietc zungv mingh.

⁷Ninh dorh jienv ninh nyei dorn, dorn-fun, sieqv, sieqv-fun, se ninh nyei yietc zungv fun-faqv mingh taux I^yipv.

⁸Yiem naaiv mingh gorngv mingh yiem I^yipv Deic-Bung nyei I^saa^laa^en Mienh nyei mbuox. Se Yaakopv caux ninh nyei fun-faqv. Maaih Yaakopv nyei dorn-hlo, Lu^mben.

⁹Lu^mben nyei dorn se Haanokv, Banlu, Hetv^lon, caux Kaanmi.

¹⁰Si^me^on nyei dorn se Ye^mu^en, Yaamin, O^haatc, Yaakin, So^haax caux Saa^un. Saa^un zoux Kaa^naa^an sieqv nyei dorn.

¹¹Lewi nyei dorn se Geson, Ko^haatv caux Me^laa^li.

¹²Yu^ndaa nyei dorn se E^aa, Onan, Qelaa, Beletv caux Zelaa. (Mv baac E^aa caux Onan yiem Kaa^naa^an Deic-Bung wuov zanc guei seix mi'aqv.) Beletv nyei dorn se Hetv^lon caux Haamun.

¹³Itc^saax^kaa nyei dorn se Tolaa, Buwaa,[163] I^opc caux Simlon.

¹⁴Se^mbu^lun nyei dorn se Seletv, Elon caux Yaa^le^en.

¹⁵Naaiv deix se Le^aa yiem Batc^ndaan Aalam yungz bun Yaakopv nyei dorn-jueiv fun-faqv. Aengx maaih dauh sieqv, mbuox heuc Ndinaa. Le^aa nyei buonc dorn-jueiv fun-faqv yietc zungv maaih faah ziepc faam dauh.

¹⁶Gaatc nyei dorn se Si^fi^yon,[164] Hakv^gi, Suni, Etc^mbon, E^le^i, Aa^lo^ndi caux Aa^le^li.

¹⁷Aa^se nyei dorn se Imnaa, Itc^waa, Itc^wi caux Mbe^li^yaa. Naaiv deix dorn nyei muoc heuc Se^laa^aa. Mbe^li^yaa nyei dorn se He^mbe caux Man^ki^en.

¹⁸Naaiv deix se Laa^mbaan bun ninh nyei sieqv, Le^aa, wuov dauh nouh beiz, Sinx^baa, yungz bun Yaakopv nyei dorn-jueiv fun-faqv. Yietc zungv maaih ziepc luoqc dauh.

¹⁹Yaakopv nyei auv, Laasen, nyei dorn se Yosepv caux Mben^yaa^min.

²⁰Yosepv yiem I^yipv Deic-Bung duqv Maa^natv^se caux E^faa^im, se On Zingh nyei sai mienh, Bo^ti^fe^laa, nyei sieqv, Aa^se^natv, yungz bun ninh.

²¹Mben^yaa^min nyei dorn se Mbelaa, Mbeke, Atc^mben, Gelaa, Naa^aa^maan, E^hai, Lo^atc, Mapv^bim, Hupc^bim caux Aatc.

²²Naaiv deix se Laasen yungz bun Yaakopv nyei dorn-jueiv fun-faqv. Yietc zungv maaih ziepc feix dauh.

²³Ndaan nyei dorn se Husim.

²⁴Napv^taa^li nyei dorn se Yaa^si^en, Guni, Yese caux Sinlem.

²⁵Naaiv deix se Laa^mbaan bun ninh nyei sieqv, Laasen, wuov dauh nouh beiz, Mbin^haa, yungz bun Yaakopv nyei dorn-jueiv fun-faqv. Yietc zungv maaih siec dauh.

²⁶Gan Yaakopv mingh I^yipv Deic-Bung wuov zanc, ninh ganh nyei dorn-jueiv fun-faqv maaih luoqc ziepc luoqc dauh, cih cuotv ninh nyei mbuangz.

²⁷Aengx maaih Yosepv yiem I^yipv Deic-Bung duqv wuov deix i dauh dorn. Yaakopv bieqc I^yipv Deic-Bung wuov zanc, ninh nyei dorn-jueiv fun-faqv yietc zungv maaih cietv ziepc dauh.

²⁸Yaakopv heuc Yu^ndaa mingh ndaangc mbuox Yosepv ninh gan jienv jauv daaih Gosen aqv. Ninh mbuo mingh taux Gosen Deic,

²⁹Yosepv mbenc ninh nyei maaz-cie mingh Gosen zipv ninh nyei die, I^saa^laa^en.[165] Yosepv yietv buatc, ziouc qam jienv ninh nyei die qaqv nyiemv lauh nyei.

³⁰I^saa^laa^en gorngv mbuox Yosepv, “Ih zanc yie duqv buatc liuz meih, hiuv duqv meih corc ziangh jienv nyei, yie daic yaac hnyouv nqaai aqv.”

³¹Yosepv gorngv mbuox ninh nyei muoz-doic caux ninh nyei die mbuo yietc zungv hmuangv doic, “Yie oix mbuox Faalo Hungh, ‘Yie nyei muoz-doic caux yie nyei die mbuo hmuangv doic yietc zungv yiem Kaa^naa^an Deic-Bung ih zanc daaih taux yie naaiv daaih aqv.

³²Yie oix mbuox ninh meih mbuo zoux yungz yungh, yungz saeng-kuv nyei mienh. Meih mbuo dorh jienv meih mbuo nyei yungh, saeng-kuv caux nyungc-nyungc ga'naaiv daaih.’

³³Faalo Hungh heuc meih mbuo daaih lorz ninh wuov zanc, ninh oix naaic meih mbuo, ‘Meih mbuo zoux haaix nyungc gong nyanc nyei mienh?’

³⁴Meih mbuo oix zuqc dau, ‘Yie mbuo, meih nyei bou, faix-faix nyei m'daaih yungz saeng-kuv taux ih zanc, hnangv yie mbuo nyei ong-taaix nor.’ Meih mbuo hnangv naaiv nor gorngv nor, ninh ziouc bun meih mbuo yiem Gosen, weic zuqc I^yipv Mienh youx haic yungz yungh nyei mienh.”