Read Iu Mien Tin Deic Douh 5 Bible Online

Tin Deic Douh 5 - Iu Mien bible

Tin Deic Douh 5

¹Naaiv se Aa^ndam nyei zeiv-fun nyei douh zong daan. Tin-Hungh zeix mienh daaih wuov zanc, ninh zeix daaih zuangv ninh ganh.

²Ninh zeix benx m'jangc m'sieqv yaac ceix fuqv bun ninh mbuo, aengx tengx cuotv mbuox heuc “baamh mienh.”

³Aa^ndam duqv yietc baeqv faah ziepc hnyangx, ninh aengx duqv dauh dorn daaih zuangv ninh, yaac tengx cuotv mbuox heuc Setc.

⁴Yiem duqv liuz Setc, Aa^ndam aengx ziangh duqv betv baeqv hnyangx, corc maaih dorn maaih sieqv nyei.

⁵Aa^ndam nyei hnyangx-jeiv duqv juov baeqv faah ziepc hnyangx ziouc guei seix mi'aqv.

⁶Setc duqv yietc baeqv lengh biaa hnyangx, ninh duqv dauh dorn, mbuox heuc Enotv.

⁷Yiem duqv liuz Enotv, ninh ziangh duqv betv baeqv lengh siec hnyangx, corc maaih dorn maaih sieqv nyei.

⁸Setc nyei hnyangx-jeiv duqv juov baeqv ziepc nyeic hnyangx, ninh ziouc guei seix mi'aqv.

⁹Enotv duqv juov ziepc hnyangx, ninh duqv dauh dorn, mbuox heuc Kenan.

¹⁰Yiem duqv liuz Kenan, ninh ziangh duqv betv baeqv ziepc hmz hnyangx, corc maaih dorn maaih sieqv nyei.

¹¹Enotv nyei hnyangx-jeiv duqv juov baeqv lengh biaa hnyangx, ninh ziouc guei seix mi'aqv.

¹²Kenan duqv cietv ziepc hnyangx, ninh duqv dauh dorn, mbuox heuc Maa^haa^laa^len.

¹³Duqv liuz Maa^haa^laa^len, ninh aengx ziangh duqv betv baeqv feix ziepc hnyangx, corc maaih dorn maaih sieqv nyei.

¹⁴Kenan nyei hnyangx-jeiv duqv juov baeqv lengh ziepc hnyangx ziouc guei seix mi'aqv.

¹⁵Maa^haa^laa^len duqv luoqc ziepc hmz hnyangx, ninh duqv dauh dorn, mbuox heuc Yaaletv.

¹⁶Duqv liuz Yaaletv, ninh aengx ziangh duqv betv baeqv faah ziepc hnyangx, corc maaih dorn maaih sieqv nyei.

¹⁷Maa^haa^laa^len nyei hnyangx-jeiv duqv betv baeqv juov ziepc hmz hnyangx ziouc guei seix mi'aqv.

¹⁸Yaaletv duqv yietc baeqv luoqc ziepc nyeic hnyangx, ninh duqv dauh dorn, mbuox heuc Enokv.

¹⁹Yiem duqv liuz Enokv, ninh aengx ziangh duqv betv baeqv hnyangx, corc maaih dorn maaih sieqv nyei.

²⁰Yaaletv nyei hnyangx-jeiv duqv juov baeqv luoqc ziepc nyeic hnyangx ziouc guei seix mi'aqv.

²¹Enokv duqv luoqc ziepc hmz hnyangx, ninh duqv dauh dorn, mbuox heuc Me^tu^se^laa.

²²Duqv liuz naaiv dauh dorn, Enokv caux Tin-Hungh horpc hnyouv jiu tong faam-baeqv hnyangx, corc maaih dorn maaih sieqv nyei.

²³Enokv nyei siouc nyuonh ziangh duqv faam-baeqv luoqc ziepc hmz hnyangx.

²⁴Enokv zanc-zanc caux Tin-Hungh jiu tong,[12] Tin-Hungh dorh ninh mingh mi'aqv. Ziang naaic maiv buatc mi'aqv.

²⁵Me^tu^se^laa duqv yietc baeqv betv ziepc cietv hnyangx, ninh duqv dauh dorn, mbuox heuc Laamekv.

²⁶Yiem duqv liuz Laamekv, ninh aengx ziangh duqv cietv baeqv betv ziepc nyeic hnyangx, corc maaih dorn maaih sieqv nyei.

²⁷Me^tu^se^laa nyei hnyangx-jeiv duqv juov baeqv luoqc ziepc juov hnyangx ziouc guei seix mi'aqv.

²⁸Laamekv duqv yietc baeqv betv ziepc nyeic hnyangx, ninh duqv dauh dorn daaih,

²⁹tengx ninh cuotv mbuox heuc Noyaa.[13] Ninh gorngv, “Weic zuqc ZIOUV houv ndau, yie mbuo oix zuqc longc buoz zoux gong kouv. Naaiv dauh dorn haih tengx yie mbuo nyei gong-bou heng deix.”

³⁰Laamekv duqv liuz Noyaa, ninh aengx ziangh duqv hmz baeqv juov ziepc hmz hnyangx, corc maaih dorn maaih sieqv nyei.

³¹Laamekv nyei hnyangx-jeiv duqv cietv baeqv cietv ziepc cietv hnyangx ziouc guei seix mi'aqv.

³²Noyaa ziangh duqv hmz baeqv hnyangx cingx duqv buo dauh dorn, mbuox heuc Sem, Haam caux Yaafetv.