Read Iu Mien 2 Saa^mu^en 11 Bible Online

2 Saa^mu^en 11 - Iu Mien bible

2 Saa^mu^en 11

¹Taux cun-gen hnoi, doix zuqc zuangx hungh diex yietc gau cuotv mingh mborqv jaax nyei ziangh hoc, Ndaawitv paaiv Yo^aapc caux jienv ninh nyei zuangx jien caux I^saa^laa^en nyei yietc zungv baeng cuotv mingh mborqv jaax. Ninh mbuo mborqv baaic Ammon Mienh yaac weih jienv oix mborqv Lapv^mbaa Zingh. Mv baac Ndaawitv yiem jienv Ye^lu^saa^lem.

²Maaih hnoi lungh maanz-hmuangx, Ndaawitv yiem coux jiez sin daaih faaux hungh dinc nyei biauv-ngorh gu'nguaaic[27] saau a'nziaauc. Yiem biauv-ngorh mangc njiec, ninh buatc dauh m'sieqv dorn nzaaux jienv sin. Wuov dauh m'sieqv dorn ziangh duqv nzueic haic.

³Ndaawitv ziouc paaiv mienh mingh muangx gaax naaiv dauh m'sieqv dorn hnangv haaix nor. Maaih dauh mienh gorngv, “Wuov dauh m'sieqv dorn se E^li^am nyei sieqv, Mbatc^qe^mbaa, Hitv^tai Mienh, U^li^aa nyei auv.”

⁴Ndaawitv paaiv mienh mingh dorh wuov dauh m'sieqv dorn daaih. Ninh ziouc daaih lorz Ndaawitv. Ndaawitv yaac caux ninh bueix. (Wuov zanc Mbatc^qe^mbaa nyei sin-yienc jang-jang nzengc, ninh aengx saax liuz uix.) Bueix liuz, Mbatc^qe^mbaa nzuonx ninh ganh nyei biauv mi'aqv.

⁵Wuov dauh m'sieqv dorn ziouc maaih jienv sin aqv. Ninh paaiv mienh mingh mbuox Ndaawitv, “Yie maaih sin aqv.”

⁶Ndaawitv ziouc paaiv mienh mingh Yo^aapc wuov mbuox ninh, “Fungx Hitv^tai Mienh, U^li^aa, daaih yie naaiv oc.” Yo^aapc ziouc fungx U^li^aa mingh Ndaawitv wuov.

⁷U^li^aa daaih lorz ninh wuov zanc, Ndaawitv naaic gaax, Yo^aapc hnangv haaix nor, baeng hnangv haaix nor, mborqv jaax nyei sic hnangv haaix nor.

⁸Nqa'haav Ndaawitv gorngv mbuox U^li^aa, “Gunv nzuonx meih nyei biauv hitv dangh kuonx maah!”[28] U^li^aa ziouc cuotv hungh dinc. Hungh diex yaac bun mienh dorh zingh nyeic mingh fungx bun ninh.

⁹Mv baac U^li^aa caux ninh nyei ziouv nyei zuangx jien bueix hungh dinc nyei gaengh ndaangc. Ninh maiv nzuonx ninh ganh nyei biauv.

¹⁰Maaih mienh mbuox Ndaawitv, “U^li^aa maiv nzuonx biauv.” Ndaawitv ziouc naaic U^li^aa, “Meih yiem go nyei daaih maiv zeiz? Meih weic haaix diuc maiv nzuonx biauv?”

¹¹U^li^aa gorngv mbuox Ndaawitv, “Laengz Ngaengc Waac Faang caux Yu^ndaa Mienh caux I^saa^laa^en Mienh yiem ndopv-liuh. Yie nyei ziouv, Yo^aapc, caux yie nyei ziouv nyei mienh yaac liepc ciangv yiem lomc-huaang. Yie fungc haih nzuonx biauv nyanc, hopv aengx caux yie nyei auv bueix? Yie ziangv jienv hungh diex nyei maengc laengz yie ndongc haaix zungv maiv hnangv naaic zoux.”

¹²Ndaawitv ziouc gorngv mbuox U^li^aa, “Ih hnoi aengx yiem hnoi naaiv, njang hnoi yie bun meih nzuonx.” Wuov hnoi caux da'nyeic hnoi, U^li^aa yiem Ye^lu^saa^lem Zingh.

¹³Ndaawitv heuc U^li^aa daaih caux ninh nyanc yaac hopv, bun ninh hopv diuv nquin. Mv baac wuov muonz U^li^aa cuotv mingh yiem ninh nyei ziouv nyei jien mbu'ndongx bueix ninh ganh nyei ziqc,[29] mv baac ninh maiv nzuonx biauv.

¹⁴Da'nyeic ndorm Ndaawitv fiev fienx bun Yo^aapc aengx bun U^li^aa dorh mingh.

¹⁵Fienx fiev jienv gorngv, “Bun U^li^aa yiem mborqv jaax gauh hniev jiex nyei dorngx wuov ndaangc maengx liuz, meih mbuo gunv tuix cuotv aqv, bun ninh zuqc daix daic aqv.”

¹⁶Hnangv naaic Yo^aapc weih jienv zingh nyei ziangh hoc ninh bun U^li^aa yiem maaih win-wangv gauh henv nyei baeng yiem nyei dorngx.

¹⁷Zingh gu'nyuoz nyei mienh cuotv daaih caux Yo^aapc mborqv jaax. Maaih deix Ndaawitv nyei jien zuqc daic. Hitv^tai Mienh, U^li^aa, yaac zuqc daix daic.

¹⁸Yo^aapc paaiv mienh mingh zorqv mborqv jaax nyei yietc zungv sic mingh mbuox Ndaawitv.

¹⁹Ninh jaa waac douc fienx mienh, “Meih zorqv naaiv deix mborqv jaax nyei yietc zungv sic mbuox liuz hungh diex.

²⁰Se gorngv hungh diex qiex! jiez haic, naaic meih, ‘Meih mbuo mborqv jaax fungc mingh nitv zingh laatc ndongc naaic fatv? Meih mbuo maiv hiuv duqv ninh mbuo oix yiem zingh laatc buonv forng fai?

²¹Haaix dauh daix Yelupv Mbesetv[30] nyei dorn, Aa^mbi^me^lekv? Maiv zeiz maaih dauh m'sieqv dorn yiem zingh laatc gu'nguaaic zoi gu'nguaaic wuov maengx morc njiec mborqv ninh, ninh cingx yiem Te^mbetc daic fai? Meih mbuo fungc mingh nitv zingh laatc ndongc naaic fatv?’ Se gorngv hungh diex hnangv naaiv nor naaic, meih oix zuqc mbuox ninh, ‘Meih nyei bou, Hitv^tai Mienh, U^li^aa, yaac daic mi'aqv.’+”

²²Douc fienx mienh ziouc mingh aqv. Mingh taux Ndaawitv wuov ninh ziux Yo^aapc mbuox ninh nyei waac zueih yietv zueih nyeic nyei gorngv mbuox hungh diex.

²³Douc fienx mienh gorngv mbuox Ndaawitv, “Win-wangv gauh henv jiex yie mbuo yaac cuotv daaih yiem wuov ndau-njang caux yie mbuo mborqv jaax, mv baac yie mbuo zunc ninh mbuo taux zingh gaengh ndaangc.

²⁴Buonv forng nyei mienh yiem zingh laatc gu'nguaaic buonv hungh nyei jien. Maaih deix hungh diex nyei jien daic mi'aqv. Maiv daan mbuoqc naaiv. Meih nyei bou, Hitv^tai Mienh, U^li^aa, yaac daic mi'aqv.”

²⁵Ndaawitv mbuox douc fienx mienh, “Meih oix zuqc hnangv naaiv nor mbuox Yo^aapc, ‘Maiv dungx bun naaiv deix sic kuonx meih nyei hnyouv, weic zuqc nzuqc ndaauv maiv ginv naaiv dauh caux wuov dauh. Meih mbuo oix zuqc qaqv mborqv wuov norm zingh taux mborqv baaic.’ Oix zuqc hnangv naaiv nor gorngv weic orn Yo^aapc nyei hnyouv.”

²⁶U^li^aa nyei auv haiz gorngv ninh nyei nqox daic mi'aqv, ninh weic ninh nyei nqox nzauh nyiemv.

²⁷Nzauh nyiemv nyei ziangh hoc jiex liuz, Ndaawitv paaiv mienh mingh dorh ninh daaih yiem hungh dinc. Ninh ziouc zoux Ndaawitv nyei auv yaac yungz dauh dorn bun Ndaawitv. Mv baac Ndaawitv zoux naaiv deix sic ZIOUV maiv horpc hnyouv.