Read Iu Mien 2 Saa^mu^en 14 Bible Online

2 Saa^mu^en 14 - Iu Mien bible

2 Saa^mu^en 14

¹Se^lu^yaa nyei dorn, Yo^aapc, hiuv duqv hungh diex nyei hnyouv jangx haic Apc^saa^lom.

²Yo^aapc ziouc paaiv mienh mingh Te^ko^aa lorz dauh cong-mengh nyei m'sieqv dorn, gorngv mbuox ninh, “Tov meih zoux eix leiz hnangv nzauh nyiemv nyei mienh. Zuqv jienv mienh nzauh nyiemv nyei ziangh hoc zuqv nyei lui-houx yaac maiv dungx nzaatv youh. Oix zuqc zoux eix leiz hnangv weic daic mingh nyei mienh nzauh nyiemv lauh nyei m'sieqv dorn.

³Oix zuqc bieqc mingh lorz hungh diex hnangv naaiv nor gorngv mbuox ninh.” Yo^aapc ziouc njaaux ziangx naaiv dauh m'sieqv dorn oix zuqc hnangv haaix nor gorngv.

⁴Naaiv dauh Te^ko^aa Mienh nyei m'sieqv dorn mingh lorz hungh diex wuov zanc, ninh puoqv njiec ndau baaix yaac gorngv, “O hungh diex aah! Tov tengx yie.”

⁵Hungh diex naaic ninh, “Meih maaih haaix nyungc sic?” Wuov dauh m'sieqv dorn gorngv, “Yie se auv-guaav. Nqox daic mi'aqv.

⁶Yie, meih nyei m'sieqv bou, maaih i dauh dorn. Maaih hnoi ninh mbuo yiem ndeic nzaeng jaax yaac maiv maaih mienh baav ninh mbuo. Yietc dauh ziouc daix wuov dauh daic.

⁷Ih zanc yie nyei zuangx cien-ceqv daaih lorz yie, meih nyei m'sieqv bou, yaac gorngv, ‘Zorqv dongh daix ninh nyei gorx wuov dauh jiu bun yie mbuo daix weic jaauv gorx zuqc daix daic nyei mienh maengc win. Ninh mbuo liemh oix zorqv duqv nzipc jaa-dingh wuov dauh daix.’ Hnangv naaic ninh mbuo oix zorqv yie zengc njiec nyei dorn[39] mietc. Yie nyei nqox ziouc maiv maaih mbuox yaac maiv maaih hoz doic yiem naaiv lungh ndiev.”

⁸Hungh diex gorngv mbuox wuov dauh m'sieqv dorn, “Gunv nzuonx meih nyei biauv maah! Yie ziouc paaiv waac liuc leiz meih nyei sic.”

⁹Te^ko^aa Mienh m'sieqv dorn gorngv, “Yie nyei ziouv, hungh diex aah! Yie caux yie nyei die nyei douh zong oix zuqc weic naaiv deix sic ndaam-dorng mv baac hungh diex caux hungh weic maiv zuqc ndaam-dorng.”

¹⁰Hungh diex gorngv, “Se gorngv maaih haaix dauh gorngv haaix nyungc bun meih, meih gunv dorh ninh daaih yie naaiv, ninh ziouc maiv mingh aengx la'nyauv meih aqv.”

¹¹Wuov dauh m'sieqv dorn aengx gorngv, “Tov ziangv jienv ZIOUV, meih nyei Tin-Hungh, laengz maiv bun jaauv mienh maengc win wuov dauh aengx daix mienh, yie nyei dorn ziouc maiv zuqc daic aqv.” Hungh diex gorngv, “Yie ziangv jienv ziangh jienv nyei ZIOUV laengz waac gorngv, meih nyei dorn nyei yietc diuh mba'biei maiv zuqc ndortv njiec ndau.”

¹²Wuov dauh m'sieqv dorn gorngv, “Tov bun yie, meih nyei m'sieqv bou, aengx gorngv joux waac mbuox yie nyei ziouv, hungh diex.” Hungh diex dau, “Gunv gorngv maah!”

¹³Naaiv dauh m'sieqv dorn gorngv, “Wuov nyungc hungh diex weic haaix diuc hnangv naaiv nor daav za'eix hoic Tin-Hungh nyei baeqc fingx? Hungh diex hnangv naaiv nor gorngv, hungh diex zungv dingc ganh zoux dorngc weic zuqc hungh diex maiv bun ganh nyei dorn, dongh biaux mingh wuov dauh, nzuonx.

¹⁴Yie mbuo dauh dauh zungv zuqc daic, hnangv wuom kung njiec ndau, maiv haih siou maiv nzuonx aqv. Tin-Hungh maiv zorqv mienh nyei maengc. Daaux nzuonx ninh daav za'eix bun zuqc leih nqoi ninh nyei mienh nzuonx daaih.

¹⁵“Yie daaih gorngv naaiv deix waac mbuox yie nyei ziouv, hungh diex, weic zuqc baeqc fingx haeqv yie gamh nziex. Yie, meih nyei m'sieqv bou, hnamv daaih, ‘Yie oix tov hungh diex. Nziex hungh diex oix ei jienv yie tov nyei waac zoux.

¹⁶Yie hnamv daaih hungh diex oix muangx yie, njoux yie, meih nyei bou, caux yie nyei dorn, biaux ndutv jiez hnyouv oix mietc yie mbuo caux yie mbuo yiem Tin-Hungh nzipc daaih nyei buonc.’

¹⁷“Yie, meih nyei m'sieqv bou, aengx hnamv daaih, ‘Tov yie nyei ziouv, hungh diex, nyei waac bun yie baengh orn, weic zuqc yie nyei ziouv, hungh diex, se hnangv Tin-Hungh nyei fin-mienh, hiuv duqv longx, hiuv duqv ciouv. Tov ZIOUV, meih nyei Tin-Hungh, caux meih yiem.’+”

¹⁸Hungh diex gorngv mbuox wuov dauh m'sieqv dorn, “Yie oix naaic joux waac meih. Dongh yie oix naaic nyei meih maiv dungx bingx.” Wuov dauh m'sieqv dorn gorngv, “Tov yie nyei ziouv, hungh diex, gunv gorngv aqv.”

¹⁹Ndaawitv naaic, “Meih zoux nyei naaiv deix yietc zungv sic se Yo^aapc maaih buonc caux jienv zoux fai?” Wuov dauh m'sieqv dorn gorngv, “Yie ziangv jienv yie nyei ziouv, hungh diex, nyei maengc laengz waac, yie nyei ziouv, hungh diex, gorngv nyei waac maiv pien mingh zaaix, mingh mbiaauc. Se hungh diex nyei bou, Yo^aapc, heuc yie zoux. Se ninh njaaux yie, meih nyei m'sieqv bou, gorngv naaiv deix yietc zungv waac.

²⁰Meih nyei bou, Yo^aapc, oix hnangv naaiv zoux weic mbienv naaiv deix sic. Mv baac yie nyei ziouv maaih cong-mengh hnangv Tin-Hungh nyei fin-mienh, haih hiuv duqv lungh ndiev nyei yietc zungv sic.”

²¹Hungh diex gorngv mbuox Yo^aapc, “Wuov nyungc, yie nqoi nzuih bun meih zoux aqv. Gunv mingh dorh wuov dauh mienh lunx mienh, Apc^saa^lom, nzuonx daaih.”

²²Yo^aapc ziouc puoqv njiec ndau baaix yaac buang waac bun hungh diex. Yo^aapc gorngv, “Ih hnoi meih nyei bou, hiuv duqv ziux yie nyei ziouv, hungh diex, mangc yie zoux duqv horpc hungh diex nyei hnyouv, weic zuqc hungh diex nqoi nzuih zoux ei meih nyei bou tov nyei waac.”

²³Yo^aapc ziouc jiez sin daaih mingh Gesu, dorh Apc^saa^lom nzuonx Ye^lu^saa^lem.

²⁴Hungh diex gorngv, “Bun ninh mingh yiem ninh ganh nyei dinc, maiv dungx bun ninh daaih yiem yie nyei nza'hmien.” Apc^saa^lom ziouc yiem ninh ganh nyei biauv, maiv duqv aengx daaih yiem hungh diex nyei nza'hmien.

²⁵Yiem gormx I^saa^laa^en Deic-Bung maiv maaih yietc dauh mienh ndongc Apc^saa^lom nzueic, duqv mienh ceng. Yiem ninh nyei m'nqorngv-baengh taux zaux-ndoqv-nyeiz bieiv[40] maiv maaih dorngx nqemh.

²⁶Ninh nyei mba'biei hniev haic, oix zuqc yietc hnyangx japv nzunc. Japv daaih wuov zanc ninh ziux hungh diex nziang ga'naaiv nyei hniev-daauh nziang duqv yietc joih ziepc betv lungz.[41]

²⁷Apc^saa^lom duqv buo dauh dorn caux yietc dauh sieqv, mbuox heuc Taamaa. Ninh se yietc dauh nzueic haic nyei sieqv.

²⁸Apc^saa^lom yiem Ye^lu^saa^lem buangv i hnyangx yaac maiv duqv mingh yiem hungh diex nyei nza'hmien.

²⁹Apc^saa^lom paaiv mienh mingh heuc Yo^aapc daaih, oix bun ninh mingh lorz hungh diex. Mv baac Yo^aapc ngaengc jienv maiv daaih. Apc^saa^lom aengx bun mienh mingh heuc Yo^aapc da'nyeic nzunc mv baac ninh corc maiv daaih.

³⁰Apc^saa^lom ziouc mbuox ninh nyei bou, “Mangc maah! Yo^aapc nyei ndeic caux yie nyei ndeic yiem nitv jienv nyei. Ndeic gu'nyuoz maaih mbiauh mbaali. Meih mbuo mingh bungx douz buov maah!” Apc^saa^lom nyei bou ziouc mingh buov aqv.

³¹Yo^aapc ziouc mingh Apc^saa^lom nyei biauv naaic ninh, “Meih nyei bou fungc mingh buov yie nyei ndeic?”

³²Apc^saa^lom dau Yo^aapc, “Yie paaiv mienh mingh lorz meih daaih, oix meih mingh lorz hungh diex tengx yie gorngv, ‘Yie weic haaix diuc yiem Gesu nzuonx? Yie corc yiem naaic gauh longx. Ih zanc tov bun yie mingh yiem hungh diex nyei nza'hmien. Se gorngv buatc yie maaih dorngc nyei dorngx, gunv bun hungh diex daix yie daic.’+”

³³Yo^aapc ziouc mingh mbuox hungh diex. Hungh diex heuc Apc^saa^lom daaih. Ninh ziouc daaih taux hungh diex nyei nza'hmien puoqv njiec ndau. Hungh diex yaac zom Apc^saa^lom.