Read Iu Mien 2 Saa^mu^en 15 Bible Online

2 Saa^mu^en 15 - Iu Mien bible

2 Saa^mu^en 15

¹Nqa'haav Apc^saa^lom weic ganh liuc leiz maaz-cie caux maaz, aengx maaih hmz ziepc dauh mienh tiux mingh ndaangc.

²Apc^saa^lom ndorm-ndorm jiez sin nziouv nyei mingh souv jienv zingh gaengh ndaangc nyei jauv-hlen. Da'faanh haaix dauh mienh maaih sic oix tov hungh diex dunx, Apc^saa^lom ziouc heuc wuov dauh yaac naaic ninh, “Meih yiem haaix norm mungv daaih?” Wuov dauh ziouc dau, “Yie se yiem I^saa^laa^en Deic-Bung nyei yietc fingx mienh.”

³Apc^saa^lom aengx gorngv mbuox ninh, “Meih gorngv nyei se horpc nyei, longx nyei, mv baac hungh diex maiv duqv paaiv haaix dauh muangx meih nyei sic.”

⁴Apc^saa^lom aengx jaa joux waac gorngv, “Feix duqv yie yiem I^saa^laa^en duqv zoux dunx sic jien. Haaix dauh maaih sic fai gox nyei jauv yie ziouc baengh fim nyei tengx ninh dunx.”

⁵Se gorngv maaih haaix dauh mienh daaih fatv, baaix Apc^saa^lom, Apc^saa^lom ziouc sung buoz baeng jienv ninh, zom ninh nyei hmien.

⁶Apc^saa^lom hnangv naaiv nor zoux bun daaih lorz hungh diex dunx sic nyei dauh dauh I^saa^laa^en Mienh. Apc^saa^lom ziouc nduov duqv I^saa^laa^en Mienh nyei hnyouv gan ninh.

⁷Jiex liuz biei hnyangx,[42] Apc^saa^lom gorngv mbuox hungh diex, “Tov bun yie mingh He^mbo^lon jaauv sung yie laengz bun ZIOUV nyei ngaengc waac.

⁸Weic zuqc yie, meih nyei bou, yiem Silie Deic-Bung, Gesu Mungv, wuov zanc yie laengz ngaengc waac gorngv, ‘Se gorngv ZIOUV dorh yie yiem Ye^lu^saa^lem nzuonx, yie zungv oix yiem He^mbo^lon baaix ninh.’+”

⁹Hungh diex gorngv, “Meih gunv baengh orn nyei mingh aqv.” Ninh ziouc mingh He^mbo^lon mi'aqv.

¹⁰Mv baac Apc^saa^lom paaiv douc fienx mienh bingx jienv mingh gormx I^saa^laa^en Deic-Bung nyei fingx-fingx mienh. Ninh mbuo gorngv, “Meih mbuo yietv haiz jorng nyei qiex mbui, oix zuqc gorngv, ‘Apc^saa^lom yiem He^mbo^lon zoux hungh aav loh!’+”

¹¹Maaih nyic baeqv dauh yiem Ye^lu^saa^lem nyei mienh gan jienv ninh mingh. Mienh cingv ninh mbuo mingh mv baac ninh mbuo maiv hiuv duqv naaiv deix jauv.

¹²Apc^saa^lom fongc horc ziec nyei ziangh hoc, ninh paaiv mienh mingh mbuox tengx Ndaawitv caangh laangh wuov dauh Gilon Mienh, Aa^hi^to^fen, yiem ninh nyei buonv-zingh, Gilon, daaih. Faanv nyei jauv gunv zoux gunv hlo. Gan Apc^saa^lom nyei mienh gunv zoux gunv camv.

¹³Maaih dauh douc fienx mienh daaih mbuox Ndaawitv, “I^saa^laa^en Mienh nyei hnyouv bieqc Apc^saa^lom mi'aqv.”

¹⁴Ndaawitv gorngv mbuox caux ninh yiem Ye^lu^saa^lem nyei yietc zungv jien, “Mbuo oix zuqc biaux. Maiv zei aeqv, mbuo maiv haih biaux maiv ndutv Apc^saa^lom. Oix zuqc gaanv jienv mingh, nziex ninh haih siepv-siepv nyei zunc zaaic hoic mbuo, yaac longc nzuqc ndaauv daix yiem zingh nyei mienh.”

¹⁵Hungh diex nyei jien gorngv mbuox hungh diex, “Yie mbuo nyei ziouv, hungh diex, dingc zoux haaix nyungc yie mbuo ziouc ei jienv zoux.”

¹⁶Hungh diex caux ninh nyei yietc biauv mienh ziouc cuotv jauv aqv. Kungx liouh ziepc dauh jaav-zeih auv goux hungh dinc hnangv.

¹⁷Hungh diex ziouc cuotv jauv, zuangx mienh yaac gan jienv mingh. Taux nqa'haav laai wuov norm biauv ninh mbuo dingh njiec.

¹⁸Hungh nyei zuangx jien mingh ndaangc hungh diex. Ke^le^ti Mienh caux Peletv Mienh yietc zungv aengx caux gan ninh wuov deix luoqc baeqv dauh Gatc Mienh jiex ndaangc hungh diex.

¹⁹Hungh diex gorngv mbuox Gatc Mienh, Itc^tai, “Meih weic haaix diuc gan yie mbuo daaih? Gunv nzuonx mingh caux siang-hungh yiem. Meih se ganh fingx mienh, leih nqoi meih ganh nyei deic-bung.

²⁰Meih daaih taux maiv gaengh lauh.[43] Yie ih hnoi oix zuqc bun meih gan yie jiex naaiv jiex wuov. Yie ganh zungv maiv hiuv duqv oix mingh haaix. Gunv nzuonx aqv, yaac dorh jienv meih nyei juangc fingx mienh. Tov ZIOUV bun cing ninh ziepc zuoqv nyei hnamv meih yaac ziepc zuoqv nyei zoux bun meih.”

²¹Mv baac Itc^tai dau hungh diex, “Yie ziangv jienv yietc liuz ziangh jienv nyei ZIOUV yaac yiem yie nyei ziouv, hungh diex, nyei nza'hmien laengz waac gorngv, yie nyei ziouv, hungh diex, yiem haaix, maiv gunv nangh fai daic, yie, meih nyei bou, zungv yiem wuov aqv.”

²²Ndaawitv gorngv mbuox Itc^tai, “Wuov nyungc, meih gunv mingh ndaangc aqv.” Gatc Mienh, Itc^tai, ziouc dorh jienv gan ninh wuov deix mienh, liemh domh mienh caux fu'jueiv, mingh aqv.

²³Zuangx mienh jiex nyei ziangh hoc, buonv-deic mienh yietc zungv bungx-sing bungx-qiex nyei nyiemv mbui. Hungh diex jiex Kitc^lon Ndoqv. Zuangx mienh jiex mingh yaac hungx jienv deic-bung-huaang nyei jauv mingh.

²⁴Saax^ndokc yaac yiem wuov, caux gaeng Tin-Hungh nyei Laengz Ngaengc Waac Faang nyei Lewi Mienh yietc zungv. Ninh mbuo zorqv Tin-Hungh nyei Laengz Ngaengc Waac Faang an njiec. Aa^mbi^yaa^taa faaux daaih[44] zuov zuangx baeqc fingx yiem zingh cuotv daaih jiex nzengc.

²⁵Hungh diex yaac gorngv mbuox Saax^ndokc, “Oix zuqc gaeng Tin-Hungh nyei Laengz Ngaengc Waac Faang nzuonx zingh mingh. Se gorngv ziux ZIOUV mangc yie zoux duqv horpc nor, ninh oix dorh yie nzuonx daaih duqv buatc laengz ngaengc waac faang caux ZIOUV yiem nyei dorngx.

²⁶Mv baac se gorngv ZIOUV gorngv, ‘Yie maiv horpc hnyouv meih,’ yie yiem naaiv, sueih ninh zoux ziux ninh buatc horpc nyei.”

²⁷Hungh diex aengx gorngv mbuox Saax^ndokc sai mienh, “Meih se douc waac mienh maiv zeiz? Gunv baengh orn nyei nzuonx zingh, meih caux Aa^mbi^yaa^taa dorh meih nyei dorn, Aa^hi^maa^atc, caux Aa^mbi^yaa^taa nyei dorn, Yo^naa^taan.

²⁸Yie yiem deic-bung-huaang jiex ndaaih nyei jauv-bouc zuov meih fungx fienx daaih bun yie hiuv.”

²⁹Saax^ndokc caux Aa^mbi^yaa^taa ziouc gaeng Tin-Hungh nyei Laengz Ngaengc Waac Faang nzuonx Ye^lu^saa^lem. Ninh mbuo yaac yiem jienv wuov.

³⁰Mv baac Ndaawitv faaux Ga'lanv Mbong, yietc binc faaux, yietc binc nyiemv. Ninh maiv daapc heh, yaac buang jienv m'nqorngv. Gan ninh wuov deix zuangx mienh yaac buang jienv m'nqorngv, yietc binc faaux, yietc binc nyiemv jienv mingh.

³¹Maaih mienh daaih mbuox Ndaawitv, “Aa^hi^to^fen yiem jienv tengx Apc^saa^lom mbienv sic wuov guanh mienh.” Ndaawitv ziouc daux gaux gorngv, “O ZIOUV aac, tov bun Aa^hi^to^fen tengx caangh laangh nyei waac tiuv benx hngongx nyei sic.”

³²Ndaawitv taux mbong-ningv, zaangc Tin-Hungh nyei dorngx, maaih dauh Aanki Mienh, Husai, daaih yiem ninh nyei nza'hmien. Husai nyei lui-houx betv huv yaac maaih nie-mbung yiem ninh nyei m'nqorngv.[45]

³³Ndaawitv gorngv mbuox ninh, “Se gorngv meih gan yie mingh, meih tengx maiv duqv yie.

³⁴Mv baac se gorngv meih nzuonx zingh mingh mbuox Apc^saa^lom, ‘O hungh diex aac, yie oix zoux meih nyei bou. Zinh ndaangc yie zoux meih nyei die nyei bou. Ih zanc yie oix hnangv wuov nor zoux meih nyei bou.’ Hnangv naaic meih haih bun Aa^hi^to^fen caangh laangh nyei waac ndortv.

³⁵Saax^ndokc sai mienh caux Aa^mbi^yaa^taa sai mienh caux meih yiem naaic maiv zeiz? Meih yiem hungh dinc gu'nyuoz muangx haiz haaix nyungc oix zuqc mbuox Saax^ndokc caux Aa^mbi^yaa^taa.

³⁶Ninh mbuo nyei i dauh dorn yiem naaic. Maaih Saax^ndokc nyei dorn, Aa^hi^maa^atc, caux Aa^mbi^yaa^taa nyei dorn, Yo^naa^taan. Hnangv naaic, da'faanh meih mbuo muangx haiz haaix nyungc, oix zuqc paaiv naaiv deix i dauh daaih mbuox yie.”

³⁷Ndaawitv nyei loz-gaeng doic, Husai, ziouc bieqc zingh mingh. Wuov zanc Apc^saa^lom jang-jang bieqc Ye^lu^saa^lem.