Read Iu Mien 2 Saa^mu^en 2 Bible Online

2 Saa^mu^en 2 - Iu Mien bible

2 Saa^mu^en 2

¹Naaiv deix sic jiex liuz, nqa'haav Ndaawitv naaic ZIOUV, “Yie horpc zuqc mingh Yu^ndaa nyei yietc norm zingh fai?” ZIOUV gorngv, “Gunv mingh aqv.” Ndaawitv aengx naaic, “Oix zuqc mingh haaix norm zingh?” ZIOUV dau, “He^mbo^lon Zingh.”

²Ndaawitv ziouc dorh jienv ninh nyei i dauh auv, se Yitv^le^en Mienh, Aa^hi^no^am, caux Kaanmen Mienh, Naa^mbaan nyei auv-guaav, Aa^mbi^gaa^yin.

³Ndaawitv yaac dorh jienv gan ninh wuov deix mienh, caux ninh mbuo gorqv-mienh nyei hmuangv doic mingh. Ninh mbuo ziouc yiem He^mbo^lon Zingh caux weih gormx nyei mungv.

⁴Yu^ndaa Mienh ziouc daaih taux He^mbo^lon longc youh orn Ndaawitv zoux Yu^ndaa nyei zeiv-fun nyei hungh. Maaih mienh daaih gorngv mbuox Ndaawitv, “Se Yaa^mbetc Gi^le^aatc Mienh zangx Saulo.”

⁵Ndaawitv ziouc paaiv douc fienx mienh mingh lorz Yaa^mbetc Gi^le^aatc Mienh, gorngv mbuox ninh mbuo, “Tov ZIOUV ceix fuqv bun meih mbuo weic zuqc meih mbuo hnangv naaiv nor zoux longx bun meih mbuo nyei ziouv, Saulo, dorh ninh zangx jienv.

⁶Ih zanc tov ZIOUV ziepc zuoqv nyei hnamv yaac baengh fim nyei dorh meih mbuo. Yie yaac oix zoux longx bun meih mbuo weic zuqc meih mbuo hnangv naaiv nor zoux.

⁷Ih zanc meih mbuo oix zuqc henv, daamv hlo nyei, weic zuqc meih mbuo nyei ziouv, Saulo, daic mi'aqv. Yu^ndaa Fingx nyei mienh zungv orn yie zoux ninh mbuo nyei hungh gunv ninh mbuo.”

⁸Saulo nyei jun-baeng nyei domh baeng-bieiv, Ne nyei dorn, Apc^ne, dorh Saulo nyei dorn, Itc^mbo^setv, biaux jiex wuov ngaanc ziqc Jor^ndaen Ndaaih taux Maa^haa^naa^im mi'aqv.

⁹Yiem naaic Apc^ne liepc Itc^mbo^setv zoux hungh gunv Gi^le^aatc Deic caux Aa^se Mienh, Yitv^le^en Mienh, E^faa^im Mienh, Mben^yaa^min Mienh caux I^saa^laa^en nyei zuangx mienh.

¹⁰Saulo nyei dorn, Itc^mbo^setv, faaux weic zoux hungh gunv I^saa^laa^en wuov zanc ninh nyei hnyangx-jeiv duqv feix ziepc hnyangx. Ninh yaac gunv duqv i hnyangx. Mv baac Yu^ndaa nyei zeiv-fun gan Ndaawitv.

¹¹Ndaawitv yiem He^mbo^lon zoux hungh gunv Yu^ndaa nyei zeiv-fun siec hnyangx caux juqv hlaax nyieqc.

¹²Ne nyei dorn, Apc^ne, caux jienv Saulo nyei dorn, Itc^mbo^setv, nyei baeng yiem Maa^haa^naa^im cuotv daaih mingh taux Gi^mbe^on Zingh.

¹³Se^lu^yaa nyei dorn, Yo^aapc, [3] caux jienv Ndaawitv nyei baeng cuotv mingh taux Gi^mbe^on siou wuom nyei kuotv[4] ga'hlen buangh Apc^ne mbuo. Ninh mbuo ziouc zueiz jienv, yietc guanh zueiz naaiv bung njaangh hlen, yietc guanh zueiz wuov bung njaangh hlen.

¹⁴Apc^ne gorngv mbuox Yo^aapc, “Bun mienh lunx mienh jiez sin daaih dorng jienv yie mbuo saaix maah!” Yo^aapc dau, “Gunv bun ninh mbuo saaix aqv.”

¹⁵Ziux ninh mbuo dingc ziangx nyei soux mouc ninh mbuo jiez sin daaih. Weic Mben^yaa^min caux Saulo nyei dorn, Itc^mbo^setv, maaih ziepc nyeic dauh. Weic Ndaawitv yaac maaih ziepc nyeic dauh.

¹⁶Yietc dauh doix yietc dauh nyau jienv m'nqorngv, longc nzuqc ndaauv, laanh nzopv laanh nyei la'nyaapv, yietc zungv king njiec daic nzengc mi'aqv. Weic naaiv yiem Gi^mbe^on naaiv norm dorngx maaih mbuox heuc Henkatc Hatv^su^lim.[5]

¹⁷Wuov hnoi mborqv nyei jaax za'gengh hniev haic. Apc^ne caux I^saa^laa^en Mienh zuqc suei Ndaawitv nyei baeng.

¹⁸Se^lu^yaa nyei buo dauh dorn, Yo^aapc, Aa^mbi^qai caux Aa^saax^hen yiem naaic. Aa^saax^hen nyei zaux tiux duqv siepv hnangv hieh njaih nor.

¹⁹Aa^saax^hen zunc jienv Apc^ne mingh, yaac maiv mingh zaaix, maiv mingh mbiaauc.

²⁰Apc^ne huin nzuonx mangc yaac naaic, “Meih Aa^saax^hen fai?” Aa^saax^hen dau, “Zeiz nyei.”

²¹Apc^ne gorngv mbuox ninh, “Gunv mingh zaaix fai mingh mbiaauc maah! Zorqv dauh mienh lunx mienh aengx luv ninh mborqv jaax nyei ga'naaiv.” Mv baac Aa^saax^hen zunc jienv ninh mingh, maiv dingh.

²²Apc^ne aengx kuinx nzunc Aa^saax^hen, “Dingh njiec, maiv dungx zunc yie maah! Yie fungc oix zuqc daix meih? Yie daix meih, hnangv haaix nor haih mangc meih nyei gorx, Yo^aapc, nyei hmien?”

²³Mv baac Aa^saax^hen maiv kangv dingh, corc zunc jienv mingh. Apc^ne ziouc longc cang-baengx nzopv Aa^saax^hen nyei ga'sie. Cang zungv nzopv tong cuotv nqa'haav maengx. Aa^saax^hen yiem naaic king njiec ndau daic mi'aqv. Haaix dauh daaih taux ninh king njiec daic nyei dorngx ziouc dingh souv jienv wuov.

²⁴Mv baac Yo^aapc caux Aa^mbi^qai zunc jienv Apc^ne mingh. Mba'hnoi ndortv nyei ziangh hoc ninh mbuo taux Ammaa Mbong-aiv, yiem Gi^mbe^on Deic-Bung-Huaang nyei wuov norm Giyaa nyei nza'hmien maengx.

²⁵Mben^yaa^min Mienh gapv zunv caux Apc^ne benx yietc guanh souv jienv yietc norm mbong-ningv gu'nguaaic.

²⁶Apc^ne heuc jienv Yo^aapc, “Nzuqc ndaauv oix zuqc yietc liuz daix mienh fai? Meih mbuo maiv hiuv duqv taux setv mueiz kungx haih cuotv kouv nyei jauv? Meih zuov taux haaix zanc cingx hatc meih nyei mienh dingh njiec, maiv zunc ninh mbuo nyei gorx-youz?”

²⁷Yo^aapc gorngv, “Yie ziangv jienv yietc liuz ziangh nyei Tin-Hungh gorngv, se gorngv meih maiv gorngv wuov joux waac, naaiv deix mienh oix zunc jienv taux njang ndorm.”

²⁸Yo^aapc ziouc biomv jorng. Zuangx mienh ziouc dingh, maiv aengx zunc I^saa^laa^en Mienh aqv, yaac maiv aengx mborqv jaax.

²⁹Apc^ne caux ninh nyei mienh ziangh muonz yangh jauv jiex Aa^laa^mbaa, aengx jiex Jor^ndaen Ndaaih. Ninh mbuo aengx jiex nzengc Mbitv^lon[6] Horngz mingh taux Maa^haa^naa^im.

³⁰Yo^aapc zunc gau Apc^ne, aengx daaux sin nzuonx daaih. Ninh bun ninh nyei mienh gapv zunv nyei ziangh hoc, cih cuotv Aa^saax^hen, Ndaawitv nyei baeng caa ziepc juov dauh.

³¹Mv baac Ndaawitv nyei mienh daix faam-baeqv luoqc ziepc dauh gan Apc^ne nyei Mben^yaa^min Mienh.

³²Yo^aapc aengx caux gan ninh nyei mienh ziouc dorh Aa^saax^hen nyei sei mingh taux Mbetc^le^hem zangx jienv ninh nyei die nyei zouv. Nqa'haav ninh mbuo ziangh muonz yangh jauv. Lungh mbiouz-mbiouz njang nyei ziangh hoc ninh mbuo taux He^mbo^lon mi'aqv.