Read Iu Mien 2 Saa^mu^en 20 Bible Online

2 Saa^mu^en 20 - Iu Mien bible

2 Saa^mu^en 20

¹Yiem wuov maaih dauh cuoqv sic nyei mienh, se Mben^yaa^min Mienh, Mbikc^li nyei dorn, Qe^mbaa. Ninh biomv jorng heuc jienv gorngv, “Yie mbuo caux Ndaawitv maiv maaih yie mbuo nyei buonc. Yiem Jetc^si nyei dorn yaac maiv maaih yie mbuo nzipc nyei buonc. O I^saa^laa^en Mienh aac, gorqv-mienh nzuonx gorqv-mienh nyei biauv maah!”

²I^saa^laa^en nyei zuangx mienh ziouc guangc Ndaawitv mingh gan Mbikc^li nyei dorn, Qe^mbaa. Mv baac Yu^ndaa Mienh ziepc zuoqv nyei gan Ndaawitv, yiem Jor^ndaen Ndaaih mingh taux Ye^lu^saa^lem.

³Ndaawitv nzuonx taux Ye^lu^saa^lem, ninh ganh nyei hungh dinc wuov. Dongh ninh zinh ndaangc guangc jienv goux hungh dinc wuov deix ziepc dauh jaav-zeih auv, ninh bun ninh mbuo ganh yiem norm biauv yaac bun mienh zuov jienv. Ninh bun ninh mbuo qiemx longc nyei ga'naaiv mv baac maiv caux ninh mbuo bueix. Ninh mbuo yietc seix zuqc wuonx jienv ziouc yiem hnangv auv-guaav nor.

⁴Ndaawitv gorngv mbuox Aa^maa^saax, “Mingh heuc Yu^ndaa Mienh buo hnoi gu'nyuoz daaih gapv zunv yiem naaiv. Meih ganh yaac caux jienv daaih.”

⁵Aa^maa^saax ziouc mingh heuc Yu^ndaa Mienh, mv baac ninh zaih jiex ndaangc hungh diex dingc daaih nyei hnoi-nyieqc.

⁶Ndaawitv gorngv mbuox Aa^mbi^qai, “Ih zanc Mbikc^li nyei dorn, Qe^mbaa, oix hoic yie mbuo gauh camv Apc^saa^lom hoic. Dorh meih nyei ziouv nyei bou mingh zunc ninh. Nziex ninh haih lorz duqv weih wuonv nyei zingh ziouc biaux ndutv yie mbuo.”

⁷Yo^aapc caux ninh nyei mienh, caux Ke^le^ti Mienh caux Peletv Mienh caux henv haic nyei jun-baeng gan jienv Aa^mbi^qai yiem Ye^lu^saa^lem cuotv mingh zunc Mbikc^li nyei dorn, Qe^mbaa.

⁸Ninh mbuo taux Gi^mbe^on nyei domh la'bieiv wuov, Aa^maa^saax daaih buangh ninh mbuo. Wuov zanc Yo^aapc zuqv jienv mborqv jaax nyei lui-houx. Ninh sai jienv houx-hlaang, nzuqc ndaauv tapv jienv paiv cipv jienv houx-hlaang. Yo^aapc yangh jauv wuov zanc nzuqc yiem paiv cuotv ndortv ndau.

⁹Yo^aapc gorngv mbuox Aa^maa^saax, “Yie nyei gorx aac, meih longx nyei saah?” Yo^aapc ziouc longc ninh nyei mbiaauc jieqv buoz nanv Aa^maa^saax nyei siaam oix zom ninh.

¹⁰Aa^maa^saax maiv jangx mangc Yo^aapc nyei buoz nanv nyei nzuqc ndaauv. Yo^aapc nzopv Aa^maa^saax nyei ga'sie, jaangh baetv cuotv njiec ndau. Zungv maiv zuqc nzopv da'nyeic nzunc. Aa^maa^saax daic mi'aqv. Yo^aapc caux ninh nyei youz, Aa^mbi^qai ziouc zunc jienv Mbikc^li nyei dorn, Qe^mbaa.

¹¹Maaih yietc dauh Yo^aapc nyei mienh souv jienv Aa^maa^saax nyei sei ga'hlen gorngv, “Haaix dauh a'hneiv Yo^aapc caux haaix dauh bieqc Ndaawitv, oix zuqc gan Yo^aapc mingh aqv.”

¹²Aa^maa^saax nyei sei yiem domh jauv bueix jienv nziaamv-ndorngh gu'nyuoz. Haaix dauh jiex jauv buatc ziouc souv jienv wuov. Wuov dauh mienh buatc mienh hnangv naaiv nor dingh, ninh ziouc tor sei mingh guangc wuov lomc-huaang, longc lui gomv jienv.

¹³Zorqv nqoi sei, nqa'haav zuangx mienh gan jienv Yo^aapc mingh zunc Mbikc^li nyei dorn, Qe^mbaa.

¹⁴Qe^mbaa jiex fingx-fingx I^saa^laa^en Mienh nyei dorngx, ninh mingh taux Aa^mben Mbetc Maa^aa^kaa[59] yaac mingh gormx Mbe^le^yaa Mienh[60] nyei deic. Mbe^le^yaa Mienh gapv zunv daaih gan Qe^mbaa mingh.

¹⁵Yo^aapc caux ninh nyei jun-baeng ziouc daaih weih jienv oix mborqv Aa^mben Mbetc Maa^aa^kaa, dongh Qe^mbaa yiem nyei zingh. Ninh mbuo yiem zingh ga'nyiec dinh nie faaux zingh laatc ga'hlen aengx longc mborqv jaax nyei jaa-sic zong zingh laatc, oix zong taux mbaang.

¹⁶Maaih dauh yiem zingh maaih cong-mengh nyei m'sieqv dorn heuc jienv gorngv, “Muangx maah! Muangx maah! Tov bun Yo^aapc daaih naaiv. Yie oix caux ninh gorngv waac.”

¹⁷Yo^aapc ziouc mingh fatv. Wuov dauh m'sieqv dorn naaic, “Meih se Yo^aapc saah?” Yo^aapc dau, “Zeiz nyei.” Wuov dauh m'sieqv dorn gorngv, “Tov muangx meih nyei m'sieqv bou nyei waac.”

¹⁸Yo^aapc gorngv, “Yie muangx nyei.” Wuov dauh m'sieqv dorn gorngv, “Loz-hnoi mienh maaih joux waac gorngv, ‘Oix hiuv haaix nyungc oix zuqc mingh Aa^mben naaic.’ Ninh mbuo ziouc haih caangh laangh duqv horpc nyei.

¹⁹Yie mbuo naaiv norm zingh nyei mienh[61] se hnamv baengh orn caux ziepc zuoqv nyei jauv. Meih daav za'eix mietc norm zingh, naaiv se yietc norm yiem I^saa^laa^en nyei domh zingh.[62] Meih weic haaix diuc oix naqv ZIOUV nyei buonc?”

²⁰Yo^aapc dau, “Yie maiv hnamv taux, za'gengh maiv hnamv taux. Yie zungv maiv mietc, maiv baaic waaic meih mbuo nyei zingh.

²¹Naaiv maiv zeiz yie mbuo nyei za'eix. Mv baac maaih dauh E^faa^im Mbong-aiv dorngx nyei mienh, se Mbikc^li nyei dorn, Qe^mbaa. Ninh sung buoz ngaengc Ndaawitv Hungh. Se gorngv meih zorqv ninh nduqc dauh mienh bun yie, yie ziouc leih nqoi naaiv norm zingh aqv.” Wuov dauh m'sieqv dorn gorngv mbuox Yo^aapc, “Yie mbuo zorqv naaiv dauh mienh nyei m'nqorngv zoi bun meih.”

²²Wuov dauh m'sieqv dorn longc ninh nyei cong-mengh mingh caux zuangx mienh caangh laangh. Ninh mbuo ziouc hngaqv Mbikc^li nyei dorn, Qe^mbaa, nyei m'nqorngv ndutv aengx zoi yangh zingh laatc gu'nguaaic bun Yo^aapc. Yo^aapc ziouc biomv jorng. Zuangx baeng ziouc nzaanx mingh, gorqv-mienh nzuonx gorqv-mienh nyei biauv. Yo^aapc yaac nzuonx Ye^lu^saa^lem, hungh diex wuov.

²³Yo^aapc zoux I^saa^laa^en nyei zuangx jun-baeng nyei domh baeng-bieiv. Ye^ho^yaa^ndaa nyei dorn, Mbe^nai^yaa gunv Ke^le^ti caux Peletv Mienh.

²⁴Aa^ndo^ni^lam gunv zoux gong kouv nyei mienh. Aa^hi^lutv nyei dorn, Ye^ho^saa^fatv, zoux fiev sou-daan nyei mienh.

²⁵Qewaa zoux sou-biuv, Saax^ndokc caux Aa^mbi^yaa^taa zoux sai mienh.

²⁶Jaa^i Mienh, I^laa, yaac zoux Ndaawitv nyei sai mienh.