Read Iu Mien 2 Saa^mu^en 4 Bible Online

2 Saa^mu^en 4 - Iu Mien bible

2 Saa^mu^en 4

¹Saulo nyei dorn, Itc^mbo^setv, haiz gorngv Apc^ne yiem He^mbo^lon daic, ninh daamv faix mi'aqv. I^saa^laa^en nyei zuangx mienh yaac gamh nziex haic.

²Saulo nyei dorn, Itc^mbo^setv, maaih i dauh zoux luv mienh nyei baeng-guanh nyei bieiv zeiv. Yietc dauh nyei mbuox heuc Mbaa^aa^naa, maaih dauh heuc Lekaapv. Ninh mbuo se Mbe^e^lotv Mienh, Mben^yaa^min Fingx, Limmon nyei dorn weic zuqc Mbe^e^lotv funx benx Mben^yaa^min Mienh nyei deic.

³Zinh ndaangc Mbe^e^lotv Mienh biaux daaih yiem Gitc^taa^im ziouc yiem jienv naaic taux ih jaax hnoi.

⁴Saulo nyei dorn, Yo^naa^taan, maaih dauh dorn zaux mbai nyei. Ninh duqv biaa hnyangx wuov zanc, maaih fienx yiem Yitv^le^en daaih gorngv Saulo caux Yo^naa^taan zuqc daix daic mi'aqv. Gu'nguaaz-bou ziouc hlorpv jienv ninh tiux biaux. Gaanv jienv biaux wuov zanc, naaiv dauh dorn ndortv njiec ndau, zaux mbai mi'aqv. Naaiv dauh dorn nyei mbuox heuc Me^fi^mbo^setv.

⁵Maaih hnoi nor Mbe^e^lotv Mienh, Limmon, nyei i dauh dorn, Lekaapv caux Mbaa^aa^naa, cuotv jauv mingh Itc^mbo^setv nyei biauv. Taux daaih wuov zanc se lungh ziangx aanx nyutc doqc nyei ziangh hoc. Itc^mbo^setv bueix hitv kuonx.

⁶Ninh mbuo bieqc biauv gu'nyuoz nyei dorngx zoux hnangv oix zorqv mbiauh witv, ziouc nzopv Itc^mbo^setv nyei ga'sie. Lekaapv caux ninh nyei gorx, Mbaa^aa^naa, ziouc biaux.

⁷Ninh mbuo bieqc biauv wuov zanc, ninh mbuo bieqc ninh nyei gen, buatc ninh bueix jienv wuov coux hitv kuonx. Ninh mbuo zorqv ninh daix daic, hngaqv ninh nyei m'nqorngv dorh jienv mingh, ziangh muonz yangh jauv jiex Aa^laa^mbaa.

⁸Ninh mbuo dorh Itc^mbo^setv nyei m'nqorngv taux He^mbo^lon fungx bun Ndaawitv aengx gorngv, “Naaiv se meih nyei win-wangv dongh mauv meih nyei maengc wuov dauh Saulo nyei dorn, Itc^mbo^setv, nyei m'nqorngv. Ih hnoi ZIOUV tengx yie nyei ziouv, hungh diex, jaauv win bun Saulo caux ninh nyei zeiv-fun.”

⁹Mv baac Ndaawitv dau Mbe^e^lotv Mienh, Limmon nyei dorn, Lekaapv, caux ninh nyei gorx, Mbe^e^lotv, “Yie ziangv jienv ziangh jienv nyei ZIOUV houv waac, dongh njoux yie biaux ndutv nyungc-nyungc kouv naanc nyei ZIOUV,

¹⁰maaih dauh mienh daaih mbuox yie wuov zanc, ‘Saulo daic mi'aqv,’ ninh laaic ninh dorh kuv fienx mbuox yie. Yie ziouc zorqv jienv ninh yiem wuov Sikc^laakv daix. Naaiv se weic ninh nyei kuv fienx yie jaauv nyei zingh nyeic.

¹¹Wuov nyungc, kuv mienh yiem ganh nyei biauv, ganh nyei coux zuqc orqv mienh daix, yie maiv zeiz gauh fatv oix dingc meih mbuo nyei zuiz daix meih mbuo guangc, maiv liouh meih mbuo yiem lungh ndiev fai?”

¹²Ndaawitv ziouc paaiv ninh nyei mienh lunx mienh. Ninh mbuo ziouc dorh ninh mbuo i dauh mingh daix daic, hngaqv ninh mbuo nyei buoz-zaux ndutv, dorh ninh mbuo mingh ndiux He^mbo^lon nyei njaangh ga'hlen. Mv baac ninh mbuo dorh Itc^mbo^setv nyei m'nqorngv mingh zangx jienv Apc^ne nyei zouv gu'nyuoz, He^mbo^lon wuov.