Read Iu Mien 2 Saa^mu^en 9 Bible Online

2 Saa^mu^en 9 - Iu Mien bible

2 Saa^mu^en 9

¹Ndaawitv naaic gaax, “Saulo nyei douh zong maaih mienh zengc fai maiv maaih? Yie oix weic Yo^naa^taan winh zingh en bun ninh.”

²Yiem Saulo nyei biauv maaih dauh bou, mbuox heuc Si^mbaa. Ninh mbuo heuc ninh daaih Ndaawitv wuov. Hungh diex ziouc naaic ninh, “Meih se Si^mbaa fai?” Si^mbaa dau, “Zeiz nyei. Yie se Si^mbaa.”

³Hungh diex naaic gaax, “Saulo nyei douh zong corc maaih mienh zengc fai maiv maaih, weic bun yie haih ziux Tin-Hungh nyei en zoux longx bun ninh mbuo fai?” Si^mbaa gorngv mbuox hungh diex, “Corc maaih dauh Yo^naa^taan nyei dorn. Ninh nyei zaux mbai nyei.”

⁴Hungh diex naaic ninh, “Ninh yiem haaix?” Si^mbaa gorngv, “Ninh yiem Lo Nde^mbaa, yiem Am^mi^en nyei dorn, Maa^ki^le, nyei biauv.”

⁵Hungh diex ziouc paaiv mienh mingh taux Lo Nde^mbaa, Am^mi^en nyei dorn, Maa^ki^le, nyei biauv.

⁶Saulo nyei fun, Yo^naa^taan nyei dorn, Me^fi^mbo^setv, daaih lorz Ndaawitv ziouc puoqv njiec ndau baaix. Ndaawitv gorngv, “Me^fi^mbo^setv aah!” Me^fi^mbo^setv dau, “Yie se meih nyei bou aqv.”

⁷Ndaawitv gorngv mbuox ninh, “Maiv dungx gamh nziex. Yie zungv oix weic meih nyei die, Yo^naa^taan, zoux longx bun meih. Yie oix zorqv meih nyei ong, Saulo, nyei yietc zungv ndau fungx nzuonx bun meih. Meih yaac duqv zanc-zanc juangc yie nyei dieh nyanc hnaangx.”

⁸Me^fi^mbo^setv aengx baaix hungh diex gorngv, “Yie, meih nyei bou, dorngx hnangv yietc dauh juv-daic. Hungh diex fungc ndongc naaic korv-lienh yie?”

⁹Hungh diex aengx heuc Saulo nyei bou, Si^mbaa, daaih gorngv mbuox ninh, “Da'faanh Saulo caux ninh nyei douh zong nyei yietc zungv ga'naaiv yie jiu bun meih nyei ziouv nyei fun.

¹⁰Meih caux meih nyei dorn, meih nyei bou, oix zuqc tengx meih nyei ziouv nyei fun zoux lingh deic, siou gaeng-zuangx daaih weic bun meih nyei ziouv nyei fun maaih nyanc hopv. Mv baac meih nyei ziouv nyei fun, Me^fi^mbo^setv, oix zuqc zanc-zanc zueiz yie nyei dieh nyanc hnaangx.” Si^mbaa maaih ziepc hmz dauh dorn caux nyic ziepc dauh bou.

¹¹Si^mbaa gorngv mbuox hungh diex, “Da'faanh yie nyei ziouv, hungh diex, paaiv yie, meih nyei bou, yie, meih nyei bou, ziouc ei jienv zoux.” Me^fi^mbo^setv ziouc yiem hungh diex nyei dieh nyanc hnangv hungh diex nyei yietc dauh dorn nor.

¹²Me^fi^mbo^setv maaih dauh dorn-faix heuc Mikaa. Yiem Si^mbaa nyei biauv nyei dauh dauh mienh yietc zungv zoux Me^fi^mbo^setv nyei bou.

¹³Hnangv naaic Me^fi^mbo^setv yiem Ye^lu^saa^lem, weic zuqc ninh zanc-zanc yiem hungh diex nyei dieh nyanc hnaangx. Ninh nyei i jieqv zaux zungv mbai nyei.