Read Iu Mien 1 Hungh Douh 10 Bible Online

1 Hungh Douh 10 - Iu Mien bible

1 Hungh Douh 10

¹Qe^mbaa Deic nyei hungh maac haiz gorngv Saa^lo^morn weic ZIOUV duqv nyei mengh dauh, ninh ziouc daaih longc ziex nyungc aqc nyei jauv kauv Saa^lo^morn.

²Hungh maac caux yietc domh guanh ninh nyei mienh daaih taux Ye^lu^saa^lem, aengx maaih lorh torh tor jienv ndaang nyei ga'naaiv, jiem camv nyei, caux jaaix nyei la'bieiv. Daaih buangh Saa^lo^morn wuov zanc, hungh maac zorqv yiem hnyouv hnamv taux nyei nyungc-nyungc mbuox Saa^lo^morn.

³Saa^lo^morn dau ninh nyei yietc zungv waac. Maiv maaih haaix nyungc aqc jiex ndaangc hungh diex maiv haih gorngv mengh bun ninh muangx.

⁴Qe^mbaa Deic nyei hungh maac buatc Saa^lo^morn maaih nyei yietc zungv cong-mengh caux ninh ceix nyei hungh dinc,

⁵yaac buatc yiem ninh nyei hnaangx-dieh nyei nyanc hopv, buatc ninh nyei jien zueiz jienv wuov, buatc fu-sux hungh diex nyei bou caux bou nyei zorng-zuqv, buatc bouh diuv-zaanv nyei bou, yaac buatc hungh diex yiem zaangc ZIOUV nyei biauv fongc horc buov ziec nyei ga'naaiv, hungh maac ziouc za'gengh! peix fuc haic, zungv maiv maaih waac gorngv aqv.

⁶Ninh gorngv mbuox hungh diex, “Yie yiem yie nyei guoqv haiz gorngv taux meih zoux liuz nyei jauv-louc se zien haic aqv.

⁷Mv baac yie maiv sienx wuov deix waac taux yie daaih, yie ganh nyei m'zing yaac duqv buatc mi'aqv. Mienh gorngv mbuox yie nyei, zungv maiv taux yietc buonc. Meih nyei cong-mengh caux zinh zoih maaih gauh camv jiex ndaangc mienh gorngv nyei.

⁸Meih nyei yietc zungv mienh[54] duqv orn-lorqc. Zanc-zanc souv jienv meih nyei nza'hmien muangx meih nyei cong-mengh waac wuov deix jien yaac duqv orn-lorqc.

⁹Ceng ZIOUV, meih nyei Tin-Hungh. Ninh a'hneiv meih yaac orn meih zoux hungh bun meih zueiz weic gunv I^saa^laa^en Mienh. Weic zuqc ZIOUV yietc liuz hnamv I^saa^laa^en Mienh ninh cingx liepc meih zoux hungh, bun meih longc baengh fim caux horpc nyei leiz gunv ninh mbuo.”

¹⁰Qe^mbaa Deic nyei hungh maac zorqv i cin feix baeqv cietv ziepc luoqc joih[55] jiem caux ndaang nyei ga'naaiv camv caux jaaix nyei la'bieiv-nzueic jiu bun Saa^lo^morn Hungh. Fungx bun hungh diex naaiv deix ndaang nyei ga'naaiv nqa'haav hingv maiv maaih haaix dauh fungx ndongc naaiv dauh hungh maac fungx nyei camv.

¹¹Cuotv liuz naaiv deix, Hilaam nyei nzangv yiem Ofi tor jiem daaih yaac tor hung ndiangx caux jaaix nyei la'bieiv-nzueic.

¹²Hungh diex longc hung ndiangx zoux zaangc ZIOUV nyei biauv caux hungh dinc nyei gungh gangc ndiangx yaac weic baaux nzung nyei mienh zoux i nyungc daanh baah. Taux ih jaax hnoi maiv maaih haaix dauh dorh hung ndiangx ndongc naaiv camv bieqc guoqv fai buatc hung ndiangx ndongc naaiv camv.

¹³Qe^mbaa Deic nyei hungh maac oix nyei caux tov nyei yietc zungv Saa^lo^morn jiu bun ninh, yaac ziux ninh zoux hungh maaih nyei yietc zungv ga'naaiv zorqv deix jiu bun ninh, hnangv naaic, hungh maac caux ninh nyei yietc zungv mienh nzuonx ganh nyei deic-bung.

¹⁴Mouz hnyangx Saa^lo^morn Hungh duqv nyei jiem yietc zungv maaih yietc waanc biei cin nyic baeqv faah ziepc betv joih.[56]

¹⁵Naaiv maiv funx loz-benv caux maaiz maaic nyei mienh fungx bieqc nyei nzou-zinh fai Aa^laa^mbie Deic-Bung nyei yietc zungv hungh diex caux I^saa^laa^en Deic-Bung nyei saengv-ziouv fungx bieqc nyei jiem.

¹⁶Saa^lo^morn Hungh daav nyic baeqv norm domh torngv-baaih. Mouz norm longc i joih cietv lungz jiem.[57]

¹⁷Ninh aengx daav faam-baeqv norm torngv-baaih gauh faix, mouz norm maaih yietc joih nyic lungz nyei dorngx.[58] Ninh yaac dorh naaiv deix torngv-baaih mingh hietv jienv maaih mbuox heuc Le^mbaa^norn Gemh wuov norm biauv.

¹⁸Ninh longc zaangz-nyaah zoux norm domh weic yaac longc zien jiex nyei jiem buang jienv.

¹⁹Naaiv norm weic maaih juqv kang tei. Weic nyei nqa'haav maengx gu'nguaaic junh nyei. Weic nyei ga'hlen maaih i bung lorngx buoz nyei dorngx. Lorngx buoz nyei dorngx yietc bung maaih dauh sienh souv ga'hlen.

²⁰Naaiv deix juqv kang tei, kang-kang i bung ga'hlen yaac maaih dauh sienh souv jienv. Maiv maaih haaix norm guoqv hnangv naaiv nor zoux jiex,

²¹Saa^lo^morn Hungh nyei yietc zungv zaanv longc jiem zoux daaih. Le^mbaa^norn Gemh wuov norm biauv nyei jaa-dorngx yaac longc jiem zoux daaih. Maiv maaih haaix nyungc longc nyaanh zoux, weic zuqc Saa^lo^morn nyei lungh ndiev maiv funx nyaanh jaaix.

²²Hungh diex maaih guanh nzangv[59] caux Hilaam nyei nzangv yietc hnyangx buo nzunc tor jienv jiem, nyaanh, zaangz-nyaah caux mbing caux mbing-jieqv[60] daaih.

²³Beiv lungh ndiev nyei hungh diex, Saa^lo^morn Hungh gauh benx jiex, gauh maaih cong-mengh jiex.

²⁴Lungh ndiev nyei zuangx mienh oix daaih lorz Saa^lo^morn, oix muangx Tin-Hungh ceix bun ninh yiem hnyouv nyei cong-mengh waac.

²⁵Daaih nyei mienh yietc zungv dorh jienv zingh nyeic daaih, se jiem nyaanh zoux daaih nyei jaa-sic, zorng-zuqv nyei ga'naaiv, mborqv jaax nyei wuoqc ginc, ndaang nyei ga'naaiv caux lorh maaz. Hnyangx jiex hnyangx ninh mbuo hnangv naaiv nor zoux.

²⁶Saa^lo^morn siou mborqv jaax nyei maaz-cie caux maaz. Ninh maaih yietc cin feix baeqv norm mborqv jaax maaz-cie yaac maaih yietc waanc i cin dauh maaz.[61] Maaz caux maaz-cie ninh an jienv siou mborqv jaax cie nyei zingh. Yaac maaih deix caux ninh yiem Ye^lu^saa^lem.

²⁷Hungh diex yiem Ye^lu^saa^lem bun nyaanh camv, benx pou-tong nyei ga'naaiv hnangv la'bieiv nor. Si^ndaa zongh ndiangx yaac ndongc mbong-aiv dorngx nyei ngongh nyorx ndiangx camv.

²⁸Saa^lo^morn nyei maaz se yiem I^yipv[62] caux Ku^e[63] dorh daaih. Hungh diex nyei saeng-eix mienh ziux dingc nyei jaax-zinh maaiz Ku^e nyei maaz.

²⁹Yiem I^yipv maaiz daaih nyei mborqv jaax cie yietc norm biei joih ziepc feix lungz[64] nyaanh. Yietc dauh maaz yietc joih nyic lungz.[65] Ninh mbuo yaac maaic mingh bun Hitv^tai Mienh caux Silie[66] nyei zuangx hungh diex.