Read Iu Mien 1 Hungh Douh 14 Bible Online

1 Hungh Douh 14 - Iu Mien bible

1 Hungh Douh 14

¹Wuov zanc Ye^lo^mbo^am nyei dorn, Aa^mbi^yaa butv baengc.

²Ye^lo^mbo^am gorngv mbuox ninh nyei auv, “Oix zuqc zorng meih ganh benx ganh dauh mienh, bun mienh zieqv maiv duqv meih zoux Ye^lo^mbo^am nyei auv, ziouc mingh Silo. Yiem wuov maaih douc waac mienh, Aa^hi^yaa. Dongh naaiv dauh gorngv yie oix zuqc zoux naaiv deix baeqc fingx nyei hungh.

³Dorh ziepc norm njuov caux deix njuov-gaam caux baengh mueiz-dorngh mingh bun ninh, ninh ziouc mbuox meih naaiv dauh fu'jueiv oix hnangv haaix nor.”

⁴Ye^lo^mbo^am nyei auv ziouc hnangv naaiv nor zoux. Ninh mingh Silo Zingh, taux Aa^hi^yaa nyei biauv. Aa^hi^yaa nyei hnyangx-jeiv gox, m'zing mbuov, mangc maiv buatc.

⁵ZIOUV jaa-ndaangc mbuox Aa^hi^yaa, “Ye^lo^mbo^am nyei auv oix daaih naaic meih weic zuqc ninh nyei dorn butv baengc. Meih oix zuqc hnangv naaiv gorngv mbuox ninh.” Ye^lo^mbo^am nyei auv daaih taux wuov zanc, ninh zoux hnangv benx ganh dauh m'sieqv dorn.”

⁶Mv baac taux gaengh ndaangc wuov zanc, Aa^hi^yaa haiz ninh nyei zaux-caaiv nyei qiex mbui ziouc gorngv, “Ye^lo^mbo^am nyei m'sieqv dorn aac, gunv bieqc daaih maah! Meih weic haaix diuc zorng benx ganh dauh m'sieqv dorn? Weic zuqc yie maaih ciouv nyei fienx gorngv mbuox meih.

⁷Meih nzuonx mingh mbuox Ye^lo^mbo^am, ZIOUV, I^saa^laa^en Mienh nyei Tin-Hungh, hnangv naaiv nor gorngv. ‘Yie yiem zuangx baeqc fingx mbu'ndongx liepc meih zoux hlo gunv yie nyei mienh.

⁸Yie betv Ndaawitv nyei douh zong gunv nyei guoqv cuotv jiu bun meih. Mv baac meih maiv hnangv yie nyei bou, Ndaawitv. Ninh ei jienv yie nyei leiz-latc, yaac longc nzengc hnyouv gan yie. Ninh kungx zoux ziux yie nyei m'zing buatc horpc nyei sic hnangv.

⁹Meih zoux gauh waaic jiex yiem ndaangc meih wuov deix yietc zungv. Meih weic meih ganh liepc nyiec nyei zienh nyei miuc-fangx, yaac dox miuc-fangx. Meih cuoqv yie qiex jiez yaac zorqv yie zoi guangc meih nyei nqa'haav nqaang.

¹⁰“+‘Weic naaiv yie oix bun Ye^lo^mbo^am nyei douh zong zuqc zeqc naanc yaac zorqv Ye^lo^mbo^am nyei dauh dauh m'jangc dorn, maiv gunv zoux nouh fai maiv zoux nouh nyei, yiem I^saa^laa^en Mienh mbu'ndongx pai guangc. Yie oix bun Ye^lo^mbo^am nyei douh zong zutc nzengc, hnangv mienh zorqv nqaiv buov qui nzengc nor.

¹¹Ye^lo^mbo^am nyei mienh, da'faanh yiem zingh daic wuov deix, oix zuqc juv nyanc. Daic wuov naah nyei, oix zuqc ndaamv-lungh nyei norqc nyanc. Yie, ZIOUV, gorngv naaiv deix waac.’

¹²“Meih ganh gunv nzuonx aqv. Meih nyei zaux yietv caaiv bieqc zingh, meih nyei dorn ziouc daic aqv.

¹³I^saa^laa^en nyei zuangx mienh ziouc weic ninh nzauh nyiemv yaac dorh ninh mingh zangx. Ye^lo^mbo^am nyei yietc zungv mienh, kungx naaiv dauh dorn ganh hnangv duqv zangx jienv, weic zuqc ZIOUV, I^saa^laa^en Mienh nyei Tin-Hungh, buatc yiem Ye^lo^mbo^am nyei douh zong kungx naaiv dauh hnangv maaih deix longx nyei dorngx.

¹⁴“Maiv daan mbuoqc naaiv. ZIOUV oix weic ninh ganh liepc dauh hungh gunv I^saa^laa^en. Ih hnoi naaiv dauh hungh ziouc pai guangc Ye^lo^mbo^am nyei douh zong. Wuov hnoi za'gengh taux aqv.

¹⁵ZIOUV oix mborqv I^saa^laa^en Mienh, bun ninh mbuo hnangv luoqc diqc zuqc wuom torngx hiou mingh hiou daaih. Ninh aengx oix zorqv I^saa^laa^en Mienh cuotv ninh ceix bun ninh mbuo nyei ong-taaix naaiv norm longx haic nyei deic-bung, hnangv baeng nzungh cuotv nor. Ninh yaac oix zorqv ninh mbuo bun nzaanx yiem Yu^fe^ditc Ndaaih dong bung maengx, weic zuqc ninh mbuo zoux Aa^se^laa zienh nyeiz nyei ndiangx-fangx ziouc cuoqv ZIOUV qiex jiez.

¹⁶Laaix Ye^lo^mbo^am baamz zuiz yaac dorh I^saa^laa^en Mienh caux jienv baamz zuiz, Ziouv zorqv I^saa^laa^en Mienh jiu bun win-wangv.”[80]

¹⁷Ye^lo^mbo^am nyei auv ziouc jiez sin nzuonx taux Ti^laa^saa Zingh. Yietv laamx bieqc gaengh, ninh nyei dorn ziouc daic mi'aqv.

¹⁸Ninh mbuo yaac dorh mingh zangx. I^saa^laa^en nyei zuangx mienh weic ninh nzauh nyiemv hnangv ZIOUV longc ninh nyei bou wuov dauh douc waac mienh gorngv nor.

¹⁹Ye^lo^mbo^am Hungh zoux liuz zengc njiec nyei sic, ninh hnangv haaix nor mborqv jaax, hnangv haaix nor gunv baeqc fingx, fiev jienv yiem I^saa^laa^en Hungh nyei hungh douh daan.

²⁰Ye^lo^mbo^am zoux hungh nyic ziepc nyeic hnyangx, ziouc guei seix mi'aqv,[81] ninh nyei dorn, Naa^ndapc, nzipc jienv ninh zoux hungh.

²¹Saa^lo^morn nyei dorn, Le^hox^mbo^am, yiem Yu^ndaa zoux hungh. Ninh faaux weic zoux hungh wuov zanc ninh duqv feix ziepc yietv hnyangx, yaac yiem Ye^lu^saa^lem gunv ziepc cietv hnyangx. Ye^lu^saa^lem Zingh se ZIOUV yiem I^saa^laa^en nyei zuangx fingx mbu'ndongx ginv daaih weic liepc ninh ganh nyei Mengh. Le^hox^mbo^am nyei maa se Ammon Mienh, mbuox heuc Naa^aa^maa.

²²Ei ZIOUV mangc, Yu^ndaa zoux waaic sic. Ninh mbuo baamz nyei zuiz cuoqv ninh qiex jiez, hanc ninh mbuo, gauh camv ninh mbuo nyei ong-taaix mbuo zoux nyei sic.

²³Ninh mbuo yiem norm-norm mbong gu'nguaaic caux diuh diuh domh ndiangx ga'ndiev, liepc zaangc zienh nyei dorngx caux la'bieiv-dongc caux zaangc Aa^se^laa zienh nyeiz nyei ndiangx-fangx.

²⁴Deic-bung gu'nyuoz yaac maaih m'jangc dorn[82] yiem zaangc zienh nyei dorngx zoux maaic buonv-sin nyei mienh. Baeqc fingx zoux zinh ndaangc ZIOUV zunc cuotv I^saa^laa^en Mienh nyei wuov ndaangc maengx wuov deix fingx-fingx mienh zoux yietc zungv gamh nziev nyei sic.

²⁵Ye^lo^mbo^am zoux hungh da'hmz hnyangx wuov hnyangx, I^yipv nyei hungh, Sisakv, daaih mborqv Ye^lu^saa^lem.

²⁶Ninh zorqv yiem zaangc ZIOUV nyei biauv gu'nyuoz caux hungh dinc gu'nyuoz yietc zungv jaaix nyei ga'naaiv. Ninh zorqv nyungc-nyungc, liemh Saa^lo^morn zoux daaih nyei jiem-torngv-baaih.

²⁷Le^hox^mbo^am Hungh ziouc longc dongh siqv zoux torngv-baaih div yaac jiu bun goux hungh dinc zuov gaengh nyei baeng-bieiv.

²⁸Hungh diex haaix zanc bieqc zaangc ZIOUV nyei biauv, goux hungh dinc nyei baeng dorh naaiv deix torngv-baaih mingh. Nqa'haav ninh mbuo aengx dorh nzuonx an jienv baeng zuov hungh dinc nyei dorngx.

²⁹Le^hox^mbo^am gunv nyei ziangh hoc zoux liuz zengc njiec nyei sic, ninh zoux cuotv nyei yietc zungv, fiev jienv Yu^ndaa Hungh nyei hungh douh daan.

³⁰Le^hox^mbo^am caux Ye^lo^mbo^am zanc-zanc mborqv jaax.

³¹Le^hox^mbo^am guei seix mi'aqv,[83] yaac caux ninh nyei ong-taaix mbuo zangx jienv yiem Ndaawitv nyei Zingh. Ninh nyei maa zoux Ammon Mienh, mbuox heuc Naa^aa^maa. Le^hox^mbo^am nyei dorn, Aa^mbi^yam,[84] yaac nzipc jienv ninh zoux hungh.