Read Iu Mien 1 Hungh Douh 22 Bible Online

1 Hungh Douh 22 - Iu Mien bible

1 Hungh Douh 22

¹Buo hnyangx gu'nyuoz Silie[103] caux I^saa^laa^en naaiv deix i norm guoqv maiv maaih mborqv jaax nyei sic.

²Mv baac taux da'faam hnyangx wuov hnyangx, Yu^ndaa Guoqv nyei hungh, Ye^ho^saa^fatv, daaih lorz I^saa^laa^en nyei hungh.

³I^saa^laa^en nyei hungh gorngv mbuox ninh nyei jien, “Meih mbuo hiuv nyei fai? Laamotv Gi^le^aatc benx mbuo nyei. Mbuo yaac maiv zoux haaix nyungc. Wuov norm zingh yiem Silie Hungh nyei buoz-ndiev, mbuo yaac maiv caangv nzuonx.”

⁴Ninh ziouc naaic Ye^ho^saa^fatv, “Meih caux yie mingh mborqv Laamotv Gi^le^aatc fai?” Ye^ho^saa^fatv dau I^saa^laa^en nyei hungh, “Yie yaac hnangv meih nor. Yie nyei baeqc fingx yaac hnangv meih nyei. Yie nyei maaz yaac hnangv meih nyei.”

⁵Mv baac Ye^ho^saa^fatv yaac gorngv mbuox I^saa^laa^en nyei hungh, “Mbuo oix zuqc naaic ZIOUV ndaangc.”

⁶I^saa^laa^en nyei hungh ziouc heuc ninh nyei zuangx douc waac mienh daaih zunv. Yietc zungv maaih feix baeqv dauh. Hungh diex naaic gaax ninh mbuo, “Yie mingh mborqv Laamotv Gi^le^aatc horpc fai maiv horpc?” Ninh mbuo dau, “Gunv mingh aqv. Ziouv oix zorqv wuov norm zingh jiu bun yiem hungh diex nyei buoz-ndiev.”

⁷Ye^ho^saa^fatv naaic gaax, “Yiem naaiv maiv maaih ZIOUV nyei ganh dauh douc waac mienh mbuo haih naaic nyei fai?”

⁸I^saa^laa^en nyei hungh dau Ye^ho^saa^fatv, “Corc maaih dauh mbuo haih bangc weic tengx mbuo naaic ZIOUV mv baac yie nzorng ninh weic zuqc ninh maiv douc jiex longx nyei waac bun yie. Kungx douc ciouv nyei waac hnangv. Naaiv dauh se Imlaa nyei dorn, Mi^kaa^yaa.” Ye^ho^saa^fatv gorngv, “Hungh diex maiv horpc zuqc hnangv naaic gorngv.”

⁹I^saa^laa^en nyei hungh ziouc heuc ninh nyei yietc dauh jien daaih yaac mbuox ninh, “Mingh dorh Imlaa nyei dorn, Mi^kaa^yaa, siepv-siepv nyei daaih maah!”

¹⁰I^saa^laa^en nyei hungh caux Yu^ndaa nyei hungh, Ye^ho^saa^fatv, yiem Saa^maa^lie nyei zingh gaengh ndaangc, mborqv mbiauh nyei ciangv. Gorqv-mienh zueiz jienv hungh weic yaac zorng jienv ninh mbuo nyei hungh lui. Zuangx douc waac mienh yiem jienv wuov douc jienv waac yiem.

¹¹Ke^naa^aa^naa nyei dorn, Se^nde^ki^yaa, longc hlieqv zoux jorng. Ninh gorngv, “ZIOUV hnangv naaiv gorngv, ‘Meih oix longc naaiv deix jorng mborqv Silie Mienh[104] taux mietc nzengc ninh mbuo.’+”

¹²Zuangx douc waac mienh yaac fih hnangv nyei douc waac. Ninh mbuo gorngv, “Gunv mingh mborqv Laamotv Gi^le^aatc ziouc mborqv hingh, weic zuqc ZIOUV oix zorqv wuov norm zingh jiu bun yiem hungh diex nyei buoz-ndiev.”

¹³Mingh heuc Mi^kaa^yaa daaih wuov dauh douc fienx mienh gorngv mbuox ninh, “Zuangx douc waac mienh dongh joux waac gorngv hungh diex oix duqv longx. Tov meih caux wuov deix dongh joux waac gorngv yaac kungx gorngv hungh diex oix duqv longx hnangv.”

¹⁴Mv baac Mi^kaa^yaa gorngv, “Yie ziangv jienv ziangh jienv nyei ZIOUV laengz waac, ZIOUV gorngv haaix nyungc yie kungx haih gorngv wuov nyungc hnangv.”

¹⁵Mingh taux hungh diex wuov zanc, hungh diex naaic ninh, “Mi^kaa^yaa aac, yie mbuo mingh mborqv Laamotv Gi^le^aatc horpc fai maiv horpc?” Mi^kaa^yaa dau, “Gunv mingh mborqv yaac mborqv duqv hingh. ZIOUV oix zorqv wuov norm zingh jiu bun yiem hungh diex nyei buoz-ndiev.”

¹⁶Mv baac hungh diex gorngv mbuox ninh, “Yie bun meih houv mbu'ziex nzunc waac meih dengv ZIOUV nyei mbuox kungx gorngv zien waac hnangv.”

¹⁷Mi^kaa^yaa ziouc gorngv, “Yie buatc I^saa^laa^en nyei zuangx mienh nzaanx mingh yiem mbong hnangv ba'gi yungh guanh maiv maaih mangc yungh nyei mienh goux nor. ZIOUV yaac gorngv, ‘Naaiv deix baeqc fingx maiv maaih ziouv. Oix zuqc bun ninh mbuo gorqv-mienh baengh orn nyei nzuonx gorqv-mienh nyei biauv.’+”

¹⁸I^saa^laa^en nyei hungh gorngv mbuox Ye^ho^saa^fatv, “Yie maiv zeiz gorngv jiex mbuox meih, naaiv dauh yietc liuz maiv douc longx nyei waac bun yie. Ninh kungx douc ciouv nyei waac hnangv.”

¹⁹Mi^kaa^yaa aengx gorngv, “Meih oix zuqc muangx ZIOUV nyei waac. Yie buatc ZIOUV zueiz ninh nyei hungh weic, yaac buatc gu'nguaaic lungh nyei zuangx fin-mienh weih gormx ninh zaaix maengx mbiaauc maengx.

²⁰ZIOUV gorngv, ‘Haaix dauh oix nduov Aa^hapc mingh Laamotv Gi^le^aatc, yiem wuov zuqc daic?’ “Maaih dauh hnangv naaiv nor gorngv, maaih dauh hnangv wuov nor gorngv.

²¹Nqa'haav maaih dauh cuotv daaih souv jienv ZIOUV nyei nza'hmien gorngv, ‘Yie oix nduov ninh.’

²²“ZIOUV naaic ninh, ‘Meih oix longc haaix nyungc za'eix?’ “Ninh gorngv, ‘Yie oix mingh bun naaiv deix zuangx douc waac mienh gorngv-baeqc.’ “ZIOUV aengx gorngv, ‘Hnangv naaic meih za'gengh haih nduov duqv zuqc ninh. Gunv mingh zoux maah!’

²³“Ih zanc ZIOUV bun meih nyei naaiv deix douc waac mienh yietc zungv gorngv-baeqc. ZIOUV zungv dingc ziangx bun meih zuqc domh zeqc naanc.”

²⁴Ke^naa^aa^naa nyei dorn, Se^nde^ki^yaa, mingh taux, mbaix Mi^kaa^yaa nyei hmien yaac naaic ninh, “ZIOUV nyei Singx Lingh hnangv haaix nor cuotv yie mingh caux meih gorngv waac laeh?”

²⁵Mi^kaa^yaa dau, “Meih bieqc gu'nyuoz jiex nyei yietc qongx bingx jienv wuov meih ziouc hiuv aqv.”

²⁶I^saa^laa^en nyei hungh gorngv, “Zorqv Mi^kaa^yaa fungx nzuonx jiu bun Aamon saengv-ziouv caux hungh nyei dorn, Yo^aatc.

²⁷Oix zuqc gorngv mbuox ninh mbuo, ‘Hungh diex hnangv naaiv nor gorngv, “Zorqv naaiv dauh lov wuonx jienv loh, bun wuom caux njuov gaux yungz jienv maengc hnangv, taux yie baengh orn nyei nzuonx daaih.”+’+”

²⁸Mi^kaa^yaa gorngv, “Se gorngv meih haih duqv baengh orn nyei nzuonx daaih, se maiv zeiz ZIOUV longc yie gorngv waac.” Ninh aengx gorngv, “Zuangx baeqc fingx aac, tov muangx longx oc.”

²⁹I^saa^laa^en nyei hungh caux Yu^ndaa nyei hungh, Ye^ho^saa^fatv, ziouc mingh Laamotv Gi^le^aatc.

³⁰I^saa^laa^en nyei hungh gorngv mbuox Ye^ho^saa^fatv, “Bieqc mingh mborqv jaax nyei ziangh hoc yie zorng benx ganh dauh mv baac meih zuqv jienv meih nyei hungh lui.” I^saa^laa^en nyei hungh ziouc zorng benx ganh dauh, bieqc mingh mborqv jaax.

³¹Silie nyei hungh paaiv ninh nyei faah ziepc nyeic dauh mborqv jaax cie nyei baeng-bieiv, “Maiv dungx caux haaix dauh mborqv jaax, maiv gunv hlo faix. Kungx caux I^saa^laa^en nyei hungh mborqv hnangv.”

³²Mborqv jaax cie nyei baeng-bieiv buatc Ye^ho^saa^fatv ninh mbuo gorngv, “Naaiv dauh za'gengh I^saa^laa^en nyei hungh.” Ninh mbuo ziouc daaux sin mingh mborqv ninh. Ye^ho^saa^fatv ziouc heuc.

³³Mborqv jaax cie nyei baeng-bieiv buatc maiv zeiz I^saa^laa^en nyei hungh, ninh mbuo ziouc daaux cie, maiv zunc Ye^ho^saa^fatv aqv.

³⁴Mv baac maaih dauh mienh gouv-mueic buonv yietc nzitv forng yaac zuqc I^saa^laa^en nyei hungh yiem ninh zuqv mborqv jaax nyei lui yietc kuaaiv yietc kuaaiv nyei mbu'ndongx-qangx. Hungh ziouc mbuox zaangv ninh nyei cie wuov dauh, “Daaux cie tor yie cuotv mborqv jaax ciangv. Yie zuqc mun mi'aqv.”

³⁵Wuov hnoi ziangh hnoi mborqv jaax hniev nyei. Ninh mbuo yaac sengh jienv hungh diex yiem ninh nyei cie gu'nyuoz huin mangc jienv Silie Mienh taux lungh hmuangx. Lungh maanz-hmuangx ninh daic mi'aqv. Nziaamv yiem zuqc mun nyei dorngx cuotv daaih liouc njiec cie gu'nyuoz.

³⁶Mba'hnoi ndortv nyei ziangh hoc, maaih qiex heuc gormx baeng-guanh nyei dorngx gorngv, “Gorqv-mienh nzuonx gorqv-mienh nyei buonv-mungv caux buonv-deic-bung aqv.”

³⁷Hungh diex ziouc daic mi'aqv. Mienh ziouc dorh ninh nyei sei mingh zangx jienv Saa^maa^lie.

³⁸Ninh mbuo yiem Saa^maa^lie nyei wuom-domh nzaaux cie. Juv daaih mbiec ninh nyei nziaamv, (maaic buonv-sin nyei m'sieqv dorn yaac yiem wuov nzaaux sin) hnangv ZIOUV gorngv jiex nyei waac nor.

³⁹Aa^hapc gunv nyei ziangh hoc zoux zengc njiec nyei sic caux ninh zoux nyei yietc zungv, caux ninh longc zaangz-nyaah zoux hungh dinc, caux ninh liepc nyei yietc zungv zingh, fiev jienv I^saa^laa^en Hungh nyei hungh douh daan.

⁴⁰Aa^hapc ziouc guei seix mi'aqv.[105] Ninh nyei dorn, Aa^hatc^yaa, nzipc jienv ninh zoux hungh.

⁴¹Aa^hapc zoux I^saa^laa^en nyei hungh da'feix hnyangx wuov hnyangx, Aasaax nyei dorn, Ye^ho^saa^fatv, faaux weic zoux Yu^ndaa nyei hungh.

⁴²Ye^ho^saa^fatv faaux weic zoux hungh wuov zanc ninh duqv faah ziepc hmz hnyangx. Ninh yiem Ye^lu^saa^lem gunv nyic ziepc hmz hnyangx. Ninh nyei maa se Sin^hi nyei sieqv, mbuox heuc Aa^su^mbaa.

⁴³Ye^ho^saa^fatv ei jienv ninh nyei die zoux nyei jauv, maiv pien yietc deix. Ziux ZIOUV mangc, ninh zoux duqv horpc. Mv baac yiem hlang zaangc zienh nyei dorngx ninh maiv caeqv guangc. Baeqc fingx corc yiem wuov fongc horc ziec yaac buov hung.

⁴⁴Ye^ho^saa^fatv yaac caux I^saa^laa^en nyei hungh zoux longx jiu tong.

⁴⁵Ye^ho^saa^fatv gunv nyei ziangh hoc zoux zengc njiec nyei sic, caux ninh zoux cuotv nyei yietc zungv sic, caux ninh cuotv mingh mborqv jaax nyei sic, fiev jienv Yu^ndaa Hungh nyei hungh douh daan.

⁴⁶Ninh yaac zunc cuotv nzengc yiem zaangc zienh nyei dorngx maaic buonv-sin nyei m'jangc dorn, dongh yiem ninh nyei die zoux hungh nyei ziangh hoc zengc njiec wuov deix.

⁴⁷Wuov zanc E^ndom Deic-Bung maiv maaih hungh, maaih dauh jien div jienv gunv.

⁴⁸Ye^ho^saa^fatv gapv saeng-eix nzangv[106] weic mingh Ofi tor jiem, mv baac nzangv maiv gaengh duqv mingh ziouc yiem E^si^on Ge^mbe waaic mi'aqv.

⁴⁹Wuov zanc Aa^hapc nyei dorn, Aa^hatc^yaa, gorngv mbuox Ye^ho^saa^fatv, “Bun yie nyei mienh caux meih nyei mienh juangc nzangv mingh maah!” Mv baac Ye^ho^saa^fatv maiv kangv.

⁵⁰Ye^ho^saa^fatv ziouc guei seix mi'aqv,[107] yaac caux ninh nyei ong-taaix zangx jienv ninh nyei ong-taaix, Ndaawitv, nyei Zingh. Ninh nyei dorn, Ye^ho^lam, nzipc jienv ninh nyei die zoux hungh.

⁵¹Ye^ho^saa^fatv zoux Yu^ndaa nyei hungh ziepc cietv hnyangx wuov hnyangx, Aa^hapc nyei dorn, Aa^hatc^yaa faaux weic zoux I^saa^laa^en nyei hungh yaac gunv I^saa^laa^en i hnyangx.

⁵²Ziux ZIOUV mangc, ninh zoux waaic sic weic zuqc ninh ei jienv ninh nyei die caux ninh nyei maa zoux nyei jauv yaac ei jienv Ne^mbatc nyei dorn, Ye^lo^mbo^am, zoux nyei sic, dongh dorh I^saa^laa^en Mienh baamz zuiz wuov deix.

⁵³Aa^hatc^yaa hnangv ninh nyei die nor, fu-sux zaangc Mbaa^an zienh yaac cuoqv ZIOUV, I^saa^laa^en nyei Tin-Hungh, qiex jiez haic.