Read Iu Mien 1 Hungh Douh 4 Bible Online

1 Hungh Douh 4 - Iu Mien bible

1 Hungh Douh 4

¹Saa^lo^morn Hungh ziouc gunv I^saa^laa^en nyei zuangx mienh.

²Daaux naaiv mingh se ninh nyei domh jien. Saax^ndokc nyei dorn, Aa^saa^li^yaa, zoux sai mienh.

³Qiqaa nyei i dauh dorn, E^li^ho^lepv caux Aa^hi^yaa, zoux sou-biuv. Aa^hi^lutv nyei dorn, Ye^ho^saa^fatv, zoux fiev sou-daan nyei jien.

⁴Ye^ho^yaa^ndaa nyei dorn, Mbe^nai^yaa, zoux domh baeng-bieiv. Saax^ndokc caux Aa^mbi^yaa^taa zoux sai mienh.

⁵Naatan nyei dorn, Aa^saa^li^yaa, zoux zuangx saengv-ziouv nyei bieiv zeiv. Naatan nyei dorn, Saax^mbutc, zoux sai mienh yaac zoux hungh nyei caangh laangh mienh.

⁶Aa^hi^qaa ziux goux hungh dinc, Apc^ndaa nyei dorn, Aa^ndo^ni^lam, gunv zuqc aapv zoux gong nyei gong-mienh.

⁷Saa^lo^morn yaac orn ziepc nyeic dauh mienh zoux saengv-ziouv gunv I^saa^laa^en nyei zuangx mienh. Naaiv deix saengv-ziouv oix zuqc lorz nyanc hopv daaih juang hungh diex caux hungh diex nyei mienh. Yietc dauh saengv-ziouv, yietc hnyangx oix zuqc juang yietc hlaax nyieqc.

⁸Naaiv deix saengv-ziouv nyei mbuox se hnangv naaiv. Mben He yiem E^faa^im nyei mbong-aiv dorngx.

⁹Mben Nde^ke yiem Maakaatv caux Saa^an^mbim, Mbetc Semetv caux Elon Mbetc^haa^nan.

¹⁰Mben Hesetc yiem Aa^lupv^mbotc. (Soko caux Hefe Deic yietc zungv benx ninh nyei.)

¹¹Mben Aa^mbi^naa^ndapc yiem Naafotv Ndo^aa nyei yietc zungv deic.[13] (Ninh longc Saa^lo^morn nyei sieqv, Taafatv, zoux auv.)

¹²Aa^hi^lutv nyei dorn, Mbaa^aa^naa, yiem Taa^aa^naakv caux Me^gitc^ndo, yiem Mbetc Saan[14] yietc zungv nyei dorngx, nitv Saax^le^taan, Yitv^le^en nyei naamh bung maengx, Mbetc Saan taux Aa^mben Me^ho^laa jiex mingh taux Yokv^me^am.

¹³Mben Ge^mbe yiem Laamotv Gi^le^aatc. (Maa^natv^se nyei dorn, Jaa^i yiem Gi^le^aatc liepc nyei fiuv-laangz benx ninh nyei, caux jienv yiem Mbaasaan nyei Aan^gopc Deic liemh wuov norm dorngx nyei luoqc ziepc norm zingh, dongh maaih zingh laatc yaac maaih dongh siqv gaengh sorn nyei domh zingh.)

¹⁴Itc^ndo nyei dorn, Aa^hi^naa^ndapc, yiem Maa^haa^naa^im.

¹⁵Aa^hi^maa^atc yiem Napv^taa^li. (Ninh longc Saa^lo^morn nyei sieqv, Mbaa^se^matv, zoux auv.)

¹⁶Husai nyei dorn, Mbaa^aa^naa, yiem Aa^se caux Mbe^aa^lotv.[15]

¹⁷Paa^lu^aa nyei dorn, Ye^ho^saa^fatv, yiem Itc^saax^kaa.

¹⁸Elaa nyei dorn, Si^me^i, yiem Mben^yaa^min.

¹⁹Uli nyei dorn, Ge^mbe yiem Gi^le^aatc, se zinh ndaangc benx Aa^mo^lai Mienh nyei Si^honx Hungh caux Mbaasaan nyei Okc Hungh nyei yietc zungv deic-bung. Aengx maaih nduqc dauh zoux zungx gunv gormx Yu^ndaa Deic.[16]

²⁰Yu^ndaa Mienh caux I^saa^laa^en Mienh camv haic, ndongc koiv-hlen nyei saa-ziou camv. Ninh mbuo nyanc yaac hopv, za'gengh orn-lorqc haic.

²¹Saa^lo^morn gunv yietc zungv nyei guoqv yiem Yu^fe^ditc Domh Ndaaih mingh taux Fi^li^saa^die Mienh nyei guoqv, aengx mingh taux I^yipv nyei gapv-jaaix. Yiem Saa^lo^morn nyei seix zeiv naaiv deix guoqv oix zuqc cuotv korx-zinh yaac fu-sux ninh.

²²Saa^lo^morn hnoi-hnoi qiemx longc nyei nyanc hopv maaih faam-baeqv faah ziepc tongv[17] mbuonv-muonc, luoqc baeqv tongv[18] mbuonv,

²³ziepc dauh ngongh junc, nyic ziepc dauh yiem wuov ciangv yungz nyei ngongh, yietc baeqv dauh ba'gi yungh caux yungh, aengx maaih buo nyungc jung njaih nyei orv caux junc nyei jai.

²⁴Weic zuqc ninh gunv nzengc Yu^fe^ditc Ndaaih fai bung maengx nyei guoqv yiem Tipv^saax taux Gaasaa, yaac gunv nzengc wuov deix yietc zungv hungh diex. Weih gormx nyei feix bung yaac taaix-baengh nyei.

²⁵Yiem Saa^lo^morn nyei seix zeiv, Yu^ndaa Mienh caux I^saa^laa^en Mienh yiem Ndaan taux Mbe^e^qe^mbaa taaix-baengh nyei yiem. Gorqv-mienh yiem ganh nyei a'ngunc huingx caux ngongh nyorx biouv nyei huingx.[19]

²⁶Saa^lo^morn nyei maaz-laanh maaih biei waanc[20] qongx bun mborqv jaax maaz-cie nyei maaz yiem, yaac maaih yietc waanc i cin dauh geh maaz baeng.[21]

²⁷Dauh dauh saengv-ziouv, ziux ninh horpc zuqc juang nyei hlaax, fungx nyanc hopv mingh juang Saa^lo^morn Hungh caux yietc zungv juangc hungh diex nyei dieh nyanc hnaangx nyei mienh.[22] Ninh mbuo yaac maiv bun caa haaix nyungc.

²⁸Gorqv-mienh ziux gorqv-mienh nyei gong dorh mbiauh mbaali caux mbiauh nqaauv daaih uix mborqv jaax nyei maaz caux maaz-siepv yaac fungx taux horpc zuqc fungx nyei dorngx.

²⁹Tin-Hungh ceix bun hlo haic nyei cong-mengh Saa^lo^morn, bun ninh maaih wuonh zaang za'gengh guai, haih hnamv duqv jangv haic, ndongc koiv-hlen nyei saa-ziou jangv.

³⁰Saa^lo^morn nyei cong-mengh gauh guai jiex Dong Bung nyei yietc zungv mienh nyei cong-mengh yaac gauh guai jiex I^yipv Mienh nyei yietc zungv cong-mengh.

³¹Ninh nyei cong-mengh gauh hlang jiex zuangx mienh, liemh Etc^laa Mienh, Etaan, liemh Maa^ho nyei dorn, Hemaan, Kaanko, caux Ndaan^ndaa nyei cong-mengh. Ninh nyei mengh dauh sing buangv weih gormx nyei maanc guoqv.

³²Ninh gorngv buo cin joux waac-beiv yaac benx cuotv yietc cin lengh biaa diuh nzung.

³³Ninh haih gorngv taux miev-ndiangx, yiem Le^mbaa^norn Mbong nyei si^ndaa zongh ndiangx gorngv mingh taux cuotv zingh laatc nyei husopc miev. Ninh haih gorngv taux saeng-kuv, norqc, haih nyorng ndau nyei ga'naaiv caux mbiauz.

³⁴Lungh ndiev nyei hungh diex haiz gorngv taux Saa^lo^morn nyei cong-mengh ziouc yiem norm-norm guoqv paaiv mienh mingh muangx ninh nyei cong-mengh waac.