Read Iu Mien 2 Hungh Douh 13 Bible Online

2 Hungh Douh 13 - Iu Mien bible

2 Hungh Douh 13

¹Aa^hatc^yaa nyei dorn, Yo^aatc, zoux Yu^ndaa nyei hungh nyic ziepc faam hnyangx wuov hnyangx, Ye^hu nyei dorn, Ye^ho^aa^haatc, yiem Saa^maa^lie faaux weic zoux I^saa^laa^en nyei hungh yaac gunv ziepc cietv hnyangx.

²Ziux ZIOUV mangc, Ye^ho^aa^haatc zoux waaic sic, weic zuqc ninh gan Ne^mbatc nyei dorn, Ye^lo^mbo^am, baamz nyei zuiz, dongh ninh bun I^saa^laa^en Mienh baamz nyei zuiz. Ye^ho^aa^haatc ninh yaac maiv guangc.

³Weic naaiv ZIOUV nouz haic I^saa^laa^en Mienh ziouc zorqv ninh mbuo jiu bun yiem Silie nyei hungh, Haa^saa^en, caux ninh nyei dorn, Mben Haa^ndatc, nyei buoz-ndiev lauh nyei.

⁴Ye^ho^aa^haatc njiec qaqv tov ZIOUV. ZIOUV yaac muangx ninh nyei waac, weic zuqc ZIOUV buatc Silie nyei hungh zeix I^saa^laa^en Mienh kouv haic.

⁵ZIOUV bun I^saa^laa^en Mienh maaih dauh mienh njoux ninh mbuo, ninh mbuo ziouc leih ndutv Silie nyei buoz-ndiev. I^saa^laa^en Mienh ziouc yiem ninh mbuo ganh nyei biauv hnangv zinh ndaangc nor.[53]

⁶Mv baac ninh mbuo maiv guangc Ye^lo^mbo^am nyei douh zong baamz nyei zuiz, dongh ninh dorh I^saa^laa^en Mienh baamz nyei zuiz. Ninh mbuo corc baamz jienv zuiz yiem. Yaac maaih Aa^se^laa zienh nyeiz nyei fangx corc yiem wuov Saa^maa^lie.

⁷Ye^ho^aa^haatc zengc njiec nyei baeng kungx maaih hmz ziepc dauh geh maaz nyei baeng caux ziepc norm mborqv jaax nyei maaz-cie, caux yietc waanc dauh yangh jauv nyei baeng hnangv, weic zuqc Silie nyei hungh mietc ninh mbuo, bun ninh mbuo hnangv mborqv mbiauh nyei ziangh hoc nyei ga'naaiv-mbung nor.

⁸Ye^ho^aa^haatc zoux zengc njiec nyei sic, da'faanh ninh zoux nyei yietc zungv, caux ninh nyei qaqv, fiev jienv yiem I^saa^laa^en hungh nyei hungh douh daan.

⁹Ye^ho^aa^haatc ziouc guei seix mi'aqv,[54] yaac zangx jienv yiem Saa^maa^lie. Ninh nyei dorn, Ye^ho^aatc, nzipc jienv ninh zoux hungh.

¹⁰Yo^aatc, zoux Yu^ndaa nyei hungh faah ziepc cietv hnyangx wuov hnyangx, Ye^ho^aa^haatc nyei dorn, Ye^ho^aatc, yiem Saa^maa^lie faaux weic zoux I^saa^laa^en nyei hungh gunv ziepc luoqc hnyangx.

¹¹Ziux ZIOUV mangc, Ye^ho^aatc zoux waaic sic, weic zuqc ninh maiv guangc Ne^mbatc nyei dorn, Ye^lo^mbo^am, baamz nyei yietc zungv zuiz, dongh ninh dorh I^saa^laa^en Mienh baamz nyei zuiz. Ye^ho^aatc corc baamz jienv wuov deix zuiz nyei.

¹²Ye^ho^aatc zoux zengc njiec nyei sic, da'faanh ninh zoux nyei caux zoux cuotv nyei, liemh ninh longc qaqv caux Yu^ndaa nyei hungh, Aa^maa^si^yaa, mborqv nyei jaax, fiev jienv I^saa^laa^en hungh nyei hungh douh daan.

¹³Ye^ho^aatc ziouc guei seix mi'aqv.[55] Ye^lo^mbo^am yaac nzipc jienv ninh faaux weic zoux hungh. Ye^ho^aatc caux I^saa^laa^en nyei hungh zangx jienv yiem Saa^maa^lie.

¹⁴E^li^saa butv dongh oix bun ninh zuqc daic nyei baengc wuov zanc, I^saa^laa^en nyei hungh, Ye^ho^aatc, njiec mingh mangc ninh, yiem ninh nyei nza'hmien nyiemv jienv gorngv, “Yie nyei die aah! Yie nyei die! I^saa^laa^en nyei mborqv jaax nyei maaz-cie caux geh maaz baeng aah!”[56]

¹⁵E^li^saa gorngv mbuox I^saa^laa^en nyei hungh, “Zorqv juang-zinx caux forng daaih maah!” Hungh diex ziouc zorqv daaih.

¹⁶E^li^saa aengx gorngv mbuox I^saa^laa^en nyei hungh, “Nanv jienv juang-zinx.” E^li^saa ziouc longc ninh ganh nyei buoz an jienv hungh diex nyei buoz gu'nguaaic.

¹⁷E^li^saa gorngv, “Koi dong bung nyei fong muonh.” Ninh aengx gorngv, “Bungx forng maah!” E^li^saa gorngv, “Naaiv se ZIOUV hingh jiex nyei forng, hingh jiex Silie Mienh nyei forng. Meih yiem Aafekv zungv oix mietc nzengc Silie Mienh.”

¹⁸E^li^saa aengx gorngv, “Zorqv forng daaih maah!” Hungh diex ziouc zorqv daaih. E^li^saa gorngv, “Longc mborqv ndau maah!” Ninh ziouc mborqv buo nzunc liuz, dingh mi'aqv.

¹⁹Tin-Hungh nyei mienh, E^li^saa, qiex jiez haic ninh ziouc gorngv, “Meih horpc zuqc mborqv ndau biaa juqv nzunc. Hnangv naaic meih duqv mborqv hingh Silie Mienh yaac mietc nzengc ninh mbuo. Mv baac ih zanc meih kungx oix hingh jiex buo nzunc hnangv.”

²⁰E^li^saa guei seix yaac zangx jienv aqv. Hnyangx-hnyangx taux cun-gen hnoi maaih Mo^apc Mienh benx yietc guanh yietc guanh daaih luv wuov norm deic-bung.

²¹Maaih nzunc doix I^saa^laa^en Mienh biopv dauh janx-daic, ninh mbuo liemh zeih buatc guanh zaqc baeng daaih. Ninh mbuo ziouc zorqv janx-daic zoi bieqc E^li^saa nyei zouv gu'nyuoz. Janx-daic yietv kuatv zuqc E^li^saa nyei mbungv, janx-daic ziouc nangh daaih souv jienv.

²²Ye^ho^aa^haatc zoux hungh nyei ziangh hoc, Silie nyei hungh, Haa^saa^en, zanc-zanc hoic I^saa^laa^en Mienh.

²³Mv baac ZIOUV ceix en bun I^saa^laa^en Mienh. Ninh korv-lienh ninh mbuo, yaac huin nzuonx daaih tengx ninh mbuo weic zuqc ninh caux Apc^laa^ham, I^sakc caux Yaakopv laengz jiex ngaengc waac. Taux ih jaax hnoi ninh maiv kangv mietc ninh mbuo yaac maiv zunc ninh mbuo leih nqoi ninh ganh nyei nza'hmien.

²⁴Silie nyei hungh, Haa^saa^en, daic mi'aqv. Ninh nyei dorn, Mben Haa^ndatc nzipc jienv ninh zoux hungh.

²⁵Zinh ndaangc Haa^saa^en caux Ye^ho^aa^haatc mborqv jaax, Haa^saa^en caangv duqv ziex norm mungv mi'aqv. Ye^ho^aa^haatc nyei dorn, Ye^ho^aatc, ziouc caux Haa^saa^en nyei dorn, Mben Haa^ndatc, mborqv jaax aengx caangv duqv wuov deix mungv nzuonx. Ye^ho^aatc mborqv hingh Mben Haa^ndatc buo nzunc ziouc caangv duqv wuov deix mungv nzuonx daaih aqv.