Read Iu Mien 1 Zunh Doic Douh 13 Bible Online

1 Zunh Doic Douh 13 - Iu Mien bible

1 Zunh Doic Douh 13

¹Ndaawitv caux ninh nyei gunv yietc cin dauh nyei baeng-bieiv caux gunv yietc baeqv dauh nyei baeng-bieiv yietc zungv caangh laangh.

²Ninh yaac gorngv mbuox yietc zungv gapv zunv nyei I^saa^laa^en Mienh, “Se gorngv meih mbuo buatc horpc, yaac se gorngv ziux ZIOUV, mbuo nyei Tin-Hungh, nyei za'eix nor, mbuo oix zuqc paaiv mienh mingh gormx I^saa^laa^en Deic-Bung mbuox mbuo zengc njiec nyei gorx-youz caux yiem ninh mbuo nyei mungv caux miev-ciangv nyei Lewi Mienh caux sai mienh, heuc ninh mbuo daaih gapv zunv mbuo naaiv.

³Bun mbuo dorh mbuo nyei Tin-Hungh nyei Laengz Ngaengc Waac Faang nzuonx mbuo naaiv daaih, weic zuqc Saulo zoux hungh nyei ziangh hoc mbuo liemh maiv naaic taux.”

⁴Gapv zunv nyei zuangx mienh dongh hnyouv dingc hnangv naaiv nor zoux, weic zuqc yietc zungv buatc se horpc nyei.

⁵Ndaawitv ziouc bun I^saa^laa^en nyei zuangx mienh gapv zunv yiem I^yipv nyei Si^hox Ndaaih taux Haamatv nyei jauv-kuv wuov weic dorh Tin-Hungh nyei Laengz Ngaengc Waac Faang yiem Ki^li^yaatv Ye^aa^lim nzuonx.

⁶Ndaawitv caux I^saa^laa^en nyei zuangx mienh mingh Yu^ndaa nyei Mbaa^aa^laa Zingh, se Ki^li^yaatv Ye^aa^lim, oix yiem wuov norm dorngx dorh Tin-Hungh nyei Laengz Ngaengc Waac Faang, se gan ZIOUV nyei Mbuox heuc nyei faang, yaac maaih ZIOUV nyei yiem wuov deix i dauh ke^lu^mbim mbu'ndongx[58] nyei weic.

⁷Ninh mbuo yiem Aa^mbi^naa^ndapc nyei biauv dorh Tin-Hungh nyei Laengz Ngaengc Waac Faang cuotv daaih an jienv yietc jaax siang-ngongh cie tor. Utc^saa caux Aa^hi^yo dorh jauv.

⁸Ndaawitv caux I^saa^laa^en nyei zuangx mienh yiem Tin-Hungh nyei nza'hmien longc nzengc qaqv zoux jorm, baaux nzung patv domh daanh baah, fiuv-daanh baah, mborqv nzoz, nqaapv caauh zeiv, biomv nzatc.

⁹Ninh mbuo daaih taux Ki^ndon nyei mborqv mbiauh ciangv, Utc^saa sung buoz baav jienv Laengz Ngaengc Waac Faang, weic zuqc tor cie nyei ngongh kaav deix ndorpc.

¹⁰ZIOUV qiex jiez! haic Utc^saa, ziouc daix ninh aqv, weic zuqc Utc^saa sung buoz kuatv zuqc Laengz Ngaengc Waac Faang. Utc^saa ziouc yiem Tin-Hungh nyei nza'hmien daic.

¹¹Ndaawitv qiex jiez haic ZIOUV weic zuqc ZIOUV ga'qiex baetv cuotv zoux bun Utc^saa. Wuov norm dorngx ziouc heuc Beletv Utc^saa[59] taux ih jaax hnoi.

¹²Wuov hnoi Ndaawitv gamh nziex Tin-Hungh ziouc gorngv, “Yie hnangv haaix nor haih dorh Laengz Ngaengc Waac Faang taux yie nyei dorngx?”

¹³Ndaawitv ziouc maiv dorh Laengz Ngaengc Waac Faang mingh Ndaawitv nyei Zingh. Ninh dorh mingh Gatc Mienh, O^mbetc E^ndom, nyei biauv.

¹⁴Tin-Hungh nyei Laengz Ngaengc Waac Faang yiem O^mbetc E^ndom nyei biauv buo hlaax nyieqc. ZIOUV ceix fuqv bun O^mbetc E^ndom nyei biauv caux ninh maaih nyei yietc zungv.