Read Iu Mien 1 Zunh Doic Douh 14 Bible Online

1 Zunh Doic Douh 14 - Iu Mien bible

1 Zunh Doic Douh 14

¹Tailaqv nyei hungh, Hilaam, paaiv deix douc fienx mienh mingh Ndaawitv wuov, yaac fungx si^ndaa zongh ndiangx caux la'bieiv-zaangc caux ndiangx-zaangc weic zoux hungh dinc bun Ndaawitv.

²Ndaawitv ziouc hiuv duqv ZIOUV liepc ninh zoux hungh gunv I^saa^laa^en Deic-Bung. Weic ninh nyei baeqc fingx I^saa^laa^en Mienh, Tin-Hungh bun mienh za'gengh! taaih Ndaawitv nyei guoqv.

³Yiem Ye^lu^saa^lem, Ndaawitv aengx longc auv camv nyei, aengx duqv dorn duqv sieqv.

⁴Naaiv se Ndaawitv yiem Ye^lu^saa^lem duqv daaih nyei fu'jueiv nyei mbuox. Maaih Sam^mu^waa, So^mbapc, Naatan, Saa^lo^morn,

⁵Ipc^haa, E^li^su^waa, En^pe^letv,

⁶Nogaa, Nefekv, Yaafie,

⁷E^li^saa^maa, Mbe^en^yaa^ndaa caux E^li^fe^letv.

⁸Fi^li^saa^die Mienh muangx haiz mienh liepc Ndaawitv zoux hungh gunv nzengc I^saa^laa^en Deic-Bung, Fi^li^saa^die nyei zuangx mienh ziouc cuotv mingh lorz Ndaawitv. Ndaawitv hiuv duqv ziouc cuotv mingh caux ninh mbuo mborqv jaax.

⁹Fi^li^saa^die Mienh zungv daaih luv Le^faa^im Horngz mi'aqv.

¹⁰Ndaawitv ziouc naaic Tin-Hungh, “Yie oix zuqc mingh mborqv Fi^li^saa^die Mienh fai? Meih oix zorqv ninh mbuo jiu bun yie fai?” ZIOUV dau ninh, “Gunv mingh mborqv aqv. Yie oix zorqv ninh mbuo jiu bun yiem meih nyei buoz-ndiev.”

¹¹Ndaawitv caux ninh nyei mienh ziouc mingh Mbaa^an Be^laa^sim, yiem naaic mborqv hingh Fi^li^saa^die Mienh. Ninh gorngv, “Tin-Hungh longc yie nyei buoz mborqv baaic yie nyei win-wangv hnangv wuom-beqv congx tong mingh nor.” Weic naaiv wuov norm dorngx mienh heuc Mbaa^an Be^laa^sim[60]

¹²Fi^li^saa^die Mienh zorqv ninh mbuo nyei miuc-fangx guangc jienv wuov biaux, Ndaawitv ziouc hatc mienh longc douz buov guangc nzengc.

¹³Fi^li^saa^die Mienh aengx daaih luv nzunc Le^faa^im Horngz.

¹⁴Ndaawitv ziouc aengx naaic nzunc Tin-Hungh. Tin-Hungh aengx dau, “Maiv dungx baengh zaqc faaux. Oix zuqc huing mingh taux ninh mbuo nyei nqa'haav nqaang, yiem yienh zouc lomc doix-ngaanc mborqv ninh mbuo.

¹⁵Meih mbuo yietv haiz baeng-guanh yangh jauv mbui nyei qiex yiem yienh zouc lomc nyei ndiangx gu'nguaaic, gunv cuotv mingh mborqv aqv, weic zuqc naaiv bun cing Tin-Hungh cuotv meih mbuo nyei wuov ndaangc maengx mborqv Fi^li^saa^die Mienh nyei baeng-guanh.”

¹⁶Ndaawitv ei jienv Tin-Hungh paaiv nyei waac zoux. Ninh mbuo ziouc yiem Gi^mbe^on mborqv jienv Fi^li^saa^die Mienh mingh taux Gese.

¹⁷Ndaawitv nyei mengh dauh ziouc sing buangv norm-norm guoqv. ZIOUV yaac bun maanc fingx gamh nziex Ndaawitv.