Read Iu Mien 1 Zunh Doic Douh 15 Bible Online

1 Zunh Doic Douh 15 - Iu Mien bible

1 Zunh Doic Douh 15

¹Ndaawitv yiem Ndaawitv Zingh weic ganh ceix ziangx hungh dinc, ninh ziouc liuc leiz dorngx aengx corng ndopv-liuh an Tin-Hungh nyei Laengz Ngaengc Waac Faang.

²wuov zanc Ndaawitv gorngv, “Cuotv liuz Lewi Mienh, maiv maaih haaix dauh maaih leiz gaeng Tin-Hungh nyei Laengz Ngaengc Waac Faang, weic zuqc ZIOUV ginv ninh mbuo gaeng ZIOUV nyei Laengz Ngaengc Waac Faang yaac yietc liuz fu-sux ninh.”

³Ndaawitv ziouc heuc I^saa^laa^en nyei zuangx mienh gapv zunv yiem Ye^lu^saa^lem weic dorh ZIOUV nyei Laengz Ngaengc Waac Faang daaih an ninh liuc leiz ziangx nyei dorngx.

⁴Ninh heuc Aalon nyei zeiv-fun caux Lewi Mienh daaih gapv zunv.

⁵Yiem Ko^haatv nyei zeiv-fun daaih maaih U^li^en zoux bieiv zeiv yaac maaih yietc baeqv nyic ziepc dauh ninh nyei bungh buonc mienh.

⁶Yiem Me^laa^li nyei zeiv-fun daaih maaih Aa^saax^yaa zoux bieiv zeiv yaac maaih nyic baeqv nyic ziepc dauh ninh nyei bungh buonc mienh.

⁷Yiem Geson Mienh nyei zeiv-fun daaih maaih Yo^en zoux bieiv zeiv yaac maaih yietc baeqv faah ziepc dauh ninh nyei bungh buonc mienh.

⁸Yiem E^li^saa^faan nyei zeiv-fun daaih maaih Se^mai^aa zoux bieiv zeiv yaac maaih nyic baeqv dauh ninh nyei bungh buonc mienh.

⁹Yiem He^mbo^lon nyei zeiv-fun daaih maaih E^li^en zoux bieiv zeiv yaac maaih betv ziepc dauh ninh nyei bungh buonc mienh.

¹⁰Yiem Utc^si^en nyei zeiv-fun daaih maaih Am^mi^naa^ndapc zoux bieiv zeiv yaac maaih yietc baeqv ziepc nyeic dauh ninh nyei bungh buonc mienh.

¹¹Ndaawitv aengx heuc sai mienh, Saax^ndokc caux Aa^mbi^yaa^taa, yaac heuc Lewi Mienh, U^li^en, Aa^saax^yaa, Yo^en, Se^mai^aa, E^li^en caux Am^mi^naa^ndapc.

¹²Ndaawitv gorngv mbuox ninh mbuo, “Meih mbuo se Lewi Mienh nyei bungh buonc bieiv zeiv. Meih mbuo caux meih mbuo juangc fingx nyei gorx-youz oix zuqc saax ganh cing-nzengc, meih mbuo ziouc haih dorh ZIOUV, I^saa^laa^en Mienh nyei Tin-Hungh, nyei Laengz Ngaengc Waac Faang taux yie liuc leiz ziangx nyei dorngx.

¹³Se laaix meih mbuo Lewi Mienh zinh ndaangc wuov nzunc maiv mingh gaeng naaiv norm Laengz Ngaengc Waac Faang daaih, ZIOUV, mbuo nyei Tin-Hungh, cingx daaih qiex jiez mbuo, weic zuqc mbuo maiv naaic ninh oix zuqc hnangv haaix nor ei dingc daaih nyei leiz zoux.”

¹⁴Sai mienh caux Lewi Mienh ziouc saax ganh cing-nzengc weic dorh ZIOUV, I^saa^laa^en Mienh nyei Tin-Hungh, nyei Laengz Ngaengc Waac Faang daaih.

¹⁵Lewi Mienh longc gaeng Laengz Ngaengc Waac Faang nyei ndiangx gaeng Tin-Hungh nyei Laengz Ngaengc Waac Faang ziux ZIOUV longc Mose paaiv nyei waac.

¹⁶Ndaawitv mbuox Lewi Mienh nyei bieiv zeiv paaiv ninh mbuo nyei gorx-youz zoux baaux nzung nyei mienh, longc ziex nyungc zoux nzung nyei jaa-sic, patv domh daanh baah, fiuv-daanh baah, nqaapv caauh zeiv, zoux njien-youh nyei qiex mbui.

¹⁷Lewi Mienh ziouc paaiv Yo^en nyei dorn, Hemaan, caux dauh ninh nyei gorx-youz, Mbe^le^ki^yaa nyei dorn, Aasaapc, caux ninh mbuo nyei gorx-youz Me^laa^li Mienh, Ku^saa^yaa nyei dorn, Etaan.

¹⁸Ninh mbuo aengx ginv deix ninh mbuo nyei gorx-youz weic tengx ninh mbuo.[61] Maaih Se^kaa^li^yaa, Yaa^aa^si^en, Se^mi^laa^motv, Ye^hi^en, Unni, E^li^apc, Mbe^nai^yaa, Maa^aa^se^aa, Matv^ti^ti^yaa, E^li^fe^le^hu, Mikv^ne^yaa, caux zuov gaengh mienh O^mbetc E^ndom caux Ye^hi^en.

¹⁹Baaux nzung nyei mienh, Hemaan, Aasaapc caux Etaan oix zuqc nqaapv dongh siqv caauh zeiv.

²⁰Se^kaa^li^yaa, Aa^si^en, Se^mi^laa^motv, Ye^hi^en, Unni, E^li^apc, Maa^aa^se^aa caux Mbe^nai^yaa oix zuqc patv daanh baah ziux aa^laa^motv.

²¹Matv^ti^ti^yaa, E^li^fe^le^hu, Mikv^ne^yaa, O^mbetc E^ndom, Ye^i^en caux Aa^saa^si^yaa oix zuqc patv daanh baah dorh nzung ziux se^me^nitv.

²²Lewi Mienh nyei bieiv zeiv Ke^naa^ni^yaa, se dorh nzung nyei bieiv, dorh ninh mbuo baaux nzung weic zuqc ninh haih haic.

²³Mbe^le^ki^yaa caux En^kaa^naa zoux zuov gaengh mienh zuov Laengz Ngaengc Waac Faang.

²⁴Qe^mbaa^ni^yaa, Yo^saa^fatv, Ne^tan^en, Aa^maa^saix, Se^kaa^li^yaa, Mbe^nai^yaa, E^li^ ye^se, caux sai mienh oix zuqc yiem Tin-Hungh nyei Laengz Ngaengc Waac Faang nza'hmien biomv nzatc. O^mbetc E^ndom caux Ye^hi^yaa yaac zoux Laengz Ngaengc Waac Faang nyei zuov gaengh mienh.

²⁵Ndaawitv caux I^saa^laa^en Mienh nyei mienh gox caux gunv yietc cin dauh baeng nyei baeng-bieiv ziouc mingh O^mbetc E^ndom nyei biauv, njien-youh nyei dorh ZIOUV nyei Laengz Ngaengc Waac Faang daaih.

²⁶Weic zuqc Tin-Hungh tengx gaeng ZIOUV nyei Laengz Ngaengc Waac Faang nyei Lewi Mienh, ninh mbuo longc siec dauh ngongh gouv caux siec dauh yungh gouv ziec.

²⁷Ndaawitv zuqv jienv la'maah ndie-muonc zoux daaih nyei lui-ndaauv. Gaeng Laengz Ngaengc Waac Faang nyei Lewi Mienh caux baaux nzung mienh nyei bieiv, Ke^naa^ni^yaa, caux baaux nzung nyei yietc zungv mienh, fih hnangv nyei zuqv jienv la'maah ndie-muonc. Ndaawitv yaac zuqv jienv la'maah ndie-muonc nyei efotv.

²⁸I^saa^laa^en nyei zuangx mienh ziouc njien-youh nyei heuc mbui, biomv jorng biomv nzatc, nqaapv caauh zeiv, aengx patv domh daanh baah, fiuv-daanh baah zoux cuotv qiex mbui dorh ZIOUV nyei Laengz Ngaengc Waac Faang daaih.

²⁹Dorh ZIOUV nyei Laengz Ngaengc Waac Faang daaih taux Ndaawitv nyei Zingh nyei ziangh hoc, Saulo nyei sieqv, Mikaan, mangc cuotv fong muonh, buatc Ndaawitv Hungh zoux nauc nyitc cangx heix, ninh ziouc yiem hnyouv mangc piex Ndaawitv.