Read Iu Mien 2 Zunh Doic Douh 10 Bible Online

2 Zunh Doic Douh 10 - Iu Mien bible

2 Zunh Doic Douh 10

¹Le^hox^mbo^am mingh Sekem Zingh weic zuqc I^saa^laa^en nyei zuangx mienh mingh Sekem liepc ninh zoux hungh.

²(Wuov zanc Ne^mbatc nyei dorn, Ye^lo^mbo^am, corc yiem I^yipv Deic-Bung weic zuqc ninh biaux Saa^lo^morn Hungh mingh yiem I^yipv.) Ye^lo^mbo^am yietv haiz ninh mbuo oix liepc Le^hox^mbo^am zoux hungh, ninh yiem I^yipv nzuonx.

³Zuangx mienh ziouc bun mienh mingh heuc Ye^lo^mbo^am daaih. Ye^lo^mbo^am caux I^saa^laa^en nyei zuangx mienh mingh lorz Le^hox^mbo^am. Ninh mbuo gorngv,

⁴“Meih nyei die, Saa^lo^morn, hoic yie mbuo kouv, hnangv gaaz ndiangx-gaaz hniev nor. Ih zanc tov meih zanv njiec yie mbuo zuqc kouv nyei jauv yaac bun yie mbuo gaaz nyei ndiangx-gaaz gauh heng, yie mbuo yietc zungv ziouc fu-sux meih.”

⁵Le^hox^mbo^am gorngv mbuox ninh mbuo, “Zuov buo hnoi meih mbuo aengx daaih lorz yie.” Zuangx mienh ziouc nzuonx aqv.

⁶Le^hox^mbo^am Hungh ziouc caux zinh ndaangc ninh nyei die, Saa^lo^morn, yiem seix zaangc wuov zanc tengx ninh nyei die zoux gong nyei mienh gox mienh caangh laangh. Ninh gorngv, “Meih mbuo tengx yie hnamv gaax, yie oix zuqc hnangv haaix nor dau naaiv deix mienh?”

⁷Ninh mbuo dau, “Se gorngv ih hnoi hungh diex oix naaiv deix baeqc fingx zoux bou yietc liuz fu-sux nor, dau longx ninh mbuo, bun ninh mbuo a'hneiv. Ninh mbuo ziouc yietc liuz zoux meih nyei bou aqv.”

⁸Mv baac Le^hox^mbo^am maiv longc naaiv deix mienh gox mienh caangh laangh nyei waac. Ninh mingh lorz caux ninh hlo daaih wuov baan mienh, dongh ih zanc fu-sux ninh wuov deix mienh lunx mienh.

⁹Le^hox^mbo^am naaic ninh mbuo, “Meih mbuo tengx yie hnamv mangc gaax, yie mbuo oix zuqc hnangv haaix nor dau naaiv deix mienh? Ninh mbuo gorngv, ‘Meih nyei die bun yie mbuo gaaz ndiangx-gaaz hniev nyei, tov meih guangc heng deix.’+”

¹⁰Caux ninh hlo daaih naaiv deix mienh lunx mienh gorngv, “Naaiv deix baeqc fingx gorngv mbuox hungh diex, ‘Meih nyei die bun yie mbuo gaaz ndiangx-gaaz hniev, tov meih bun yie mbuo heng deix.’ Hungh diex oix zuqc mbuox naaiv deix mienh, ‘Yie nyei buoz-ndoqv-dorn gauh hoz yie nyei die nyei jaaiv.

¹¹Yie nyei die bun meih mbuo gaaz ndiangx-gaaz hniev. Yie zungv oix bun meih mbuo gauh hniev. Yie nyei die longc biaav-bin mborqv meih mbuo. Yie oix longc ziepc nyeic ndaangh bin mborqv meih mbuo.’+”

¹²Taux da'faam hnoi, Ye^lo^mbo^am caux zuangx baeqc fingx aengx daaih lorz Le^hox^mbo^am hnangv hungh diex gorngv nor. Ninh gorngv, “Zuov buo hnoi aengx daaih lorz yie.”

¹³Hungh diex longc waac ciouv nyei dau baeqc fingx. Ninh maiv longc wuov deix mienh gox mienh caangh laangh nyei waac.

¹⁴Le^hox^mbo^am Hungh longc mienh lunx mienh caangh laangh nyei za'eix. Ninh gorngv, “Yie nyei die bun meih mbuo gaaz ndiangx-gaaz hniev. Yie zungv oix bun meih mbuo gaaz gauh hniev. Yie nyei die longc biaav-bin mborqv meih mbuo. Yie oix longc ziepc nyeic ndaangh bin mborqv meih mbuo.”

¹⁵Hungh diex ziouc maiv muangx baeqc fingx tov nyei waac. Naaiv deix sic se ei Tin-Hungh nyei za'eix weic bun doix ZIOUV longc Silo Mienh, Aa^hi^yaa, douc bun Ne^mbatc nyei dorn Ye^lo^mbo^am, nyei waac.

¹⁶I^saa^laa^en nyei zuangx mienh buatc hungh diex maiv muangx ninh mbuo, ninh mbuo ziouc gorngv mbuox hungh diex, “Yie mbuo caux Ndaawitv maaih haaix nyungc buonc? Yie mbuo caux Jetc^si nyei dorn maiv maaih yie mbuo nzipc nyei buonc. O I^saa^laa^en Mienh aac, gorqv-mienh nzuonx gorqv-mienh nyei biauv aqv. O Ndaawitv aac, goux meih ganh nyei hungh douh maah!” I^saa^laa^en Mienh ziouc nzuonx biauv mi'aqv.

¹⁷Mv baac Le^hox^mbo^am corc gunv yiem Yu^ndaa Deic nyei zingh nyei I^saa^laa^en Mienh.

¹⁸Le^hox^mbo^am Hungh paaiv Aa^ndo^ni^lam,[50] dongh tengx ninh gunv zuqc aapv zoux gong nyei mienh, mingh I^saa^laa^en Mienh wuov, mv baac I^saa^laa^en Mienh longc la'bieiv zong daic ninh. Le^hox^mbo^am Hungh ziouc siepv-siepv nyei faaux ninh nyei mborqv jaax maaz-cie biaux nzuonx Ye^lu^saa^lem.

¹⁹Hnangv naaic I^saa^laa^en Mienh ngaengc jienv Ndaawitv nyei hungh douh taux ih jaax hnoi.